དགེ་རྒན་ལ་ཆེ་མཐོང་དང་བརྩི་འཇོག་ཡོང་ཐབས་བྱ་རྒྱུ་ཡིན་ཟེར།

ཤེས་རིག་ཚོགས་ཆེན་ཐེངས་དྲུག་པའི་ཐོག་མ་འོངས་པར་དགེ་རྒན་ལ་གསོལ་ཕོགས་དང་སྨན་ཁང་བསྟེན་གཏུག་སོགས་ཀྱི་མཐུན་རྐྱེན་དང་ཆེ་མཐོང་དང་བརྩི་འཇོག་ཡོང་ཐབས་བྱ་རྒྱུ་ཡིན་པ་མ་ཟད། མཐའ་མཚམས་སོཊ་སུ་ཡོད་པའི་དགེ་རྒན་ལ་དམིགས་བསལ་མཐུན་རྐྱེན་དང་གླ་ཕོགས་སྤྲོད་རྒྱུ་ཡིན་པའི་གྲོས་ཆོད་བཞག་འདུག

ཟླ་སྔོན་མའི་ཚེས་ ༧ ནས་ ༩ ཉིན་བར་བཙན་བྱོལ་བོད་མིའི་སློབ་གྲྭ་ཁག་ནས་ཕེབས་པའི་དགེ་ལས་ ༢༡༥ ཙམ་ལ། ངྷ་ཤོད་སློབ་གྲྭའི་ཚོགས་ཁང་དུ་ཤེས་རིག་ཚོགས་ཆེན་ཐེངས་དྲུག་པ་ཚོགས་ཏེ་གྲོས་གཞི་གཙོ་བོ་ ༣ གྱི་ཐོག་བགྲོ་གླེང་གྲོས་ཆོད་བཞག་ཡོད། གྲོས་གཞི་དང་པོ་དགེ་རྒན་གྱི་ཁྱད་ལས་ཡར་རྒྱས་གཏོང་ཕྱོགས་ཞེས་པའི་ཐད། ཤེས་རིག་ལས་ཁུངས་ཀྱི་འཆར་འགོད་དང་མི་སྣ་ཆེད་ཕེབས་ཀྱིས་ངོ་སྤྲོད་དང་གོ་རྟོགས་སྤེལ་རྒྱུ་དང་། དགེ་རྒན་ཕན་ཚུན་གྱི་ལས་དོན་དང་འབྲེལ་བའི་བསམ་ཚུལ་བརྗེ་ལེན་གྱི་དྲ་རྒྱའི་བརྒྱུད་ལམ་ཞིག་འཛུགས་རྒྱུ། དགེ་རྒན་གྱི་འབྲི་རྩོམ་དང་དཔྱད་རྩོམ། ཁྱད་ལས་པའི་རྣམ་དཔྱོད་དང་ཉམས་མྱོང་སྤེལ་སའི་དུས་དེབ་ཅིག་འདོན་རྒྱུ། དགེ་རྒན་རྣམས་ལ་ཡིག་འབྲེལ་བརྒྱུད་ཤེས་ཡོན་གོང་མཐོར་གཏོང་བའི་གོ་སྐབས་དང་། སློབ་ཡོན་དམིགས་བསལ་གནང་རྒྱུ།

