ཐེངས་འདིའི་སེ་རི་ཡའི་གྲོས་མོལ་ལ་དོན་འབྲས་སོན་མེད་པའི་རྒྱུ་རྐྱེན་གཞུང་གིས་གྱེན་ལོག་ཤོག་ཁག་འཇིགས་སྐུལ་བར་ངོས་འཛིན་བྱས་པ་དང་གྱེན་ལོག་ཤོག་ཁག་གིས་ཚོས་སྲིད་འཛིན་གྱིས་དགོངས་པ་ཞུ་དགོས་པའི་རེ་འདུན་བཏོན་པ་བཅས་ལ་བརྟེན་ཏེ་བྱུང་བ་ཞིག་ཡིན་འདུག
ཕྱི་ཚེས་ ༣༡ ཉིན་སུད་སིའི་གྲོང་ཁྱེར་ཇེ་ནེ་ཝའི་ནང་། མཉམ་འབྲེལ་རྒྱལ་ཚོགས་ཀྱི་དཀྱིལ་ཤར་ཨེ་ཤ་ཡའི་དམིགས་བསལ་སྐུ་ཚབ་སྐུ་ཞབས་བྷར་ཧེ་མེ་ (Lakhdar Brahimi)ལགས་ཀྱི་གཙོ་སྐྱོང་འོག ཟླ་འདིའི་ཚེས་ ༢༤ ནས་ ༣༡ བར་གྱི་ཉིན་བརྒྱད་རིང་། སེ་རི་ཡའི་ནང་གི་ཟིང་འཁྲུག་ཞི་འཇགས་སྐོར་གྱི་གྲོས་མོལ་བྱས་ཡོད་པ་དང་། ཚོགས་ཐོག་ཏུ་སེ་རི་ཡའི་ནང་བར་བརྒལ་སྲིད་གཞུང་འཛུགས་རྒྱུའི་གྲོས་གཞི་དེར། སེ་རི་ཡའི་གཞུང་དང་གྱེན་ལོག་ཤོག་ཁག་གཉིས་གཙོས་ཨ་རི་དང་ཨུ་རུ་སུ། རྒྱལ་ཁབ་ ༣༠ ལྷག་གི་སྐུ་ཚབ་མཉམ་ཞུགས་ཀྱིས་ཇེ་ནེ་ཝར་གྲོས་མོལ་ཐེངས་གཉིས་པ་མགོ་འཛུགས་བྱས་ཏེ། སེ་རི་ཡའི་དམག་དཔུང་གིས་གྱེན་ལོག་དམག་དཔུང་གིས་བཙན་བཟུང་བྱས་པའི་གྲོང་ཁྱེར་ཧོམ་སི་ (Homs) གཙོས་གྲོང་ཁྱེར་ཁག་ནང་། རྒྱལ་སྤྱིའི་རོགས་སྐྱོར་ཚོགས་པས་ཟས་རིགས་དང་སྨན་སོགས་མཁོ་སྤྲོད་བྱེད་པར་མོས་མཐུན་བྱས་ཡོད་ཀྱང་། གྱེན་ལོག་ཤོག་ཁག་གིས་སྲིད་འཛིན་བྷ་ཤྰར་གོ་གནས་ནས་རྩ་དགོངས་ཞུ་དགོས་པའི་རེ་འདུན་དེར་མོས་མཐུན་བྱས་མེད་སྟབས། ཐེངས་འདིའི་གྲོས་མོལ་ལ་དོན་འབྲས་གང་ཡང་སོན་མེད་སྟབས། ཕྱི་ཟླ་ ༢ ཚེས་ ༡༠ ཉིན་ཕྱོགས་དངོས་གཞིའི་གྲོས་མོལ་ཐེངས་གསུམ་པ་ཚོགས་གཏན་འཁེལ་ཡོད་པ་དེའི་སྟེང་། གྱེན་ལོག་ཤོག་ཁག་གིས་མཉམ་ཞུགས་བྱེད་པར་ཁས་ལེན་བྱས་ཡོད་ཀྱང་། སེ་རི་ཡའི་གཞུང་ཕྱོགས་ནས་དེ་ནི་རྒྱལ་ཁབ་ནང་ཁུལ་ནས་ཐག་གཅོད་བྱེད་རྒྱུ་ཡིན་སྐོར་བརྗོད་ཡོད་འདུག
