ཨ་རི་དང་ཨབ་གྷན་བར་བདེ་འཇགས་མཉམ་ལས་སྐོར་ལ་གྲོས་ཆོད་ཅིག་བཞག་ཡོད་པ་དེར་ཨབ་གྷན་གཞུང་གིས་མ་འོངས་པར་བསྐྱར་སྣོལ་མིང་རྟགས་འགོད་རྒྱུ་མིན་ཚུལ་བརྗོད་པ་དེས་ཨ་རིའི་གཞུང་སེམས་འཚབ་ལ་གཏད།
ཁ་སང་ཨ་རིའི་སྲིད་འཛིན་ཨོ་བྷ་མ་དང་སྲིད་འཛིན་གཞོན་པ། རྒྱལ་དོན་དྲུང་ཆེ་ཇོན་ཁད་རེ། བདེ་སྲུང་དྲུང་ཆེ་ཧད་གྷིལ། གཞན་གནད་ཡོད་དམག་དཔོན་ཁག་ཅིག་བཅས་ཕོ་བྲང་དཀར་པོར་འཛོམས་ཏེ། ཨབ་གྷན་གྱི་སྲིད་འཛིན་གསར་རྙིང་ཇི་ལྟར་འཕོ་འགྱུར་ཕྱིན་ཡང་དེ་སྔ་ཨ་རི་དང་ཨབ་གྷན་ནི་སི་ཐན་བར་བཞག་པའི་བདེ་འཇགས་མཉམ་འབྲེལ་གྲོས་ཆོད་དེར་བསྐྱར་ནན་གྱི་མིང་རྟགས་འགོད་དགོས་ཚུལ་བརྗོད་ཡོད་པ་དང་། ཨ་རིའི་དམག་དཔུང་ཨབ་གྷན་ནང་མུ་མཐུད་གནས་སྡོད་བྱས་ཏེ་འཇིགས་སྐུལ་རིང་ལུགས་པར་རྒོལ་རྡུང་དང་། ཨབ་གྷན་གྱི་དམག་མི་དང་ཉེན་རྟོག་པ་ཚོར་དམག་སྦྱོང་སྤྲོད་པ་དང་མཚོན་ཆའི་རོགས་སྐྱོར་མུ་མཐུད་བྱེད་རྒྱུ་ཡིན་སྐོར་ལ་གྲོས་མོལ་བྱས་ཡོད་འདུག
ན་ནིང་ཕྱི་ཟླ་ ༡༡ པའི་ནང་ཨབ་གྷན་གྱི་སྲིད་འཛིན་ཁྰར་ཛེ་ (Hamid Karzai) ཡིས། འབྱུང་འགྱུར་ ༢༠༡༤ ལོའི་ཕྱི་ཟླ་ ༤ པའི་ནང་ཨབ་གྷན་མི་མང་ལ་འོས་བསྡུ་བྱས་པ་བརྒྱུད་བསྐོ་བཞག་བྱེད་འཆར་གྱི་སྲིད་འཛིན་གསར་བས། དེ་སྔ་ཨ་རི་དང་ལྷན་དུ་བདེ་འཇགས་མཉམ་འབྲེལ་སྐོར་ལ་གྲོས་ཆོད་བཞག་ཡོད་པ་དེར་མིང་རྟགས་འགོད་རྒྱུ་མིན་ཚུལ་གསལ་བསྒྲགས་སྤེལ་ཡོད་པ་མ་ཟད། དེ་སྔོན་ཨ་རིའི་དམག་དཔུང་གིས་འཛིན་བཟུང་བྱས་པའི་འཇིགས་སྐུལ་རིང་ལུགས་པ་ ༨༠ ལྷག་ལ་འདྲི་གཅོད་གང་ཡང་མ་བྱས་པར་ཀློད་གྲོལ་བཏང་བར་བརྟེན་རྒྱལ་ཁབ་གཉིས་ཀྱི་ཕྱི་སྲིད་འབྲེལ་ལམ་ཇེ་སྡུག་ཏུ་ཕྱིན་ཡོད།
