གཟའ་མིག་དམར་ཉིན་ནས་བཟུང་བོད་ཀྱི་བུད་མེད་ལྷན་ཚོགས་ཀྱིས་དྲ་ཐོག་ཏུ་མཚན་རྟགས་བསྡུ་རུབ་ཀྱི་ལས་འགུལ་ཞིག་སྤེལ་གྱི་ཡོད་འདུག
ཟླ་འདིའི་ཚེས་ ༢༥ ཉིན་ནས་བཟུང་བོད་ཀྱི་བུད་མེད་ལྷན་ཚོགས་ཀྱི་དྲ་རྒྱ་ www.tibetanwomen.org ཐོག་བོད་རྒྱ་ཞི་མོལ་ཡོང་ཐབས་ཀྱི་མཚན་རྟགས་བསྡུ་རུབ་ཅེས་པའི་ལས་འགུལ་ཞིག་མགོ་འཛུགས་གནང་ཡོད་པ་དང་། དེ་རིང་བར་དྲ་ཐོག་ཏུ་མི་ ༡༩༦ གིས་མཚན་རྟགས་བཀོད་ཡོད་འདུག
འདིའི་ཐད་བུད་མེད་ལྷན་ཚོགས་ཀྱི་ཚོགས་གཙོ་བཀྲ་ཤིས་སྒྲོལ་མ་ལགས་ཀྱིས་ངོ་སྤྲོད་གནང་བ་ལྟར་ན། ཐེངས་འདིའི་མཚན་རྟགས་བསྡུ་རུབ་ཀྱི་ལས་འགུལ་དེ། ཟླ་འདིའི་ཚེས་ ༢༥ ནས་མགོ་འཛུགས་ཀྱིས་ཕྱི་ཟླ་ ༣ ཚེས་ ༡༢ བར་སྤེལ་རྒྱུ་ཡིན་འདུག་ལ། ལས་འགུལ་འདིའི་དམིགས་ཡུལ་གཙོ་བོ། ད་ལྟའི་བར་རྒྱ་གཞུང་གིས་བོད་ནང་མཁྲེགས་འཛིན་གྱི་སྲིད་བྱུས་ལག་བསྟར་བྱས་པ་ལ་བརྟེན་ནས་བོད་མི་མང་པོ་ཞིག་གིས་རང་ལུས་མེར་བསྲེཊ་གནང་ཡོད་པ་ལྟར། མ་འོངས་པར་བོད་ནང་རང་ལུས་མེར་བསྲེཊ་གཙོས་པའི་དཀའ་ངལ་མི་འབྱུང་བ་དང་། བོད་རྒྱལ་གཉིས་ཀའི་དཀའ་རྙོག་དེ་ཞི་བའི་བཀའ་མོལ་གྱི་ལམ་ནས་སེལ་བར་རྒྱལ་སྤྱིའི་རང་དབང་ལྡན་པའི་རྒྱལ་ཁབ་དང་ཚོགས་པ་ཁག་བཅས་ཀྱིས་རྒྱ་ནག་ལ་གནོན་ཤུགས་སྤྲད་དེ་མགྱོགས་མྱུར་ཞི་མོལ་གནང་རྒྱུའི་འབོད་སྐུལ་གནང་ཆེད་ལས་འགུལ་འདི་སྤེལ་བ་ཞིག་ཡིན་ཚུལ་ངོ་སྤྲོད་གནང་བྱུང་།
ཐེངས་འདིའི་བུད་མེད་ལྷན་ཚོགས་ཀྱི་མཚན་རྟགས་བསྡུ་རུབ་ལས་འགུལ་དེ། བོད་མི་ཙམ་མིན་པར་རྒྱལ་སྤྱིའི་ཐོག་བོད་དོན་ལ་དོ་སྣང་དང་ཐུགས་འཁུར་གནང་མཁན་གྱི་མི་སྒེར་ཚང་མས་བླུག་ཆོག་པའི་ཆེད་དུ་དྲ་རྒྱའི་ཐོག་སྤེལ་བ་ཞིག་ཡིན་འདུག་ལ། མཚན་རྟགས་བསྡུ་རུབ་གནང་གྲུབ་རྗེས་འཛམ་གླིང་མཉམ་འབྲེལ་རྒྱལ་ཚོགས་དང་། རྒྱལ་ཚོགས་འགྲོ་བ་མིའི་ཐོབ་ཐང་ཚོགས་པ། རྒྱལ་སྤྱིའི་ཉེས་ཡང་ཚོགས་པ། རྒྱལ་ཁབ་ཁག་གི་སྲིད་གཞུང་བཅས་ལ་གཏོང་འཆར་ཡོད་འདུག
གསར་འགོད་པས་ཁོང་ལ་ལོ་གསར་བའི་གནང་བུད་མེད་ལྷན་ཚོགས་ལ་བོད་དོན་ཐད་ལས་འགུལ་དང་ལས་འཆར་གསར་བ་ག་རེ་ཡོད་མེད་དྲིས་པར་ཁོང་གིས། “ ལོ་གསར་བའི་ནང་ང་ཚོས་ལས་འགུལ་གཅིག་དེ་བུད་མེད་སྒེར་ལངས་ཉིན་གྱི་ལས་འགུལ་ཐད་གྲ་སྒྲིག་དང་དེའི་ཐོག་ལས་འགུལ་ཇི་ལྟར་སྤེལ་མིན་ཐོག་ལས་འཆར་བསྒྲིགས་ཡོད། དེ་མིན་ལོ་གསར་བའི་ནང་འདས་པའི་མི་ལོ་དེ་དག་རིང་བོད་ནང་བོད་མི་དང་རྒྱ་མི་རིགས་བར་མི་རིགས་བསྲེས་ལྷད་ཀྱི་གནས་ཚུལ་གང་འདྲ་བྱུང་ཡོད་མེད་དང་། བཙན་བྱོལ་ནང་བོད་པ་དང་མི་རིགས་གཞན་བར་བསྲེས་ལྷད་ཀྱི་གནས་ཚུལ་གང་འདྲ་བྱུང་ཡོད་མེད་བཅས་བརྗོད་གཞི་གཉིས་ཀྱི་ཐོག་ཉམས་ཞིབ་བྱ་རྒྱུའི་འཆར་གཞི་སོགས་བསྒྲིགས་ཡོད། ” ཅེས་བརྗོད་བྱུང་།
གསར་འགོད་པ། དོན་གོ
