ངྷ་སའི་བོད་དོན་ལས་འགུལ་བསྟི་གནས་ཁང་གིས་ངོ་སྤྲོད་གནང་བ་ལྟར་ན། དེང་སྐབས་རྒྱལ་སྤྱིའི་ཐོག་དར་ཁྱབ་ཆེན་པོ་འགྲོ་བཞིན་པའི་སྐད་འཕྲིན་དང་ལའེན་གཉིས་རྒྱ་ནག་གི་ལག་ཆ་ཞིག་ཆགས་ཡོད་ཚུལ་དང་། ཁཱ་ཁོ་དང་ཝོསི་ཨབ་གཉིས་ཅུང་བདེ་འཇགས་ཡིན་སྐོར་ངོ་སྤྲོད་བྱས་སོང་།
ཁ་སང་ཉིན་རྒྱབ་ཆུ་ཚོད་ ༣།༡༥ ཐོག་ངྷ་རམ་ས་ལའི་བོད་དོན་ལས་འགུལ་བསྟི་གནས་ཁང་གི་འགན་འཛིན་བཀྲས་མཐོང་ལྷ་སྒྲོན་ལགས་དང་། བསྟི་གནས་ཁང་གི་གློག་ཀླད་ཆེད་མཁས་པ་བློ་བཟང་རྒྱ་མཚོ་སྲིད་ཐར་ལགས་རྣམ་གཉིས་ཀྱིས་༼སྲུང་འཁོར༽ཞེས་པའི་ཚགས་པར་ཞིག་འགྲེམས་སྤེལ་དང་འབྲེལ། དེང་སྐབས་བོད་ཕྱི་ནང་གཉིས་སུ་དར་ཁྱབ་ཆེན་པོ་འགྲོ་བཞིན་པའི་སྐད་འཕྲིན་སོགས་སྤྱི་ཚོགས་དྲ་འབྲེལ་རིགས་ལ་དོགས་ཟོན་གཟབ་ནན་བྱ་དགོས་པའི་སྐོར་ལ་གསར་འགོད་ལྷན་ཚོགས་ཤིག་བསྐྱངས་སོང་།
བསྟི་གནས་ཁང་གི་འགན་འཛིན་བཀྲས་མཐོང་ལྷ་སྒྲོན་ལགས་ཀྱིས་ངོ་སྤྲོད་གནང་བ་ལྟར་ན། གསར་དུ་ཐོན་པའི་བརྡ་འཕྲིན་ཚན་རྩལ་གྱི་མཉེན་ཆས་སྐད་འཕྲིན་དེ་རྒྱ་ནག་དང་རྒྱ་གར་གཙོས་རྒྱལ་ཁབ་མང་པོའི་ནང་ལོ་ན་ ༡༦ ཡན་གྱི་ན་གཞོན་དང་། ལྷག་དོན་བོད་ཕྱི་ནང་གཉིས་སུ་བཀོལ་སྤྱོད་ཤུགས་ཆེན་བྱེད་ཀྱི་ཡོད་སྟབས། ང་ཚོས་སྐད་འཕྲིན་འདི་སུས་བཟོས་མེད་དང་སུས་སྟངས་འཛིན་བྱེད་ཀྱི་ཡོད་མེད་ཧ་གོ་བ་བྱས་ཏེ་རང་སྲུང་བདེ་འཇགས་ཐོག་གཟབ་ནན་བྱེད་རྒྱུ་གལ་ཆེན་ཡིན་སྐོར་དང་། དེ་ཡང་། ཁོ་མོས་ཉེ་ཆར་ངྷ་རམ་ས་ལར་སྡོད་མཁན་ཞིག་དང་བོད་ནང་གི་ནང་མི་ཚོ་དང་གླེང་མོལ་བྱེད་སའི་སྐད་འཕྲིན་གྱི་ཚོགས་པའི་ནང་དུ་རྒྱ་མི་ཞིག་ལྐོག་འཛུལ་བྱས་ཏེ། རྒྱ་སྐད་ཐོག་ “དེ་ལ་དུས་ཚོད་ཅི་ཙམ་རེད། ང་ལ་ད་ལྟ། ཏོག་ཙམ་རྗེས་ནས་ཆུ་ཚོད་ 12.20 །12.50 དང་། ད་དུང་1.30 བཅས་ཡོད། དུས་བགོས་ལྟར་ན་འདི་གསུམ་ཡོད། མ་གཏོགས་ད་ལྟ་རང་ལས་ཀ་མེད།” ཅེས་པ་ཞིག་བསྐུར་ཡོད་སྟབས། ནང་མི་སྤུན་མཆེད་ཚོས་ཞིབ་འཇུག་བྱས་པ་བརྒྱུད་སྐད་འཕྲིན་དེ་རྒྱ་གར་ནང་ཡོད་པའི་སྤུན་མཆེད་དེས་བཏང་བ་མིན་པ་ཤེས་རྟོགས་བྱུང་ཡོད་ཅིང་། རྒྱ་ནག་གཞུང་གིས་བོད་མི་སྒེར་གྱི་སྐད་འཕྲིན་ནང་སིམ་འཛུལ་གྱིས་སྐད་ཆ་དང་གནས་ཚུལ། ཆབ་སྲིད་ལས་འགུལ་བཅས་ཀྱི་སྐོར་ལ་ལྐོག་བལྟ་དང་ལྐོག་ཉན་བྱེད་ཀྱི་ཡོད་པ་གསལ་པོ་ཡིན་སྟབས། སོ་སོའི་ལག་ཁྱེར་ཁ་པར་དང་གློག་ཀླད་སོགས་ནི་སོ་སོའི་དམིགས་ཡུལ་དང་ཁེ་ཕན་སྒྲུབ་བྱེད་ཅིག་ཆགས་དགོས་པ་ལས་སོ་སོ་གཡོ་ཚོང་བྱེད་པའི་ཅ་དངོས་ཤིག་ཏུ་མི་འགྱུར་ཐབས་ལ་འབད་བརྩོན་བྱེད་དགོས་སྐོར་བརྗོད་སོང་།
