དེ་རིང་བོད་མིའི་བཟོ་ཚོགས་ཁག་གི་ཚོགས་འདུ་དང་པོ་དེ་གངས་སྐྱིད་དུ་དབུ་འཛུགས་གནང་ཡོད་པ་དང་། ཐེངས་འདིར་བཟོ་གྲྭ་ཁག་ལ་ས་གནས་མགོ་འཛིན་གྱི་འགན་འཁུར་ཕྱོགས་སྐོར་དང་རྩིས་ཁྲའི་འགྲོ་སྟངས་ལ་བསྐྱར་ཞིབ་ཀྱིས་མ་འོངས་པར་གཅིག་གྱུར་ཐུབ་པར་བྱ་རྒྱུ་ཡིན་འདུག
དེ་རིང་ཞོགས་པར་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་གོ་སྒྲིག་འོག ནང་སྲིད་ཁྱབ་ཁོངས་བོད་མིའི་བཟོ་ཚོགས་ཁག་གི་ཚོགས་གཙོ་དང་འགན་ལྷན་འཛིན་ལྷན་ཚོགས་ཀྱི་འཐུས་མིའི་ཚོགས་འདུ་ཐེངས་དང་པོ་དེ་གངས་སྐྱིད་གཉའ་ཁྲི་ཚོགས་ཁང་དུ་དབུ་འཛུགས་གནང་ཡོད་ཅིང་། དབུ་འཛུགས་མཛད་སྒོར་བོད་མིའི་སྒྲིག་འཛུགས་ཀྱི་སྲིད་སྐྱིང་བློ་བཟང་སེང་གེ་མཆོག་དང་། ནང་སྲིད་བཀའ་བློན་རྒྱ་རི་སྒྲོལ་མ་མཆོག ནང་སྲིད་དྲུང་ཆེ་འཁོར་ལྷ་ཚང་བསོད་ནམས་སྟོབས་རྒྱལ། དེ་བཞིན་ནང་སྲིད་དྲུང་འཕར་དང་ལས་བྱེད། རྒྱ་བལ་གཉིས་ཀྱི་ས་གནས་ཁག་ ༡༢ ནས་ཕེབས་པའི་འཐུས་མི་ ༢༨ བཅས་འཛོམས་འདུག
ཚོགས་འདུའི་ཐོག་ནང་སྲིད་དྲུང་ཆེ་ལགས་ཀྱིས་ངོ་སྤྲོད་གནང་བར། ཚོགས་འདུ་དེ་དེ་རིང་སང་ཉིན་གཉིས་ལ་ཚོགས་རྒྱུ་ཡིན་ཞིང་། ཐེངས་འདིར་བོད་མིའི་སྒྲིག་འཛུགས་ནང་སྲིད་ལས་ཁུངས་ཁྱབ་ཁོངས་སུ་བལ་ཡུལ་གྱི་བཟོ་ཚོགས་ཁག་ ༤ དང་རྒྱ་གར་ནང་བཟོ་ཚོགས་ཁག་ ༡༢ བཅས་ཡོད་པ་ལས། རྒྱ་བལ་གཉིས་ཀྱི་ས་གནས་ཁག་ ༡༢ ནས་ཚོགས་གཙོ་དང་འཐུས་མི་ ༢༨ ཕེབས་ཡོད་པ་དང་། ཚོགས་འདུའི་དམིགས་ཡུལ་གཙོ་བོ། བཀའ་ཤག་སྐབས་སྔོན་མས་བོད་མི་ཚོ་བཙན་བྱོལ་དུ་སྡོད་རིང་ཁྱབ་ཁོངས་སོ་སོའི་མི་མང་ལ་ཁེ་ཕན་ཡོད་བསྡད་པའི་ལས་དོན་སྔར་ལས་ཡར་རྒྱས་གཏོང་ཆེད་དང་། མ་འོངས་གཞིས་བྱེས་མཉམ་འཛོམས་སྐབས་བོད་ཀྱི་འཛུགས་བསྐྲུན་སྲ་བརྟན་ཐོག་མིག་དཔེ་སྟོན་ཐུབ་ཆེད། སོ་ནམ་གཞིས་ཆགས་དང་མཉམ་འབྲེལ་ཁག