ཧུའུ་ཅིན་ཐའོ་ལ་འདྲི་རྩད།

ཉེ་སྔོན་སི་པེན་ཆེས་མཐོའི་ཁྲིམས་ཁང་གིས་རྒྱ་ནག་གི་སྲིད་འཛིན་ཟུར་པ་ཧུའུ་ཅིན་ཐའོ་ལ་བོད་ཀྱི་གནད་དོན་སྐོར་འདྲི་རྩད་བྱས་འདུག

ཟླ་འདིའི་ཕྱི་ཚེས་ ༢༥ ཉིན་སི་པེན་གྱི་གསར་ཁང་ (Agencia EFE) གིས་གནས་ཚུལ་སྤེལ་བ་ལྟར་ན། འདས་ལོའི་ལོ་མཇུག་ཏུ་སི་པེན་ཆེས་མཐོའི་ཁྲིམས་ཁང་གིས་རྒྱ་ནག་གི་སྲིད་འཛིན་ཟུར་པ་ཅང་ཙེ་མེན་སོགས་མཐོ་རིམ་དཔོན་རིགས་ ༥ ཡིས། བོད་དུ་མི་རིགས་རྩ་མེད་བཟོ་བའི་སྲིད་བྱུས་ལག་བསྟར་བྱས་པའི་ནག་ཉེས་འོག་འཛིན་བཟུང་བཀའ་ཁྱབ་བཏང་ཡོད་པ་ལྟར། ཉེ་སྔོན་སི་པེན་ཆེས་མཐོའི་ཁྲིམས་ཁང་གིས་རྒྱ་ནག་གི་སྲིད་འཛིན་ཟུར་པ་ཧུའུ་ཅིན་ཐའོ་ཡིས་བོད་རང་སྐྱོང་ལྗོངས་ཀྱི་དམར་ཤོག་དྲུང་ཆེའི་འགན་འཁུར་སྐབས། གཞི་རྒྱ་ཆེ་བའི་དྲག་གནོན་གྱི་ལས་འགུལ་སྤེལ་ཏེ་མི་རིགས་རྩ་མེད་གཏོང་བའི་སྲིད་བྱུས་ལག་བསྟར་བྱས་ཡོད་པའི་དོགས་གཞིའི་འོག འབྲེལ་ཡོད་གནད་དོན་ཁག་ ༤༨ བཏོན་ཏེ་ཧུའུ་ལ་འདྲི་རྩད་བྱས་ཡོད་འདུག

སི་པེན་ཆེས་མཐོའི་ཁྲིམས་ཁང་གི་ཁྲིམས་དཔོན་ (Smael Moreno) ལགས་ཀྱིས་ཧུའུ་ལ་བཏོན་པའི་གནད་དོན་ཁག་གི་ནང་། ཧུའུ་ཡིས་༡༩༨༨ ནས་ ༡༩༩༢ ལོའི་བར་བོད་རང་སྐྱོང་ལྗོངས་དམར་ཤོག་དྲུང་ཆེའི་འགན་འཁུར་སྐབས། དམག་མི་དང་ཉེན་རྟོག་པས་བོད་མིར་དྲག་གནོན་བྱས་ཏེ་མི་གྲངས་ ༤༥༠ དམར་གསོད་བཏང་བ་དང་། མི་ ༧༠༠༠ ལ་རྨས་སྐྱོན་ཕོག་པ། མི་ ༣༥༠ གར་སོང་ཆ་མེད། མི་ ༣༠༠༠ འཛིན་བཟུང་བཀག་ཉར་བྱས་པའི་ནག་ཉེས་དེ། ཁོ་བོའི་བཀའ་བཀོད་ལག་བསྟར་བྱས་པའི་མཇུག་འབྲས་ཡིན་པ་ཤེས་ཀྱི་ཡོད་དམ། ཞེས་དང་། ལྷ་ས་བཙོན་ཁང་དང་པོའི་ནང་བཙོན་པ་བརྒྱ་ཕྲག་ལ་མནར་གཅོད་བཏང་སྟེ་འདས་གྲོངས་སུ་བཏང་བ་དེར་ཧུའུ་ཡིས་ཆོག་མཆན་སྤྲད་ཡོད་མེད། ༡༩༩༤ ལོར་བོད་ཀྱི་ལས་དོན་བཞུགས་མོལ་ཚོགས་འདུ་ཐེངས་ ༣ པའི་ཐོག ཏཱ་ལའི་བླ་མ་ལ་ཐུག་འཕྲད་བྱེད་མཁན་ཚོ་གསར་བརྗེ་ངོ་ལོག་པ་ཡིན་པའི་གཏན་འབེབས་བྱུང་མིན། དེ་བཞིན། ཁོ་བོས་ལོ་ངོ་ ༡༠ ལྷག་གི་རིང་རྒྱ་ནག་དབུས་དམག་དོན་ཨུ་ཡོན་ལྷན་ཁང་གི་མགོ་ཁྲིད་ཀྱི་འགན་འཁུར་སྐབས། བལ་པོ་དང་རྒྱ་གར་ལ་བྲོས་བྱོལ་དུ་འགྲོ་མཁན་གྱི་བོད་མི་ཚོ་འཛིན་བཟུང་དང་ཁྲིམས་ཆད་བཏང་བའི་གནད་དོན་དག་ཤེས་རྟོགས་བྱུང་མིན་སོགས་འདྲི་རྩད་བྱས་ཡོད་འདུག

འདས་ལོར་སི་པེན་གྱི་བཙན་བྱོལ་བོད་མིའི་ཚོགས་པ་གཉིས་དང་། ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས་བཅས་ཀྱིས། སི་པེན་ཁྲིམས་ཁང་ལ་ཧུའུ་ཅིན་ཐའོ་ཡིས་བོད་མི་རིགས་རྩ་མེད་གཏོང་བའི་སྲིད་བྱུས་སྤེལ་བའི་གཏུག་བཤེར་སྙན་ཞུ་ཕུལ་ཡོད་པ་ལྟར། སི་པེན་ཆེས་མཐོའི་ཁྲིམས་ཁང་གིས་དངོས་སུ་ཞིབ་བཤེར་ལག་བསྟར་བྱས་པ་ཞིག་ཡིན་ལ། བོད་དོན་ཐད་ཀྱི་ནག་ཉེས་ཞིབ་བཤེར་དེ་ཧུའུ་ཅིན་ཐའོ་གཅིག་པུར་བྱས་པ་མིན་པར་ད་ལྟའི་བར་སི་པེན་ཁྲིམས་ཁང་གིས་རྒྱ་ནག་གི་མཐོ་རིམ་དཔོན་རིགས་ ༦ གི་ནག་ཉེས་གཏུག་བཤེར་སྙན་ཞུ་དང་ལེན་བྱས་ཡོད་འདུག ཆབ་སྲིད་དཔྱད་ཞིབ་པ་ཚོས་ཧུའུ་ཅིན་ཐའོ་དངོས་གནས་སི་པིན་ཁྲིམས་ཁང་དུ་སྐྱེལ་ཐུབ་རྒྱུ་ཁག་པོ་ཡིན་ཡང་། ད་ཆ་ཁོ་བོ་དཀའ་ངལ་མང་པོ་ཞིག་ལ་འཕྲད་དུ་བཅུག་ཡོད་སྐོར་བརྗོད་འདུག

གསར་འགོད་པ། པདྨ་མཚོ།