རྒྱ་གཞུང་གིས་ནག་ཆུ་སོག་རྫོང་ཁྲི་རྡོ་ཡུལ་ཚོའི་གྲྭ་བ་བཞི་འཛིན་བཟུང་བྱས་ཏེ། ད་ཆར་གར་ཡོད་མ་ཤེས་པར་ལྷག་ཡོད་འདུག
ངག་དབང་ཐར་པ་ལགས་ཀྱིས་འདི་གར་གནས་ཚུལ་བཏང་འབྱོར་ལྟར་ན། ཟླ་འདིའི་ཕྱི་ཚེས་ ༢ ཉིན་རྒྱ་གཞུང་གིས་ནག་ཆུ་སོག་རྫོང་ཁྲི་རྡོ་ཡུལ་ཚོ་རྡོ་བ་གཤར་ཚ་དགོན་པའི་གྲྭ་པ་ ༤ ཡིས། ས་གནས་སུ་བོད་རང་བཙན་གྱི་ཡིག་ཆ་ ༤༠ ལྷག་སྦྱར་འགྲེམས་བྱས་ཡོད་པ་དང་། རྒྱ་གཞུང་གི་སྤྲད་པའི་དགོན་པའི་སྒོ་བྱང་མེད་པ་བཟོས་པ། དགོན་པར་བཅའ་སྡོད་རུ་ཁག་གི་སྒོ་དང་སྒེའུ་ཁུང་ལ་རྡོ་གཞུས་ཡོད་ཚུལ་སོགས་ཀྱི་ཉེས་མིང་བཀལ་ཏེ་འཛིན་བཟུང་བྱས་རྗེས་སོག་རྫོང་དུ་འཁྲིད་ཡོད་ཀྱང་། ནང་མི་ཉེ་འབྲེལ་ཚོས་ཁོང་ཚོ་གར་ཡོད་ཅི་བྱུང་གི་གནས་ཚུལ་ཅི་ཡང་མ་ཤེས་པར་ལྷག་ཡོད་འདུག
ཐེངས་འདིར་རྒྱ་གཞུང་གིས་འཛིན་བཟུང་བཙན་འཁྲིད་བྱས་པའི་གྲྭ་བ་དེ་དག་ནི། དཔལ་འགྲུབ་ཚང་གི་རང་ལོ་ ༢༠ ཡིན་པའི་གྲྭ་ཚུལ་ཁྲིམས་དཔལ་བཟང་དང་། བསོད་ཚིམ་ཚང་གི་རང་ལོ་ ༡༥ ཡིན་པའི་གྲྭ་བློ་བཟང་ཡེ་ཤེས། མི་ཆུང་ཚང་གི་རང་ལོ་ ༢༢ ཡིན་པའི་གྲྭ་སྐལ་བཟང་བྱམས་པ། ཨ་གནམ་ཚང་གི་རང་ལོ་ ༢༣ ཡིན་པའི་གྲྭ་སྐལ་བཟང་རྡོ་རྗེ་བཅས་ཡིན་འདུག
རྡོ་བ་གཤར་ཚ་དགོན་ནི། བོད་རབ་བྱུང་བདུན་པའི་ཆུ་སྟག་ཕྱི་ལོ་ ༡༤༢༢ ཙམ་ལ་ཞང་ཞུང་ཆོས་དབང་གྲགས་པས་ཕྱག་བཏབ་པ་ཞིག་ཡིན་འདུག་ལ། ལོ་ངོ་ ༥༣༨ ཙམ་གྱི་ལོ་རྒྱུས་ཡོད་པའི་དགེ་ལུགས་པའི་དགོན་པ་ཞིག་ཡིན་འདུག
གསར་འགོད་པ། དོན་གོ