ཟླ་སྔོན་མའི་ནང་ནེའུ་ཡོག་དུས་བབ་ཐོག་གནས་ཚུལ་ཐོན་པར། སྲིད་འཛིན་ཁྰར་ཛེ་ཡིས་ཨ་རིའི་གཞུང་ལ་བཀའ་འདྲི་མ་ཞུས་པར་ཁ་ཆེ་གྲོང་ཁྱེར་ཌོ་བྷེ་ (Dubai) ཕེབས་ཏེ། ཊ་ལི་བྷན་འཇིགས་སྐུལ་ཚོགས་པ་དང་མཉམ་དུ་གསང་བའི་གྲོས་མོལ་བྱས་པའི་གནས་ཚུལ་ཐོན་སྟབས། ཨོ་བྷ་མ་གཞུང་གིས་ཨབ་གྷན་གཞུང་ལ་གནོན་ཤུགས་སྣ་ཚོགས་སྤྲད་དེ་སྲིད་འཛཱིན་ཁྰར་ཛེ་ཡིས་དེ་སྔའི་མཉམ་ལས་གྲོས་ཆོད་ལ་མིང་རྟགས་འགོད་དགོས་པ་ནན་བརྗོད་བྱས་ཡོད།
ཨ་རིའི་ཕོ་བྲང་དཀར་པོའི་མགྲིན་ཚབ་པས། སྲིད་འཛིན་ཨོ་བྷ་མས་ ༢༠༡༤ ལོའི་རྗེས་ནས་ཨ་རིའི་དམག་མི་ཨབ་གྷན་ནས་ཕྱིར་འཐེན་བྱེད་དགོས་མིན་ཐག་གཅོད་བྱས་མེད་སྟབས། ཨབ་གྷན་གྱིས་གྲོས་ཆོད་ལ་མིང་རྟགས་མ་བཀོད་པར་ཐག་གཅོད་བྱེད་ཐབས་མེད། ཨབ་གྷན་གྱི་མགོ་ཁྲིད་ཚོས་གཟའ་འཁོར་འགའི་ནང་གང་མགྱོགས་མིང་རྟགས་འགོད་དགོས་པ་ལས་འགོར་འགྱངས་བྱེད་མི་ཆོག་ཚུལ་བརྗོད་འདུག
འོན་ཀྱང་། ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ཇོན་མད་ཀན་ (John McCain) གྱིས་ཨོ་བྷ་མ་སྲིད་གཞུང་གིས་ཨ་རིའི་དམག་མི་ཆ་ཚང་ཨབ་གྷན་ནས་གང་མགྱོགས་ཕྱིར་འཐེན་བྱ་རྒྱུ་ཡིན་པའི་རྣམ་འགྱུར་བསྟན་ཡོད་སྟབས། སྲིད་འཛིན་ཁྰར་ཛེ་ཡིས་ཊ་ལི་བྷན་ཚོགས་པར་མཉམ་དུ་ཞི་མོལ་བྱེད་དགོས་བྱུང་བ་རེད། དེར་བརྟེན། སྲིད་འཛིན་ཨོ་བྷ་མའི་ལས་འཁུར་མ་རྫོགས་སྔོན་ལ་ཨ་རིའི་དམག་མི་ཕྱིར་འཐེན་བྱེད་རྒྱུར་བསམ་བློ་གཏོང་གི་ཡོད་ཚུལ་བརྗོད་ཡོད་འདུག
དམག་དོན་དབྱེ་ཞིབ་པ་ཚོས། སྲིད་འཛིན་ཁྰར་ཛེ་ཡིས་དེ་སྔའི་གྲོས་ཆོད་ལ་བསྐྱར་དུ་མིང་རྟགས་བཀོད་པ་ཡིན་ན། ཨབ་གྷན་ནང་བདེ་འཇགས་བརྟན་བརླིང་དང་དཔལ་འབྱོར་འཕེལ་རྒྱས་སོགས་ལ་ཁེ་ཕན་ཆེན་པོ་ཡོད་ཅེས་དང་། ཡང་ཁག་ཅིག་གིས་ཨ་རིའི་དམག་དཔུང་གཙོས་ནུབ་ཕྱོགས་རྒྱལ་ཁབ་ཚོའི་དམག་མི་ཨབ་གྷན་ནང་མུ་མཐུད་བསྡད་ཚེ། ཨབ་གྷན་ནང་མི་གསོད་ཁྲག་སྦྱོར་གྱི་གནས་ཚུལ་བྱུང་སྟེ་རྒྱལ་ཁབ་ཀྱི་དཔལ་འབྱོར་དང་མི་མང་གི་འཚོ་བར་གྱོང་གུད་ཆེན་པོ་འཕོག་རྒྱུ་ཡིན་སྐོར་རྗོད་བཞིན་ཡོད་འདུག
ངོ་མ་བདེན་གི