བཟོ་གྲྭ་བཅས་གསར་འཛུགས་བཅས་གནང་སྟེ་སྤྱིའི་སྒྲིག་འཛུཊ་ལ་ཕན་པའི་རླབས་ཆེན་དགོངས་པ་བཞེས་ཡོད་ཀྱང་། ༢༠༠༥ ལོའི་ཡས་མས་ནས་མཉམ་འབྲེལ་ཁག་དང་ས་གནས་མགོ་འཛིན་གྱི་འཛིན་སྐྱོང་ཁ་ཁར་ཕྱེས་པ། ཁྲིམས་མཐུན་དེབ་སྐྱེལ་ཡོད་བསྡད་པའི་བཟོ་གྲྭ་ཁག་དང་ས་གནས་མགོ་འཛིན་གཉིས་ཀྱི་ལས་དོན་དབྱེ་བ་ཕྱེས་རྗེས་གནས་སྟངས་གང་འདྲ་ཆགས་མིན་ཤེས་རྟོགས་ཡོང་ཆེད་ཡིན་ཚུལ་བརྗོད་བྱུང་།
ད་ལྟའི་བཟོ་གཞིས་ཁག་གི་གནས་སྟངས་ཐད་དྲུང་ཆེ་ལགས་ཀྱིས། “ བཟོ་གཞིས་ཡོད་པའི་ས་ཁུལ་ཁག་ཅིག་ཏུ་མགོ་འཛིན་གཞུང་གིས་བཏང་ཡོད་པ་དང་། རིགས་གཅིག་བཟོ་གཞིའི་མགོ་འཛིན་མང་ཚོགས་ཀྱིས་འོས་འདེམས་བྱས་པ། གཞིས་ཆགས་ཁག་ཅིག་ནང་དེབ་སྐྱེལ་བྱས་པའི་བཟོ་གཞིས་ཡོད་པ་ཙམ་མ་གཏོགས། བཟོ་གཞིས་ལས་བསྡོམས་གང་ཡང་མེད་མཁན་བཅས་འདས་པའི་ལོ་ ༥ ལྷག་གི་རིང་ཁ་ཁར་ཕྱེས་རྗེས་ཚོགས་པ་སྒྲིག་འཛུགས་ཡག་པོ་ཆགས་ཡོད་མེད་དང་། ལས་དོན་བྱེད་ཕྱོགས་གང་འདྲ་ཡོང་གི་ཡོད་མེད་གསལ་བོ་རྟོགས་ཐུབ་ཀྱི་ཡོད་པ་མ་རེད། ལྷག་པར་དུ་བཟོ་གྲྭའི་མགོ་འཛིན་མི་མང་གིས་འོས་འདེམས་བྱས་པའི་ས་ཁུལ་གྱི་གནས་སྟངས་གང་འདྲ་ཆགས་ཡོད་མེད་ནང་སྲིད་ཀྱིས་མ་ཤེས་པར་བརྟེན། བཟོ་གྲྭའི་གནས་སྟངས་ཕུགས་ལ་གང་འདྲ་ཆགས་མིན་ཐོག་དགོངས་པ་བཞེས་དགོས་པ་མང་པོ་ཡོང་གི་འདུག རྩིས་ཞིབ་ཀྱི་ཐད་ནས་ཀྱང་བཟོ་གྲྭ་ཁག་ཅིག་ལ་བོད་མིའི་སྒྲིག་འཛུགས་རྩིས་ཞིབ་ལས་ཁུངས་ཀྱིས་རྩིས་ཞིབ་གནང་གི་ཡོད་པ་ལས། མཚམས་རེར་སོ་སོའི་ས་གནས་རྒྱ་གར་རྩིས་ཞིབ་པས་རྩིས་ཞིབ་གནང་སྟེ་སྤྱི་ཡོངས་ཀྱི་བཟོ་གྲྭ་ཁག་གི་སྔོན་རྩིས་དང་རྩིས་ཀྱི་གནས་སྟངས་སོགས། སྐབས་རེར་བོད་མིའི་སྒྲིག་འཛུཊ་ཀྱི་ཤེས་ཐུབ་མ་ཐུབ་ཀྱི་གནས་སྟངས་ཡོང་གི་ཡོད་སྟབས། ད་རེབ་གྲོས་གཞི་དོན་ཚན་བདུན་གྱི་ཐོག་ས་གནས་ཁག་གི་གནས་སྟངས་དང་དཀའ་ངལ། མ་འོངས་པར་ལས་དོན