དེ་རིང་ངྷ་སའི་བདེ་ལེགས་སྨན་ཁང་གིས་དུས་བཀག་གཟུགས་གཞི་བརྟག་དཔྱད་སྡེ་ཚན་ཟེར་བ་ཞིག་གསར་དུ་སྒོ་འབྱེད་དང་བསྟུན་ཏེ་འཕྲོད་བསྟེན་བཀའ་བློན་སོགས་ཀྱིས་བོད་མི་ཚོས་ན་ཚ་མ་བྱུང་སྔོན་ལ་གཟུགས་པོར་བརྟག་དཔྱད་ཡང་ཡང་གཏོང་རྒྱུ་གལ་ཆེན་ཡིན་སྐོར་མི་མང་ལ་འབོད་སྐུལ་ཞུས་སོང་།
དེ་རིང་ཕྱི་དྲོའི་ཆུ་ཚོད་ ༣ པའི་སྟེང་བདེ་ལེགས་སྨན་ཁང་གི་ཊི་སྦི་(T.B) སྡེ་ཚན་དུ། དུས་བཀག་གཟུགས་གཞི་བརྟག་དཔྱད་ (Delek Private OPD) ཅེས་པའི་སྡེ་ཚན་གསར་པ་ཞིག་སྒོ་འབྱེད་གནང་ཡོད་ཅིང་། སྡེ་ཚན་དེ་དབུ་འབྱེད་ཀྱི་སྐུ་མགྲོན་གཙོ་བོར་བོད་མིའི་སྒྲིག་འཛུགས་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་དང་། གཞན། འཕྲོད་བསྟེན་དྲུང་ཆེ་བསོད་ནམས་ཆོས་འཕེལ་དང་སྐུའི་བླ་སྨན་ཚེ་བརྟན་རྡོ་རྗེ། བདེ་ལེགས་སྨན་ཁང་གི་འགན་འཛིན་སྤྱི་འཐུས་ཟླ་བ་ཕུན་སྐྱིད་ལགས་བཅས་ལྷན་བཞུགས་ཐོག བཙན་བྱོལ་བོད་མིའི་འཕྲོད་བསྟེན་སྐོར་ལ་གསར་འགོད་གསལ་བསྒྲགས་ཤིག་ཀྱང་སྤེལ་སོང་།
འགན་འཛིན་ཟླ་བ་ཕུན་སྐྱིད་ལགས་ཀྱིས་བདེ་ལེགས་སྨན་ཁང་གི་དུས་བཀག་གཟུགས་གཞི་བརྟག་དཔྱད་སྡེ་ཚན་སྐོར་ངོ་སྤྲོད་གནང་བ་ལྟར་ན། རྒྱ་གར་གྲོང་ཁྱེར་ཁག་གི་སྒེར་གྱི་སྨན་ཁང་མང་པོའི་ནང་དུས་བཀག་གཟུགས་གཞི་བརྟག་དཔྱད་ལས་རིམ་འདི་ཡོད་ཀྱང་། ཁོང་ཚོས་མང་ཚོགས་ལ་གོ་རྟོགས་སྤེལ་ཐབས་དང་འཕྲོད་བསྟེན་བདེ་ཐང་ལས་ལྷག་ཅིག་ཚོང་ལས་གཙོ་བོར་བཟུང་སྟེ་བརྟག་དཔྱད་གནང་ཚར་རྗེས་འདི་དང་དེ་ལ་དོགས་པ་འདུག འདི་དང་དེ་ལ་བསྐྱར་དུ་བརྟག་དཔྱད་བྱེད་དགོས་ཀྱི་འདུག་ཟེར་ནས་མུ་མཐུད་དངུལ་བཟོ་ཐབས་བྱེད་བཞིན་ཡོད་པ་དང་། བདེ་ལེགས་སྨན་ཁང་གི་དུས་བཀག་གཟུགས་གཞི་བརྟག་དཔྱད་སྡེ་ཚན་འདི་ལ་མཚོན་ན། ན་ཚ་སྔོན་འགོག་ཆེད་ལམ་སྟོན་བྱས་ཏེ་མང་ཚོགས་ཀྱི་འགྲོ་གྲོན་དང་གཟུགས་པོའི་གནས་བབ་ཐད་ཕུགས་རྒྱང་རིང་པོར་ཕན་ཐོགས་པ། སོ་སོའི་འཕྲོད་བསྟེན་ལ་སོ་སོས་བདག་པོ་རྒྱག་ཐུབ་ཐབས་སོགས་དམིགས་ཡུལ་དུ་བཟུང་ཡོད། ཅེས་བརྗོད་སོང་།
