ལོ་གསར་ལ་རྟེན་འབྲེལ་ཞུས་འདུག

ཟླ་འདིའི་ཕྱི་ཚེས་ ༡༩ ཉིན་བལ་ཡུལ་གྱི་རྒྱ་ནག་གཞུང་ཚབ་ཁང་གིས་ལོ་གསར་གྱི་སྣེ་ལེན་སྤྲོ་ཚོགས་ཟེར་བ་ཞིག་བསྡུས་ཏེ་ས་གནས་བོད་མི་ཚོར་ལོ་གསར་གྱི་རྟེན་འབྲེལ་ཞུས་ཡོད་འདུག

རྒྱ་ནག་གཞུང་འབྲེལ་ཤིན་ཧྭ་དྲ་བའི་ཐོག་གནས་ཚུལ་སྤེལ་བ་ལྟར་ན། ཕྱི་ཚེས་ ༡༩ ཉིན་བལ་ཡུལ་གྱི་ཕྱི་དྲོའི་ཆུ་ཚོད་ ༧ པ་ཙམ་ལ་བལ་བོའི་རྒྱལ་ས་ཀ་ཊི་མན་ཊིའུ་རུ། བལ་ཡུལ་དུ་གནས་སྡོད་རྒྱ་ནག་གཞུང་ཚབ་ཁང་གི་གོ་སྒྲིག་འོག བོད་ཤིང་ཕོ་རྟ་ལོའི་ལོ་གསར་གྱི་སྣེ་ལེན་སྤྲོ་ཚོགས་ཞེས་པ་ཞིག་ཆེད་དུ་བསྡུས་ཏེ་གླུ་གར་འཁྲབ་སྟོན་དང་གསོལ་སྟོན་བཤམས་ཡོད་པ་དང་། སྤྲོ་ཚོགས་ཐོག་ཀྲུང་དབྱང་མི་དམངས་ཀུན་ཁྱབ་རླུང་འཕྲིན་ལས་ཁུངས་བོད་སྐད་འཕྲིན་ལམ་གྱི་སྤྱི་ཁྱབ་ལྟ་སྐུལ་བ་ཚེ་དགའ་ཟེར་བའི་གཙོས་རྒྱ་ནག་གཞུང་ཚབ་ཁང་གི་ལས་བྱེད་དང་བལ་ཡུལ་གྱི་རྒྱ་རིགས། བལ་པོའི་མི་སེར། དེ་བཞིན་བོད་རིགས་སེར་སྐྱ་བཅས་མཉམ་ཞུགས་བྱས་ཡོད་འདུག

སྤྲོ་ཚོགས་ཐོག་རྒྱ་ནག་གི་གཞུང་ཚབ་བུ་ཆུང་ཐར་ཟེར་བ་དེས། བོད་ཁུལ་གྱི་བརྟན་ལྷིང་དང་གོང་འཕེལ་ཐད་བྱས་རྗེས་བཞག་པའི་རྒྱལ་གཅེས་བོད་རིགས་སྤུན་ཟླ་རྣམས་ལ་སྙིང་ཐག་པ་ནས་གུས་བཀུར་ཡོད་ལུགས་དང་། བལ་ཡུལ་ནི་རྒྱ་ནག་གི་ཁྱིམ་མཚེས་རྒྱལ་ཁབ་གཙོ་བོ་ཞིག་ཡིན་ཞིང་བོད་རང་སྐྱོང་ལྗོངས་དང་སྦྲེལ་ཡོད་ལ། འདས་པའི་ལོ་གཅིག་ནང་རྒྱལ་ཁབ་གཉིས་ཀྱི་མཐོ་རིམ་དཔོན་རིགས་བར་འབྲེལ་འདྲིས་ཀྱིས་ཆབ་སྲིད་དང་ཚོང་དོན། རིག་གནས་བཅས་ཀྱི་ཐད་མཉམ་ལས་གྲོས་ཆོད་རབ་དང་རིམ་པར་མིང་རྟགས་བཀོད་ཡོད་ཅིང་། མཐའ་མཚམས་འབྲེལ་བ་སྐས་རིམ་གསར་པ་ཞིག་གི་ཐོག་བསླེབས་ཡོད་སྐོར་བརྗོད་ཡོད་འདུག

གསར་འགོད་པ། པདྨ་མཚོ།