ཐེངས་འདིའི་གྲོས་མོལ་ལམ་ལྷོང་མ་བྱུང་བའི་འགལ་རྐྱེན་གཙོ་བོ་དག་ནི། སེ་རི་ཡའི་གཞུང་གིས་མི་མང་གྱེན་ལོག་ཤོག་ཁག་གི་བྱེད་སྟངས་ཡོངས་རྫོགས་འཇིགས་སྐུལ་རིང་ལུགས་པར་ངོས་འཛིན་བྱས་ཏེ་གྱེན་ལོག་པ་དང་གྱེན་ལོག་གི་གནས་ཚུལ་ཡོངས་རྩ་མེད་བཟོ་དགོས་སྐོར་རྗོད་ཀྱི་ཡོད་པ་དང་། གྱེན་ལོག་ཤོག་ཁག་གིས་སྲིད་འཛིན་བྷ་ཤྰར་གོ་གནས་ནས་ཕྱིར་འཕུད་ཀྱིས་བར་བརྒལ་སྲིད་གཞུང་འཛུགས་དགོས་པར་ཨུ་ཚུགས་བྱེད་པ་བཅས་ལ་བརྟེན་ཏེ་བྱུང་བ་ཞིག་ཡིན་འདུག
ཐེངས་འདིའི་གྲོས་མོལ་གྱི་མཇུག་བསྡོམས་ཉིན། ལོན་ཌོན་དུ་རྟེན་གཞི་བྱས་པའི་སེ་རི་ཡའི་འགྲོ་བ་མིའི་ཐོབ་ཐང་རྟོག་ཞིབ་ཁང་གིས་བྷེ་བྷེ་སེ་གསར་ཁང་ལ། ཇེ་ནེ་ཝ་གྲོས་མོལ་ཐེངས་གཉིས་པའི་སྐབས་སེ་རི་ཡའི་ནང་ཁྱོན་མི་གྲངས་ ༡༨༧༠ བསད་ཡོད་པ་དང་། སེ་རི་ཡའི་དམག་དཔུང་གིས་འཛིན་བཟུང་བྱས་པའི་གྲོང་ཁྱེར་ཁག་ནང་ཟ་མ་དང་འཐུང་ཆུ། སྨན་སོགས་བཀག་འགོག་བྱས་པར་བརྟེན་མི་མང་མང་པོ་ཤི་ཡོད་སྐོར་བརྗོད་འདུག
སེ་རི་ཡའི་ཕྱི་སྲིད་བློན་ཆེན་མྰོ་ལེན་ (Wali Mullem) གྱིས་གསར་འགོད་པར། གྱེན་ལོག་ཤོག་ཁག་གིས་སྲིད་དབང་རྩིས་སྤྲོད་ཁོ་ནར་འབོད་བརྩོན་གྱིས་གྲོས་མོལ་ཞི་འགྲིག་ཡོང་བར་འགོག་རྐྱེན་བཟོས་ཡོད་ཚུལ་བརྗོད་ཡོད་པ་དང་། དེ་བཞིན། གྱེན་ལོག་ཤོག་ཁག་གི་མགོ་ཁྲིད་ཇར་བྷ་ ( Ahmed Jarba) ཡིས། སྲིད་འཛིན་བྷ་ཤྰར་གྱིས་སྲིད་དབང་རྩིས་སྤྲོད་མ་བྱས་པར་དུ་སེ་རི་ཡའི་དཀའ་རྙོག་སེལ་ཐུབ་ལ་རེ་བ་མེད་ཅེས་གསར་འགོད་པར་བརྗོད་ཡོད་འདུག
གནད་དོན་དབྱེ་ཞིབ་པ་ཚོས། ཐེངས་འདིའི་ཚོགས་ཐོག་ཏུ་སེ་རི་ཡའི་གཞུང་མཉམ་ཞུགས་བྱེད་དོན་ནི། དེ་སྔའི་ཇེ་ནེ་ཝའི་གྲོས་དོན་ལྟར་གྱེན་ལོག་ཚོགས་པ་རྒྱལ་སྤྱིའི་ནང་འཇིགས་སྐུལ་རིང་ལུགས་པར་ངོས་འཛིན་བྱེད་ཐབས་ཀྱི་དམིགས་ཡུལ་བཟུང་ཡོད་པ་ལས། རྒྱལ་ཁབ་ནང་ཁུལ་གྱི་དཀའ་རྙོག་སེལ་ཐབས་བྱེད་པར་འདོད་མོས་གང་ཡང་མེད་པ་དང་། གྱེན་ལོག་ཤོག་ཁག་གིས་ཨ་རི་གཙོས་ནུབ་ཕྱོགས་རྒྱལ་ཁབ་ཚོའི་གནོན་ཤུགས་ལ་བརྟེན་ཏེ་བཅའ་ཁྲིམས་བསྐྱར་བཅོས་དང་སྲིད་འཛིན་བྷ་ཤྰར་མགོ་རྟིང་སློག་ཐབས་ལ་འབད་བརྩོན་བྱེད་ཀྱིན་ཡོད་སྐོར་བརྗོད་འདུག
ནུབ་ཕྱོགས་ཀྱི་སྲིད་དོན་ཉམས་ཞིབ་པ་ཚོས། སེ་རི་ཡའི་ཟིང་འཁྲུག་གང་མགྱོགས་ཞི་འཇགས་མ་བཟོས་ཚེ་འཇིགས་སྐུལ་རིང་ལུགས་པས་གོ་སྐབས་འཇུས་ཏེ་སྟོབས་ཤུགས་རྒྱ་སྐྱེད་བཏང་ནས་ཡང་བསྐྱར་ཨ་རི་གཙོས་ནུབ་ཕྱོགས་རྒྱལ་ཁབ་ཁག་ནང་གཏོར་རྒོལ་གཏོང་སྲིད་པའི་ཉེན་བརྡ་བཏང་ཡོད་འདུག
༢༠༡༢ ལོའི་ཟླ་ ༦ ཚེས་ ༣༠ ཉིན། སུད་སིའི་གྲོང་ཁྱེར་ཇི་ནེ་ཝར་གྲོས་མོལ་ཐེངས་དང་པོ་གནང་ཡོད་ཅིང་། སྐབས་དེའི་གྲོས་ཆོད་ཀྱི་ནང་དོན་གཙོ་བོ་ནི། སེ་རི་ཡའི་ནང་བར་བརྒལ་སྲིད་གཞུང་གསར་འཛུགས་བྱས་ཏེ་རྒྱལ་ཡོངས་གྲོས་མོལ་མགོ་འཛུགས་བྱེད་དགོས་པ་དང་། རྩ་ཁྲིམས་བསྐྱར་བཅོས་དང་སྦྲགས་རང་དབང་དང་དྲང་བདེན་འོག་རྒྱལ་ཡོངས་འོས་བསྡུ་བྱ་རྒྱུ་སོགས་འཁོད་ཡོད་འདུག
༢༠༡༡ ལོའི་ཟླ་ ༣ ཚེས་ ༡༥ ཉིན། སེ་རི་ཡའི་མང་ཚོགས་ཀྱིས་ངོ་རྒོལ་ཤུགས་ཆེན་བྱས་ཏེ་སྲིད་འཛིན་བྷ་ཤཱར་གྱིས་རྩ་དགོངས་ཞུ་དགོས་པའི་འབོད་སྒྲ་བརྒྱབ་ཡོད་སྟབས་སེ་རི་ཡའི་གཞུང་གིས་མང་ཚོགས་མང་པོ་དམར་གསོད་བཙོན་འཇུག་བྱས་ཡོད། དེའི་རྗེས་སེ་རི་ཡའི་མང་ཚོགས་ཀྱིས་རང་དབང་དམག་དཔུང་ཞེས་པ་གསར་འཛུགས་བྱས་ཏེ་སྲིད་གཞུང་གི་དམག་དཔུང་ལ་ཁ་གཏད་བཅག་སྟེ། ད་བར་སེ་རི་ཡའི་ཟིང་འཁྲུག་ཁྲོད་མང་ཚོགས་ས་ཡ་ ༡ ལྷག་རྐྱེན་འདས་དང་། ས་ཡ་ ༩།༥ ལྷག་ཁྱིམ་མཚེས་རྒྱལ་ཁབ་ཁག་ཏུ་སྐྱབས་བཅོལ་དུ་ཕྱིན་ཡོད་འདུག
གསར་འགོད་པ། ལྷ་སྐྱབས་རྒྱལ།