གཞིས་བྱེས་མཉམ་འཛོམས་མ་བྱུང་བར་ང་ལ་ལོ་གསར་མེད།

ངྷ་ས་གཙུག་ལག་ཁང་གི་རྒྱལ་གཅེས་དཔའ་བོའི་དྲན་རྟེན་རྡོ་རིང་མདུན་དུ། ལོ་གསར་ཚེས་གཅིག་གི་ཞོགས་པ་ནས་ཆུ་ཚོད་ ༧༢ རིང་ཟས་བཅད་ཆུ་བཅད་ཀྱི་ངོ་རྒོལ་གནང་མཁན་སཱ་ར་མཐོ་སློབ་ཀྱི་སློབ་མ་བསྟན་པ་དར་རྒྱས་ལགས་ཀྱི་ལས་འགུལ་དེ་ཁ་སང་ཞོགས་པར་མཚམས་འཇོག་གནང་ཡོད་ཅིང་། ཁོའི་ལས་འགུལ་དེ་ནི་རང་ལུས་མེར་བསྲེགས་གཏོང་མཁན་རྒྱལ་གཅེས་དཔའ་བོ་དཔའ་མོ་རྣམས་ཀྱི་ཁྱིམ་མི་གཉེན་འབྲེལ་གྱི་གཙོས་གཞིས་ལུས་བོད་མི་ཚོར་གདུང་སེམས་མཉམ་སྐྱེད་མཚོན་ཆེད་ཡིན་འདུག

གསར་འགོད་པས་ཁ་པར་བརྒྱུད་བསྟན་པ་དར་རྒྱས་ལགས་སུ་ཁོང་གི་གཟུགས་པོའི་གནས་སྟངས་དང་དཀའ་ངལ་ཅི་འཕྲད་སྐོར་དྲིས་པར་ཁོང་གིས། གཟུགས་པོ་ཧ་ཅང་ཐང་ཆད་པ་དང་སྐད་ཆེན་པོ་གྲགས་ཐུབ་ཀྱི་མི་འདུག དེ་ནས་ནང་དགོང་ལ་དབུགས་ཀྱིས་མི་འདང་བའི་དཀའ་ངལ་ཏོག་ཙམ་འདུག་མ་གཏོགས་གཞན་པ་སྐྱོན་མི་འདུག ཟས་བཅད་ངོ་རྒོལ་གྱི་ཉིན་དང་པོ་དེར་གནམ་གཤིས་ཀྱིས་ཅུང་ཙམ་དཀའ་ངལ་འཕྲད་སོང་། དེ་ནས་ཉིན་གསུམ་པ་དེར་གཟུགས་པོ་ཧ་ཅང་ཐང་ཆད་པ་དང་མགོ་ཡིས་རང་ཚུགས་མ་ཐུབ་པར་ཉིན་གང་བོར་ཉལ་བསྡད་པ་ཡིན། དེ་མ་གཏོགས་དཀའ་ངལ་ཆེན་པོ་འཕྲད་མ་སོང་། ཐེངས་འདིའི་ཟས་བཅད་ངོ་རྒོལ་སྐབས་གཞུང་འབྲེལ་མ་ཡིན་པའི་ཚོགས་པ་ཁག་གི་གཙོས་བོད་མི་དང་ཕྱི་རྒྱལ་བ་མང་པོས་རྒྱབ་སྐྱོར་དང་གདུང་སེམས་མཉམ་སྐྱེད་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། ཞེས་བརྗོད་བྱུང་།

ད་རེབ་ཀྱི་ལས་འགུལ་བརྒྱུད་སྤྱི་ཚོགས་ཐོག་བོད་དོན་ཕྱིར་བསྒྲགས་ཀྱི་ནུས་པ་ཅི་ཙམ་ཐོན་ཡོད་དྲིས་པར། ང་མི་དཀྱུས་མ་ཞིག་གིས་བོད་དོན་ཐད་སྤྱི་ཚོགས་ལ་ཚོར་ཤུགས་ཆེན་པོ་སྤྲད་ཐུབ་སོང་བསམ་པ་བྱུང་། དཔེར་ན། རྒྱ་གར་གྱི་ཚགས་ཤོག་ཁྱབ་ཆེ་ཤོས་རྒྱ་གར་དུས་བབ་སོགས་གསར་འགྱུར་བརྒྱུད་ལམ་ཁག་མང་པོ་ཞིག་ཏུ་བསླེབས་འདུག་ལ། ལྷག་པར་དུ་སྐད་འཕྲིན་བརྒྱུད་དེ་བོད་ནང་དུ་མང་པོ་བརྒྱུད་བསྒྲགས་བྱས་འདུག་པས། གཞིས་བཞུགས་སྤུན་ཟླ་དང་ལྷག་པར་དུ་རང་ལུས་མེར་བསྲེགས་གནང་མཁན་གྱི་ཁྱིམ་མི་གཉེན་འབྲེལ་ཚོས་མཁྱེན་རྟོགས་བྱུང་ཡོད་པའི་རེ་བ་ཡོད། ད་ཐེངས་ཕྱི་རྒྱལ་བ་སོགས་མི་མང་འདུ་འཛོམས་བྱས་པའི་གོ་སྐབས་དང་བསྟུན་ཏེ་ངས་ལོ་གསར་མི་གཏོང་དགོས་པའི་རྒྱུ་མཚན་སྐོར་གྱི་བསྒྲགས་གཏམ་ཡིག་ཆ་ ༢༠༠ ལྷག་པར་སྐྲུན་བྱས་ཏེ་བཀྲམས་པ་ཡིན། གང་ལྟར་ང་མི་ང་ཆུང་ཞིག་གིས་སྤེལ་བའི་ལས་འགུལ་འདི་ཨོ་ཙམ་བྱུང་སོང་བསམ་ནས་ང་ རང་ཡིད་ཚིམ་བསྡད་ཡོད། ཅེས་བརྗོད་བྱུང་།

