བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༡༧ སྟེང་གི་རྩོམ་སྒྲིག་པའི་གཏམ།
ཉེ་ལམ་བོད་མིའི་སྒྲིག་འཛུགས་དང་ཨ་སམ་མངའ་གཞུང་མཉམ་འབྲེལ་ཐོག་རྒྱལ་ས་གྷོ་ཧ་ཊི་རུ་བོད་ཀྱི་དུས་སྟོན་ཟེར་བ་ཞིག་གོ་སྒྲིག་གནང་། བོད་ཕྱོགས་ནས་༧གོང་ས་མཆོག་གིས་དུས་སྟོན་དབུ་འབྱེད་དང་། སྲིད་སྐྱོང་མཆོག་དང་ཁྲི་ཟུར་ཟམ་གདོང་རིན་པོ་ཆེ་སོགས་ཀྱིས་གཏམ་བཤད་སྤེལ་ཅིང་ཟློས་གར་ཚོགས་པས་རམ་འདེགས་བྱས། ཨ་སམ་མངའ་སྡེའི་སྤྱི་ཁྱབ་བློན་ཆེན་ཊ་རིན་གྷོ་གཱོ་དང་ཨ་རུ་ན་ཅལ་མངའ་སྡེའི་ཡུལ་སྐོར་སྤྲོ་འཆམ་བློན་ཆེན་པད་མ་མཁའ་འགྲོ དེ་བཞིན། རྟ་དབང་དགོན་པའི་མཁན་པོ་གུ་རུ་རིན་པོ་ཆེ་སོགས་དུས་སྟོན་ཐོག་མཉམ་ཞུགས་གནང་སྟེ། མཉམ་འབྲེལ་རིག་གནས་འགྲོ་འོང་དང་མྱོང་ཚོར་བརྗེ་ལེན་གྱི་ལས་དོན་འདི་ལ་ཕྱོགས་གཉིས་ཀས་གདེང་འཇོག་ཚད་མཐོ་གནང་འདུག
བོད་པ་ཚོ་བཙན་བྱོལ་དུ་གྱར་བའི་དོན་གོ་ཟེར་ན་འདྲ། འདས་པའི་མི་ལོ་ལྔ་བཅུ་ལྷག་རིང་གི་འབུར་དུ་ཐོན་པའི་བྱས་རྗེས་ཆེ་ཤོས་དང་གླེང་རིན་ཡོད་པ་གཅིག་ནི། བོད་བརྒྱུད་ནང་བསྟན་གཙོས་བོད་པའི་ཆོས་དང་རིག་གཞུང་འཛམ་གླིང་ཐོག་ཁྱབ་སྤེལ་གང་འཚམ་ཐུབ་ཡོད་པ་འདི་རེད། ལྷག་པར་དུ་ལོ་རྒྱུས་ཐོག་རིགས་དང་རུས་རྒྱུད། ཆོས་དང་རིག་གནས་ཀྱི་འབྲེལ་བ་དམ་ཟབ་ཡོད་པའི་ཆེན་པོ་ཧོར་ཡུལ་དང་ཧི་མ་ལ་ཡའི་རི་རྒྱུད་ཀྱི་མི་རིགས་དག་དང་འབྲེལ་ལམ་བསྐྱར་གསོ་བྱས་ཏེ། ཡུལ་ལུང་དེ་དག་གི་ཕ་མེས་ཡང་མེས་ཚོས་རྔུལ་ཁྲག་ལ་བརྗེ་བའི་གདོད་མིའི་ཆོས་རིག་ཉམས་གསོ་དང་། བོད་པ་དང་ཡུལ་ལུང་འདི་དག་བར་ལེགས་སྐྱེས་འབུལ་རེས་བྱས་པ་འདི་ཕྱོགས་གཉིས་ཀར་ཁེ་ཕན་ཡོད་པའི་ལེའུ་གསར་པ་ཞིག་ཡིན།
