དམར་ཤོག་ཚོགས་པའི་ཤི་གསོན་གྱི་འཐབ་འཛིང་།

ཀྲོ་ཨིར་ཅིན་གྱིས་བརྩམས། པདྨ་མཚོས་བསྒྱུར།

མི་རྣམས་ཀྱིས་དོ་སྣང་བྱེད་ཡུལ་དུ་གྱུར་བའི་རྒྱ་གཞུང་གིས་གསར་དུ་བཙུགས་པའི་བཅོས་བསྒྱུར་གཏིང་ཟབ་སྣེ་ཁྲིད་ཚོགས་ཆུང་དང་རྒྱལ་ཁབ་བདེ་འཇགས་ཨུ་ཡོན་ལྷན་ཁང་ཞེས་པའི་ནང་། སྲིད་བློན་ལི་ཁེ་ཆིང་སྣེ་ཁྲིད་ཚོགས་ཆུང་གི་ཚོགས་གཞོན་དང་བདེ་འཇགས་ཨུ་ཡོན་ལྷན་ཁང་གི་མགོ་ཁྲིད་གཞོན་པར་བསྐོ་བཞག་བྱས་ཡོད། རྒྱ་གཞུང་གི་དབང་འཛིན་སྒྲིག་གཞི་གསར་པའི་ཆབ་སྲིད་ལམ་ལུགས་ལ་རིགས་བསྒྲེ་བ་ཡིན་ན། ཞི་ཅིན་ཕིན་སྲིད་འཛིན་དང་ལི་ཁེ་ཆིང་སྲིད་འཛིན་གཞོན་པ་ཡིན་ལ།ལི་ཁེ་ཆིང་སྲིད་བློན་ཡིན་པའི་ཆ་ནས་ཁོ་བོའི་ལས་འགན་གཙོ་བོ་རྒྱལ་ཁབ་ཀྱི་དཔལ་འབྱོར་ལས་དོན་ཡིན་ནའང་། ཁོས་ཅིའི་ཕྱིར་རྒྱལ་ཁབ་བདེ་འཇགས་ཨུ་ཡོན་ལྷན་ཁང་གི་མགོ་ཁྲིད་གཞོན་པའི་འགན་འཁུར་བ་རེད། འདི་ལྟར་བཀོད་སྒྲིག་བྱས་པའི་དགེ་མཚན་ནི། གལ་སྲིད་ཞི་ཅིན་ཕིན་ལ་གནད་དོན་ཞིག་བྱུང་ཚེ། ལི་ཁེ་ཆིང་གིས་མགྱོགས་མྱུར་ངང་ཞི་ཅིན་ཕིན་གྱི་དབང་ཆ་རྒྱུན་འཛིན་བྱེད་ཐུབ་པ་རེད།

ཀྲུག་ཡོང་ཁཱང་འཛིན་བཟུང་བྱས་རྗེས། ཞི་ཅིན་ཕིན་སྲིད་གཞུང་གི་ཁ་གཏད་དུ་ལངས་བའི་ཅང་ཙེ་མེན་ཚོགས་པའི་རྒན་རབས་པ་ཅང་ཙེ་མེན་དང་ཙིན་ཆིན་ཧོང་གཉིས་སེམས་པ་གནག་ཅིང་སྦྱོར་བ་རྩུབ་པ། ལྐོག་གསོད་ཀྱི་ལས་ལ་བྱང་ཆུབ་པའི་མི་སྣ་གཉིས་ཡིན་ལ། ཁོ་བོ་གཉིས་ཀྱིས་ཞི་ཅིན་ཕིན་ཚོགས་པ་མགོ་གཏིང་སློག་པར་སྨྱོ་ཧམ་ཆེན་པོས་འཕག་འཚག་རྒྱག་གི་ཡོད་པ་མ་ཟད། ཡང་བསྐྱར་ཞི་ཅིན་ཕིན་ལྐོག་གསོད་བྱེད་པའི་ངན་ཇུས་བཤམ་སྲིད་སྟབས།ཞི་ཅིན་ཕིན་ཚོགས་པས་འགོག་སྲུང་དོགས་ཟོན་མི་བྱེད་ཐབས་མེད་ཅིག་ཆགས་ཡོད།