ཁོང་གིས་བསྒྲགས་གཏམ་ནང་དུ་ལས་འགུལ་གྱི་དགོས་དམིགས་སོགས་བཀོད་དོན། “ མི་ལོ་ཉིས་སྟོང་མ་ཟིན་ཙམ་གྱི་ལོ་རྒྱུས་ལྡན་པའི་ དུས་ཆེན་གལ་ཆེན་འདི་མི་ཚང་རེ་རེའམ་མི་བུ་རེ་རེའི་ངོས་ནས་བརྩི་སྲུང་བྱེད་སྲོལ་ཡོད་ནའང་། སྤྱི་ལོ་ ༢༠༠༨ ས་བྱི་ཞི་རྒོལ་ཆེན་མོ་བྱུང་བ་ནས་བཟུང་ད་ལྟའི་བར་དུ་མི་ལོ་ལྔ་ཡི་རིང་ལ་གཞིས་ བྱེས་གཉིས་ཀྱིས་སེམས་ཀྱི་ན་གཟུ་མ་ཐེག་པར་ལོ་ནག་སྲུང་བརྩི་བྱེད་དགོས་བྱུང་བ་རེད། ཡིན་ནའང་། མི་རིགས་ཤིག་གི་སྲོལ་རྒྱུན་གྱི་རིག་གཞུང་ལ་འབྲེལ་བ་ཡོད་པའི་དུས་ཆེན་ཁྱད་པར་ཅན་དེ་འདི་ལྟར་ཉམས་རྒུད་དུ་གཏོང་ག་ལ་རུང་། རྒྱུ་མཚན་དེའི་དབང་གིས་ད་ལོ་ནས་བཟུང་སྟེ་ཁུ་སིམ་སིམ་གྱིས་སྲོལ་རྒྱུན་དེ་ལྟར་སླར་གསོ་བྱེད་མགོ་བཙུགས་ཡོད་པ་འདྲ། དེ་ནི་འོས་ཤིང་འཚམ་པའི་བྱེད་སྟངས་མ་ནོར་བ་ཞིག་རེད་འདུག་སྙམ་པའི་ཚོར་སྣང་དང་བཅས་ཏེ་གུས་བརྩི་ཞུ་བཞིན་ཡོད། སྤྱི་ལོ་ ༡༩༩༨ ནས་ད་ལྟའི་བར་དུ་བོད་ཕྱི་ནང་གཉིས་ནས་རྒྱལ་གཅེས་དཔའ་བོ་དཔའ་མོ་བརྒྱ་དང་སུམ་ཅུ་ལྷག་གིས་རང་ལུས་མེར་བསྲེགས་བཏང་བ་འདི་ནི་ཆེས་ཚད་མཐོ་བའི་སྨྲ་བསམ་བརྗོད་འདས་ཀྱི་ལས་འགུལ་ཞིག་ཡིན་ལ། འགྲོ་བ་མིའི་རིགས་བྱུང་བ་ནས་དེ་རིང་བར་དུ་ས་ཆེན་གོ་ལ་འདིའི་སྟེང་དུ་བྱུང་མ་མྱོང་བའི་ལས་འགུལ་ཞིག་ཀྱང་ཡིན་པ་རེད་མོད། སྒེར་གཅོད་རང་ལུགས་པའི་དབང་སྒྱུར་བ་དག་ལ་ཚོར་བ་གང་ཡང་མེད་པའི་མངོན་གསལ་གྱི་རྣམ་འགྱུར་དེ་ལས། ང་ཚོས་རྟོགས་ཐུབ་པ་ཞིག་ནི་མཚོན་བྱེད་གསུམ་ཅན་གྱི་ལས་འགུལ་གྱིས་རྒྱ་ནག་དམར་པོའི་གཞུང་ལ་གཡོ་འགུལ་གང་ཡང་གཏོང་མི་ཐུབ་པ་དེ་རེད་འདུག་སྙམ། འོན་ཀྱང་འཚེ་མེད་ཞི་བའི་ལས་འགུལ་གྱི་ཆ་ཤས་མང་པོ་ཞིག་མཚོན་བྱེད་ཅན་གྱི་ལས་ འགུལ་ཡིན་ཙ་ན་སྣང་མེད་དུ་འཇོག་ག་ལ་རུང་། དེ་ལྟར་བསམས་ནས་བདག་གིས་ད་ལོ་ནས་བཟུང་སྟེ་བོད་གཞིས་བྱེས་མཉམ་འཛོམས་མ་བྱུང་ བར་དུ་ལོ་གསར་ཡོད་ཚད་མྱ་ངན་གྱིས་བསུ་རྒྱུའི་དམ་བཅའ་བྱེད་ཀྱིན་ཡོད། སྤྲོ་སྐྱིད་ལྡན་པའི་དུས་ཚིགས་ཁྱད་པར་ཅན་ཞིག་ཅིའི་ཕྱིར་འདི་ལྟར་མྱ་ངན་ལ་ བསྒྱུར་དགོས་སོང་བ་རེད། དེ་ནི་རྒྱལ་ཁབ་བཙན་གྱིས་ཕྲོགས་པར་སྙིང་ནད་དྲག་ཏུ་འབར་བས་ཡིན་ལ། སྤུན་ཟླ་དམར་གསོད་བྱས་པའི་ཤ་འཁོན་སེམས་ན་ཡོད་པས་ཡིན། མ་ཟད་དགྲ་བོའི་གཉའ་གནོན་འོག་གི་སྡུག་བསྔལ་བཟོད་ཐབས་བྲལ་བས་ཡིན། འདི་དག་ནི་ངའི་སྤྲོ་སྐྱིད་ཀྱི་ཉི་མ་ཕྲོགས་པའི་གཤེད་མ་དངོས་དེ་ཡིན། ”ཞེས་དང་།