ཤེས་ཡོན་སྲིད་བྱུས་ནང་འཁོད་ལྟར་དགེ་རྒན་གྱི་སྤུས་ཚད་སྟངས་འཛིན་ཚད་ལྡན་ཡོང་སླད། ཤེས་ཡོན་ལྷན་ཚོགས་ཀྱིས་ལོ་ ༥ རེའི་དུས་ཡུན་ཅན་གྱི་དགེ་རྒན་ལས་སྒོར་ཞུགས་པའི་ལག་འཁྱེར་ཞུ་དགོས་པ་བཟོ་རྒྱུ་དང་། ལག་འཁྱེར་བསྐྱར་ལེན་བྱེད་པར་དུས་ཡུན་དེའི་རིང་རང་གི་ཁྱད་ལས་གོང་འཕེལ་གཏོང་བའི་ཟབ་སྦྱོང་གསར་པ་གྲངས་ངེས་ཅན་རེ་འགྲིམ་དགོས་པའི་ཆ་རྐྱེན་འདོན་རྒྱུ། དགེ་རྒན་གྱི་སྡོད་གནས་སུ་གློག་ཀླད་དང་དྲ་རྒྱ། དཔེ་མཛོད་ཁང་དུ་དཔེ་དེབ་སྣ་འཛོམས། སློབ་ཚན་སློབ་ཐབས་ཀྱི་འཕྲུལ་འཁོར་ (LCD Projector) བཅས་ཀྱི་མཐུན་རྐྱེན་བསྐྲུན་རྒྱུ་དང་། དགེ་རྒན་གྱི་གསོལ་ཕོགས་སྤར་ཆ་དང་། སྨན་ཁང་བསྟེན་གཏུག་དང་མཛད་སྒོ་སོགས་ཀྱི་སྐབས་མི་མང་དཀྱུས་མ་བཞིན་མིན་པར་ཆེ་མཐོང་དང་། བརྩི་འཇོག་ཡོང་ཐབས་བྱ་རྒྱུ། མཐའ་མཚམས་སོགས་ས་ཆ་ཁུག་ཀྱོག་ཏུ་ཡོད་པའི་སློབ་གྲྭ་ཁག་གི་དགེ་རྒན་རྣམས་ལ་མཐུན་རྐྱེན་དང་གླ་ཕོགས་སོགས་དམིགས་བསལ་གནང་རྒྱུ་བཅས་གཏན་འབེབས་གནང་འདུག

གྲོས་གཞི་གཉིས་པ། སྔོན་འགྲོ་དང་གཞི་རིམ་འོག་མའི་སྐབས་ཀྱི་དགེ་རྒན་གྱི་འོས་ཆོས་དང་སྐད་ཡིག་སློབ་ཁྲིད། ཨང་རྩིས་སོགས་དུས་མཐུན་ཁྲིད་ཐབས་སྲ་བརྟན་དང་ལེགས་བཅོས་གཏོང་ཕྱོགས་ཞེས་པའི་ཐད། སྔོན་འགྲོ་དང་གཞི་རིམ་འོག་མའི་དགེ་རྒན་གསར་པ་བསྐོ་གཞག་གནང་ཕྱོགས་དང་དགེ་རྒན་གྱི་འོས་ཆོས། མཐུན་རྐྱེན། གསོལ་ཕོགས་སོགས་བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་ཀྱི་དོན་ཚན་ ༡༡།༡༢ ནང་དུ། “སྔོན་འགྲོ་དང་གཞི་རིམ་འོག་མའི་དགེ་རྒན་རྣམས་ཉེ་བའི་གཙུག་ལག་རབ་འབྱམས་པའི་ཤེས་ཚད་ཐོག་དགེ་རྒན་འོས་སྦྱོང་ཡོད་པ་དགོས་ཤིང་། དེ་དག་གི་གླ་ཕོགས་དང་མཐུན་རྐྱེན་ཁག་ཀྱང་གཞི་རིམ་གོང་མའི་དགེ་རྒན་དང་གཅིག་མཚུངས་དགོས་པ་བཟོ་རྒྱུ།” ཞེས་པ་ཕྱག་བསྟར་གནང་རྒྱུ། སྐད་ཡིག་གི་ཁྱད་ཆོས་བཞི་སྟེ། ཀློག་རྩལ། འབྲི་རྩལ། འཆད་རྩལ། ཉན་རྩལ་རྣམས་སློབ་མའི་རྒྱུད་ལ་འཇགས་ཐབས་གནད་འགག་ངོ་སྤྲོད་གནང་རྒྱུ།  སློབ་གྲྭའི་ནང་དུ་ཁྲིད་ཆས་ཁང་(Resource Room) ངེས་པར་དུ་དགོས་པ་དང་། སྔོན་འགྲོ་གཙོས་གཞི་རིམ་སློབ་གྲྭའི་ནང་འཛིན་གྲྭ་རེར་ཕྲུ་གུའི་གྲངས་ཚད་ ༡༥ ལྷག་མེད་པ་གཙོ་འདོན་གནང་རྒྱུ།

