དེ་རིང་རྒྱ་གར་ཤར་ཕྱོགས་དམག་སྤྱི་ཁང་གིས་གསལ་བསྒྲགས་སྤེལ་ཏེ་དམིགས་བསལ་དམག་དོན་རུ་ཁག་ཅིག་རྩ་འཛུགས་བྱས་ཏེ་རྒྱ་དཀར་ནག་གི་ས་མཚམས་སོགས་སུ་རྟོག་ཞིབ་བྱ་རྒྱུ་ཡིན་ཚུལ་བརྗོད་འདུག
རྒྱ་གར་གྱི་སྤྱི་ཁྱབ་དམག་དཔོན་ཆེན་མོ་བྷི་ཁམ་སིང་ ( Bikram Singh) ལགས་ཀྱི་བཀོད་འདོམས་ལྟར། ཀ་ལི་ཀ་ཌར་ཡོད་པའི་རྒྱ་གར་ཤར་ཕྱོགས་དམག་སྤྱི་ཁང་གིས་རྒྱ་གར་གྱི་ཨུ་བྷམ་པུར་ ( Udhampur) དང་ལཱག་ནོ་ ( Lucknow) ཡི་དམག་སྒར་ནས་མདའ་དཔོན་རེ་དང་དམག་མི་གསུམ་རེ་འདེམས་སྒྲུག་གིས་དམིགས་བསལ་དམག་དོན་རུ་ཁག་ཟེར་བ་ཞིག་གསར་འཛུགས་བྱས་ཡོད་སྐོར་དེ་རིང་གསལ་བསྒྲགས་སྤེལ་འདུག
དེ་ནི་ཉེ་ལམ་རྒྱ་ནག་གི་མཐའ་སྲུང་དམག་མིས་རྒྱ་དཀར་ནག་གི་ས་མཚམས་( Line of Actual Control) སོགས་བརྒྱུད་ནས་སྤྱི་ལེ་ ༤༠༥༩ ཙམ་ཡོད་པའི་ལ་དྭགས་མངའ་ཁུལ་དུ་བཙན་འཛུལ་དང་། པ་ཀི་སི་ཐན་དང་མཉམ་འབྲེལ་ཐོག་རྒྱ་གར་ལ་རྣམ་འགྱུར་མི་ལེགས་པ་བསྟན་པ། དེ་བཞིན་ཤར་ཞི་བདེ་རྒྱ་མཚོའི་མངའ་ཁུལ་དུ་མཁའ་དབྱིངས་དབྱེ་མཚམས་ཐིག་ཚད་བཟོས་པ་བཅས་ལ་རྟོག་ཞིབ་གདོང་ལེན་བྱ་ཆེད་ཡིན་འདུག
རྒྱ་གར་གྱི་མཐོ་རིམ་དམག་དཔོན་ཞིག་གིས། ང་ཚོས་རྒྱ་གར་གྱི་དབུས་ཤར་དང་ནུབ་ཕྱོགས་ས་ཁུལ་དུ་འཕྲད་བཞིན་པའི་ས་མཚམས་རྩོད་རྙོག་དང་། རྒྱ་ནག་གི་དམག་དོན་རྒྱ་སྐྱེད་ཐབས་ཇུས་གཙོས་རྒྱ་ནག་མཐའ་སྲུང་དམག་མིའི་ཉིན་རེའི་བྱ་སྤྱོད་ལ་ཉུལ་ཞིབ་བྱས་ཏེ་དམག་དོན་སྤྱི་ཁྱབ་ལ་སྙན་སེང་ཞུ་རྒྱུ་ཡིན་ཞེས་བརྗོད་འདུག
རྒྱ་ནག་ཕྱི་སྲིད་ལྷན་ཁང་གིས། རྒྱ་གར་གྱིས་རྒྱ་ནག་གི་དམག་དོན་ཐབས་ཇུས་ཐོག་རྟོག་ཞིབ་བྱེད་མཁན་ཚན་པ་ཞིག་གསར་འཛུགས་བྱས་པ་དེ་ནི་རྒྱ་གར་གྱིས་རྒྱ་ནག་ལ་ཁ་གཏད་ལྕོག་གི་ཡོད་སྐོར་བརྗོད་འདུག རྒྱ་ནག་གི་དམག་ཇུས་ཆེད་མཁས་པ་ནཱེ་ལིན་ཤུང་ (Ni Lengxiong) གིས། རྒྱ་གར་གྱིས་རྒྱ་ནག་གི་དམག་དོན་སྲིད་ཇུས་ཉེན་ཁ་ཞིག་ལ་བརྩིས་ཏེ། ཆེད་དུ་རྒྱ་ནག་གི་དམག་དོན་ཐབས་ཇུས་ལ་རྟོག་ཞིབ་བྱེད་མཁན་ཞིག་བཙུགས་པ་ཡིན་ཚུལ་བརྗོད་འདུག
༢༠༡༣ ལོའི་ཟླ་ ༡༠ པའི་ནང་རྒྱ་གར་སྲིད་བློན་མན་མ་ཧཱན་སིང་དང་རྒྱ་ནག་གི་སྲིད་བློན་ལི་ཁཱེ་ཆིང་གཉིས་ཀྱིས་མཐའ་མཚམས་སྲུང་སྐྱོབ་སྐོར་གྱི་ཡིག་ཆར་མིང་རྟགས་བཀོད་དེ། ས་མཚམས་ཁུལ་དུ་ཞི་བདེ་བརྟན་བརླིང་དང་དམག་འཐབ་མི་འབྱུང་བ། མཉམ་ལས་དམག་སྦྱོང་བྱ་རྒྱུ་སོགས་ལ་གྲོས་ཆོད་བཞག་ཡོད་པ་དང་། བདུན་ཕྲག་ཅིག་སྔོན་ལ་རྒྱ་གར་གྱི་རྒྱལ་སྲུང་སློབ་སྟོན་པ་ཤང་ཀར་མེ་ཎོན་ (Shiv Shankar Menon) ལགས་ཀྱིས་རྒྱ་ནག་གི་སྐུ་ཚབ་ཡང་ཇེ་ཆི་ (Yang Jiechi) ཐུག་སྟེ་ས་མཚམས་སྐོར་གྱི་གྲོས་མོལ་ཐེངས་ ༡༧ པ་དེ་ཚོགས་ཡོད་འདུག
