བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༡༨ སྟེང་གི་རྩོམ་སྒྲིག་པའི་གཏམ།
བོད་རང་བཙན་ཟེར་བ་དུས་ཀྱི་བསྐལ་བ་དང་། དབུ་མའི་ལམ་ཟེར་བ་ཡུལ་གྱི་བསྐལ་བ། བདེན་པའི་ཨུ་ཚུགས་དངོས་པོའི་བསྐལ་བ་སྟེ། བསྐལ་དོན་གསུམ་གྱི་ངོ་བོར་འགྱུར་བཞིན་པའི་བོད་དོན་དེ་སྤྱང་ཚོགས་ཁྲོད་ཀྱི་ལྤགས་ཧྲལ་ལྟར། ཆབ་སྲིད་པ་ཚོས་ཁེ་བཟང་ཡོད་དུས་ཡར་བཏེགས་ནས་མགོ་ལ་འཁུར། ཁེ་ཕན་མེད་སྐབས་མར་གཡུགས་ནས་ས་ལ་བརྡབ། བོད་དོན་འཐབ་རྩོད་འདི་ལྟར་ཕྱིན་ན་འགྲུབ་འབྲས་རི་བོང་གི་ར་དང་། རུས་སྦལ་གྱི་སྤུ། གནམ་མཁའ་ཡི་པད་མོ་ཡིན།
བསྐལ་དོན་གསུམ་ཟེར་བ་ཚིག་མཛོད་དང་གྲུབ་མཐའི་གཞུང་སོགས་སུ། བར་དུ་ཆོད་པའི་དབང་གིས་ལག་ཏུ་འཐོབ་དགའ་བའམ་རྒྱང་ཐག་རིང་བའི་དབང་གིས་ནང་དོན་རྟོགས་དཀའ་བ། ཞེས་འགྲེལ་འདུག་པ་ལྟར་ཁ་སང་དེ་རིང་གི་བོད་དོན་རྩོད་ཕྱོགས་དེ་དཔེ་འདི་ལ་སྦྱར་ན་ཏག་ཏག་འཇུག་པོ་དང་འཕྲོད་པོ་འདུག
དབུ་མའི་ལམ་ལ་དམིགས་ཡུལ་མེད་རབ་དང་བོད་རང་བཙན་ལ་གྲུབ་འབྲས་མེད་སྐོར། བདེན་པའི་ཨུ་ཚུགས་ལ་ཉེན་ཁ་ཆེ་ཚུལ་བཤད་དེ། རང་ཉིད་ཐོ་གང་མདུན་དུ་བསྐྱོད་ཐབས་ལ་བསམ་བློ་མི་གཏོང་བར། གཞན་པའི་རྐང་པ་འདོམ་གང་མར་འཐེན་ཐབས་ལ་འབད་བརྩོན་བྱས་ཏེ། ཡར་བསྟོད་མར་ཐེན་ནང་འཛིང་གིས་ཉི་མ་བཏང་སྟེ་ལོ་ཟླ་སྐྱེལ་འདུག་རྒྱུ་ལས། བོད་ཕྱི་ནང་གཉིས་ནས་ཉི་མ་རེ་རེ་དང་གོམ་པ་རེ་རེ་མདུན་དུ་བསྐྱོད་ཐབས་ཀྱི་ཧྲག་བར་བཙལ་ནས་ལམ་ཁ་བཟོ་དགོས།
འདས་པའི་ལོ་ལྔ་དྲུག་ཚུན་ལ་བོད་ས་སྟོད་སྨད་བར་གསུམ་དུ་བོད་ཡིག་བོད་སྐད་ལ་བདག་གཅེས་དང་ཁོར་ཡུག་སྲུང་སྐྱོབ། འཕྲོད་བསྟེན་སློབ་གསོ། བོད་རིགས་ནང་ཁུལ་རང་འགན་རང་འཁུར་དང་རང་དོན་རང་གཅེས་ཀྱི་བསམ་བློ་གསར་པ་ཞིག་དབུ་ཚུགས་ཏེ། གྲོང་ཁྱེར་གྲོང་གསེབ་མེད་པར་ལས་འགུལ་ཆེ་ཆུང་སྨྱུ་གུ་འབུས་ནས་འདབ་ལག་རྒྱས་བཞིན་འདུག