ཤེས་རིག་ལས་ཁུངས་ཀྱི་ངོས་ནས་སློབ་ཕྲུག་གི་ལོ་ཚད་དང་ཤེས་ཡོན་ལ་དཔག་པའི་སྒྲུང་དེབ་དང་། བརྙན་པར་འོད་སྡེར། སྒྲ་བརྙན་འཁོར་ཐག པར་རིས་སྒྲུང་དེབ་སོགས་སྔར་བཞིན་པར་སྐྲུན་གང་མང་གནང་རྒྱུ། ལྷག་པར་དུ་བོད་ཡིག་གི་ཞབས་མཆན་གསལ་བའི་བོད་སྐད་ཐོག་ཡ་རབས་བཟང་སྤྱོད་དང་ལྡན་པའི་བྱིས་པའི་འགུལ་རིས་ལྟད་མོ་དགོས་གལ་ཆེ་བ་དང་། དེ་བཞིན་གཞི་རིམ་འོག་མ་དང་སྔོན་འགྲོའི་ཆེད་དུ་དབུ་མེད་ཐོག་རི་མོ་མཉམ་དུ་ཡོད་པའི་གོ་བདེའི་བྱིས་སྒྲུང་དཔེ་དེབ་ཚད་ལྡན་གང་མང་བཟོ་གལ། བོད་བསྒྱུར་ཞུས་པའི་སློབ་ཚན་རྣམས་ཀྱི་ཐ་སྙད་གསར་པ་རྣམས་ལ་སྐད་ཡིག་ཤན་སྦྱར་གང་མང་དགོས་པ་དང་། ཚིག་འགྱུར་རྣམས་ཀྱང་ཐ་སྙད་གཏན་འབེབས་སྡེ་ཚན་ནས་གཏན་འབེབས་གནང་བའི་བརྡ་ཆད་ལ་གཞི་བཅོལ་ནས་གཅིག་གྱུར་ཡོང་ཐབས་བྱ་རྒྱུ། སློབ་དེབ་གཏན་འབེབས་མ་གནང་གོང་རགས་ཟིན་དགེ་རྒན་རྣམས་ལ་ཟླ་ཤས་རིང་འགྲེམས་སྤེལ་བྱས་ཏེ། དགེ་རྒན་ལས་ལེགས་ཉེས་བསམ་འཆར་བསྡུ་རུབ་གནང་གྲུབ་རྗེས་གཏན་འབེབས་གནང་དགོས་པ། ལྷག་པར་དུ་སློབ་དེབ་བསྐྱར་ཞིབ་དེ་ཁ་ཚ་དགོས་གཏུགས་མ་ཟད། ད་ལྟའི་འཛིན་གྲྭ་བཞི་པ་དང་ལྔ་པའི་བོད་ཡིག་སློབ་དེབ་དག་ལོ་ ༢༠ ཙམ་འགྲོ་བཞིན་ཡོད་སྟབས། བསྐྱར་བཅོས་གང་མགྱོགས་དང་ཕྱིས་སུ་ལོ་ལྔ་རེའི་ནང་སློབ་དེབ་བསྐྱར་ཞིབ་ངེས་པར་གནང་རྒྱུ་བཅས་ཡིན་འདུག

གྲོས་གཞི་གསུམ་པ། ཤེས་ཡོན་སྲིད་བྱུས་ཀྱི་ཤེས་ཡོན་སྤྲོད་པའི་དགོས་དམིགས་རང་དབང་དང་། གཞན་ཕན། རྒྱུན་འཛིན། གསར་གཏོད་བཞི་སློབ་མ་རྣམས་ཀྱི་རྒྱུད་ལ་སད་སྨིན་རྫོགས་གསུམ་ཡོང་ཐབས་ཞེས་པའི་ཐད། ཤེས་ཡོན་སྤྲོད་དགོས་པའི་དམིགས་ཡུལ་བཞི་པོ་འདི་དག་ཉིན་རེའི་སློབ་ཚན་དང་འབྲེལ་ནས་སློབ་ཁྲིད་ཡོང་ཐབས་ཀྱི་ལམ་སྟོན་ལག་དེབ་གསར་བསྒྲིག་དང་འབྲེལ་ཡོད་དགེ་རྒན་རྣམས་ལ་ངོ་སྤྲོད་གསལ་བཤད་དང་འགྲེམས་སྤེལ། དེ་བཞིན་ཕ་མ་དང་མང་ཚོགས་ལའང་གསལ་བཤད་གནང་ཐབས་དགོས་རྒྱུ། སློབ་གྲྭའི་ནང་བགྲོ་གླེང་དང་གཏམ་བཤད་ཀྱི་ལས་རིམ་གང་མང་གོ་སྒྲིག་སྐབས་བརྗོད་བྱ་གང་ཡིན་སློབ་གྲྭ་ནས་ངོ་སྤྲོད་བྱེད་པ་ལས་རྗོད་བྱེད་སློབ་ཕྲུག་རང་ཉིད་ཀྱིས་བཟོ་དགོས་པ་དང་། དེ་ཡང་བློ་འཛིན་དང་ཤོག་ཐོག་ནས་ཀློག་པ་ལྟ་བུ་མ་ཡིན་པར་བོད་སྐད་གཙང་མའི་ཐོག་ནས་ཐད་ཀར་ཤོད་ཐུབ་ཐབས་ཀྱི་ལས་འགུལ་སྤེལ་ཐབས་དགོས་རྒྱུ།

