ང་ཚོས་འདི་ནས་ནུས་པ་ཐོན་རྒྱུ་མེད་པའི་སྐད་འབོད་རྒྱག་རྒྱུའི་ཐོག་གཟབ་གཟབ་བྱེད་དགོས།

༧གོང་ས་མཆོག་གིས་རྒྱ་གར་བྱང་ཤར་ཤི་ལོང་མི་མང་ལ་བཀའ་སློབ་སྩོལ་སྐབས་བཙན་བྱོལ་ནང་སྐད་འབོད་སོགས་ཀྱི་ལས་འགུལ་སྤེལ་སྐབས་གཟབ་དགོས་པ་དང་། འདི་ནས་ཟང་ཟིང་བྱས་ཏེ་རྒྱ་མིར་ཁོང་ཁྲོ་བསླངས་ན་བོད་ནང་དམ་དྲག་བྱེད་ཀྱི་ཡོད་སྟབས། ནང་ཆོས་ཀྱི་འགྲོ་འོང་བརྒྱུད་དེ་རྒྱ་རིགས་མི་མང་ལ་མཛའ་འབྲེལ་འཛུགས་གལ་ཆེ་སྐོར་གསུངས་འདུག

ཚེས་ ༥ ཉིན་༧གོང་ས་མཆོག་གིས་རྒྱ་གར་བྱང་ཤར་ཁུལ་དུ་མཛད་འཕྲིན་མཇུག་བསྒྲིལ་ལ་ཉེ་བ་དང་བསྟུན་ཏེ། ཉིན་དེའི་སྔ་དྲོར་ཤི་ལོང་དུ་ས་གནས་བོད་མི་གཙོས་རྒྱ་གར་བྱང་ཤར་ཁུལ་གྱི་མི་མང་ཆིག་སྟོང་ལྷག་ལ་བཀའ་སློབ་བསྩལ་ཏེ། ན་གཞོན་ཚོས་གནའ་དེང་ཟུང་འབྲེལ་གྱི་ཤེས་ཡོན་སློབ་སྦྱོང་བྱེད་དགོས་པ་དང་། ལྷག་པར་དུ་ནང་ཆོས་ཐོག་དོ་སྣང་བྱ་གལ་ཆེ་སྐོར་གསུངས་པ་དང་འབྲེལ་ཏེ་བོད་པའི་ཆབ་སྲིད་གནད་དོན་སྐོར་ལ། བོད་ཀྱི་ཆབ་སྲིད་གནས་སྟངས་ཐོག་ངོས་རང་ཐད་ཀར་འབྲེལ་བ་མེད་པ་ལྟ་བུ་རེད། འོན་ཀྱང་ངོས་རང་བོད་པའི་སྤྱི་འབངས་ཤིག་ཆགས་ཡོད། དེར་བརྟེན་སྤྱི་པའི་གནས་སྟངས་བརྩིས་ན། བོད་ཀྱི་དཀའ་ངལ་གཙོ་བོ་རྒྱ་ནག་གཞུང་ལ་ཐུག་གི་ཡོད། རྒྱ་ནག་ནི་སྟོབས་ཆེན་རྒྱལ་ཁབ་ཅིག་རེད། ང་ཚོས་འདི་གར་སྐད་བརྒྱབ་སྟེ་སྤོ་འཕེལ་རྒྱུ་ཧ་ཅང་ཁག་པོ་ཆགས་ཡོད། ང་ཚོས་འདི་གར་སྐད་བརྒྱབ་ནས་རྒྱ་མི་ཁོང་ཁྲོ་ལང་རྒྱུ་དེ་འདྲ་བྱས་ན། ཁོང་ཁྲོ་ང་ཚོར་ལངས་ཡོད་ཁོང་ཁྲོ་བསྟན་ས་བོད་ནང་གི་བོད་མིར་སྟོན་གྱི་འདུག

