ནམ་རྒྱུན་གསར་འགྱུར་བརྒྱུད་ལམ་ཁག་ནས་མཐོང་ཐོས་ཀྱི་གནས་ཚུལ་མང་པོ་ཞིག་ནི་རང་ཉིད་ཁྱབ་བསྒྲགས་བྱེད་མཁས་པའི་ཆབ་སྲིད་པ་དང་གློག་བརྙན་འཁྲབ་སྟོན་པ་སོགས་ཡིན་ལ། དེ་ལས་གཞན་ས་གནས་ག་གེ་མོ་ཞིག་ཏུ་བྱུང་བའི་མི་གསོད་ཁྲག་སྦྱོར་གྱི་གནས་ཚུལ་དང་མི་ག་གེ་མོ་ཞིག་གིས་བྱས་ཉེས་བསགས་པའི་གནས་ཚུལ་དེ་ཚོ་རེད། གནས་ཚུལ་དེ་འདྲ་རྐྱང་རྐྱང་གིས་མི་ཚོའི་སེམས་ལ་འཇིག་རྟེན་འདིར་བྱམས་པ་དང་སྙིང་རྗེ་མི་འདུག་བསམ་པའི་ལོག་རྟོག་ཅིག་རང་བཞིན་གྱིས་འབྱུང་མི་སྲིད་པ་མིན་སྟབས། འཇིག་རྟེན་འདིར་ཁ་ཁུ་སིམ་པོའི་ཐོག་ནས་བྱམས་སྙིང་རྗེ་དང་གཞན་ཕན་དོན་གཉེར་བྱེད་མཁན་ཡང་མང་པོ་ཞིག་ཡོད་པ་དང་། བོད་པའི་སྤྱི་ཚོགས་ནང་དུའང་ལོ་ནས་ལོ་བསྟུད་དེ་གཞན་ལ་རོགས་སྐྱོར་ཁོ་ན་བྱས་ནས་མི་ཚེ་སྐྱེལ་བཞིན་པའི་ཡོངས་གྲགས་དང་ཡོངས་གྲགས་མ་ཡིན་པའི་རླབས་ཆེན་གྱི་སྐྱེས་བུ་མང་པོ་ཞིག་ཡོད། རྣམ་གྲྭ་སྐུ་ཞབས་དོན་གྲུབ་རྒྱལ་མཚན་ལགས་ནི་སྐུ་ཚེ་ཧྲིལ་པོ་བོད་རིགས་ཉམ་ཐག་ཚོའི་ཆེད་དུ་ཕུལ་དང་འབུལ་བཞིན་པའི་གང་ཟག་ཅིག་ཡིན་ཡང་། ད་སྔ་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཕར་ཟད་བོད་པའི་གསར་ལམ་ཁག་གིས་ཀྱང་མ་མཐོང་བའི་མི་སྣ་ཞིག་ཡིན།
གསར་འགོད་པ་རྒན་དོན་གྲུབ་རྒྱལ་མཚན་ལགས་སུ་ཐུག་འཕྲད་ཀྱིས་ཁོང་གི་མི་ཚེའི་ལོ་རྒྱུས་དང་བཙན་བྱོལ་བོད་པའི་སྤྱི་ཚོགས་ཁྲོད་ཀྱི་ཉམས་ཐག་ཚོར་རོགས་སྐྱོར་གནང་བཞིན་པའི་ལས་གཞིའི་སྐོར་ལ་བཅར་འདྲི་བརྒྱུད་རྒྱུས་ལོན་བྱས་དོན་ལྟར་ན། རྣམ་གྲྭ་སྐུ་ཞབས་དོན་གྲུབ་རྒྱལ་མཚན་ལགས་ནི་བོད་དུ་སྐུ་འཁྲུངས་ཤིང་། ༡༩༥༩ ལོར་རྒྱ་གར་ནང་བཙན་བྱོལ་དུ་འབྱོར། ༡༩༦༧ ལོའི་བར་དུ་སྐུ་བཅར་རྣམ་རྒྱལ་གྲྭ་ཚང་ནས་བསླབ་པ་མཐར་སོན་ཞིང་། ༡༩༩༤ ལོར་ཨ་རིའི་གླིང་ཕྲན་ཧཱ་ཝ་ཡི་ (Hawaii) ནང་བཀྲ་ཤིས་ཕན་བདེ་ཚོགས་པ་གསར་དུ་ (http://www.tashipendey.org) བཙུགས་གནང་སྟེ། གཞན་ཕན་གྱི་ལས་དོན་བསྒྲུབ་མགོ་བརྩམས་ཡོད་པ་དང་། ཁོང་གིས་འདས་པའི་ལོ་ངོ་བཅུ་ཕྲག་ཁ་ཤས་རིང་རྒྱ་བལ་འབྲུག་གསུམ་ནང་གི་བོད་རིགས་དཀའ་ངལ་ཅན་མང་པོར་རོགས་སྐྱོར་བྱེད་བཞིན་པ་མ་ཟད། ༢༠༡༣ ལོའི་ཟླ་ ༨ པའི་ནང་ཨོ་རི་ས་བོད་མིའི་གཞིས་ཆགས་ལ་དྲག་ཆར་རླུང་འཚུབ་ཀྱི་གནོད་འཚེ་ཕོགས་པར། བོད་མིའི་སྒྲིག་འཛུགས་ནང་སྲིད་ལས་ཁུངས་བརྒྱུད་ཨ་སྒོར་འབུམ་གཉིས་ཀྱི་ཞལ་འདེབས་ཕུལ་འདུག
དྲི་བ། སྐུ་ཉིད་ཀྱིས་༼ བཀྲ་ཤིས་ཕན་བདེ་ཚོགས་པ༽ངོ་སྤྲོད་ཅིག་དང་འབྲེལ། སྐུ་ཉིད་ཀྱིས་དེང་སྐབས་ཕྱག་ལས་གཙོ་བོ་ག་རེ་གནང་གི་ཡོད་མེད་ངོ་སྤྲོད་ཅིག་གནང་རོགས།
ལན། བཀྲ་ཤིས་ཕན་བདེའི་ངོ་སྤྲོད་དྲ་རྒྱའི་ནང་གསལ་པོ་བཀོད་ཡོད་པས། དེའི་ནང་ནས་མཁྱེན་པའི་རེ་བ་ཡོད། རྩ་བའི་ཆ་ནས་ཚོགས་པའི་ལས་ཀ་གཙོ་བོ་དེ་ཉམ་ཐག་རོགས་རམ་དགོས་ངེས་ཅན་རིགས་ལ་རོགས་རམ་འཚོལ་རྒྱུ་དེ་རེད། དེང་སང་ཕྲན་ལ་དམིགས་གསལ་གྱི་ལས་ཀ་འདི་ཟེར་ཡ་དེ་འདྲ་གང་ཡང་མེད། ང་དང་ངའི་ཚོགས་པའི་ལོ་རྒྱུས་ཁག་དྲ་རྒྱའི་ནང་གསལ་པོ་ཡོད་པས། དེ་ནས་མཁྱེན་རྟོགས་གནང་རོགས་ཞུ་ཡ་ཡིན།
དྲི་བ། རྒན་ལཊ་ཀྱིས་ཉེ་ལམ། ཨོ་རི་ས་བོད་མིའི་གཞིས་ཆགས་ལ་དྲག་ཆར་རླུང་འཚུབ་བྱུང་བར་ཨ་སྒོར་འབུམ་གཉིས་ཀྱི་ཞལ་འདེབས་ཕུལ་འདུག དངུལ་དེ་འདྲ་ཕོན་ཆེན་པོ་ཞིག་གནང་དགོས་པའི་རྒྱུ་མཚན་གང་ཡིན་པ་དང་། ཉིད་ལ་དངུལ་དེ་འདྲ་ཕོན་ཆེན་པོ་ཞིག་ཇི་ལྟར་རག་པ་རེད་དམ།