དེ་རྗེས་བསྟི་གནས་ཁང་གི་གློག་ཀླད་ཆེད་མཁས་པ་བློ་བཟང་རྒྱ་མཚོ་ལགས་ཀྱིས། ཁོང་ཚོའི་བསྟི་གནས་ཁང་གི་ངོས་ནས་ཁེ་ན་ཌའི་གཙུག་ལག་སློབ་ཆེན་ཞིག་གི་ཆབ་འབངས་རྟོག་ཞིབ་སྡེ་ཚན་( Citizen Lab) དང་མཉམ་འབྲེལ་གྱིས་འདས་པའི་ཟླ་ཤས་རིང་ཞིབ་འཇུག་བྱས་ཏེ། ༢༠༡༣ ལོའི་ཟླ་ ༡༡ ནང་འདོན་སྤེལ་བྱས་པའི་སྙན་ཐོ་ (Asia chat; analyzing information controls and privacy in Asian messaging Application) ཞེས་པའི་ནང་། བོད་མི་ཚོས་བཀོལ་སྤྱོད་ཤུགས་ཆེན་བྱེད་བཞིན་པའི་སྐད་འཕྲིན་ ( Wechat)དང་། ལའེན་ ( Line)ཁཱ་ཁོ།( kakao) ཝོསི་ཨབ་ ( whatsup)བཞི་ཨེ་ཤ་ཡའི་ནང་བཀོལ་སྤྱོད་བྱེད་མཁན་ས་ཡ་ ༡༠༠ ལྷག་ཡོད་པ་དང་། སྐད་འཕྲིན་དེ་རྒྱ་ནག་གིས་བཟོས་པ་དང་། ལའེན་ཉི་ཧོང་ནས་བཟོས་པ། ཀཱ་ཁཱོ་ཀོ་རི་ཡཱ་ནས་བཟོས་པ་བཅས་གསལ་བོ་བྱུང་ཡོད་ཀྱང་། ལའེན་ཞེས་པ་དེ་རྒྱལ་སྤྱིའི་ནང་ལ་བེད་སྤྱོད་གཏོང་སྐབས་འགོག་རྐྱེན་གང་ཡང་མེད་ཀྱང་། རྒྱ་ནག་དང་བོད་ནང་བེད་སྤྱོད་གཏོང་སྐབས་མཉེན་ཆས་དེ་མ་འདྲ་བ་ཞིག་ཆགས་ཀྱི་ཡོད་པ་དང་། ལྷག་པར་དུ་རང་ལུས་མེར་བསྲེགས་དང་རྩ་རླུང་སྒོམ་སྒྲུབ་སོགས་འཚོལ་ཞིབ་བྱེད་ཐུབ་ཀྱི་མེད་སྟབས། མཉེན་ཆས་དེ་ཉི་ཧོང་ནས་བཟོས་པ་ཞིག་ཡིན་ཡང་མཉེན་ཆས་དེ་རྒྱལ་ཁབ་གཞན་གང་དག་དང་ཚོང་འབྲེལ་ཡོད་མེད་ལ་རྟོག་ཞིབ་བྱེད་རྒྱུ་གལ་ཆེན་པོ་ཡིན་པ་དང་། ད་བར་རྒྱ་གཞུང་གིས་ཀོ་རི་ཡ་ནས་བཟོས་པའི་མཉེན་ཆས་ཀཱ་ཁཱོ་ལ་ཐེ་བྱུས་བྱེད་ཐུབ་མེད་སྐོར་སོགས་བརྗོད་སོང་།
མཇུག་ཏུ་ཁོང་གིས་ང་ཚོས་ད་ལྟ་སྐད་འཕྲིན་གྱི་འགྲོ་སྟངས་དང་སྒྲུབ་ཚུལ་སྐོར་ལ་ཞིབ་འཇུག་བྱེད་བཞིན་ཡོད་སྟབས་བསྟི་གནས་ཁང་གི་ངོས་ནས་རིམ་པས་སྐད་འཕྲིན་སྐོར་ལ་གནས་ཚུལ་གསར་པ་དེ་འདྲ་རག་པ་ཡིན་ན་གསར་འགོད་པ་ཚོར་འབྲེལ་བ་དང་མང་ཚོགས་ཚོར་གང་ཐུབ་གོ་རྟོགས་སྤེལ་རྒྱུ་ཡིན་སྐོར་བརྗོད་སོང་།
ངོ་མ་ཡིད་སྐྱོ་བྱེད་རེད། ད་ལྟ་བར་དུ་ཆེད་ལས་མཁས་པ་དང་ཁྱེད་རྣམ་པ་ཚོ་གཉིད་ནས་བསྡད་པ་ཡིན་ས་རེད། ད་སུན་གི་འདུག
བཀྲས་མཐོང་ལྷ་སྒྲོན་ལགས་ཁྱེད་རང་ཨ་རི་ཡང་ན་ཀེ་ནཱ་ཌ་ལ་ཉིད་ཤོག་སོང་ངམ།