ཁོང་གིས་ད་སྔ་བདེ་ལེགས་སྨན་ཁང་དུ་ཆེད་ལས་སྨན་པ་མེད་ཀྱང་སྐུའི་བླ་སྨན་ཚེ་བརྟན་རྡོ་རྗེ་ལགས་ཀྱིས་རྒྱ་གར་གྱི་ཁྱད་ལས་སྨན་པ་མང་པོར་འབྲེལ་བ་ཡོད་སྟབས། སྙིང་གི་ན་ཚ་གཙོས་ནད་རིགས་ག་འདྲ་ཞིག་ཡིན་ཡང་ཁོང་གིས་ངོ་སྤྲོད་བྱས་ཏེ་ཕྱི་ལོགས་ཀྱི་སྨན་པ་བསྟེན་གཏུགས་བྱེད་ཚེ་མི་སྒེར་གྱི་འགྲོ་གྲོན་བཅས་ལ་ཕན་ཐོགས་ཡོད་དང་། དེ་མིན་ངྷ་ས་ཁུལ་གྱི་རྒྱ་གར་སྨན་ཁང་བྷ་ལ་ཇེ་ (Balaji hospital) དང་། ཧྥོ་ཊི་སྨན་ཁང་ (Fortis hospital)སོགས་ལ་བསྟེན་གཏུགས་བྱས་ཀྱང་སྨན་རིན་ཆག་ཡང་སོགས་ལ་དགེ་མཚན་ཆེན་པོ་ཡོད་སྐོར་བརྗོད་སོང་།
དེའི་རྗེས་སྐུའི་བླ་སྨན་ཚེ་བརྟན་རྡོ་རྗེ་ལགས་ཀྱིས་གཟུགས་པོར་བརྟག་དཔྱད་བྱ་རྒྱུ་གལ་ཆེན་ཡིན་པའི་སྐོར་ལ། ང་ཚོའི་ལས་རིམ་གསར་བ་འདིས་སྤྱི་ཚོགས་ནང་ང་ལ་ན་ཚ་མ་སླེབ་གོང་ནས་ངས་གཟུགས་པོར་བརྟག་དཔྱད་མ་བྱས་ན་ང་ལ་ན་ཚ་འདི་འདྲ་ན་སྲིད་པ་རེད་སྙམ་པའི་གོ་རྟོགས་སྤེལ་རྒྱུ་གལ་ཆེན་པོ་རེད། ང་ཚོའི་བོད་པའི་སྤྱི་ཚོགས་ནང་ན་ཚ་ན་དུས་མ་གཏོགས་སྨན་ཁང་ལ་ཡོང་བའི་ལུགས་སྲོལ་མི་འདུག དེར་བརྟེན། ང་ཚོས་ལས་རིམ་འདི་ལ་དུས་བཀག་གཟུགས་གཞི་བརྟག་དཔྱད་ཅེས་བྲིས་ཡོད། ང་ཚོ་བོད་པའི་བསམ་བློའི་ནང་གོ་རྟོགས་སྤེལ་མ་ཐུབ་པར་དུས་ཚོད་གང་ཡང་མ་བཀག་པར་འཐོན་བསྡད་པ་ག་ལེར་མིའི་བསམ་བློའི་ནང་བསླེབ་འགྲོ་རྒྱུ་རེད་བསམ་གྱི་འདུག དེ་འདྲ་ཡིན་དུས་མི་མང་ཡོངས་ལ་ཁྱབ་བསྒྲགས་ཤུགས་ཆེན་བྱེད་པའི་གསལ་བཤད་ཅིག་གནང་རོགས་ཞེས་འབོད་སྐུལ་རྒྱུ་ཡིན་ཞེས་བརྗོད་བྱུང་།
