དེ་རིང་སྔ་དྲོར་གྲྭ་བག་གྲོ་ལགས་ཀྱིས་༧པན་ཆེན་སྐུ་ཕྲེང་བཅུ་པ་མཆོག་རྒྱ་གཞུང་གིས་བཀྲོངས་ཏེ་ལོ་ཧྲིལ་པོ་ ༢༥ འཁོར་བར་རྗེས་དྲན་དང་བསྟུན་ཏེ། པཎ་ཆེན་རིན་པོ་ཆེ་མཆོག་གི་སྐུ་ཚེ་ཧྲིལ་བོ་བོད་མི་རིགས་དང་རིག་གཞུང་ཐོག་ཕུལ་ཡོད་པ་ལྟར་བཙན་བྱོལ་དུ་ཡོད་པའི་བླ་སྤྲུལ་དགེ་བཤེས་ཚོས་ཀྱང་བོད་དོན་ཐོག་ཕྱག་ལས་གནང་རོགས་ཟེར།
དེ་རིང་སྔ་དྲོའི་ཆུ་ཚོད་ ༩།༣༠ ཐོག ངྷ་སའི་ལྷ་སྤྱི་ཚོགས་ཞབས་ཞུའི་ཚོགས་ཁང་དུ། ཆབ་སྲིད་བཙོན་ཟུར་དགའ་ལྡན་གྲྭ་བག་གྲོ་ལགས་ཀྱིས། ༧ཀུན་གཟིགས་པཎ་ཆེན་སྐུ་ཕྲེང་བཅུ་པ་མཆོག་རྒྱ་གཞུང་གིས་བཀྲོངས་ཏེ་བགྲང་བྱ་ ༢༥ འཁོར་བར་མྱ་ངན་རྗེས་དྲན་གྱི་གསར་འགོད་གསལ་བསྒྲགས་ཤིག་བསྐྱངས་སོང་། སྐབས་དེར་གྲྭ་བག་གྲོ་ལགས་ཀྱིས་ངོ་སྤྲོད་གནང་བར། ༧ཀུན་གཟིགས་པཎ་ཆེན་རིན་པོ་ཆེ་མཆོག་དགོངས་པ་རྫོགས་སྟངས་དེ་ཧ་ཅང་རྙོག་འཛིང་ཅན་ཞིག་ཡིན་པ་དང་། ཁོང་ལ་སྙུང་གཞི་གང་ཡང་མེད་པར་སྐུ་གྲོངས་ཤིང་། ལྷག་པར་དུ་རྒྱ་ནག་པེ་ཅིན་དུ་མ་གྲོངས་པར་གདན་ས་བཀྲིས་ལྷུན་པོར་གྲོངས་པ་དེ་ནི་རྒྱ་གཞུང་གིས་ནག་ཉེས་བོད་ཐོག་གཡོག་ཐབས་ཤིག་ཡིན་སྟབས། བོད་མི་དང་བོད་དོན་རྒྱབ་སྐྱོར་བ་ཚོས་༧པཎ་ཆེན་རིན་པོ་ཆེ་སྐུ་གཤེགས་རྐྱེན་སྐོར་ལ་ཞིབ་འཇུག་མཐིལ་ཕྱིན་པ་ཞིག་ངེས་པར་དུ་གནང་གལ་ཆེ་བ། ཁོ་རང་གི་ངོས་འཛིན་ལྟར་ན། ༧པཎ་ཆེན་རིན་པོ་ཆེ་དགོངས་པ་རྫོགས་པའི་རྒྱུ་མཚན་གཙོ་བོ་གཅིག་ནི། ཡིག་འབྲུ་ཁྲི་བདུན་གྱི་སྙན་ཞུར་ཐུག་ཡོད་པ་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་གཙོས་པའི་བཀའ་བློན་རྣམ་པ་དང་། གཞུང་ཞབས་ལས་བྱེད་ཆེ་ཕྲ། དེ་བཞིན་བོད་དོན་ཆེད་ཕྱག་ལས་གནང་མཁན་ཚོགས་པ་དང་མི་སྒེར་ཡོངས་ཀྱིས་ཡིག་ཆ་དེར་ཞིབ་འཇུག་དང་སློབ་སྦྱོང་ཡག་པོ་གནང་དགོས་སྐོར་སོགས་བརྗོད་སོང་།