ཡང་ ཁོང་གིས་མུ་མཐུད་དུ། “སྤྱིར་བོད་མི་ཞིག་ཡིན་པ་ཙམ་གྱིས་འགན་འཁྲི་ཉག་གཅིག་ཡོད་པ་དེ་ནི་ད་ལྟའི་བོད་ པ་ཚང་གི་གནས་སྟངས་བརྗེད་མི་རུང་བ་དང་། རང་ནུས་གང་ལྕོགས་ཀྱིས་ཐབས་ལམ་སྣ་ཚོགས་ལ་བརྟེན་ཏེ་རྒྱལ་ཁབ་སྐྱོབ་ཐབས་ལ་འབད་ རྒྱུ་དེ་ནི་མེད་དུ་མི་རུང་བའི་འོས་འགན་ཞིག་ཡིན། བདག་ལ་མཚོན་ན་དེང་སྐབས་སློབ་མའི་མིང་ཐོག་ཏུ་བསྡད་ཡོད་སྟབས་ནམ་རྒྱུན་གདུང་སེམས་མཉམ་བསྐྱེད་དང་། བོད་དོན་དྲིལ་བསྒྲགས་སོགས་ཀྱི་ལས་གཞི་འདྲ་མིན་ནང་མཉམ་ཞུགས་ཀྱི་ཁོམ་ལོང་ཡང་མ་མཆིས། ད་ཐེངས་ལོ་གསར་གུང་སེང་དང་སྟབས་བསྟུན་ཏེ་ང་དང་ངའི་མི་རིགས་ཀྱི་ཆེད་དུ། ང་དང་ངའི་རྒྱལ་ཁབ་ཀྱི་ཆེད་དུ། གཅེས་པའི་ལུས་སྲོག་གཏོང་མཁན་གྱི་དཔའ་བོ་དཔའ་མོ་ཚོའི་ཕ་མ་དང་། བཟའ་ཟླ། བུ་ཕྲུག གཉེན་ཉེ་སོགས་ལ་གདུང་སེམས་མཉམ་བསྐྱེད་མཚོན་བྱེད་དུ་ཆུ་ཚོད་ ༧༢ རིང་ཟས་བཅད་ཆུ་བཅད་ཀྱི་མྱ་ངན་བྱ་རྒྱུ་ཐག་གཅོད་བྱས་པ་ཡིན། འདི་ཡང་ང་རང་བོད་པ་ཞིག་ཡིན་པའི་རྒྱུ་མཚན་གྱིས་ཅི་བྱ་གཏོལ་མེད་དུ་གྱུར་ནས་བྱས་པ་ཞིག་ལས་གཞན་འདི་ལ་ནུས་པ་གང་ཡང་མེད་མོད། དེ་ལྟ་ནའང་། ངས་གདུང་སེམས་མཉམ་བསྐྱེད་བྱེད་ས་དེ་ཚོས་བཙན་བྱོལ་བོད་མི་ཞིག་གིས་འདི་ལྟར་སྐྱབས་བཅོལ་ནས་ལོ་གསར་གཏོང་རྒྱུ་གཏན་ནས་དོར་ཏེ། གདུང་སེམས་མཉམ་བསྐྱེད་བྱེད་ཀྱིན་ཡོད་པ་ཤེས་སོང་ན་ང་ལ་དེས་ཆོག ” ཅེས་བཀོད་འདུག

གསར་འགོད་པ། པདྨ་མཚོ།