མདང་ནུབ་མ་ལེ་ཞི་ཡ་ནས་རྒྱ་ནག་པེ་ཅིན་དུ་འཕུར་བའི་ (777) རྟགས་ཅན་གྱི་གནམ་གྲུ་ཞིག་བོར་བརླག་ཕྱིན་ཡོད་འདུག གནམ་གྲུ་དེ་འདང་ནུབ་པེ་ཅིན་གྱི་ཆུ་ཚོད་ ༡༢།༤༡ སྟེང་མ་ལེ་ཞི་ཡའི་ཅི་ལུང་ཕའོ་གནམ་ཐང་ནས་འཕུར་ཡོད་ཅིང་། བར་སྣང་དུ་འཕུར་རྗེས་དོ་དམ་ལྟེ་གནས་དང་འབྲེལ་གཏུག་ཆད་ཡོད་པ་དང་དེའི་ནང་འགྲུལ་བ་ ༢༣༩ ཡོད་འདུག
རྒྱ་ནག་དང་མ་ལེ་ཞི་ཡ། དེ་བཞིན། ཝེ་ཐི་ནམ་བཅས་ཀྱིས་གྲུ་གཟིངས་དང་གནམ་གྲུ་མང་པོ་བཏང་སྟེ་འཚོལ་ཞིབ་བྱེད་ཀྱི་ཡོད་ཀྱང་། ད་ལྟ་གནམ་གྲུ་དེ་མ་ལེ་ཞི་ཡ་དང་ཝེ་ཐི་ནམ་ཕྱོགས་ཀྱི་མཚོ་ནང་དུ་ལྷུང་ཡོད་ཅིང་། དེའི་ནང་གི་འགྲུལ་བ་ཡོངས་ཀྱི་ཚེ་སྲོག་ཤོར་ཚར་བའི་ཚོད་དཔག་བྱེད་ཀྱིན་ཡོད་འདུག མཉམ་འབྲེལ་རྒྱལ་ཚོགས་ཀྱི་དྲུང་ཆེ་བྷན་ཁཱེ་མོན་གྱིས་འགྲུལ་བ་དེ་དག་གི་ནང་མི་ཚོར་སེམས་གསོའི་འཚམས་འདྲི་གནང་ཡོད་འདུག
ད་སྔ་རྒྱ་ནག་དང་མ་ལེ་ཞི་ཡ་གཉིས་ངོས་ནས་གནམ་གྲུ་དེར་གནས་ཚུལ་ཅི་བྱུང་བ་དང་། དོན་རྐྱེན་གང་ལ་འབྲེལ་བ་ཡོད་མེད་སོགས་གཞུང་འབྲེལ་གསལ་བསྒྲགས་སྤེལ་མེད་ཀྱང་། གནམ་གྲུའི་ནང་ཡུ་རོབ་ནས་ཡིན་པའི་འགྲུལ་བ་གཉིས་ཀྱི་ཕྱི་སྐྱོད་ལག་འཁྱེར་ཚད་ལྡན་མིན་པ་དང་། དེ་གཉིས་འཇིགས་སྐུལ་དྲག་སྤྱོད་པ་ཡིན་སྲིད་པའི་ཚོད་དཔག་བྱེད་བཞིན་ཡོད་ཅིང་། ཨ་རིའི་རྟོག་ཞིབ་ཚན་པའི་མི་སྣ་ཆེད་གཏོང་གིས་གནས་ཚུལ་དེའི་ཐད་ཞིབ་འཇུག་བྱེད་བཞིན་ཡོད་འདུག
གནམ་གྲུའི་ནང་ཁྱོན་མི་ ༢༣༩ ཡོད་པ་ལས། ད་སྔ་གསལ་བོ་བྱུང་བ་རྒྱ་ནག་གི་མི་ ༡༥༤ དང་། ཧིན་ཊུའུ་ནེ་ཤི་ཡཱའི་མི་ ༡༢ ། ཨོ་སི་ཊོ་ལེ་ཡཱ་ ༧ ། ཨ་རིའི་མི་ ༤ ། ཧྥ་རན་སུའི་མི་ ༣ ། དེ་མིན་ཁེ་ན་ཌ་དང་ཨུ་རུ་སུ། ཡུའུ་ཁུ་རཱེན་སོགས་རྒྱལ་ཁབ་གཞན་ཁག་ཅིག་གི་མི་བཅས་ཡོད་པ་ལས་ལོ་ཆུང་ཤོས་ ༢ དང་ཆེ་ཤོས་ ༧༣ ཡིན་འདུག