༧པཎ་ཆེན་རིན་པོ་ཆེ་དགོངས་པ་རྫོགས་པའི་རྒྱུ་རྐྱེན་སྐོར་ལ་ཁོང་གིས། “ཀུན་གཟིགས་༧པཎ་ཆེན་རིན་པོ་ཆེ་མཆོག་གིས་ལྗགས་རྩོམ་གནང་བའི་ཡིག་འབྲུ་ཁྲི་བདུན་གྱི་སྙན་ཞུའི་ནང་། རྒྱ་ནག་གཞུང་གིས་བོད་ཐོག་འཛིན་པའི་སྲིད་ཇུས་ཁག་ལ་འཇིགས་ཞུམ་བྲལ་བའི་སྐྱོན་བརྗོད་གནང་ཡོད་སྟབས། རྒྱ་དམར་གྱི་དཔོན་ངན་རུ་ཚོགས་བཟོད་སྒོམ་བྲལ་ཏེ་ ༡༩༨༧ ཟླ་ ༡༡ ནང་ཏིན་ཞའོ་ཕིན་གྱི་མགྲོན་བསུ་ཁང་དུ་ཏིན་ཞའོ་ཕིན་དང་ཁྲིན་ཡོན། ལིས་ཞན་ཉིན། པའོ་ཡི་པོ། སུང་ཕེན་བཅས་ཀྱི་༼ པཎ་ཆེན་བཀྲོང་རྒྱུའི་ཐག་གཅོད་ཚོགས་འདུ། ༽ཟེར་བ་ཞིག་སྐོང་ཚོགས་བྱས་ཏེ་༼ པཎ་ཆེན་དམིགས་བསལ་ཐག་གཅོད།༽ཟེར་བ་ཞིག་འཆར་འགོད་བྱས་ཤིང་། ལས་གཞི་དེ་དངོས་སུ་ལག་བསྟར་བྱེད་མཁན་ཝུན་ཅའོ་པའོ་དང་ཧུའུ་ཅིན་ཐའོ་གཉིས་བསྐོ་བཞག་བྱས་པ་རེད། ཁོ་གཉིས་ཀྱི་གོ་སྒྲིག་འོག་ ༡༩༨༨ ལོར་ཝུན་ཅའོ་པའོ་ཡིས་ངོ་སྤྲོད་བྱས་པའི་རྒྱ་དམར་མཐོ་རིམ་དཔོན་རིགས་ཀྱི་སྨན་པ་ཝན་མིན་ཆིན་དང་། ཧུའུ་ཅིན་ཐའོ་ཡིས་ངོ་སྤྲོད་བྱས་པའི་སྨན་པ་ཧུའུ་ཁྲོང་ཧྭ་སོགས་ཀྱིས་པེ་ཅིན་དུ་ཚོགས་འདུ་ཚོགས་ཏེ། སྨན་པ་ཝང་མིན་ཆིན་གྱིས་གྲོས་གཞི་ལྟར་༧པཎ་ཆེན་རིན་པོ་ཆེ་མཆོག་ལ་དུག་བཀོལ་ནས་བཀྲོང་རྒྱུའི་ཐབས་ཇུས་བརྩམས་ཤིང་། ༡༩༨༩ ལོའི་ཟླ་ ༢ ཚེས་ ༢༧ མཚན་མོར་ཧུའུ་ཅིན་ཐའོ་དང་ཝུན་ཅཱ་པའོ་ཡིས་གཙོ་སྐྱོང་འོག་མུན་ཧོང་ཝེ་དང་ཧུའུ་ཁྲོང་ཧྭ་ཡིས་ལག་བསྟར་བརྒྱུད་ཀྲུའུ་མེན་ཌིན་ཐད་ཀར་པཎ་ཆེན་རིན་པོ་ཆེ་མཆོག་གི་གམ་དུ་བཏང་སྟེ་ ༢༨ ཉིན་གྱི་ཞོགས་པར་འཆར་གཞི་ལྟར་བཀྲ་ལྷུན་དགོན་དུ་སྐུ་སྲོག་དངོས་སུ་བཀྲོངས་ཡོད་པ་རེད། སྐབས་དེར་ཞིང་གཤེགས་པ་མཆོག་གི་ཚེམས་དང་ཞལ་མདངས་ནག་པོ་ཆགས་ཡོད་པ་དེས་ཁོང་ལ་དུག་ཕོག་སྟེ་སྐུ་གྲོངས་པ་བདེན་དཔང་བྱས་ཡོད” ཅེས་དང་། ཁོང་གིས་མུ་མཐུད་དུ། “ སྤྱིར་རྒྱ་ནག་གི་དཔོན་རིགས་ཚོ་འདས་གྲོངས་སྐབས་མེ་ཏོག་ཕུལ་ཏེ་མྱ་ངན་མཆོད་འབུལ་གྱི་ལམ་སྲོལ་ཡོད་ཀྱང་། སྐབས་དེར་བོད་རིགས་དད་ལྡན་མང་ཚོགས་སྐུ་གདུང་ལ་མཇལ་ཁར་བཏང་མེད་པ་མ་ཟད། དེ་མ་ཐག་བྲེལ་བྲེལ་ཚུབ་ཚུབ་ཀྱིས་གདུང་བརྟེན་བཟོས་ཡོད་ལ། དེའི་རྗེས་ཀུན་གཟིགས་མཆོག་སྐུ་བཀྲོང་པར་འཆར་འགོད་བྱེད་མཁན་གཙོ་བོ་ཧུའུ་ཅིན་ཐའོ་ཡི་གོ་གནས་འཕར་ཏེ་རྒྱ་ནག་གི་སྲིད་འཛིན་དང་ཝུན་ཅཱ་པའོ་སྲིད་བློན་ཆགས་པ་རེད” ཅེས་སོགས་བརྗོད་སོང་།
གྲྭ་བག་གྲོ་ལགས་ཀྱིས་ཀུན་གཟིགས་༧པཎ་ཆེན་སྐུ་ཕྲེང་བཅུ་བ་མཆོག་གི་སྐུ་ཚེའི་ལོ་རྒྱུས་སྐོར་ལ། ༡༩༤༩ ལོར་རྒྱ་དམར་གྱིས་བོད་ལ་དྲག་པོའི་བཙན་འཛུལ་བྱས་རྗེས་བོད་རང་སྐྱོང་ལྗོངས་དང་མཚོ་སྔོན། སི་ཁྲོན། ཀན་སུའུ། ཡུན་ནན་བཅས་སུ། འགྲོ་བ་མིའི་རིགས་ཀྱི་བསམ་གཞིགས་དང་བཟོད་སྒོམ་བྱེད་མི་ཐུབ་པའི་རྡུང་རྡེག་དང་འཕྲོག་བཅོམ། གཏོར་བཤིག དམར་གསོད་སོགས་རང་སྣང་གང་དྲན་བྱས་ཏེ། བོད་རྒྱ་ཆེའི་མང་ཚོགས་ལ་ལོ་རྒྱུས་ཐོག་བྱུང་མྱོང་མེད་པའི་དཀའ་སྡུག་ཚད་མེད་མྱང་དགོས་བྱུང་སྟབས། ཀུན་གཟིགས་༧པཎ་ཆེན་རིན་པོ་ཆེ་མཆོག་གིས་རང་ཉིད་བློས་གཏོང་གིས་བོད་མིའི་བདེ་སྡུག་ཕྲག་ཏུ་བཞེས་ཏེ། དོན་ཚན་ ༨ ཡོད་པའི་ཡིག་འབྲུ་ཁྲི་བདུན་གྱི་སྙན་ཞུ་དེ་ ༡༩༦༢ ལོའི་ཟླ་ ༥ ཚེས་ ༡༨ ཉིན་རྒྱ་གཞུང་གི་སྲིད་བློན་ཀྲའོ་ཨིན་ལེར་ཕུལ་ཏེ་བོད་ཀྱི་གནས་སྟངས་རྣམས་དམར་རྗེན་དུ་བཏོན་གནང་མཛད་ཅིང་། གནས་ཚུལ་དེ་ལ་བརྟེན་ཏེ་ཏང་ལ་ངོ་རྒོལ་དང་མི་མང་ལ་ངོ་རྒོལ། སྤྱི་ཚོགས་རིང་ལུགས་ལ་ངོ་རྒོལ་བྱེད་མཁན་ཞེས་ཆབ་སྲིད་ཀྱི་ཞྭ་མོ་གསུམ་གཡོགས་ཏེ་བོད་རང་སྐྱོང་ལྗོངས་གྲ་སྒྲིག་ཨུ་ཡོན་ལྷན་ཁང་གི་གཙོ་འཛིན་ལས་ཚབ་ཀྱི་གོ་གནས་མེད་པ་བཟོས་པ་མ་ཟད། ཞིང་བྲན་ཁྲི་སྟོང་མང་པོ་སྐུལ་སློང་གིས་རྔ་རྡུང་དར་འཕྱར་གྱི་མནར་གཅོད་ཚད་མེད་བཏང་ཡོད་པ་དང་། ༧པཎ་ཆེན་གྱི་རྔ་མ་གནམ་ལ་བཀྱགས་ཏེ་ UG-2 གནམ་གྲུ་ལས་ཀྱང་མཐོ་བ་འདུག་ཅེས་ཟུར་ཟ་དང་མཚན་སྨད། མཐོང་ཆུང་སོགས་བྱས་ཏེ་ལོ་ ༩ དང་ཟླ་ ༨ རིང་བཙོན་མུན་དུ་དཀའ་སྡུག་ཚད་མེད་མྱངས་དགོས་བྱུང་ཞིང་། མཐར་ ༡༩༧༧ ལོའི་ཟླ་ ༡༠ པའི་ནང་བཙོན་གྲོལ་ཐོབ་ཀྱང་ལོ་གཉིས་མ་ཟིན་ཙམ་རིང་མི་སེར་དཀྱུས་མ་ལྟར་བཞུགས་ཏེ་ ༡༩༧༩ ལོའི་ཟླ་ ༧ ཚེས་ ༢ ཉིན་རྒྱ་ནག་ཆབ་སྲིད་གྲོས་ཚོགས་ཀྱི་གཙོ་འཛིན་གཞོན་པ་དང་། ༡༩༨༠ ལོར་རྒྱ་ནག་རྒྱལ་ཡོངས་འཐུས་མི་ཚོགས་ཆེན་རྒྱུན་ལས་ཚོགས་གཞོན་དུ་བསྐོ་བཞག་གནང་ཡོད་པ་རེད། དེའི་རྗེས་ཁོང་གིས་མུ་མཐུད་བོད་མི་རིགས་ཀྱི་རིག་གཞུང་སྲུང་སྐྱོབ་ཆེད་མཚོ་སྔོན་མི་རིགས་སློབ་གྲྭ་ཆེན་མོ་དང་། ནུབ་བྱང་མི་རིགས་སློབ་གྲྭ་ཆེན་མོ། བོད་ལྗོངས་སློབ་གྲྭ་ཆེན་མོ། བོད་ལྗོངས་ནང་བསྟན་སློབ་གྲྭ་སོགས་གསར་འཛུགས་གནང་སྟེ། ཤེས་རིག་གི་སྒྲོན་མེ་སྤར་བ་དང་། དགོན་སྡེ་ཁག་གི་བསླབ་པ་སློབ་གཉེར་བསྐྱར་གསོ། ལྷག་པར་དུ་ལོ་ངོ་ ༣༠ ལྷག་རྒྱུན་ཆད་པའི་ལྷ་སའི་ཆོ་འཕྲུལ་སྨོན་ལམ་ཆེན་མོ་སྐོང་ཚོགས། ༡༩༨༧ ལོར་བོད་དོན་ཆེད་བཙོན་དུ་ཚུད་པའི་འབྲས་སྤུངས་དང་སེ་ར་དགོན་པའི་དགེ་འདུན་པ་ ༨༠ ཙམ་ཀློད་གྲོལ་གཏོང་ཐུབ་པ་སོགས་བོད་མི་རིགས་ཆེད་རི་བོ་འབིགས་པར་ནུས་པའི་སྐུ་ངལ་ཚད་མེད་བསྐྱོན་ཡོད་པ་རེད་ཅེས་སོགས་བརྗོད་སོང་།
མཇུག་ཏུ་གྲྭ་བག་གྲོ་ལགས་ཀྱིས་འབོད་སྐུལ་གནང་དོན། “ ཀུན་གཟིགས་༧པཎ་ཆེན་སྐུ་ཕྲེང་བཅུ་པ་མཆོག་ནི་བོད་མི་མང་ལ་བཀའ་དྲིན་བླ་མེད་མཛད་མཁན་གྱི་སྐྱེས་ཆེན་དམ་པ་ཞིག་དང་། བོད་མིའི་སྙིང་དབུས་སུ་བཅངས་པའི་བླ་ན་མེད་པའི་དཔའ་བོ་ཞིག་ཡིན་པ་མ་ཟད། ཁོང་སྐུ་སྒེར་ལ་ཡོད་པའི་ཕྱག་དངུལ་རྣམས་རླངས་འཁོར་དང་བླ་བྲང་རྫིག་པོ་དེ་འདྲའི་ཐོག་མ་བཏང་བར། བོད་མི་རིགས་ཀྱི་སློབ་གསོའི་བྱ་གཞག་ཆེད་ཕུལ་ཡོད་སྟབས། སྐྱབས་བཅོལ་དུ་ཡོད་པའི་བླ་སྤྲུལ་དགེ་བཤེས་ཚོས་ཁོང་ལ་དམིགས་དཔེ་བལྟས་ཏེ། རྒྱ་དམར་གྱི་བཙན་གནོན་འོག་ཆག་འཇིག་གི་གནས་སུ་ལྷུང་ཡོད་པའི་མི་རིགས་འདིའི་ཆེད་དུ་ཕྱག་ལས་གནང་རོགས” ཞེས་རེ་སྐུལ་གནང་སོང་།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
“གཅིག་གྱུར་གྱི་བོད་རིགས་རང་སྐྱོང་འཛུགས་རྒྱུའི་རེ་འདུན་ནི་ཚུལ་ལུགས་དང་མཐུན་པ། ཁྲིམས་དང་མཐུན་པ། རྒྱ་ཆེའི་བོད་མི་མང་གི་བསམ་འདུན་དང་མཐུན་པས། དེ་ནི་ཆ་རྐྱེན་འཛོམས་མིན་གྱི་གནད་དོན་ཞིག་ལས་ཕྱིར་བཤོལ་དང་ལོག་སྤྱོད་ཟེར་བའི་གནད་དོན་གང་ཡང་མ་རེད།” བཀའ་སློབ་འདི་རིགས་ཀྱིས་ཀྱང་ཁྱེད་ཉིད་ལ་བར་ཆད་བཏང་ཡོད་ངེས། ཁྱེད་ཀྱི་གསུང་ཚད་མ་དག ཡིད་ལ་བཟུང་ཡོད། ལམ་དུ་ཆས་ཡོད།
ཞོར་དུ་ཞུ་འདོད་པ་གཅིག
རྒྱུན་དུ་རང་ངོས་ནས་ལས་འགུལ་ཞིག་སྤེལ་ནས་ནུས་པ་གང་ཐུབ་འདོན་མཁན་གྲྭ་བག་གྲོ་ལགས་ཡིན། གལ་ཏེ་མདོ་སྟོད་སྨད་པའི་མི་ཞིག་ཡིན་ན་ཁོང་ལ་སྔ་ས་ནས་སྤྱི་འཐུས་ཀྱི་སྟེགས་བུ་གནང་ཡོད་ངེས་ཡིན།
བཙོན་ཟུར་གྲྭ་བག་བྲོ་ལགས་ལ་སྐུ་པར་འགྲེམས་སྦྱར་དང་དཔེ་དེབ་འདོན་རྒྱུ་གྲངས་ལས་འདས་པ་ཡིན་ཙང་ཅུང་ཙམ་མིན་ན་འདིའང་མིག་འོག་ནས་ཤོར་སོང། བསྒྲགས་གཏམ་འདི་དང་ལས་འགུལ་འདི་ལ་བཀའ་དྲིན་ཆེ་ཞུ་འདོད་བྱུང་ལ། ༸པཎ་ཆེན་རིན་པོ་ཆེས་དབྱིངས་ནས་དགོངས་ན་ཐུགས་ཡིད་སྐྱོ་ལྷང་ལྷང་ཞིག་ལོས་ཡོང་བསམས། དེ་ཙམ་ཞུ།
