ཟླ་རྗེས་མའི་ནང་༧གོང་ས་མཆོག་རྒྱ་གར་བྱང་ཤར་ཨ་སམ་དང་མེ་གྷ་ལཱ་ཡ་བཅས་སུ་ཆིབས་བསྒྱུར་བསྐྱངས་ཏེ། བོད་ཀྱི་སྒྱུ་རྩལ་དང་རིག་གཞུང་དུས་སྟོན་དབུ་འབྱེད་གནང་རྒྱུ་ཡིན་ཞིང་། དེར་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་དང་ཁྲི་ཟུར་ཟམ་གདོང་རིན་པོ་ཆེ་བཅས་ཀྱང་མཉམ་ཞུགས་གནང་འཆར་ཡོད་འདུག
འབྱུང་འགྱུར་ཕྱི་ཟླ་ ༢ པའི་ཚེས་ ༡ ནས་ ༥ བར་༧གོང་ས་མཆོག་རྒྱ་གར་བྱང་ཤར་ཨ་སམ་དང་མེ་གྷ་ལཱ་ཡ་བཅས་མངའ་སྡེ་ཁག་གཉིས་ནང་ཆིབས་བསྒྱུར་བསྐྱང་རྒྱུ་ཡིན་ཞིང་། ཚེས་ ༡ ཉིན་རྒྱལ་ས་གྷོ་ཝ་ཊིའི་ར་བིན་ཌ་བྷ་ཝན་ཚོགས་ཁང་དུ་ཆོས་ལུགས་རིས་མེད་ལྷན་ཚོགས་སྟེང་བཀའ་སློབ་གནང་རྒྱུ་ཡིན་པ་དང་། ཚེས་ ༢ ཉིན་གྱི་སྔ་དྲོ་རྒྱལ་ས་གྷོ་ཝ་ཊའི་ནེ་རུ་རྩེད་ཐང་དུ། ཨེལ་བྷེ་ཨེ་སི་དཔེ་བསྐྲུན་ཁང་གསར་འཛུགས་གནང་མཁན་གྱི་རྗེས་དྲན་ཚོགས་འདུའི་ཐོག་ཆིབས་བསྒྱུར་གྱིས་གསུང་བཤད་གནང་རྒྱུ་ཡིན་འདུག
ཉིན་དེའི་ཉིན་རྒྱབ་རྒྱལ་སའི་ཚོགས་ཁང་ (Shrimant Shankardev Kalashetra) ཞེས་པར། བོད་ཀྱི་སྒྱུ་རྩལ་དང་རིག་གཞུང་དུས་སྟོན་དབུ་འབྱེད་གནང་རྒྱུ་ཡིན་པ་དང་། དུས་སྟོན་མཛད་སྒོའི་སྟེང་ཨ་རུ་ན་ཅལ་མངའ་སྡེའི་ཡུལ་སྐོར་སྤྲོ་འཆམ་བློན་ཆེན་དང་དུས་སྟོན་གོ་སྒྲིག་ཚོགས་ཆུང་གི་ཚོགས་གཙོ་པདྨ་མཁའ་འགྲོ་མཆོག་གིས་གཙོས་པའི་ཨ་རུ་ན་ཅལ་དང་ཨ་སམ་མངའ་སྡེའི་དཔོན་རིགས་ཁག་མཉམ་ཞུགས་གནང་རྒྱུ་ཡིན་པ་དང་། མཇུག་བསྡོམས་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་མཉམ་ཞུགས་ཀྱིས་གསུང་བཤད་གནང་རྒྱུ། གཞན། བརྗོད་གཞི་སྣ་ཚོགས་ཐོག་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་གིས་དབུས་པའི་མཁས་དབང་གྲགས་ཅན་ཁག་ཅིག་གི་གསུང་བཤད་དང་བགྲོ་གླེང་བཅས་གོ་སྒྲིག་གནང་འཆར་ཡོད་འདུག
དུས་སྟོན་དེ་ཚེས་ ༢ ནས་ ༦ བར་ཉིན་ལྔའི་རིང་ཚོགས་འཆར་ཡོད་ཅིང་། དེར་བོད་ཀྱི་ཟློས་གར་ཚོགས་པའི་འཁྲབ་སྟོན་པས་གཞས་སྣ་འཁྲབ་སྟོན་དང་། ཨ་སམ་དང་ཨ་རུ་ན་ཅལ་ཡུལ་མིའི་འཁྲབ་སྟོན་ཚོགས་པ་ཁག་དང་། རྒྱ་གར་གྱི་གཞས་པ་གྲགས་ཅན་ཁག་བཅས་ཀྱིས་གནང་དེང་རོལ་དབྱངས་གཟིགས་འབུལ་གནང་འཆར་ཡོད་འདུག