དེ་བཞིན། ཀྲུང་ཧ་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དང་མི་རིགས་ས་གནས་རང་སྐྱོང་བཅའ་ཁྲིམས། ས་ཁུལ་སོ་སོའི་སྒྲིག་ཡིག་དང་སྲོལ་ཡིག་སོགས་སུ་གང་ཞིག་འཁོད་པ་ལག་ལེན་དང་། མ་འཁོད་པ་ཞུ་སྐུལ་དང་གྲོས་བསྡུར་བརྒྱུད་རྩོད་ལེན་བྱས་ཏེ་རིམ་འཕར་དམངས་གཙོའི་ལམ་དུ་བསྐྱོད་ཐུབ་ལ་འབད་དགོས།
རྒྱ་ནག་དམར་ཤོག་གི་དབང་བསྒྱུར་འོག་ཏུ་འཛམ་གླིང་སྤྱི་སྲོལ་གྱི་དམངས་གཙོའི་ཁྲིམས་སྒྲིག་སྣ་གཅིག་མཐོང་རྒྱུ་མེད་ཀྱང་། དབུས་གཞུང་གི་བསླུ་བྲིད་ཅིག་གམ་ས་གནས་ཀྱི་འགྲོ་སྟངས་གང་ཡིན་ཆ་མ་འཚལ་ཡང་། བོད་པའི་གྲོང་གསེབ་ཁུལ་དུ་ཆོས་དང་རིག་གཞུང་སྲུང་སྐྱོབ་དང་། མི་རིགས་ཐོབ་ཐང་རྩོད་ལེན། དམངས་གཙོའི་ལམ་ལུགས་ལག་ལེན་བསྟར་སའི་ལམ་ཁ་དོག་པོ་ཞིག་མངོན་གསལ་མིན་པའི་ཚུལ་དུ་ལྷག་ཡོད། ལམ་ཁ་དེར་དངོས་སུ་གོམ་པ་རེ་རེ་འཇུག་བཞིན་པའི་ས་གནས་རེ་ཟུང་མདོ་དབུས་ཁམས་གསུམ་ནང་ཡོད་པ་མཐོང་ཐོས་འདུག
བོད་མདོ་སྨད་ཕྱོགས་སུ། སྡེ་བ་རེ་ལ་སྡེ་དཔོན་རེ་དང་། སྡེ་དཔོན་ལྔ་དྲུག་རེར་མགོ་བསྒྲིལ་སྡེ་དཔོན་ཆེ་བ་རེ། སྡེ་དཔོན་ཆེ་བ་དག་གི་སྒང་ན་ཞང་སྲིད་གཞུང་ཡོད། སྡེ་དཔོན་དེ་དག་ལོ་གསུམ་དང་ལྔ་རེའི་མཚམས་སུ་སྡེ་བའི་ཁྱིམ་བདག་ཚོས་མང་མོས་སྤྱི་མོས་ཐོག་བསྐོ་བཞག་བྱ་དགོས། སྡེ་དཔོན་ཆེ་བའི་མི་འགྲོ་དམར་ཤོག་ཚོགས་པའི་ཚོགས་མི་ཡིན་དགོས་ཤིང་། ཁོང་ཅག་འདེམ་བསྐོ་བྱེད་མཁན་ཡང་ས་གནས་དེ་གའི་དམར་ཤོག་ཚོགས་པའི་ཚོགས་མི་དག་ཡིན་དགོས་ཀྱང། ཞང་ངམ་ཡུལ་འཚོ་གཅིག་གི་འོག་ཏུ། སྡེ་དཔོན་ཆེ་བ་བདུན་བརྒྱད་རེ་ཡོད་ལ། སྡེ་དཔོན་ཆེ་བ་དག་ལ་འཇོན་ནུས་དང་རང་ཚུགས་བརྟན་པོ་ཡོད་ན་ཡུལ་ཚོའི་སྲིད་གཞུང་གི་ལས་དོན་ཐོག་ནུས་པ་གང་འཚམ་འདོན་ཐུབ་པ་མ་ཟད། ཡུལ་ཚོའི་མགོ་ཁྲིད་ཀྱང་སྡེ་དཔོན་ཆེ་བ་དག་གིས་འོས་འདེམས་བྱེད་པའི་ལམ་ཁ་ཀྱག་ཀྱོག་ཅིག་མངོན་ཆུང་གིས་ང་ཚོར་ལྷག་ཡོད་སྟབས། རིམ་འཕར་དམངས་གཙོའི་གོམ་པ་དང་པོ་ལམ་འདི་ནས་སྤོ་དགོས་སོ།།