་བྱེད་ཕྱོགས་བཅས་ཀྱི་ཐོག་བཀའ་བསྡུར་གནང་སྟེ། ནང་སྲིད་ཀྱི་ཐད་ཀར་ཐག་གཅོད་ཐུབ་པའི་རིགས་ཐད་ཀར་ཐག་གཅོད་གནང་རྒྱུ་དང་། ཐག་གཅོད་བྱེད་མི་ཐུབ་པའི་རིགས་བཀའ་ཤག་ལ་སྙན་སེང་། སྲིད་བྱུས་དང་འབྲེལ་བ་ཡོད་པའི་རིགས་སྤྱི་འཐུས་རྒྱུན་ལས་དང་གྲོས་ཚོགས་བཅས་ཀྱི་བཀའ་འཁྲོལ་དང་འབྲེལ་ནས་ཐག་གཅོད་གནང་རྒྱུ་ཡིན། ” ཞེས་བརྗོད་བྱུང་།
དེའི་རྗེས་སྲིད་སྐྱོང་བློ་མཆོག་གིས། བོད་མིའི་བཟོ་ཚོགས་ཁག་གི་གནས་སྟངས་ཐད་བཀའ་ཤག་ནང་ཁུལ་དུ་བཀའ་མོལ་གནང་སྟེ། ནང་སྲིད་བཀའ་བློན་གྱིས་འགན་འཁུར་ཏེ་བཟོ་གྲྭ་ཁག་གི་ཕྱག་ལས་གནང་སྟངས་དང་རྩིས་ཞིབ་བཅས་ཀྱི་ཐོག་བསྐྱར་ཞིབ་གནང་སྟེ། མ་འོངས་པར་སྤྱི་མཚུངས་བྱ་རྒྱུ་གལ་ཆེན་ཡིན་པའི་ལམ་སྟོན་གནང་ཡོད་ཚུལ་དང་། བཟོ་གྲྭ་ཁག་གིས་མི་མང་གི་བདེ་དོན་ལ་ཐུགས་འཁུར་གནང་དགོས་པའི་ཐད། “ ད་ལྟའི་བར་ང་རང་གཞིས་ཆགས་ཁག་བརྒྱ་ཆའི་ ༩༥ ལྷག་ཏུ་སྐོར་བ་བརྒྱབ་ཚར་བ་ཡིན། སྐབས་དེ་དག་ཏུ་བཟོ་གྲྭ་ཁག་གི་གནས་སྟངས་ཐོག་བཀའ་མོལ་བྱུང་སོང་། ཁ་ཤས་ཡག་པོ་འདུག ཁ་ཤས་སྟོང་སིང་ངེར་འདུག དེ་དག་གི་ཐོག་ཁྱེད་རང་ཚོས་བཀའ་བསྡུར་གནང་རྒྱུ་གལ་ཆེན་པོ་རེད། ཡར་རྒྱས་གཏོང་དགོས་པའི་རིགས་གང་ཡོད་མེད་དང་། ཡར་རྒྱས་གཏོང་ཐབས་རྩ་བ་ནས་མེད་པ་ཡིན་ན། མེད་དགོས་པའི་རྒྱུ་མཚན་སོགས་གླེང་བ་ཡིན་ན། རྗེས་ཕྱོགས་ཕན་ཐོགས་ཡོང་གི་རེད་བསམ་གྱི་འདུག ས་གནས་ཁ་ཤས་ནང་བཟོ་གྲྭའི་ཚོགས་ཁང་ནང་མཆོད་འབུལ་སོགས་བྱེད་སྐབས་ཁང་གླ་ལེན་གྱི་ཡོད་པ་རེད་ཅེས་བཤད་ཀྱི་འདུག ས་གནས་ཁ་ཤས་ནང་བཟོ་གྲྭ་ཁག་ལ་ཁང་པ་སྟོང་པ་ཡོད་ཀྱང་། མི་མང་པོ་ཞིག་རྒྱ་གར་ཁང་པ་གླས་ཏེ་དཀའ་ངལ་འཕྲད་ཀྱི་འདུག་ཅེས་བཤད་མཁན་འདུག དེ་དག་ལ་སྐད་ཆ་དྲིས་སྐབས་བཟོ་གྲྭའི་ཁོང་གཏོགས་མིན་པའི་རིགས་ལ་ཁང་པ་རག་གི་མེད་ཚུལ་ཤོད་ཀྱི་འདུག