མགོ་འཛུགས་བྱེད་ལ་ཉེ་པའི་རྒྱ་གར་རྒྱལ་ཡོངས་འོས་བསྡུ་ཆེན་མོ་བསླེབ་ལ་ཉེ་བ་དང་བསྟུན་ཏེ། ཟླ་འདིའི་ཚེས་ ༧ ཉིན་རྒྱ་གར་དབུས་འོས་བསྡུ་ལྷན་ཁང་གིས་མངའ་སྡེ་ཁག་ལ་བཀའ་ཁྱབ་ཅིག་བཏང་བའི་ནང་། ༡༩༥༥ ལོའི་རྒྱ་གར་མི་སེར་ཐོབ་ཐང་རྩ་ཁྲིམས་ཀྱི་ཆ་རྐྱེན་འོག ༡༩༥༠ ནས་ ༡༩༨༧ ལོའི་ནང་ཚུད་དུ་རྒྱ་གར་ནང་སྐྱེས་པའི་བོད་རིགས་སྐྱབས་བཅོལ་བ་ཚོ་རྒྱ་གར་གྱི་མི་སེར་ཡིན་སྟབས། ཁོང་ཚོའི་འོས་བསྡུའི་ཐོབ་ཐང་མུ་མཐུད་དུ་བཀག་འགོག་བྱེད་ཐབས་བྲལ་བས་འོས་བསྡུའི་ཐོ་གཞུང་ལ་དེབ་སྐྱེལ་བྱས་ཏེ་འོས་ཤོག་བླུག་ཆོག་ཅེས་བཀོད་ཡོད་འདུག
ཚེས་ ༡༡ ཉིན་རྒྱ་གར་བང་ཆེན་གསར་ཤོག་སྟེང་གནས་ཚུལ་བཀོད་པར། རྒྱ་གར་གཞུང་གིས་རྒྱ་གར་ནང་སྐྱབས་བཅོལ་དུ་སྡོད་པའི་བོད་རིགས་ཚོ་ཕྱི་རྒྱལ་མི་རིགས་ཤིག་ལ་ངོས་འཛིན་བྱེད་ཀྱི་ཡོད་ཀྱང་། ན་ནིང་ཕྱི་ཟླ་ ༨ པའི་ནང་ཀཱ་ཎ་ཊ་ཀའི་འབྲིང་རིམ་ཁྲིམས་ཁང་གིས་གོང་གི་དུས་བཀག་ནང་སྐྱེས་པའི་བོད་རིགས་ཤིག་ལ་རྒྱ་གར་མི་སེར་ཐོབ་ཐང་སྤྲད་ཡོད་པ་དང་། ༢༠༡༠ ལོའི་ཟླ་ ༡༢ ནང་ལྡི་ལི་མཐོ་རིམ་ཁྲིམས་ཁང་གིས་ཀྱང་བོད་རིགས་བུ་མོ་ཞིག་ལ་རྒྱ་གར་མི་སེར་ཐོབ་ཐང་སྤྲད་པར་བརྟེན། རྒྱ་གར་དབུས་འོས་བསྡུ་ལྷན་ཁང་གིས་གནས་ཚུལ་རྒྱུས་ལོན་བྱས་པ་བརྒྱུད་བཀའ་ཁྱབ་བཏང་བ་ཞིག་ཡིན་སྐོར་སོགས་བཀོད་འདུག
གནས་ཚུལ་ནང་མུ་མཐུད་བཀོད་པར། རྒྱ་གར་ནང་བོད་རིགས་སྐྱབས་བཅོལ་བ་འབུམ་གཅིག་ཁྲི་གཉིས་ལྷག་སྡོད་གནས་བྱེད་ཀྱི་ཡོད་ཅིང་། དེ་དག་མང་ཆེ་བ་ ༡༩༨༧ ལོའི་ཟླ་ ༧ ཚེས་ ༡ སྔོན་ལ་རྒྱ་གར་ནང་སྐྱེས་པ་ཡིན་ཚུལ་བཀོད་འདུག
གསར་འགོད་པ། ལྷ་སྐྱབས་རྒྱལ།
སྐྱབས་བཅོལ་ལག་དེབ་ཀྱི་ཐོག་ནས་འོས་འཕེན་ཆོག་ཟེར་བ་ཡིན་ན་་་་་་་་་ཨོའོ་་ཁག་པོ་རེད་བ། མི་སེར་ཡིག་ཆ་ཡོད་མཁན་ནི་བརྒྱ་ཆ་ཉུང་ཙམ་རེད།
གང་ལྟར་ཡང་གནས་ཚུལ་སྤྱི་རིམ་ནས་འགྱུར་འགྲོས་ཧ་ཅང་ཆེན་པོ་རེད།
ཁྲིམས་ཁང་དུ་གཅིག་རྒྱུག་འགྲོ་དགོས་མིན་ན་་་་་