མཇུག་ཏུ་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གིས། ད་རབ་བདེ་ལེགས་སྨན་ཁང་དུ་དུས་བཀག་གཟུགས་གཞི་བརྟག་དཔྱད་སྡེ་ཚན་ཞིག་མགོ་འཛུགས་གནང་ཡོད་སྟབས། ངྷ་སའི་གཡས་གཡོན་གྱི་བོད་མི་གཙོས་ཕྱོགས་མཐའ་ཁག་ནས་ཕེབས་པའི་བོད་རིགས་ཚོས་བེད་སྤྱོད་ཡག་པོ་གཏོང་རྒྱུ་གལ་ཆེན་རེད། དེ་དང་ཆབས་ཅིག་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་སྲི་ཞུ་བ་རྣམ་པ། དེ་བཞིན་འབྲེལ་ཡོད་ལས་བྱེད། བོད་མི་ཉམ་ཐག ཆབ་སྲིད་བཙོན་ཟུར་རྣམ་པ་བཅས་ལ་འཕྲོད་བསྟེན་ལས་ཁུངས་ཀྱིས་སྨན་རིན་སོགས་ཀྱི་རོགས་སྐྱོར་གནང་གི་ཡོད་སྟབས། བདེ་ལེགས་སྨན་ཁང་གི་མཐུན་རྐྱེན་འདི་དག་བེད་སྤྱོད་གནང་རོགས་ཞེས་འབོད་སྐུལ་ཞུ་རྒྱུ་ཡིན། བདེ་ལེགས་སྨན་ཁང་བརྒྱུད་འཕྲོད་བསྟེན་ལས་ཁུངས་ཀྱི་ལས་གཞི་མང་པོ་ཞིག་སྤེལ་ཐུབ་ཀྱི་ཡོད། དཔེར་ན། ཊི་སྦི་སྔོན་འགོག་དང་སྨན་བཅོས་ལྟ་སྐྱོང་ལས་གཞི་གཉིས་བདེ་ལེགས་སྨན་ཁང་གི་ལས་གཞི་གལ་ཆེན་གྲས་ཆགས་ཡོད། དེ་མིན། མ་དང་བྱིས་པའི་འཕྲོད་བསྟེན་ཞེས་པའང་འཕྲོད་བསྟེན་ལས་ཁུངས་ཀྱི་ལས་གཞི་གལ་ཆེན་ཞིག་ཡིན། དེ་ནི་ངྷ་སའི་གཡས་གཡོན་དུ་ཡོད་པའི་བུད་མེད་སྦྲུམ་མ་ཚོར་གཟུགས་པོར་བརྟག་དཔྱད་དང་བྱིས་པ་སྐྱེས་ནས་ལོ་ལྔ་མན་ཆད་ལ་འགོག་སྨན་སོགས་ཀྱི་མཐུན་རྐྱེན་སྦྱོར་གྱི་ཡོད་སྟབས། ཚང་མས་མ་གོ་མ་ཐོས་མེད་པར་མཁྱེན་པ་གནང་རོགས་ཅེས་གསུངས་སོང་།
བདེ་ལེགས་སྨན་ཁང་གི་དུས་བཀག་གཟུགས་གཞི་བརྟག་དཔྱད་སྡེ་ཚན་གྱིས་མིའི་གཟུགས་གཞི་བདེ་ཐང་བརྟག་དཔྱད་ལ་རིམ་པ་གསུམ་དུ་དབྱེ་ཡོད་པ་དང་། དེ་དག་གི་ཁོངས་སུ་མིའི་གཟུགས་པོའི་ཁྲག་རིགས་ཚང་མ་དང་མཁལ་མ། སྙིང་། མཆིན་པ་བཅས་ལ་བརྟག་དཔྱད་གཏོང་རྒྱུའི་ལས་རིམ་དང་ཆ་རྐྱེན་སོགས་ཡོད་འདུག
གསར་འགོད་པ། ལྷ་སྐྱབས་རྒྱལ།