མ་གཞི་ཡིན་ན་བཙན་བྱོལ་བོད་མི་ཡོངས་ནས་པཎ་ཆེན་རིན་པོ་ཆེར་རྗེས་དྲན་སྲུང་བརྩི་བྱེད་འོས་ཤིང་། དེ་མ་བྱུང་ན་དགེ་ལུགས་པ་ཡོངས་རྗེས་དྲན་བྱེད་འོས་ཤིང་། དེའང་མ་བྱུང་ན་གོང་ས་མཆོག་དབུ་བཞུགས་ཀྱིས་བསྔོ་སྨོན་ཞིག་གསུང་འོས་མོད། སྟབས་མ་ལེགས་པར་གྲྭ་བག་གྲོ་གཅིག་པུ་ལས་ཁོང་ལ་རྗེས་དྲན་གནང་མཁན་མི་འདུག་པས། ནམ་ཞིག་གོང་ས་མཆོག་ཀྱང་གནས་སྟངས་འདིའི་འོག་ལྷུང་མི་སྲིད་པར་སུས་ཁག་ཐེག་གནང་ཐུབ་བམ།
གུས་ནས་ཀྱང་རྐམ་རྡོ་རྗེས་བཤད་པའི་གཤམ་གྱི་སྐད་ཆ་འདི་སྔར་བོད་ནང་ནས་ཐོས་མྱོང་།
༼ ཧུའུ་ཅིན་ཐའོ་ཡིས་ངོ་སྤྲོད་བྱས་པའི་<སྨན་པ་ཧུའུ་ཁྲོང་ཧྭ་སོགས་ཀྱིས་པེ་ཅིན་དུ་ཚོགས་འདུ་ཚོགས་ཏེ། སྨན་པ་ཝང་མིན་ཆིན་གྱིས་གྲོས་གཞི་ལྟར་༧པཎ་ཆེན་རིན་པོ་ཆེ་མཆོག་ལ་དུག་བཀོལ་ནས་བཀྲོང་རྒྱུའི་ཐབས་ཇུས་བརྩམས་ཤིང་། ༡༩༨༩ ལོའི་ཟླ་ ༢ ཚེས་ ༢༧ མཚན་མོར་ཧུའུ་ཅིན་ཐའོ་དང་ཝུན་ཅཱ་པའོ་ཡིས་གཙོ་སྐྱོང་འོག་མུན་ཧོང་ཝེ་དང་ཧུའུ་ཁྲོང་ཧྭ་ཡིས་ལག་བསྟར་བརྒྱུད་ཀྲུའུ་མེན་ཌིན་ཐད་ཀར་པཎ་ཆེན་རིན་པོ་ཆེ་མཆོག་གི་གམ་དུ་བཏང་སྟེ་ ༢༨ ཉིན་གྱི་ཞོགས་པར་འཆར་གཞི་ལྟར་བཀྲ་ལྷུན་དགོན་དུ་སྐུ་སྲོག་དངོས་སུ་བཀྲོངས་ཡོད་པ་རེད། ༽
་་་་་་་ ཧུའུ་ཅིན་ཐའོ་ཡིས་ངོ་སྤྲོད་བྱས་པའི་སྨན་པ་ཧུའུ་ཁྲོང་ཧྭ་སོགས་ཀྱིས་པེ་ཅིན་དུ་ཚོགས་འདུ་ཚོགས་ཏེ། སྨན་པ་ཝང་མིན་ཆིན་གྱིས་གྲོས་གཞི་ལྟར་༧པཎ་ཆེན་རིན་པོ་ཆེ་མཆོག་ལ་དུག་བཀོལ་ནས་བཀྲོང་རྒྱུའི་ཐབས་ཇུས་བརྩམས་ཤིང་།
༡༩༨༩ ལོའི་ཟླ་ ༢ ཚེས་ ༢༧ མཚན་མོར་ཧུའུ་ཅིན་ཐའོ་དང་ཝུན་ཅཱ་པའོ་ཡིས་གཙོ་སྐྱོང་འོག་མུན་ཧོང་ཝེ་དང་ཧུའུ་ཁྲོང་ཧྭ་ཡིས་ལག་བསྟར་བརྒྱུད་ཀྲུའུ་མེན་ཌིན་ཐད་ཀར་པཎ་ཆེན་རིན་པོ་ཆེ་མཆོག་གི་གམ་དུ་བཏང་སྟེ་ ༢༨ ཉིན་གྱི་ཞོགས་པར་འཆར་གཞི་ལྟར་བཀྲ་ལྷུན་དགོན་དུ་སྐུ་སྲོག་དངོས་སུ་བཀྲོངས་ཡོད་པ་རེད། ་་་་་་་་