དཔའ་བོའི་རྗེས་དྲན་སྐུ་བརྙན།

ཨོ་སི་ཊོ་ལི་ཡའི་རྒྱ་རིགས་བོད་དོན་རྒྱབ་སྐྱོར་ཚོགས་པ་ཞིག་གིས་བོད་ཀྱི་འགྲེམས་སྟོན་ཁང་གི་མདུན་དུ་བོད་མིའི་རང་ལུས་མེར་བསྲེགས་ལ་རྗེས་དྲན་སྐུ་བརྙན་ཞིག་གསར་བཞེངས་དབུ་འབྱེད་གནང་སོང་།

དེ་རིང་སྔ་དྲོར་དྷ་ས་ཐེག་ཆེན་གཙུག་ལག་ཁང་དུ་བོད་མིའི་སྒེར་ལངས་དུས་དྲན་ཐེངས་ ༥༥ པའི་གཞུང་འབྲེལ་མཛད་སྒོ་གྲུབ་རྗེས། བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཁག་གིས་སྣེ་ཁྲིད་དེ་དྷ་ཤོད་ཀ་ཅཱ་རིའི་ཁྲིམས་ཁང་བར་མི་མང་གིས་སྐད་འབོད་གོམ་བགྲོད་གནང་ཡོད། ཆུ་ཚོད་ ༡༠།༣༠ ཙམ་ལ་གཙུག་ལག་ཁང་གི་བོད་ཀྱི་འགྲེམས་སྟོན་ཁང་གི་མདུན་དུ། ཨོ་སི་ཊོ་ལི་ཡར་རྟེན་གཞི་བྱས་པའི་རྒྱ་རིགས་ཚོགས་པ་རིས་ཆཱི་རིག་གཞུང་ཐེབས་རྩ་ཁང་གིས། ད་ལྟའི་བར་བོད་ཕྱི་ནང་གཉིས་ནས་བོད་མི་ ༡༣༠ ཙམ་གྱིས་བོད་དོན་ཆེད་རང་ལུས་མེར་བསྲེགས་གནང་བར་རྗེས་དྲན་སྐུ་བརྙན་ཞིག་བཞེངས་ཡོད་པ་དེ། བོད་མིའི་སྒྲིག་འཛུགས་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་གིས་དབུ་འབྱེད་གནང་སོང་།

སྐབས་དེར་རྒྱ་རིགས་ཚོགས་པ་དེའི་སྐུ་ཚབ་ལྕམ་ཆི་ཅཱ་ཀྲིན་ལགས་ཀྱིས་གཏམ་བཤད་གནང་དོན། “དེ་རིང་གསུམ་བཅུའི་དུས་དྲན་དང་བོད་ཕྱི་ནང་གཉིས་ནས་རང་ལུས་མེར་བསྲེགས་བཏང་བའི་རྒྱལ་གཅེས་དཔའ་བོ་དཔའ་མོ་རྣམས་ལ་རྗེས་དྲན་གྱི་ཉིན་མོ་གལ་ཆེན་འདིར། བཞུགས་སྒར་དྷ་རམ་ས་ལར་བཙན་བྱོལ་བོད་མི་དང་རྒྱ་མི་མཉམ་འཛོམས་ཀྱིས་དུས་དྲན་སྲུང་གཙི་ཞུ་རྒྱུ་དང་། སྐུ་བརྙན་འདིས་རྒྱ་གཞུང་གི་དབང་བསྒྱུར་འོག་སྡུག་སྦྱོང་མནར་གཅོད་ཐེབས་པའི་བོད་མི་ཁྲི་སྟོང་མང་པོ་དང་རང་ལུས་མེར་བསྲེགས་གནང་བའི་བོད་རིགས་སྤུན་ཟླ་ཚོར། ང་ཚོ་ནམ་ཡང་ཁོ་ཚོར་བརྩེ་བ་ཡོད་ལ་ནམ་ཡང་བརྗེད་མི་སྲིད་པ་མཚོན་ཡོད། བོད་མི་འདི་འདྲ་མང་པོས་ག་རེ་བྱས་ནས་རང་ལུས་མེ་རུ་བསྒྲོན་པ་རེད། ཁོ་ཚོའི་རེ་འདོན་ག་རེ་རེད། ཁོ་ཚོས་ཆོས་ལུགས་རང་དབང་དང་བོད་མི་རིགས་ཀྱི་ཐུན་མོང་མ་ཡིན་པའི་རིག་གཞུང་གཅེས་འཛིན། རང་ཉིད་ཀྱི་འཚོ་བའི་གོམས་གཤིས་རྒྱུན་འཛིན། ༧རྒྱལ་བ་ཡིད་བཞིན་ནོར་བུ་བོད་དུ་ཕྱིར་ཕེབས་ཏེ་བོད་མི་རྣམས་དང་མཉམ་དུ་བཞུགས་ཐུབ་པའི་རེ་བ་གནང་གི་ཡོད་ཀྱང་། རྒྱ་གཞུང་གི་དབང་བསྒྱུར་འོག་ཁོ་ཚོའི་རེ་འདོད་མངོན་འགྱུར་བྱེད་ཐུབ་ཀྱི་མེད། ཡིན་ནའང་། རང་ལུས་མེར་བསྲེགས་གནང་མཁན་གྱི་བོད་མི་ཚོས་རང་གི་ལུས་སྲོག་བློས་བཏང་བ་ལས་གཞན་ལ་གནོད་འཚེ་མི་བྱེད་པའི་བྱ་སྤྱོད་འདིས་འཛམ་གླིང་མི་མང་ལ་མིག་དཔེ་བཟང་པོ་བསྟན་ཡོད། སྤྱིར་བཏང་ང་ཚོ་རྒྱ་མི་དང་བོད་མི་གཉིས་ཀ་རྒྱ་གཞུང་གི་དབང་བསྒྱུར་འོག་གནོད་འཚེ་ཐེབས་མཁན་ཡིན་ལ། ང་ཚོ་ཚང་མ་ཁྱིམ་ཚང་གཅིག་ནས་ཡིན་སྟབས་ཚང་མས་རྡོག་རྩ་ཆིག་སྒྲིལ་གྱིས་རྒྱ་གཞུང་གི་དབང་ཆ་གཅིག་སྡུད་ལམ་ལུགས་མེད་པར་བཟོ་ཆེད་ནུས་ཤུགས་ཡོད་དགུ་འདོན་དགོས། ”ཞེས་བརྗོད་སོང་།