ལན། ཨོ་རི་ས་གཞིས་ཆགས་འདི་ལ་ས་ཞིང་ཐོག་དཀའ་ངལ་མང་པོ་འཕྲད་ཀྱིན་ཡོད་པ་དེ་སྔ་གསར་འགྱུར་ཐོག་ནས་མཐོང་སོང་། དེའི་སྒང་ལ་ད་ལོར་ས་ཞིང་འདེབས་རྒྱུའི་གོ་སྐབས་རག་ཙམ་བྱུང་ནས་ཕལ་ཆེར་སྟོན་བསྡུ་རན་སྐབས། ཆུ་ལོག་གི་གནོད་སྐྱོན་སྟབས་མ་ལེགས་འདི་འདྲ་བྱུང་བ་རེད། མི་མང་པོར་དཀའ་ངལ་འཕྲད་ནས་ཅི་བྱ་འདི་བྱ་མེད་པར་གྱུར་འདུག་པ་གོ་སོང་། ད་ཁོང་ཚོ་ཕྱིར་རང་རང་གི་རྐང་པའི་སྒང་ལ་ལངས་དགོས་ན་དེར་དངུལ་ཡང་ཧ་ཅང་ཕོན་ཆེན་པོ་དགོས་ཀྱི་ཡོད་པ་རེད། གཞུང་གིས་ཀྱང་ས་ཕྱོགས་གང་ས་ནས་ཞལ་འདེབས་བསྡུ་བཞིན་འདུག ཡིན་ན་ཡང་ཞལ་འདེབས་དེ་ཙམ་གྱི་ཕོན་ཆེན་པོ་ཡོང་ཁག་པོ་ཡིན་དུས། ང་རང་གིས་ཚོགས་པར་རྒྱུན་རིང་སྦྱིན་བདག་གནང་མཁན་མང་པོ་ཞིག་ཡོད་པའི་ཁོངས་ནས་སྦྱིན་བདག་གཅིག་ལ་དེའི་སྐོར་གྱི་སྐྱིད་སྡུག་ཅིག་ཞུས་པ་ཡིན། དེར་ཁོང་གིས་ཀྱང་འཕྲལ་དུ་རོགས་སྐྱོར་གནང་འདོད་ཡོད་པ་ཞལ་བཞེས་གནང་སོང་། དེར་བརྟེན་ང་རང་ཡིན་ན་ཡང་དགའ་སྤྲོ་ཚད་མེད་པ་སྐྱེས་སོང་། དེ་ནས་ཨ་སྒོར་འབུམ་གཉིས་ལམ་སེང་རང་གཞུང་དཔལ་ལྡན་ནང་སྲིད་ལྷན་ཁང་བརྒྱུད་ནས་བཏང་བ་ཡིན། སྤྱིར་བཏང་ངའི་ཚོགས་པའི་ངོས་ནས་མ་དངུལ་འདི་ལས་ཕོན་ཆེ་བ་ཁ་ཤས་ལ་གཏོང་གི་ཡོད་རེད། ཡིན་ན་ཡང་གསལ་ཆ་ཞུ་རྒྱུའི་དགོས་པ་མི་འདུག
དྲི་བ། རྒན་ལགས་ཀྱིས་བོད་མིར་རོགས་སྐྱོར་བྱེད་པའི་ལས་ཀ་འདི་ག་དུས་ནས་མགོ་ཚུགས་པ་ཡིན་ནམ། ད་ལྟའི་ཆར་མི་གྲངས་ག་ཚོད་ཅིག་ལ་རོགས་རམ་གནང་བཞིན་ཡོད་དམ།
ལན། ལས་ཀ་འདི་ ༡༩༩༥ ལོ་ནས་མགོ་ཚུགས་པ་རེད། རོགས་རམ་བྱེད་སའི་བོད་མི་རྣམས་མོན་གྷོ་ཌི་གཞིས་ཆགས་དང་། བྷེལ་ཀོབ་གཞིས་ཆགས། རྫོང་དཀར་ཆོས་སྡེ། ཧོན་སོར་གཞིས་ཆགས་སོགས་ནས་མགོ་འཛུགས་བྱས་པ་ཡིན། མི་གྲངས་ཀྱི་ཆ་ནས་བཤད་ན་ཧ་ཅང་མང་པོ་ཡོད་རེད། ཧ་ལམ་མི་གྲངས་སུམ་སྟོང་ཙམ་ལ་རོགས་རམ་བྱས་དང་བྱེད་ཀྱིན་ཡོད། བོད་གཞུང་གི་འོག་ལ་ཡོད་པའི་རྒན་གསོ་ཁང་ཡང་ཁ་ཤས་ཤིག་ཡོད། དགོན་པ་གྲྭ་ཚང་ཡང་ཁ་ཤས་ཤིག་ཡོད་པ་རེད།