རྒྱ་གཞུང་གི་མཐོ་རིམ་དཔོན་རིགས་ཚོས་དངུལ་དངོས་ཕོན་ཆེན་ལྐོག་ཟ་བྱས་ཏེ་ཕྱི་ཕྱོགས་སུ་གསོག་ཉར་བའི་གནད་དོན་ཕྱིར་གྱར་བ་བརྒྱུད། ཅང་ཚོགས་པས་ཞི་ཅིན་ཕིན་ཚོགས་པར་མཉམ་དུ་རྩ་མེད་འགྲོ་བའི་ངན་བལྟས་བསྟན་ཡོད་པ་མ་ཟད། ཕྱིས་ཀྱི་དབང་ཆ་འཐབ་རྩོད་ཀྱི་བརྒྱུད་རིམ་ཁྲོད་ཅང་ཚོགས་པས་འགུལ་སྐྱོད་གང་འདྲ་བྱེད་རྒྱུ་ཡིན་མིན་ཚོད་དཔག་བྱེད་དཀའ་བའི་གནད་དོན་ཞིག་ཏུ་གྱུར་ཡོད། འདིས་གནས་བབ་སྤྱི་ཡོངས་ལ་སྔར་ལས་ཉེན་ཁ་དང་ངེས་གཏན་མེད་པའི་རྒྱུ་རྐྱེན་མང་པོ་བསྐྲུན་ཡོད། སྔོན་ཆད་ཅང་ཚོགས་པས་ཐེངས་ ༣ ལ་ཧུའུ་ཅིན་ཐའོ་ལྐོག་གསོད་བྱེད་རྩིས་དང་། ཐེངས་ ༢ ལ་ཞི་ཅིན་ཕིན་ལྐོག་གསོད་བྱེད་རྩིས་བྱས་ཡོད་ཀྱང་ལེགས་འགྲུབ་བྱུང་མེད། འོན་ཀྱང་། ཅང་ཚོགས་པའི་ལྐོག་གསོད་ཀྱི་དམིགས་འབེན་དེར་ནམ་ནམ་ཞར་ཞར་ལ་ལྷ་མོ་འོད་ཟེར་ཅན་མས་ཞལ་གཟིགས་དང་མགོན་སྐྱབས་གནང་མི་སྲིད་སྟབས། ནམ་ཞིག་ཅང་ཚོགས་ཀྱི་འགུལ་སྐྱོད་ཅིག་ལམ་ལྷོངས་བྱུང་བ་ཡིན་ན།ཞི་ཚོགས་པ་རྩ་མེད་དུ་འགྲོ་བའི་ཆག་སྒོ་ཆེན་པོ་ཞིག་རེད། དེའི་ཕྱིར་ལི་ཁེ་ཆིང་ཐད་ཀར་ཞི་ཅིན་ཕིན་གྱི་རྒྱུན་འཛིན་པའི་གོ་གནས་སུ་བཀོད་སྒྲིག་བྱས་ཏེ།ཞི་ཚོགས་པའི་འབྱུང་འགྱུར་གྱི་ཉེན་ཁ་ཆེ་བའི་གནས་བབ་ཆུང་ཕྲ་ནས་འགུལ་སྐྱོད་གྲ་སྒྲིག་བྱས་ཡོད། དེ་ཡིས་ཞི་ཚོགས་པས་ཆེས་སྡུག་ས་ནས་གྲ་སྒྲིག་བྱས་ཟིན་པ་མཚོན་གྱི་ཡོད།

ཅང་ཚོགས་ཀྱི་དཔོན་རིགས་པའོ་ཞི་ལེ་ལ་ཚེ་བཙོན་གྱི་ཁྲིམས་ཐག་བཅད་ཡོད་སྟབས། པའོ་ཡི་ནག་ཉེས་ལས་ལྡབ་འགྱུར་གྱིས་ཚབས་ཆེ་བའི་ཀྲུའུ་ཡོང་ཁཱང་གི་ནག་ཉེས་དེར་སྲོག་ཁྲིམས་གཅོད་སྲིད། དེས་ན་ཀྲུའུ་ཡི་རྒྱབ་ལོགས་སུ་ཡོད་པའི་ཅང་ཙེ་མེན་དང་ཙིན་ཆིན་ཧོང་གཉིས་ལ་ག་རེ་བྱེད་དམ། རྒྱ་གཞུང་གི་ཉེས་ཁྲིམས་ཚད་གཞི་ལྟར་བྱས་ན་སྔ་ས་ནས་སྲོག་ཁྲིམས་གཅོད་པའི་གནས་སུ་བསླེབས་ཟིན། ཅང་ཙེ་མེན་ལ་མཚོན་ནས་བཤད་ན། ཞི་ཅིན་ཕིན་དང་དབང་ཆ་རྩོད་ལེན་བྱེད་པ་དེ་ཤི་གསོན་གྱི་འཐབ་འཛིང་ཞིག་ཡིན་སྟབས།གལ་སྲིད་འཐབ་འཛིང་ལས་རྣམ་པར་རྒྱལ་ཐུབ་ཚེ། ཁོ་ཚོས་ལྐོག་གསོད་དང་སྲིད་བསྒྱུར།དཔལ་འབྱོར་འཇིག་ཉེན་གྱིས་སྤྱི་ཚོགས་ལ་ཟང་ཟིང་སློང་བ་སོགས་ཇུས་ངན་ག་རེ་ཡིན་ནའང་ལག་བསྟར་བྱེད་སྲིད། ཡིན་ནའང་། ཞི་ཅིན་ཕིན་ཚོགས་པར་མཚོན་ན། ད་ལྟའི་གནས་བབ་དེ་མེ་ཆུ་ལྟར་མཐུན་ཐབས་མེད་པའི་ཚབས་ཆེན་རང་བཞིན་དུ་བསླེབ་མེད་པ་འདྲ། དེ་བས་མུ་མཐུད་དུ་གོམ་རེའི་མཚམས་སུ་སྒར་རེ་བཏབས་ཏེ་ཕར་རྒོལ་འགོག་སྲུང་གི་ཐབས་ཇུས་ལག་བསྟར་བྱེད་ཀྱི་ཡོད་པ་ལས།ཆེད་དམིགས་ཀྱིས་ཅང་ཚོགས་ཀྱི་ཉེས་དོན་ལ་ཕྱོགས་ཡོངས་ནས་ཞིབ་རྩིས་བརྒྱབ་མེད།

ཞི་ཅིན་ཕིན་ཚོགས་པར་མཚོན་ནས་བཤད་ན། པའོ་ཞེ་ལེ་ཡི་སྔོན་བཤད་ཕྱི་འགྱུར་གྱི་ཁྲིམས་རའི་བྱ་སྤྱོད་དང་། ཁྲིན་ཀང་པོའོ་ཡི་དགོད་བྲོ་བའི་ཟློས་གར། རྒྱུ་དངོས་ཕྱི་ཉར་གྱི་གནད་དོན་སོགས་ཚུད་པའི་ཅང་ཚོགས་ཀྱི་རང་སྲོག་བློས་གཏོང་གི་འགུལ་སྐྱོད་དེ་དག་ལ་འགྲེལ་བརྗོད་བྱེད་ཐབས་མེད། གང་ཡིན་ཟེར་ན། ཁོ་ཚོ་ཅང་ཚོགས་པའི་ཕྱོགས་སུ་ལངས་ཏེ་གནད་དོན་ལ་བསམ་གཞིག་བྱས་མེད་པས་རེད། ནག་ཉེས་ཚབས་ཆེན་བསགས་པའི་ཚོགས་པ་ཞིག་ཡིན་པའི་ཆ་ནས་ཅང་ཚོགས་ཀྱི་དབང་ཆ་མེད་པར་གྱུར་ཚེ། དབང་ཆ་སྒེར་སྤྱོད་ཀྱིས་ནག་ཉེས་འགེབ་སྲུང་བྱེད་ཐབས་མེད་པར་ཕྱོགས་གཏོགས་པ་ཚང་མ་འཇིགས་སྐྲག་གི་ཁྲོད་འཚོ་དགོས། གནས་བབ་དེ་ཁོ་ཚོ་ཐད་ཀར་དམར་གསོད་བཏང་བ་ལས་ཀྱང་གཟོད་དཀའ་བ་ཞིག་ཡིན་སྟབས།ཞི་ཅིན་ཕིན་ཚོགས་པས་སྲིད་དབང་འཛིན་པའི་ནུས་པ་ཇི་ལྟར་མངོན་གསལ་དང་རྒྱ་སྐྱེད་པ་ཡིན་ན། ཅང་ཚོགས་པར་དེ་ལྟར་དབང་ཆ་ཤོར་བཞིན་པའི་ཚོར་བ་ཤུགས་དྲག་གིས་བསླེབས་ཏེ། ཐབས་ཇུས་སྣ་ཚོགས་ཀྱིས་ཞི་ཅིན་ཕིན་ཚོགས་པ་ཕམ་པར་རྒྱག་པའི་ཧམ་སེམས་ཆེ་རུ་འགྲོ་བཞིན་ཡོད།

