ཁ་སང་༧གོང་ས་མཆོག་གིས་ཨ་རིའི་ཚོང་འབྲེལ་ཁེ་ལས་བསྟི་གནས་ཁང་དུ། ཁོང་ཉིད་ཀྱི་ལས་འགན་དང་པོ་འགྲོ་བ་མིའི་རྒྱུད་ཀྱི་བཟང་སྤྱོད་གོང་མཐོར་གཏོང་ཐབས་དང་། གཉིས་པ་ཁོང་ཉིད་ནང་པ་ཡིན་པའི་ཆ་ནས་ཆོས་ལུགས་མཐུན་སྒྲིལ། གསུམ་པ་བོད་མི་ཞིག་དང་ཏཱ་ལའི་བླ་མའི་མཚན་གནས་ཡོད་སྟབས་བོད་ཀྱི་བྱམས་སྙིང་རྗེ་རྩ་བར་གྱུར་པའི་རིག་གཞུང་གཅེས་འཛིན་ཐོག་ཕྱག་ལས་གནང་གི་ཡོད་སྐོར་གསུངས་འདུག
ཁ་སང་ཚེས་ ༡༩ ཉིན་༧གོང་ས་མཆོག་ཨ་རིའི་རྒྱལ་ས་ཝ་ཤིན་ཌོན་དུ་ཡོད་པའི་ཨ་རིའི་ཚོང་འབྲེལ་ཁེ་ལས་བསྟི་གནས་ཁང་ (American Enterprise Institute) གི་ལྷན་ཚོགས་ཐོག་ཆིབས་བསྒྱུར་བསྐྱངས་ཏེ། ཨ་རིའི་གྲོས་ཚོགས་གོང་འོག་གཉིས་ཀྱི་ལས་བྱེད་ཁག་ཅིག་དང་། དཔལ་འབྱོར་དང་དང་ཁྲིམས་ལུགས་ཐོག་ཕྱག་ལས་གནང་མཁན་གྱི་གཞོན་སྐྱེས་ ༢༠༠ ཙམ་ལ་༼བདེ་སྐྱིད་རང་དབང་ཅན་གྱི་ཚོང་དོན་ལས་གཞི། འགྲོ་བ་མིའི་ནུས་སྟོབས་གོང་སྤེལ༽ཞེས་པའི་བརྗོད་གཞིའི་ཐོག་བཀའ་སློབ་གནང་འདུག
ལྷན་ཚོགས་ཐོག་༧གོང་ས་མཆོག་གིས། སྤྱིར་བཏང་འཛམ་གླིང་ནང་ཡོད་པའི་འགྲོ་བ་མི་ཚང་མ་བདེ་བ་ལས་སྡུག་བསྔལ་མི་འདོད་པ་དང་། བདེ་སྐྱིད་བསྒྲུབ་རྒྱུའི་ཐོབ་ཐང་ཡང་གཅིག་མཚུངས་ཡོད་སྟབས། གཅིག་ལ་གཅིག་བརྟེན་གྱི་སྤྱི་ཚོགས་ནང་འཇིག་རྟེན་སྤྱི་ཡོངས་ལ་བསམ་བློ་གཏོང་དགོས་རྒྱུ་ཧ་ཅང་གལ་ཆེན་པོ་ཡིན་པ་དང་། ཁོང་ཉིད་ཀྱི་ངོས་ནས་ལས་འགན་དང་པོ། འཇིག་རྟེན་ཀུན་ཁྱབ་དང་འགྲོ་བ་མིའི་རྒྱུད་ཀྱི་བཟང་སྤྱོད་གོང་མཐོར་སྤེལ་ཐབས་དང་། གཉིས་པ། ཁོང་ཉིད་ནང་པ་ཞིག་ཡིན་པའི་ཆ་ནས་ཆོས་ལུགས་ཕན་ཚུན་བར་མཐུན་སྒྲིལ་གོང་མཐོར་གཏོང་རྒྱུ། གསུམ་པ། བོད་མི་ཞིག་དང་ཏཱ་ལའི་བླ་མའི་མཚན་གནས་ཡོད་པའི་ཆ་ནས་བོད་ཀྱི་བྱམས་དང་སྙིང་རྗེ་རྩ་བར་གྱུར་པའི་རིག་གཞུང་གཅེས་འཛིན་བྱེད་རྒྱུ་ཆགས་ཡོད་སྐོར་སོགས་གསུངས་འདུག