དྲི་བ། རོགས་རམ་གནང་སའི་མི་སྒེར་པ་དང་། རྒན་གསོ་ཁང་དེ་དག་གང་འདྲ་བྱས་ནས་བདམས་ཀྱིན་ཡོད་དམ།
ལན། དངོས་ཡོད་གནས་ཚུལ་གྱི་ཐོག་ནས་དཔལ་འབྱོར་གནས་སྟངས་ཞན་པོ་ཡིན་པའི་ཁྱིམ་ཚང་དང་། རྒན་གསོ་ཁང་སོགས་ལ་ས་གནས་དོན་གཅོད་ཁང་གི་རྒྱབ་གཉེར་ཡི་གེ་ཡོད་པ་དེ་འདྲ་ལ་རོགས་པ་བྱེད་ཀྱིན་ཡོད། སློབ་ཕྲུག་ཁ་ཤས་ལ་དཔེར་ན་བོད་གཞུང་གི་ངོས་ནས་རོགས་སྐྱོར་ཕྱེད་ཙམ་ཞིག་ཐོབ་ཀྱི་ཡོད་ཀྱང་། ད་དུང་སློབ་ཡོན་དང་ལག་དངུལ་སོགས་ཀྱི་ཐོག་ནང་མིར་དཀའ་ངལ་ཡོད་མཁན་སློབ་མ་སུམ་ཅུ་བཞི་ཅུ་ཙམ་ཡོད། ཁོང་ཚོ་ལ་སྦྱིན་བདག་བཙལ། དེ་ནས་སྦྱིན་བདག་དང་ཁོང་ཚོ་ཕན་ཚུན་ངོ་སྤྲོད་བྱས་པའི་ཐོག་ནས་རོགས་རམ་བྱེད་ཀྱིན་ཡོད་རེད། སྦྱིན་བདག་གིས་སྦྱིན་ཡུལ་གྱི་མི་ལ་དངུལ་ག་ཚོད་ཅིག་བསྐུར་བ་དེ་ཐད་ཀར་ཁུངས་སོ་སོར་གཏོང་གི་ཡོད་རེད།
དྲི་བ། ད་སྔ་ཉིད་ཀྱིས་བོད་མི་ ༣༠༠༠ ལྷག་ལ་རོགས་པ་བྱས་ཡིན་གསུངས་སོང་། དེ་དག་ལ་གྲུབ་འབྲས་ཟེར་ན་འདྲ་དེང་སྐབས་རང་སྐྱ་ཐུབ་མཁན་དེ་འདྲ་བྱུང་འདུག་གམ།
ལན། ངས་རོགས་རམ་བྱེད་ས་མང་ཆེ་ཤོས་ཉམ་ཐག་སྐྱོ་བོ་ཁག་རེད། ཁོང་ཚོའི་འཚོ་བའི་དཀའ་ངལ་ཁག་ཁ་ཐུག་དེར་ཏོག་ཙམ་ཇེ་ཡང་དུ་བཏང་ཐུབ་པ་དེ་གྲུབ་འབྲས་ཤིག་རེད། དེ་ནས་སློབ་ཕྲུག་ཚོའི་ནང་ལ་འབྲིང་རིམ་སློབ་གྲྭ་ཐོན་ནས་ད་ཆ་ལོ་གསུམ་དང་བཞི། ལྔའི་རིང་གི་སྨན་ཞབས་སློབ་སྦྱོང་བྱེད་མཁན་དང་། བྷི་ཨེ་(BA) སློབ་སྦྱོང་བྱེད་མཁན། ཨེམ་ཨེ་(MA)སློབ་སྦྱོང་བྱེད་མཁན་སོགས་ཧ་ལམ་སུམ་ཅུ་སོ་གྲངས་ཤིག་ཡོད། ཁོང་ཚོ་ལས་མང་ཆེ་ཤོས་བར་སྐབས་ཤིག་ལ་བོད་གཞུང་གི་རོགས་སྐྱོར་མ་ཐོབ་པར་སློབ་མཚམས་འཇོག་དགོས་བྱུང་བ་དེ་འདྲ་རེད། རྗེས་སུ་ཁོང་ཚོར་རོགས་དངུལ་བཙལ་ནས་ད་ཆ་སློབ་སྦྱོང་མུ་མཐུད་ཐུབ་པ་བྱུང་ཡོད། ལོ་ཤས་རྗེས་སུ་ཁོང་ཚོ་སློབ་སྦྱོང་མཐར་ཕྱིན་པ་ཡིན་ན། ཉུང་མཐར་ཡང་སོ་སོའི་མི་ཚེ་སྐྱིད་པོ་ཞིག་སྐྱེལ་ཐུབ་ངེས་རེད་བསམ་གྱི་ཡོད།
དྲི་བ། ཨ་རི་ནས་རྒྱ་གར་སོགས་རྒྱལ་ཁབ་གཞན་ཞིག་ནང་བོད་མི་ཉམ་ཐག་ཅིག་འདུག་ཟེར་ནས་རོགས་རམ་བྱེད་མཁན་སྦྱིན་བདག་འཚོལ་རྒྱུར་དཀའ་ངལ་དེ་འདྲ་འདུག་གམ།
ལན། སྔོན་ཆད་ང་རང་ཨ་རིར་བསླེབས་མ་ཐག་གི་སྐབས་ལ། ང་རང་སྒེར་ལ་རོགས་པ་བྱེད་མཁན་མང་པོ་བྱུང་སོང་། ཡིན་ན་ཡང་། ང་གྲྭ་པ་ཞིག་ལ་དངུལ་མང་པོ་བསགས་པའི་དགོས་པ་མི་འདུག དེ་ནས་ང་རང་ལ་རོགས་པ་ཡག་པོ་བྱེད་མཁན་དེ་ཚོར་གྲོས་བྱས་ཏེ་ཚོགས་པ་ཞིག་བཙུགས་ནས་བོད་མི་ཉམ་ཐག་ཚོར་རོགས་པ་ཕྲན་ཙམ་བྱས་ན་བསམ་པ་རེད། དེ་དུས་ཡིན་ན་ཨ་རིའི་དཔལ་འབྱོར་གནས་སྟངས་ཡག་པོ་ཡོད་སྟབས། སྦྱིན་བདག་འཚོལ་ཁག་པོ་དེ་འདྲ་ཡོད་པ་མ་རེད། དེང་སྐབས་སྔོན་ཆད་ཡོད་བསྡད་པའི་སྦྱིན་བདག་དེ་ཚོ་ཡང་ཉུང་དུ་འགྲོ་བ་དང་། ཡང་ཁ་ཤས་ཀྱིས་སློབ་ཕྲུག་གྲངས་བརྒྱ་ལ་སྦྱིན་བདག་བྱེད་ཀྱིན་ཡོད་ན། ད་ཆ་ལྔ་བཅུ་ཙམ་ལ་མ་གཏོགས་སྦྱིན་བདག་བྱེད་མི་ཐུབ་པའི་གནས་སྟངས་དེ་འདྲ་ཆགས་འདུག ལོ་ཤས་གོང་ནས་ཨ་རིའི་དཔལ་འབྱོར་ལ་ཉམས་ཆག་བྱུང་སྟབས། སྦྱིན་བདག་གསར་པ་འཚོལ་རྒྱུ་ཏོག་ཙམ་ཁག་ཏུ་ཕྱིན་སོང་། སྔར་སྦྱིན་བདག་ཡོད་ཀྱང་བར་སྐབས་ནས་མཚམས་ཆད་པ་དང་། འཚོ་བའི་དཀའ་ངལ་ད་དུང་ཆེན་པོ་ཡོད་མཁན་མང་པོ་ཞིག་ལ་ང་རང་སྒེར་ངོས་ནས་མུ་མཐུད་དེ་རོགས་རམ་བྱེད་ཀྱིན་ཡོད།
དྲི་བ། རྒན་ལགས་ཀྱི་ངོས་ནས་རོགས་རམ་གནང་སའི་མི་མང་དང་སློབ་ཕྲུག་རྣམས་ལ་རེ་བ་དང་འབོད་སྐུལ་ཞུ་རྒྱུ་དེ་འདྲ་ཡོད་དམ།