ཞི་དང་ཅང་ཚོགས་པ་བར་གྱི་ཤི་གསོན་འཐབ་འཛིང་དེ་འདྲ་མཉམ་མིན་པའི་ཆབ་སྲིད་ཀྱི་དབང་ཆའི་འཐབ་རྩོད་ཅིག་ཆགས་ཡོད། ཞི་ཅིན་ཕིན་ཚོགས་པས་ཆབ་སྲིད་ཐད་ཅང་ཚོགས་ལ་སྟབས་བསྟུན་མི་དགོས་པའི་རང་སྐྱ་འཕེལ་བ་ཞིག་བྱེད་འདོད་ཀྱི་ཡོད་ཀྱང་། ཅང་ཙེ་མེན་ཚོགས་པས་ཞི་ཚོགས་པ་ནི་ཤི་གསོན་གྱི་འགག་རྩར་ཐུག་པའི་སྟོབས་ཤུགས་ཐ་དད་པ་ཞིག་ཡིན་སྟབས་ངེས་པར་དུ་མེད་པ་བཟོ་དགོས་པ་ཞིག་ཏུ་སེམས་ཀྱི་ཡོད། འདི་ནི་ཅིའི་ཕྱིར་ཅང་དང་ཞི་ཡི་འཐབ་རྩོད་དེ་གཅིག་ལྷོད་གཅིག་དམ་དང་འགལ་བ་མང་བའི་རྒྱུ་རྐྱེན་རེད།

ཅང་ཚོགས་པས་རྒྱུན་མི་ཆད་པར་དུད་མདའ་འཕངས་ཏེ་ཞི་ཚོགས་པ་སྦྲིད་དུ་འཇུག་གི་ཡོད་ལ། ལྷག་པར་དུ་རྒྱབ་སྐྱོར་སྲོག་ཤིང་དུ་འཛིན་པ་དང་ལྐོག་ཟ་རུལ་སུངས་ལ་རྒོལ་རྡུང་གཏོང་བ། སྲིད་དབང་ལ་གཏོར་བཤིག་གཏོང་བར་འགོག་རྒོལ་བྱེད་པ་སོགས་ནི་ཅང་ཙེ་མེན་ཚོགས་པས་དུད་མདའ་འཕེན་ས་གཙོ་བོ་རེད། གང་ལྟར་ཞི་ཅིན་ཕིན་ཚོགས་པས་སྟག་རྒན་གྱི་རྔ་མ་ནས་འཇུས་ཚར་སྟབས།ཅང་ཚོགས་པ་ལྟ་བུའི་མི་ཤ་ཟ་མྱོང་བའི་སྟག་རྒན་ཞིག་གི་རྔ་མ་ནས་འཇུ་བ་ཕར་ཞོག་རག་པ་ཙམ་གྱིས་ཁྱོད་ཤི་ང་གསོན་གྱི་དམར་འཛིང་བྱེད་དགོས།སུ་ཞིག་གིས་སྟག་རྒན་རྔོན་རྒྱུ་ཡིན་ཟེར་ན་དེ་གསོན་འཆའ་བྱེད་པར་དུས་ཡུན་རིང་པོ་མི་དགོས།ག་དུས་ཞི་ཅིན་ཕིན་ཚོགས་པས་འཛེམས་ཟོན་མེད་པར་ཅང་ཚོགས་ཀྱི་ནག་ཉེས་ཐེར་འདོན་བྱས་ན། དེ་དུས་ཅང་དང་ཞི་ཡིས་ཁྱོད་ཤི་ང་གསོན་གྱི་འཐབ་འཛིང་བྱེད་པའི་མཐོ་རླབས་སུ་བསླེབས་པ་རེད།   

མ་རྩོམ།http://www.epochtimes.com/gb/14/2/3/n4074308.htm