དེ་སྔ་བོད་བར་ཞི་བའི་གོམ་བགྲོད་བྱེད་རྒྱུ་ཡིན། ཞེས་བརྗོད་སྐབས། དེ་དུས་ངོས་ཀྱིས་གཞོན་ནུའི་འགན་ཁུར་མཁན་ཚོ་ཐུག་སྟེ་ཁྱེད་རང་ཚོའི་སྙིང་སྟོབས་ཧ་ལས་པ་རེད། འོན་ཀྱང་བོད་བར་ཞི་བའི་གོམ་བགྲོད་བྱས་ནས་འགྲོ་ཐུབ་ཀྱི་མ་རེད། གང་ལ་ཞེ་ན། ས་མཚམས་ལ་སླེབ་སྐབས་རྒྱ་གར་གཞུང་གིས་གཏོང་གི་མ་རེད། བལ་ཡུལ་བརྒྱུད་ནས་ཕྱིན་ན་བལ་པོས་གཏོང་གི་མ་རེད། ཅི་སྟེ་ངེས་མེད་ཁྱེད་རང་ཚོས་མངོན་ལྐོག་གཉིས་ནས་བོད་ནང་འཛུལ་ཐུབ་པའི་དབང་དུ་བཏང་རུང་། བོད་ནང་གི་སེམས་ཤུགས་ཡོད་མཁན་གྱི་མི་དེ་དག་དོན་ཡོང་གི་རེད། སྐབས་དེར་སྡུག་ན་ཁ་ཐུག་མེ་མདའ་བརྒྱབ་ནས་གསོད་ཉེན་ཡོད། དེ་ལྟར་མ་བྱས་ཀྱང་བཙོན་འཇུག་བྱས་ཏེ་སེམས་ཤུགས་ཡོད་མཁན་རྣམས་མེད་པ་ཆགས་ཀྱི་རེད། དཀྲོག་རྐྱེན་མ་སློངས། ཞེས་བརྗོད་པ་ཡིན། འོན་ཀྱང་མུ་མཐུད་ཕྱིན་ཏེ་རྒྱ་གར་གཞུང་གིས་བཀག་པ་རེད། བོད་ནང་གི་བོད་མིས་རྒྱ་གར་ནས་ཞི་བའི་གོམ་བགྲོད་ཡོང་གི་ཡོད་པ་རེད། དེར་བརྟེན། ང་ཚོས་ཀྱང་ལས་དོན་སྤེལ་དགོས་རེད་ཅེས་བརྗོད་རྐྱེན་མི་གང་ཙམ་ཞིག་བཙོན་ཁང་ནང་ཚུད་འདུག