ལན། ང་ཚོ་ཚང་མ་ཆོལ་ཁ་དང་ཆོས་ལུགས་ཀྱི་མིང་མི་འདྲ་བ་གང་འདྲ་ཞིག་ནས་ཡིན་ནའང་། བོད་པ་ཡིན་པ་གཅིག་པ་གཅིག་རྐྱང་ཡིན་དུས། ནང་ཁུལ་ལ་འཆམ་པོ་མཐུན་པོ་བྱེད་རྒྱུ་དེ་དོན་དག་གཙོ་བོ་རེད། དེ་ནས་གྲྭ་བཙུན་སློབ་ཕྲུག་སུ་འདྲ་ཞིག་ཡིན་ན་ཡང་། ༧རྒྱལ་བ་རིན་པོ་ཆེ་དང་བོད་མིའི་སྒྲིག་འཛུགས་ལ་ཞབས་འདེགས་ཕྲན་ཙམ་ཡིན་ན་ཡང་བསྒྲུབ་ཨེ་ཐུབ་ལ་འབད་བརྩོན་བྱེད་རྒྱུ་དེ་དོན་དག་གལ་ཆེན་པོ་ཞིག་རེད་ལ། བོད་པ་ཞིག་ཡིན་པའི་ངོས་ནས་ལས་འགན་ཞིག་དང་བཟང་སྤྱོད་ཅིག་ཀྱང་ཆགས་ཀྱི་ཡོད་པ་རེད་བསམ་གྱི་འདུག དེ་ནས་སོ་སོའི་ཆོས་དང་རིག་གཞུང་ལ་བདག་པོ་རྒྱག་རྒྱུ་དེ་གཅིག་རེད། ང་རང་གི་ངོས་ནས་ད་ལྟའི་བར་དུ་རོགས་པ་བྱེད་བསྡད་པའི་རྒྱུ་མཚན་གཙོ་བོ་ཡིན་ན། མི་ཚང་མ་མི་ཚེ་སྐྱིད་པོ་ཞིག་དང་། དོན་དང་ལྡན་པ་ཞིག་སྐྱེལ་ཐུབ་པ་ཡོང་རྒྱུར་ཕན་ཕྲན་ཙམ་ཐོག་རྒྱུར་རེ་བ་དེ་ཡིན། ངའི་ངོས་ནས་ཁོང་ཚོ་ཚང་མར་མི་ཚེ་སྐྱིད་པོ་ཞིག་དང་། བོད་དང་བོད་ཀྱི་རིག་གཞུང་ལ་ཕན་ཐོགས་ཐུབ་མཁན་ཞིག་ཡོང་བའི་སྨོན་ལམ་འདེབས་རྒྱུ་མ་གཏོགས་གཞན་ཞུ་རྒྱུ་མེད།
ས་གནས་གསར་འགོད་པ། སངས་རྒྱས་བཀྲ་ཤིས།
དོན་དམ་གྱི་སྤྱི་ཚོགས་ཞབས་ཞུའི་ཕྱག་ལས་འདི་ལ་བསྟོད་དོ།། བཀྲིས་བདེ་ལེགས།
ལེགས་སོ་ལེགས་སོ། རྗེས་སུ་ཡིད་རང་ངོ། ཐུགས་རྗེ་ཆེ་མ་གཏོག་ཞུ་རྒྱུ་ལྷག་མི་འདུག།
བོད་པའི་བཀའ་བསྟན་འགྱུར་ཕྱི་སྐད་ནང་ཕར་བསྒྱུར་ཏེ་བོད་པའི་རིག་གཞུང་ཕར་འཚོང་པའི་བསམ་བློ་བཏོང་རྒྱུ་ལས། དགེ་བཤེས་དོན་འགྲུབ་རྒྱལ་མཚན་མཆོག་ལྟར་ཐབས་ལམ་སྣ་ཚོགས་བརྒྱུད་དེ་ཕྱི་རྒྱལ་བ་ཚོར་བོད་པའི་སྤྱི་ཚོགས་ནང་གི་ཉམ་ཐག་ཚོར་རོགས་རམ་བྱེད་རྒྱུ་དེ་ཧ་ཅང་རླབས་ཆེན་པོ་རེད།