འགྲོ་བ་མིའི་ཡ་རབས་བཟང་སྤྱོད་ཐད་༸གོང་ས་མཆོག་གིས། “ ཆོས་ལུགས་རྨང་གཞི་བྱས་པའི་བཟང་སྤྱོད་དེ་གུ་དོག་དྲགས་པ་རེད། ཆོས་ལུགས་དང་མ་འདྲེས་པའི་བཟང་སྤྱོད་དེ་ཆོས་དད་ཡོད་མེད་ལ་མ་ལྟོས་པར་འགྲོ་བ་མི་ཡོངས་ལ་ཁྱབ་ཐུབ་ཀྱི་ཡོད་སྟབས། ང་ཚོས་ཆོས་ལུགས་དང་མ་འདྲེས་པའི་བཟང་སྤྱོད་གོང་འཕེལ་གཏོང་རྒྱུ་ཧ་ཅང་གལ་ཆེན་པོ་ཆགས་ཡོད། ངོས་ནས་ཆོས་ལུགས་དང་མ་འདྲེས་པའི་བཟང་སྤྱོད་བཤད་སྐབས། ཡི་ཤུ་དང་ཁ་ཆེའི་གྲོགས་པོ་ཁག་ཅིག་གི་བློར་དེ་ཙམ་འབབ་ཀྱི་མི་འདུག ཆོས་ལུགས་དང་མ་འདྲེས་པའི་བཟང་སྤྱོད་ཅེས་པ་ཆོས་དད་མེད་མཁན་ཚོར་ཡང་བརྩི་བཀུར་བྱེད་དགོས་པ་ཞིག་ཆགས་ཡོད། མདོར་ན། ང་ཚོས་ལས་དོན་གང་ཞིག་བསྒྲུབ་ཀྱང་གཞན་ཕན་གྱི་བསམ་བློ་བཅང་ཐུབ་ན་རང་ཉིད་ལ་བདེ་སྐྱིད་ཐོབ་ཀྱི་རེད། རང་གཅེས་འཛིན་གྱི་བསམ་བློས་བདེ་སྐྱིད་ལྡན་པའི་འཛམ་གླིང་ཞིག་ནམ་ཡང་བསྐྲུན་ཐུབ་ཀྱི་མེད། ” ཅེས་གསུངས་འདུག
དྲི་བ་དྲིས་ལན་སྐབས་ན་གཞོན་ཞིག་གིས་དུས་རབས་ཉེར་གཅིག་ནང་གི་ཨ་རིའི་དམག་མི་ཚོར་བཀའ་སློབ་གང་འདྲ་ཡོད་མེད་དྲིས་སྐབས་ཁོང་གིས། “ དེ་ནི་འཛམ་གླིང་རང་བཞིན་གྱི་གནད་དོན་དང་འབྲེལ་བ་ཡོད་པ་ཞིག་རེད། དམག་འཁྲུག་ནི་འགྲོ་བ་མིའི་ལོ་རྒྱུས་ཀྱི་ཆ་ཤས་ཤིག་ཆགས་ཀྱི་ཡོད། འདས་པའི་དུས་སྐབས་ནང་རང་ཉིད་ཀྱི་དགྲ་བོ་ཕམ་པར་བསྒྱུར་ཐུབ་ན་རྒྱལ་ཁ་ཐོབ་པར་ངོས་འཛིན་བྱེད་བཞིན་ཡོད། དེང་སྐབས་འཛམ་གླིང་འདི་གཅིག་ལ་གཅིག་བརྟེན་ཡིན་པ་མ་ཟད། དཔལ་འབྱོར་གྱི་གནས་སྟངས་ཀྱང་གཅིག་ལ་གཅིག་བརྟེན་ཆགས་ཡོད་སྟབས། དངོས་ཡོད་གནས་སྟངས་ཐོག་ནས་གཅིག་ཕམ་པ་དང་གཞན་དེར་རྒྱལ་ཁ་ཐོབ་པ་དེ་འདྲ་མེད། དུས་རབས་ཉི་ཤུ་པ་ནི་དྲག་སྤྱོད་ཀྱི་དུས་རབས་ཤིག་ཆགས་ཡོད། གང་ཡིན་ཞེ་ན། དུས་རབས་དེའི་ནང་རྡུལ་ཕྲན་མཚོན་ཆ་བེད་སྤྱོད་བཏང་སྟེ་སྐར་ཆ་ཁ་ཤས་ནང་མི་སྟོང་ཕྲག་མང་པོའི་ཚེ་སྲོག་ཕྲོགས་ཡོད། དུས་རབས་ཉེར་གཅིག་གི་དུས་འགོར་ཡང་དྲག་སྤྱོད་བྱུང་ཡོད། དེ་ནི་དུས་རབས་སྔོན་མའི་ནོར་འཁྲུལ་དབང་གིས་བྱུང་བ་ཞིག་ཆགས་ཡོད། དུས་རབས་ཉེར་གཅིག་པ་འདིའི་ནང་ཐོག་མར་རྡུལ་ཕྲན་མཚོན་ཆ་རྣམས་མེད་པ་བཟོས་ཏེ། དུས་རབས་འདི་གྲོས་མོལ་གྱི་དུས་རབས་ཤིག་དང་ཞི་བདེའི་འཛམ་གླིང་ཞིག་བསྐྲུན་རྒྱུར་ང་ཚོ་ཚང་མས་སྔར་ལྷག་འབད་བརྩོན་བྱེད་དགོས། སྤྱིར་བཏང་བསམ་ཚུལ་མི་མཐུན་པ་ཡོང་ངེས་ཀྱང་། བསམ་ཚུལ་མི་མཐུན་པ་བྱུང་རུང་གྲོས་མོལ་གྱི་ལམ་ནས་ཐག་གཅོད་བྱེད་དགོས། དུས་རབས་འདིའི་ནང་དམག་མི་མེད་པ་བཟོས་ཏེ་ཞི་བདེའི་འཛམ་གླིང་ཞིག་བསྐྲུན་རྒྱུའི་རེ་བ་བྱེད་བཞིན་ཡོད། ” ཅེས་བཀའ་སློབ་གནང་འདུག
ཐེངས་འདིའི་ཨ་རིའི་ནང་གི་མཛད་འཕྲིན་དང་སྟབས་བསྟུན་ཏེ། ༧གོང་ས་མཆོག་གིས་དབྱིན་ཇིའི་རྒྱལ་ས་ལོན་ཌོན་དུ་ཡུ་རོབ་ཨེ་མ་ཊེ་ཡཱ་ཁ་ཆེའི་མང་ཚོགས་ (Ahmadiyya Muslim Community) ཀྱིས་གོ་སྒྲིག་འོག འཛམ་གླིང་ཆོས་ལུགས་ཁག་གི་དབུ་ཁྲིད་དང་ཆབ་སྲིད་མི་སྣ། མཁས་དབང་། གཞུང་གི་དཔོན་རིགས། ཕྱི་འབྲེལ་མི་སྣ། གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་སོགས་རྒྱལ་ཁབ་ ༢༦ ནས་འཐུས་མི་ ༥༠༠ ལྷག་མཉམ་འཛོམས་ཀྱིས་ཚོགས་བཞིན་པའི་རྒྱལ་སྤྱིའི་ཆོས་ལུགས་ལྷན་ཚོཊ་ཐོག་གསུང་འཕྲིན་བསྩལ་ཏེ། ཆོས་ལུགས་ཚང་མའི་གཞི་རྩའི་དམིགས་ཡུལ་གཞན་ཕན་གྱི་ལྟ་བ་དང་བྱམས་བརྩེ་གོང་སྤེལ་གཏོང་ཐབས། ནང་སེམས་ལ་ཞི་བདེའི་བསྐྲུན་ཆེད་ཡིན་སྟབས། ཆོས་ལུགས་ཚང་མར་གུས་བཀུར་བྱེད་རྒྱུ་གལ་ཆེན་ཡིན་པ་དང་། ཁོང་གི་ངོས་ནས་རྒྱལ་སྤྱིའི་ཆོས་ལུགས་ལྷན་ཚོགས་ལ་ལྷག་བསམ་རྣམ་དག་གིས་རྒྱབ་སྐྱོར་ཡོད་ཅེས་གསུངས་ཡོད་འདུག
དེ་རིང་༧གོང་ས་མཆོག་གིས་ཝ་ཤིན་ཌོན་དུ་བོད་མི་དང་ཧི་མ་ལ་ཡའི་རི་རྒྱུད་ཀྱི་མི་རིཊ། སོག་པོ་བཅས་ལ་དམིགས་བསལ་མཇལ་ཁ་གནང་ཡོད་འདུག་ལ། རྒྱལ་སའི་མཛད་འཕྲིན་གྲུབ་རྗེས་ཨ་རིའི་ནུབ་ཕྱོགས་མངའ་སྡེ་ཁ་ལེ་ཧྥོ་ནི་ཡའི་གྲོང་ཁྱེར་ལོ་སི་ཨན་རྗེ་ལེ་སི་ (Los Angeles) དང་། སེན་ཧྥི་རན་སི་ཀོ་ (San Francisco) བཅས་གྲོང་ཁྱེར་ཁག་ལྔའི་ནང་ཆིབས་བསྒྱུར་མཛད་འཕྲིན་བསྐྱང་རྒྱུ་ཡིན་འདུག
གསར་འགོད་པ། དོན་གོ