གཞི་རྩའི་ཆ་ནས་ཐོབ་ཐང་དང་པོ་ཚོགས་མི་ཚོར་གནང་དགོས་ཆགས་ཀྱང་། ཁང་པ་སྟོང་པ་ཡོད་ན། མི་མང་སྐྱོ་བོའི་རིགས་ལ་ཁང་གླ་ཉུང་ངུ་རེ་བླངས་ཏེ་གཡར་བཞག་པ་ཡིན་ན་འགྲིག་གི་རེད་བསམ་གྱི་འདུག ང་ཚོས་བཟོ་གྲྭ་ཐོག་མར་འཛུགས་སྐབས་གཙོ་བོ་མི་མང་ལ་ཕན་ཐོགས་ཡོང་ཆེད་བཙུགས་པ་ཡིན་སྟབས། མི་མང་ལ་ཕན་ཐོགས་རྒྱུ་གལ་ཆེ་ཤོས་ཆགས་ཀྱི་ཡོད་པ་རེད། མ་འོངས་པར་དེའི་ཐོག་དགོངས་པ་བཞེས་རྒྱུ་གལ་ཆེན་པོ་རེད། ” ཅེས་གསུངས་བྱུང་།
ཡང་སྲིད་སྐྱོང་མཆོག་གིས་ “ བཟོ་གྲྭ་རྒྱ་གར་གཞུང་ལ་ཁྲིམས་མཐུན་དེབ་སྐྱེལ་བྱས་ཡོད་ཚུལ་དང་རང་དབང་ཡིན་ཚུལ་བཤད་པ་ཡིན་ན། མ་རེད་ཅེས་བཤད་ཀྱི་མེད། ཡིན་ནའང་། ང་ཚོས་ཐོག་མར་བོད་མིའི་སྒྲིག་འཛུཊ་དང་མཉམ་འབྲེལ། བཟོ་གྲྭ་བཅས་ཚང་མ་མི་མང་ལ་ཕན་ཐོགས་རྒྱུ་གཙོ་བོར་བཟུང་སྟེ་བཙུགས་པ་ཡིན་སྟབས། ཁྲིམས་མཐུན་དང་དེབ་སྐྱེལ་དེ་དགོས་མཁོའི་ཆེད་དུ་རེད། དེ་དག་གི་ཐོག་དགོངས་པ་བཞེས་རྒྱུ་ཧ་ཅང་གལ་ཆེན་ཡིན་ཡང་། རང་གི་མི་མང་ལ་ཕན་ཐོགས་རྒྱུ་ཧ་ཅང་གལ་ཆེན་རེད། གནས་སྟངས་དེའི་རིགས་ལ་ངས་བརྟག་དཔྱད་མཐིལ་ཕྱིན་བྱས་ཏེ་བཤད་པ་མིན་ཡང་། ས་གནས་ཁག་ཅིག་ནང་འགྲོ་སྐབས་མི་མང་གིས་ཚོར་བ་ཆེན་པོས་མིག་ཆུ་གཏོང་བཞིན་བཤད་ཡོང་གི་འདུག མ་འོངས་པར་དེ་དག་ལ་དགོངས་པ་བཞེས་རྒྱུ་ཧ་ཅང་གལ་ཆེན་རེད། ” ཅེས་གསུངས་བྱུང་།
སྔོན་འགྲོའི་མཛད་རིམ་གྲུབ་རྗེས་ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས་གཙོ་སྐྱོང་འོག་གྲོས་གཞི་ཁག་གི་ཐོག་བགྲོ་གླེང་གནང་མགོ་ཚུགས་སོང་། གྲོས་གཞི་ཁག་ལས་དང་པོ། བཟོ་ཚོགས་རེ་ཟུང་ནས་འཛིན་སྐྱོང་གི་སྟངས་འཛིན་ས་གནས་མགོ་འཛིན་ནས་འགན་ཁུར་མཉམ་ལྕོགས་གནང་མུས་དེ་དག་སྤྱི་མཚུངས་ལག་ལེན་འཁེལ་རྒྱུར་འགོག་རྐྱེན་ནམ་དཀའ་ངལ་ཅི་འཕྲད་སྐོར། གཉིས་པ། ས་གནས་མགོ་འཛིན་ནས་བཟོ་ཚོགས་ཀྱི་འཛིན་སྐྱོང་གི་འགན་འཁུར་མཉམ་ལྕོགས་གནང་ཕྱོཊ་ཐོག་དབུས་དང་ས་གནས་སུ་དཀའ་ངལ་གང་འཕྲད་སྐོར། གསུམ་པ། བཟོ་ཚོགས་ཁག་གི་རྩིས་ཁྲར་བོད་མིའི་སྒྲིག་འཛུགས་རྩིས་ཞིབ་ལས་ཁང་ནས་རྩིས་ཞིབ་གནང་རྒྱུར་དགེ་སྐྱོན་ཅི་གཟིགས་སྐོར། བཞི་བ། ས་གནས་མགོ་འཛིན་ལས་ཁུངས་དང་དེབ་སྐྱེལ་བཟོ་ཚོགས་གཉིས་ཀྱི་ས་ཁང་དང་འཛིན་སྐྱོང་གི་སྒྲོམ་གཞིའི་བདག་བསྒྱུར་གྱི་གནས་བབ་དང་། སྤྱི་རྫས་དེ་དག་གི་བེད་སྤྱོད་དང་འགན་འཁུར། ལས་འགན་མཉམ་ལྕོགས་གནང་ཕྱོགས།
ལྔ་བ། དེབ་སྐྱེལ་ཡོད་པའི་བཟོ་ཚོགས་ཡིན་པ་གང་ཞིག་ལ་ཚོགས་པའི་སྒྲིག་གཞི་ནང་གསལ་དམིགས་ཡུལ་དང་བྱེད་སྒོ་ལྟར་དངོས་སུ་ས་གནས་སུ་ལས་གཞིའི་རིགས་གང་ཡང་མེད་པར་དེབ་སྐྱེལ་སྒྲིག་འཛུགས་ཀྱི་མིང་ཙམ་ཐོག་འཚོ་གནས་བྱེད་རིགས་གནས་སྟངས་སྐོར། དྲུག་པ། ས་གནས་སོ་སོར་དེབ་སྐྱེལ་ཚོགས་པའི་འགན་འཛིན་ལྷན་ཚོགས་ཀྱིས་ཚོགས་པའི་ལས་དོན་དང་འཛིན་སྐྱོང་སྟངས་འཛིན་གནང་གི་ཡོད་མུས་ཀྱང་། ས་གནས་ཀྱི་སྤྱི་ཡོངས་འཛིན་སྐྱོང་གི་གཟིགས་རྟོགས་འགན་དབང་བོད་མིའི་སྒྲིག་འཛུགས་ཀྱི་སྐུ་ཚབ་ས་གནས་མགོ་འཛིན་ལ་ཡོད་པ་དེར་བཟོ་ཚོགས་ནས་འགན་འཁུར་ལན་འདེབས་ཞུ་ཕྱོགས་སྐོར། བདུན་པ། གྲོས་གཞིར་མ་གསལ་བའི་གནད་དོན་ཐོག་བཀའ་བསྡུར་གནང་རྒྱུ་བཅས་ཡིན་འདུག
གསར་འགོད་པ། དོན་གོ
ད་་རེས་བཙན་བྱོལ་བོད་མིའི་གཞིས་ཆགས་ནང་གི་བཟོ་གྲྭ་ཁག་གི་འགྲོ་སྟངས་ཡག་པོ་ཞིག་བཟོ་རྒྱུ་དེ་ཧ་ཅང་གལ་ཆེན་པོ་རེད། ལྷག་པར་དུ་རྩིས་ཀྱི་སྐོར་ལ་གཟབ་ནན་གྱིས་ཐག་གཅོད་གཅིག་གྱུར་ཞིག་ཡོང་དགོས་པ་དེ་གལ་ཆེན་པོ་རེད། གཞས་ཆགས་ཁག་མང་པོ་ཞིག་ནང་གི་བཟོ་གྲྭ་ཁག་ཐོར་ཞིག་ཏུ་ཕྱིན་ཡོད་པ་དང་། ཁ་ཤས་ཤིག་མི་རེ་ཟུང་གིས་སྒེར་བདག་ལྟ་བུར་བཟུང་ཡོད་པ། ཡང་ཁ་ཤས་ཤིག་གི་ལས་ཀ་ཡག་པོ་ཡོད་ཀྱང་རྩིས་དང་དོ་དམ་གྱི་ཕྱོགས་ནས་གཙང་མ་མེད་པ་དེ་འདྲ་མང་པོ་མཐོང་ཐོས་འདུག