དུས་སྟོན་དངོས་གཞིར་བོད་ཟས་དང་བོད་ཀྱི་ལྷ་བྲིས་སྒྱུ་རྩལ། དཀྱིལ་འཁོར་དང་མར་མཚོན་གྱི་མཆོད་པ་བཞེངས་སྟངས། བོད་ཀྱི་ཤིང་བརྐོ་སོགས་བོད་ཀྱི་སྲོལ་རྒྱུན་སྒྱུ་རྩལ་ཁག་གཟིགས་འབུལ་དང་། བོད་མིས་བཟོས་པའི་ལག་ཤེས་ཐོན་སྐྱེད་རིགས་ཚོང་འགྲེམས། བོད་དང་འབྲེལ་བའི་པར་རྙིང་རིགས་འགྲེམས་སྟོན། བོད་དང་འབྲེལ་བའི་ཆེད་བསྒྲིགས་གློག་བརྙན་གཟིགས་འབུལ། བོད་སྐོར་གྱི་དཔེ་དེབ་འགྲེམས་སྟོན་བཅས་གནང་རྒྱུ་ཡིན་འདུག
ཐེངས་འདིའི་དུས་སྟོན་གོ་སྒྲིག་གནང་གཙོ་གྲས་དག་ནི། ཨ་རུ་ན་ཅལ་མངའ་སྡེའི་གཞུང་ཡུལ་སྐོར་སྤྲོ་འཆམ་བློན་ཆེན་པདྨ་མཁའ་འགྲོ་མཆོག་དང་། རྟ་དབང་དགོན་པའི་མཁན་རིན་པོ་ཆེ་གུ་རུ་སྤྲུལ་སྐུ། བོད་མི་མང་སྤྱི་འཐུས་ཀརྨ་ཡེ་ཤེས་དང་དབྱངས་ཅན་སྒྲོལ་དཀར་ལགས། ཚེ་བརྟན་ཆོས་འཕེལ་སྐྱིད། རན་ཇན་ཨེན་གྷ་ཌི་ (Ranjat Ingati) ། གྷོ་ཧ་ཊི་རྒྱལ་སའི་གཙོ་འགན་འབྲེལ་མཐུད་པ་ (Guwahati Metro Coordinator) བཅས་ཡིན་འདུག་ལ། དུས་སྟོན་འདིའི་དམིགས་ཡུལ་གཙོ་བོ་ནི། ཡུལ་མི་དང་ཧི་མ་ལ་ཡའི་རི་རྒྱུད་ཀྱི་སྤུན་ཟླ་རྣམས་ཀྱིས་བོད་ཀྱི་ཁྱད་འཕགས་རིག་གཞུང་དང་སྒྱུ་རྩལ་ལ་དངོས་སུ་གསན་གཟིགས་གནང་རྒྱུའི་གོ་སྐབས་བསྐྲུན་ཏེ། བོད་ཀྱི་རིག་གཞུང་གི་མཛེས་ཉམས་དང་གཟི་བརྗིད་ཀྱི་གོ་རྟོགས་སྤེལ་རྒྱུ་དང་། རྒྱ་གར་བྱང་ཤར་ཁུལ་གྱི་མི་རིགས་ཁག་དང་བོད་མིའི་བར་ཕན་ཚུན་མཛའ་མཐུན་དམ་ཟབ་དང་། ཆོས་དང་རིག་གཞུང་གི་གོ་རྟོགས་སྤེལ་རེས་བྱ་ཆེད་བཅས་ཡིན་འདུག
གཞན། ཚེས་ ༣ ཉིན་༧གོང་ས་མཆོག་རྒྱ་གར་བྱང་ཤར་ཤེས་ལོངས་དུ་ཆིབས་བསྒྱུར་བསྐྱངས་ཏེ། མར་ཊི་ལིའུ་ཐིར་ཡེ་ཤུའི་གཙུག་ལག་སློབ་ཆེན་ (Martin Luther Christian University) གྱི་ཐེངས་དྲུག་པའི་བསླབ་པ་མཐར་སོན་མཛད་སྒོར་ཆིབས་བསྒྱུར་གྱིས་བཀའ་སློབ་གནང་རྒྱུ་ཡིན་པ་དང་། ཚེས་ ༤ ཉིན་ཤེས་ལོངས་ས་གནས་བོད་རིགས་མི་མང་ལ་ཆོས་འབྲེལ། ཚེས་ ༥ ཉིན་ཤེས་ལོངས་མངའ་སྡེའི་དཔེ་མཛོད་ཁང་ (Central State library) གི་གདན་ཞུ་ལྟར་ཆོས་ལུགས་རིས་མེད་མཛད་སྒོའི་ཐོག་མཉམ་ཞུགས་བཅས་གནང་རྒྱུ་བཅས་ཡིན་འདུག
