སང་ཉིན་མཉམ་འབྲེལ་རྒྱལ་ཚོགས་ཀྱིས་སྣེ་འཁྲིད་རྒྱལ་ཁབ་ ༣༠ ལྷག་གི་སྐུ་ཚབ་དང་ལྷན་སེ་རི་ཡའི་གཞུང་དང་གྱེན་ལོག་ཤོག་ཁག་བར་ཞི་གྲོས་ཀྱི་སྔོན་འགྲོའི་གྲོས་མོལ་གནང་རྒྱུ་ཡིན་འདུག
སང་ཉིན་སུད་སིའི་གྲོང་ཁྱེར་མོན་ཌི་རེ་སི་རུ་མཉམ་འབྲེལ་རྒྱལ་ཚོགས་ཀྱི་སྣེ་འཁྲིད་འོག་སེ་རི་ཡའི་ནང་གི་རྙོག་ཟིང་སྐོར་ལ། སེ་རི་ཡའི་གཞུང་དང་གྱེན་ལོག་ཤོག་ཁག་གཉིས་གཙོས། ཨ་རི་དང་ཨུ་རུ་སུ། ཨི་རན། དཀྱིལ་ཤར་ཨེ་ཤ་ཡའི་རྒྱལ་ཁབ་ ༣༠ ལྷག་གི་སྐུ་ཚབ་མཉམ་ཞུགས་ཐོག་གྲོས་མོལ་ཐེངས་གཉིས་པའི་སྔོན་འགྲོའི་གྲོས་མོལ་བྱ་རྒྱུ་ཡིན་པ་དང་། དེའི་རྗེས་གྲོང་ཁྱེར་ཇེ་ནེ་ཝར་ཉིན་ ༢ རིང་མཉམ་འབྲེལ་རྒྱལ་ཚོགས་ཀྱི་དཀྱིལ་ཤར་ཨེ་ཤ་ཡའི་དམིགས་བསལ་སྐུ་ཚབ་སྐུ་ཞབས་བྷར་ཧེ་མེ་ (Lakhdar Brahimi)ལགས་ཀྱིས་སྣེ་འཁྲིད་དེ་དངོས་གཞིའི་གྲོས་མོལ་གནང་འཆར་ཡོད་འདུག
ཟླ་འདིའི་ཚེས་ ༡༩ ཉིན། མཉམ་འབྲེལ་རྒྱལ་ཚོགས་ཀྱི་དྲུང་ཆེ་བྷན་ཁེ་མོན་ (Ban ki-moon)མཆོག་གིས། ཐེངས་འདིའི་གྲོས་མོལ་ཐོག་ཨི་རན་མགྲོན་འབོད་བྱས་པ་གསལ་བསྒྲགས་བྱས་ཡོད་ཀྱང་། སེ་རི་ཡའི་གྱེན་ལོག་ཤོག་ཁག་གི་མགྲིན་ཚབ་པས་བྷེ་བྷེ་སེའི་གསར་འགོད་པར། གལ་སྲིད་མཉམ་འབྲེལ་རྒྱལ་ཚོགས་ཀྱིས་ཨི་རན་མགྲོན་འབོད་བྱས་པ་ཕྱིར་འཐེན་མ་བྱས་ཚེ། གྱེན་ལོག་ཚོགས་པའི་སྐུ་ཚབ་ཐེངས་འདིའི་གྲོས་མོལ་ནང་ཞུགས་རྒྱུ་མིན་སྐོར་བརྗོད་ཡོད་པ་དང་། དེའི་རྗེས་མཉམ་འབྲེལ་རྒྱལ་ཚོགས་ཀྱི་དྲུང་ཆེའི་མགྲིན་ཚབ་པས་སླར་ཡང་ཨི་རན་མགྲོན་འབོད་བྱས་པ་ཕྱིར་འཐེན་བྱས་སྐོར་གསལ་བསྒྲགས་བྱས་ཡོད་འདུག
མཉམ་འབྲེལ་རྒྱལ་ཚོགས་ནང་ཡོད་པའི་ཨི་རན་སྐུ་ཚབ་ཀྱིས། ཐེངས་འདིའི་གྲོས་མོལ་སྟེང་ ༢༠༡༢ ལོའི་ཟླ་ ༦ ཚེས་ ༣༠ ཉིན་ཇི་ནེ་ཝར་མཉམ་འབྲེལ་རྒྱལ་ཚོགས་དང་སྟོབས་ཆེན་རྒྱལ་ཁབ་ཁག་གིས་བཞག་པའི་གྲོས་དོན་ལྟར་འགྲོ་རྒྱུ་ཡིན་ཚེ་ཨི་རན་གྲོས་མོལ་དེར་མཉམ་ཞུགས་བྱེད་རྒྱུ་མིན་སྐོར་བརྗོད་ཡོད་པ་དང་། ཨ་རིའི་རྒྱལ་དོན་ལས་ཁུངས་ཀྱིས། ཨི་རན་གྱིས་ཇི་ནེ་ཝའི་གྲོས་ཆོད་དེར་ངོས་ལེན་མ་བྱས་སྟབས་མགྲོན་འབོད་ཕྱིར་འཐེན་བྱས་པ་ཡིན་སྐོར་དང་། ཨི་རན་གྱིས་སེ་རི་ཡའི་སྲིད་འཛིན་བྷ་ཤཱར་ (Bashar al-Assad)གཞུང་ལ་མཚོན་ཆ་དང་རོགས་དངུལ་སྤྲད་དེ་སེ་རི་ཡའི་མང་ཚོགས་ཐོག་དྲག་གནོན་ཆེན་པོ་བྱས་ཡོད་སྐོར་བརྗོད་འདུག
ཇི་ནེ་ཝ་གྲོས་ཆོད་དང་པོའི་དགོངས་དོན་དག་ནི། སེ་རི་ཡའི་ནང་བར་བརྒལ་སྲིད་གཞུང་གསར་འཛུགས་བྱས་ཏེ་རྒྱལ་ཡོངས་གྲོས་མོལ་མགོ་འཛུགས་བྱེད་དགོས་པ་དང་། རྩ་ཁྲིམས་བསྐྱར་ཞིབ་དང་སྦྲགས་ཁྲིམས་མཐུན་ལམ་ལུགས་འོག་རྒྱལ་ཡོངས་འོས་བསྡུ་བྱ་རྒྱུ་སོགས་བཀོད་ཡོད་ཀྱང་། སེ་རི་ཡའི་ད་ལྟའི་གཞུང་ལ་རྒྱབ་སྐྱོར་བྱེད་མཁན་ཨུ་རུ་སུ་དང་རྒྱ་ནག་སོགས་ཀྱིས་གྲོས་དོན་དེར་ངོས་ལེན་བྱེད་ཀྱི་མེད།
ཐེངས་འདིར་སེ་རི་ཡའི་གྱེན་ལོག་ཕྱོགས་ཁག་གིས་ཨི་རན་གྲོས་མོལ་གནང་ཞུགས་རྒྱུར་མོས་མཐུན་མི་བྱེད་དོན་ནི། དེ་སྔོན་ཨི་རན་གཞུང་གིས་ད་ལྟའི་སེ་རི་ཡའི་སྲིད་འཛིན་བྷ་ཤྰར་རྩ་དགོངས་ཞུས་ཏེ་བར་བརྒལ་གཞུང་འཛུགས་རྒྱུར་མོས་མཐུན་མེད་པ་མ་ཟད། གྱེན་ལོག་པར་ཁ་གཏད་གཅོག་ཆེད་སྲིད་གཞུང་ལ་མཚོན་ཆ་དང་དམག་མིའི་རོགས་རམ་ཤུགས་ཆེན་པོ་བྱས་ཡོད་འདུག
༢༠༡༠ ལོ་ནས་བཟུང་དཀྱིལ་ཤར་ཨེ་ཤ་ཡའི་རྒྱལ་ཁབ་ཁག་ནང་ཁ་ཆེའི་དཔྱིད་དུས་གསར་བརྗེ་བྱུང་བ་དང་སྦྲགས། ༢༠༡༡ ལོའི་ཟླ་ ༣ ཚེས་ ༡༥ ཉིན། སེ་རི་ཡའི་མང་ཚོགས་ཀྱིས་སྲིད་འཛིན་བྷ་ཤཱར་གྱིས་རྩ་དགོངས་ཞུ་དགོས་པའི་ངོ་རྒོལ་བྱས་སྟབས། སེ་རི་ཡའི་གཞུང་གིས་མང་ཚོགས་མང་པོ་དམར་གསོད་བཙོན་འཇུག་བྱས་ཤིང་། མང་ཚོགས་ཀྱིས་སེ་རི་ཡའི་རང་དབང་དམག་དཔུང་ཞེས་པ་གསར་འཛུགས་བྱས་ཏེ་སྲིད་གཞུང་གི་དམག་དཔུང་ལ་ཁ་གཏད་བཅག་ཡོད། ད་བར་སེ་རི་ཡའི་ཟིང་འཁྲུག་ཁྲོད་མང་ཚོགས་ས་ཡ་ ༡ ལྷག་རྐྱེན་འདས་དང་། ས་ཡ་ ༩ ལྷག་ཁྱིམ་མཚེས་རྒྱལ་ཁབ་ཁག་ཏུ་སྐྱབས་བཅོལ་དུ་ཕྱིན་ཡོད་འདུག ད་ལྟའི་སྲིད་འཛིན་བྷ་ཤཱར་ཁྱིམ་རྒྱུད་ཀྱིས་ ༡༩༧༡ ལོ་ནས་ད་བར་གྱི་ལོ་ངོ་ ༤༢ ལྷག་རིང་སི་རེ་ཡའི་སྲིད་དབང་བཟུང་ཡོད་འདུག