སློབ་ཕྲུག་ཆུང་དུས་ནས་རང་འགན་འཁུར་རྒྱུ་དང་། ལོ་རེར་རིག་རྩལ་འཁྲབ་སྟོན་ཐེངས་གཅིག་གཉིས་གོ་སྒྲིག་གིས་སློབ་མ་སོ་སོའི་འཇོན་ནུས་གོང་འཕེལ་གཏོང་བའི་གླེང་སྟེགས་ཤིག་བསྐྲུན་གལ་ཆེ་བ་མ་ཟད། འཛིན་གྲྭར་སློབ་ཕྲུག་གི་ལན་འདེབས་ནོར་བར་དམའ་འབེབས་མེད་པར་ནོར་བཅོས་དང་སེམས་ཤུགས་སྤར་ཐབས། དེ་བཞིན་སྦྱོང་ཚན་ཁག་གི་ལན་འདེབས་སློབ་མ་རང་ངོས་ནས་འབྲི་འཇུག་གལ། སྤྱི་ཚོགས་དང་ཁོར་ཡུག་ལས་དོན་ཐོག་ལ་སློབ་མ་རྣམས་དངོས་སུ་མཉམ་ཞུགས་གནང་དུ་བཅུག་ནས། སློབ་གྲྭ་སོ་སོའི་ཉེ་འགྲམ་དུ་ཡོད་པའི་སྨན་ཁང་ཆེ་ཁག་དང་རྒན་གསོ་ཁང་དུ་སློབ་ཕྲུག་རྣམས་ལྟ་སྐོར་དུ་ཁྲིད་ན་ནད་པ་འདྲ་མིན་ཡོད་པ་ངོ་སྤྲོད་ཐུབ་པ། དེ་བཞིན་འབྱུང་བཞི་འཁྲུགས་པ་ལས་ས་ཡོམ་དང་། ཆུ་ལོགས་རུད། ནད་ཡམས་སོགས་ཀྱི་གོད་ཆག་བྱུང་སྐབས་སློབ་ཕྲུག་རྣམས་འཁྲིད་དེ་རོགས་སྐྱོར་ལས་འགུལ་ནང་ཞུགས་ན་གཞན་ཕན་གྱི་བསམ་བློ་ངང་གིས་སླེབས་ཐུབ།

སློབ་གྲྭའི་དགེ་ལས་རྣམས་ནི་སློབ་ཕྲུག་རྣམས་ཀྱི་མིག་དཔེ་དང་། རེ་ཡུལ་ངོ་འདྲིས་ཅན་ཡིན་སྟབས། དགེ་ལས་སོ་སོའི་ཉིན་རེའི་སྤྱོད་ཚུལ་སྤྱི་དང་ཡང་སྒོས་སློབ་ཕྲུག་དང་ཐད་ཀར་འབྲེལ་བ་གནང་བའི་སྐབས་སུ་བྱམས་སྐྱོང་ལྡན་པ། དྲང་པོ་ཞི་འཇམ་སོགས་དགོས་རྒྱུ། སྐད་ཡིག་ནི་མི་རིགས་ཀྱི་སྲོག་རྩ་ཡིན་ཞིང་། བོད་ཀྱི་རིག་གཞུང་རྒྱུན་འཛིན་ཐུབ་མིན་ནི་བོད་ཀྱི་སྐད་ཡིག་རྒྱུན་འཛིན་ཐུབ་མིན་ལ་རག་ལས་སྟབས། སློབ་ཕྲུག་རྣམས་ལ་བོད་ཀྱི་སྐད་ཡིག་གི་སློབ་སྦྱོང་སྔར་ལས་ལྷག་པ་ཡོང་བའི་གོ་སྐབས་དང་ཆ་རྐྱེན་ངེས་པར་བསྐྲུན་རྒྱུ་བཅས་གྲོས་ཆོད་ཁག་གཏན་འབེབས་གནང་འདུག

གསར་འགོད་པ། དོན་གོ