བོད་པ་ཚོ་སྐྱབས་བཅོལ་དུ་ཡོང་རྗེས་ཀྱི་སྤྱི་ཚོགས་ཁེ་ལས་དང་འབྲེལ་བའི་ལས་གཞི་ཐོག་མ་བཟོ་གྲྭ་ཁག་ཆགས་ཡོད་པ་རེད། རྒན་པ་མང་པོ་ཞིག་གིས་དཀའ་ལས་བརྒྱབ་ནས་བཙུགས་པ་རེད། ༧གོང་ས་སྐྱབས་མགོན་ཆེན་པོ་མཆོག་དང་རང་གཞུང་གི་དབུ་ཁྲིད་རིམ་པའི་ངོས་ནས་ཀྱང་བཟོ་གྲྭ་གཞིས་ཁག་ལ་ཐུགས་རེ་ཆེན་པོ་གནང་གི་ཡོད་པ་རེད། རང་ཁ་རང་གསོ་ཟེར་ན་འདྲ་གཞན་ལ་བརྟེན་མ་དགོས་པར་རང་གི་རྐང་པའི་སྒང་ལ་ལངས་ཐུབ་པའི་ལས་ཀ་གཅིག་པོ་དེ་ཆགས་ཡདོ་པ་རེད། གལ་སྲིད་ད་རེས་ཚོགས་འདུའི་སྟེང་གཙང་མ་ཞིག་དང་འགྲོ་སྟངས་ཡག་པོ་ཞིག་མ་བཟོས་པ་ཡིན་ན་རིམ་གྱིས་བཟོ་གྲྭ་མང་པོ་ཞིག་སྒོ་རྒྱག་དགོས་པ་ཐུག་རྒྱུ་ཡིན་པ་མ་ཟད། ཁག་ཅིག་སྒེར་གཅོད་ཅན་དུ་གྱུར་ཏེ་མི་མང་ལ་ཕན་ཐོགས་རྒྱུ་ཕར་ཞོགས་རྙོག་གྲྭ་ཆནེ་པོ་མི་ཆགས་པའི་ངེས་པ་མི་འདུག དེ་ནས་སྒང་དུ་སྲིད་སྐྱོང་མཆོག་གིས་བཟོ་གྲྭ་ཁག་གིས་ས་གནས་མི་མང་ལ་ཕན་ཐོགས་དགོས་ཀྱི་འདུག་གསུངས་པ་དེ་ཧ་ཅང་གནད་འགག་རེད། ས་གནས་མི་མང་ལ་ཕན་མ་ཐོགས་པ་ཡིན་ན་ས་གནས་མི་མང་གིས་མཉམ་རུབ་ཡོང་གི་་རེད། ས་གནས་མི་མང་གི་རྒྱབ་སྐྱོར་མེད་ན་བཟོ་གྲྭ་ཁག་གི་ལས་དོན་ཡང་ཏག་ཏག་འགྲོ་མ་ཐུབ་པའི་དཀའ་ངལ་ཡོང་གི་རེད། དེ་ནས་དུས་རབ་དང་མཐུན་པར་བཟོ་གྲྭ་ཁག་གི་ལས་གཞི་དང་ཚོང་རྫས་ལའང་འགྱུར་བ་གཏོང་དགོས་ཀྱི་ཡོད་མེད་ཐོག་བསམ་ཞིབ་དང་བགྲོ་གླེང་གནང་རྒྱུ་གལ་ཆེན་རེད། དུས་རབ་དང་མཐུན་པའི་དངོས་རྫས་རིགས་ཤུགས་ཆེ་རུ་གཏོང་རྒྱུ་དང་ཁེ་ཕན་མེད་པ་དང་དཀའ་ལས་ཆནེ་པོ་ཡོད་པའི་རིགས་ལ་འགྱུར་བ་བཏང་སྟེ་འཕེལ་རྒྱས་དང་གསར་གཏོད་ག་རེ་བྱེད་རྒྱུ་ཡོད་མེད་བཅས་ལ་བསམ་ཞིབ་གནང་རྒྱུ་གལ་ཆེན་པོ་རེད། སྔོན་མ་ནས་བྱེད་བསྡད་པ་ད་དུང་མུ་མཐུད་དུ་ཉར་བསྡད་ན་ཡག་པོ་ཡོང་མིན་ཐེ་ཚོ་རེད།