འབྲུག་དང་འབྲས་ལྗོངས་ལ་དྭགས། མོན་དང་སྦལ་ཏི་ཟངས་དཀར། དེང་སྐབས་བཙན་བྱོལ་བོད་མིའི་དགོན་སྡེ་ཁག་དང་སློབ་གྲྭ་ཁག་ཏུ་ཧི་མ་ལའི་རི་རྒྱུད་ཀྱི་སློབ་གཉེར་བ་ཇེ་མང་དུ་འགྲོ་བཞིན་ཡོད། ཉིས་སྟོང་བརྒྱད་ཀྱི་སྔོན་ལ་བོད་ནས་འབྱོར་བཞིན་པའི་གྲྭ་རྒྱུན་དང་སློབ་འཇུག་གི་གྲངས་ཚད་དེ་དེང་སྐབས་ཧི་མ་ལའི་རི་རྒྱུད་གྱི་ཕྲུ་གུ་ཚོས་ཚབ་བྱེད་ཀྱིན་ཡོད། ཧི་མ་ལའི་རི་རྒྱུད་ཁུལ་དུ་ནང་ཆོས་དང་སྐད་ཡིག་ཐོག་ཕྱག་རྗེས་རླབས་ཆེན་བཞག་དང་འཇོག་མཁན་ཕལ་ཆེ་བ་གདན་ས་གསུམ་གཙོས་པའི་བོད་པའི་དགོན་སྡེ་དང་སློབ་གྲྭ་ཁག་ནས་སྐྱེད་སྲིང་བྱས་པ་རྐྱང་ཆགས་ཡོད། མཚོ་སྣ་རིན་པོ་ཆེ་མཆོག་དང་གུ་རུ་རིན་པོ་ཆེ་མཆོག དེ་བཞིན་བླ་མ་ཆོས་འཕེལ་བཟོད་པ་དང་ལོ་ཆེན་རིན་པོ་ཆེ། གཞན་ད་ལྟའི་དགའ་ལྡན་ཁྲི་ཐོག་བརྒྱ་དང་གཉིས་པ་རི་རྫོང་རིན་པོ་ཆེ་མཆོག་ཀྱང་སྐྱེས་ས་ལ་དྭགས་ཡིན་ཡང་། བོད་རང་བཙན་མ་ཤོར་སྔོན་ལ་ལྷ་སར་སློབ་གཉེར་གནང་སྟེ། ཕྱིས་སུ་རྒྱ་ནག་གིས་བོད་སར་བཙན་བཟུང་བྱས་རྗེས་ཀྱང་བོད་མི་ཚོ་དང་ལྷན་དུ་རྒྱ་གར་ནང་སྐྱབས་བཅོལ་དུ་ཕེབས་ཏེ་བོད་པ་ཚོ་དང་མུ་མཐུད་དེ་སྐྱིད་སྡུག་མཉམ་མྱོང་གནང་ཡོད།
བཙན་བྱོལ་བོད་མི་ཚོས་རྒྱ་གར་བྱང་ཤར་ཁུལ་དུ་ཆོས་དང་རིག་གཞུང་གི་འབྲེལ་ལམ་འཕེལ་རྒྱས་སུ་བཏང་བ་དེ་ལོ་རྒྱུས་ལ་དྲན་ལན་མཇལ་བ་ཞིག་མཚོན་གྱི་ཡོད་ལ། ཡུལ་གཉིས་ཀྱི་ཕྱི་རབས་པ་ཚོའི་སེམས་ནང་སྲོལ་རྒྱུན་བཟང་པོར་ངོས་འཛིན་གསར་པ་ཞིག་དང་ཕྱོགས་གཉིས་ཀར་འཕྲལ་ཕུགས་ཀྱི་ཁེ་ཕན་ཡོད་པའི་ལས་དོན་ཞིག་ཀྱང་ཆགས་ཡོད། ད་རེབ་ཀྱི་དུས་སྟོན་འདི་དང་འདི་ལྟ་བུ་བརྒྱུད་དེ་རྒྱ་གར་བྱང་ཤར་ཁུལ་གྱི་མི་རིགས་དག་ལ་མི་ངོ་ལྷ་ངོ་འཕྲོད་པ་དང་། རང་གི་རིགས་དང་རུས་རྒྱུད། རིགས་གནས་རིན་ཐང་སོགས་ལ་དྲན་གསོ་དང་ངོས་འཛིན་བྱས་པ་ཞིག་ཆགས་ཡོད་ལ། བསམ་བློ་བཟང་ས་དང་གྲ་སྒྲིག་སྡིག་ས་ཞེས་པ་ལྟར། ཐབས་སྡུག་པ་བྱུང་ན་བོད་པའི་ཆོས་དང་རིག་གཞུང་སྲུང་སྐྱོབ་དང་། འཚོ་གནས་བྱེད་ཡུལ་གྱི་བཙན་རྫོང་ཞིག་ལ་རྨིང་བཏིང་སྟེ་ཧི་མ་ལའི་རི་རྒྱུད་དུ་བཅོལ་བཏམས་བྱས་པ་ཞིག་ཀྱང་མཚོན་ཡོད་དོ།།