གང་ལྟར་བོད་ཀྱི་གནད་དོན་རྒྱ་ནག་གཞུང་ལ་ཐུག་ཡོད་སྟབས། ང་ཚོས་རྒྱ་ཆེ་ས་དང་ཕུགས་རྒྱང་རིང་པོར་བསམ་བློ་བཏང་ནས་བྱེད་དགོས་པ་རེད་མ་གཏོགས་འཕྲལ་སེལ་ཁོང་ཁྲོ་ལང་སྐབས་ཀྱི་ལས་ཀ་བྱས་ན་ཕན་ཐོགས་ཡོང་རྒྱུ་ཧ་ཅང་ཁག་པོ་རེད། མདོ་དོན་ང་ཚོས་རྒྱ་མི་ཁོང་ཁྲོ་ལང་རྒྱུར་ཤུགས་བརྒྱབ་ནས་ཕྱིན་ན་གྱོང་གུད་བོད་ནང་གི་བོད་མིར་རག་གི་རེད། རྒྱ་མི་ས་ཡ་སྟོང་ཕྲག་གཅིག་ལྷག་ཙམ་ཡོད། ང་ཚོ་བོད་མི་ས་ཡ་དྲུག་རེད། རྒྱ་མི་ས་ཡ་སྟོང་ཕྲག་གཅིག་ལྷག་ཙམ་ཡོད་པ་དེ་ང་ཚོས་དགྲ་བཟོས་ན་ཡག་པོ་མེད། རྒྱ་མི་ས་ཡ་སྟོང་ཕྲག་གཅིག་ལྷག་ཙམ་དེ་གཉེན་དུ་བསྒྱུར་ཐུབ་ན་ང་ཚོར་ཕན་ཐོགས་ཡོད། གང་ལྟར་རྒྱ་མི་དུང་ཕྱུར་བཅུ་གསུམ་ཙམ་ཡོད་པ་རྣམས་གཉེན་དུ་བསྒྱུར་རྒྱུར་ང་ཚོར་ཐབས་ལམ་ཞིག་འདུག གང་ལ་ཞེ་ན། དེང་སྐབས་རྒྱ་ནག་ནང་དུ་ནང་པའི་ཆོས་བྱེད་མཁན་ས་ཡ་བཞི་བརྒྱ་ནས་ལྔ་བརྒྱ་བར་ཡོད་སྐོར་རྗོད་ཀྱི་འདུག དུང་ཕྱུར་བཅུ་གསུམ་ནང་ནས་དུང་ཕྱུར་བཞི་ལྔ་ཙམ་ནས་ནང་ཆོས་ལ་དོ་སྣང་བྱེད་ཀྱི་ཡོད། དཔེར་ན། ངྷ་སར་ཧ་ལམ་བདུན་ཕྲག་རེ་རེའི་ནང་རྒྱ་ནག་ནས་ཡོང་བའི་མི་བཅུ་བཅོ་ལྔ་དེ་འདྲ་ཐུག་གི་ཡོད། ཁོང་ཚོ་ཐུག་སྐབས་མང་ཆེ་བས་མིག་ཆུ་བཏང་སྟེ་རྒྱ་ནག་ནང་ཡོད་པའི་ནང་པ་ཚོ་མ་བརྗེད་པ་བྱེད་རོགས། ཞེས་བརྗོད་ཀྱི་འདུག ང་ཚོ་གཉེན་དུ་བསྒྱུར་རྒྱུའི་ཆ་རྐྱེན་གཅིག་དེའི་ཐོག་ཏུ་ཚང་ཡོད།

དེང་སྐབས་བོད་ནང་བླ་མ་དང་དགེ་བཤེས་ཡག་པ་དེ་དག་གིས་རྒྱ་ནག་ནང་ཕྱིན་ཏེ་ནང་ཆོས་འགྲེལ་བཤད་རྒྱག་གི་ཡོད། སྔར་འགྲོ་མགོན་ཆོས་རྒྱལ་འཕགས་པ་ཡོད་སྐབས་དང་མན་ཇུའི་སྐབས་འབྲེལ་བ་བྱུང་ཡོད། འོན་ཀྱང་རྒྱ་ནག་ནང་གི་ནང་པ་ཚོས་མཚན་ཉིད་བལྟས་ཞེས་པ་ཧ་ལམ་བྱུང་མྱོང་མེད། དེ་རིང་ས་ཁང་རྒྱ་ནག་ནང་གི་ནང་པའི་དགེ་འདུན་པ་དེ་དག་གིས་མཚན་ཉིད་སློབ་སྦྱོང་བྱེད་ཀྱི་འདུག སྔ་མོ་ཐེ་ཝན་ལ་ཆོས་ཚོགས་ཤིག་ཡོད། ཁོང་ཚོའི་ཁོངས་རྒྱ་ནག་ནས་ཡོང་བའི་རབ་བྱུང་ཕོ་མོ་རྣམས་ཀྱིས་རྟགས་གསལ་སྦྱངས་ཏེ་ཧ་ཅང་དོ་སྣང་བྱེད་ཀྱི་འདུག དེ་དག་ང་ཚོའི་མཐུན་པའི་ཆ་རྐྱེན་གཙོ་བོ་ཞིག་རེད། ཅེས་སོགས་ཀྱི་བཀའ་གནང་ཡོད་པ་བོད་མིའི་སྒྲིག་འཛུགས་ཀྱི་དྲ་བ་ལས་བཤུས་པ་ཡིན།