བོད་རིགས་མཐོ་རིམ་སློབ་མའི་ཚོགས་ཆེན་ཐོག སློབ་མ་ཚོས་བོད་རྒྱ་དབྱིན་གསུམ་དང་། ཧིན་རྡུ་བཅས་སྐད་ཡིག་བཞི་ཡོད་པའི་མཐོ་རིམ་སློབ་མའི་དུས་དེབ་ཅིག་པར་བསྐྲུན་བྱ་རྒྱུའི་ཐག་གཅོད་བྱས་འདུག
ཟླ་འདིའི་ཚེས་ ༡༡ ནས་ ༡༤ བར་རྒྱ་གར་རྒྱལ་ཡོངས་བོད་རིགས་མཐོ་རིམ་སློབ་མའི་ཚོགས་ཆེན་ཐེངས་བརྒྱད་པ་རྒྱ་གར་བྱང་ཕྱོགས་གྷོ་ཇི་ར་ཊི་མངའ་སྡེའི་གྲོང་ཁྱེར་བྷ་རོ་ཌར་ཚོགས་ཏེ། མཐོ་རིམ་སློབ་མའི་ཚོགས་ཆེན་གྱི་དམིགས་ཡུལ་གཉིས་དང་། བོད་ནང་གི་རང་ལུས་མེར་བསྲེཊ་གཙོས་པའི་གྲོས་གཞི་ཁག་ ༦ ཐོག་བགྲོ་གླེང་གོ་བསྡུར་གནང་ཡོད་པ་དང་། ཁ་སང་ཕྱི་ཚེས་ ༡༤ ཉིན་བྷ་རོ་ཌ་གཙུག་ལག་སློབ་གྲྭའི་རྒྱལ་རབས་སྡེ་ཚན་གྱི་འགན་འཛིན་ཌོག་ཌར་ཨ་དྷི་ཡ་བི་སཱ་སེན་ནཱ་མཆོག་དང་། བོད་རིགས་མཐོ་རིམ་སློབ་མའི་ཚོགས་ཆེན་ཐོག་མར་དབུ་འཛུགས་གནང་མཁན་དང་། ད་ལྟའི་བོད་རང་བཙན་སློབ་ཕྲུག་ཚོགས་པའི་རྒྱ་གར་ས་གནས་ཚོགས་གཙོ་རྡོ་རྗེ་ཚེ་བརྟན་རྣམ་གཉིས་ཕེབས་ཏེ་གཏམ་བཤད་བཅས་གནང་རྗེས་ཚོགས་འདུ་མཇུ་སྒྲིལ་ཡོད་འདུག
ཐེངས་འདིའི་ཚོགས་འདུའི་ཐོག་གྲོས་ཆོད་ཁག་ ༨ དང་། ཞུ་སྐུལ་ཁག་ ༡༣ ། བསམ་ཚུལ་ཁག་ ༡༠ བཅས་ཐག་གཅོད་གནང་ཡོད་འདུག་ལ། གྲོས་ཆོད་ཁག་ལས་དང་པོ། བོད་རིགས་མཐོ་རིམ་སློབ་གཉེར་བ་ཡོངས་ཀྱི་ཉིན་གཅིག་དུས་གཅིག་ཏུ་དཔུང་རྟགས་ནག་པོ་བཏགས་པ་དང། ངོ་དེབ་དང་དྲ་རྒྱའི་ཐོག་བོད་དོན་ལས་འགུལ་སྤེལ་རྒྱུ། གཉིས་པ། ༧གོང་ས་མཆོག་གི་འཁྲུངས་སྐར་དུས་བཟང་བདུན་གཅིག་གི་རིང་༼༧གོང་ས་མཆོག་གི་བདུན་ཕྲག༽ ཅེས་སྲུང་གཙི་བྱ་རྒྱུ། གསུམ་པ། མཐོ་སློབ་སོ་སོར་ལྷག་དཀར་སྲུང་གཙི་བྱ་རྒྱུ། བཞི་བ། བོད་ཡིག་དང་རྒྱ་ཡིག དབྱིན་ཇི། ཧིན་རྡུ་བཅས་སྐད་ཡིག་བཞི་ཡོད་པའི་མཐོ་རིམ་སློབ་མའི་དུས་དེབ་ཅིག་པར་བསྐྲུན་བྱ་རྒྱུ།
ལྔ་བ། ཚོགས་ཆེན་ཚོགས་སའི་ས་གནས་ཀྱི་གསར་འགོད་བརྒྱུད་ལམ་དམ་འཛིན་བྱ་རྒྱུ། དྲུག་པ། མ་འོངས་པར་མཐོ་རིམ་སློབ་མའི་ཚོགས་ཆེན་འཚོགས་ཡུལ་ས་གནས་བོད་པའི་སློབ་གྲྭ་དང་གཞིས་ཆགས། དེ་བཞིན་མཐོ་སློབ་ཆ་རྐྱེན་འཛོམས་པའི་ས་ཁུལ། ལྡི་ལི་བོད་ཁྱིམ་སྡོད་ཁང། ནོར་གླིང་མཐོ་སློབ། ཝཱ་ཎ་མཐོ་སློབ། ས་ར་མཐོ་སློབ། ཤེས་རབ་དགའ་ཚལ་སློབ་གླིང་། བྷེང་ལོར། ཏྰ་ལའི་བླ་མའི་མཐོ་རིམ་སློབ་གཉེར་ཁང་། དགོན་སྡེ་ཁག་བཅས་སུ་རེས་མོས་སུ་འཚོགས་རྒྱུ། བདུན་པ། མཐོ་སློབ་ཁག་སོ་སོ་ནས་འཐུས་མི་ས་གནས་འབྲེལ་མཐུད་པ་རེ་རེ་བསྐོ་བཞག་བྱ་རྒྱུ། བརྒྱད་པ། ཚོགས་ཆེན་གྱི་འགྲོ་གྲོན་སླད་ས་གནས་འབྲེལ་མཐུད་པའི་འགན་འཁུར་གྱིས་དཔའ་འབྱོར་བསྡུ་རུབ་གང་ཡོང་བྱ་རྒྱུ་བཅས་ཡིན་འདུག
ད་དུང་། ཚོགས་འདུའི་ཐོག་བོད་རིགས་མཐོ་རིམ་སློབ་མའི་ཚོགས་ཆེན་ཐེངས་དགུ་བའི་སྤྱི་ཁྱབ་འབྲེལ་མཐུད་པར་མེ་སོར་མཐོ་སློབ་ཀྱི་སློབ་མ་ཚེ་ལོ་རྒྱལ་ལགས་བདམས་ཡོད་པ་དང་། ཚོགས་ཆེན་ཐེངས་དགུ་བ་༧གོང་ས་ཏཱ་ལའི་བླ་མའི་མཐོ་རིམ་སློབ་གཉེར་ཁང་དུ་འཚོགས་རྒྱུའི་གཏན་ཁེལ་བྱུང་ཡོད་འདུག
གསར་འགོད་པ། དོན་གོ