དེའི་རྗེས་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་གོ་སྒྲིག་འོག རྡ་ས་འགྲེམས་སྟོན་ཁང་དུ། ཐེངས་འདིར་གསུམ་དུས་མཛད་སྒོར་བཅར་བའི་ཡུ་རོབ་མཐུན་ཚོགས་ཀྱི་དཔལ་འབྱོར་དང་སྤྱི་ཚོགས་ཚོགས་ཆུང་(European Economic & Social Committee)གི་ཚོགས་གཙོ་སྐུ་ཞབས་ཧན་རི་མཱ་ལོ་སི་(Henri Malosse)མཆོག་གི་གཙོས་སྐུ་ཚབ་ཚོགས་ཆུང་གི་ངོས་ནས་གསར་འགོད་ལྷན་ཚོགས་ཤིག་བསྐྱངས་སོང་། སྐབས་དེར་སྲིད་སྐྱོང་བློ་བཟང་སེང་གེ་མཆོག་དང་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་རྣམ་གཉིས་ཀྱིས། སྐུ་ཞབས་ཧན་རི་མཱ་ལོ་སི་མཆོག་ནི་བོད་ཀྱི་ཡིད་ཆེས་བྱེད་ཆོག་པའི་གྲོགས་པོ་རྙིང་པ་ཞིག་ཡིན་པ་དང་། ད་རེབ་ཡུ་རོབ་མཐུན་ཚོགས་ཀྱི་གཞུང་འབྲེལ་ངོས་ནས་སྐུ་ཚབ་ཚོགས་པ་གསུམ་བཅུའི་དུས་དྲན་གྱི་མཛད་སྒོར་ཕེབས་ཏེ། བོད་མི་ཚོར་གདུང་སེམས་མཉམ་སྐྱེད་དང་བོད་དོན་ཐོག་ཐུགས་ཁུར་རྒྱབ་སྐྱོར་གནང་བར་ཐུགས་རྗེ་ཆེ་ཞུའི་གསུང་བཤད་གནང་སོང་།

སྐུ་ཞབས་ཧན་རི་མཱ་ལོ་སི་མཆོག་གིས། “ང་ཚོ་དྷ་རམ་ས་ལར་ཡོང་དགོས་དོན་ནི་བོད་དོན་གཅིག་པུ་མིན་པར་འཛམ་གླིང་ཡོངས་ཀྱིས་ངོས་འཛིན་བྱེད་བཞིན་པའི་བོད་མིའི་འགྲོ་བ་མིའི་ཐོབ་ཐང་དང་ཆེ་མཐོང་། རང་དབང་བཅས་ལ་རྒྱ་གཞུང་གིས་ལོ་མང་རིང་རྡོག་རོལ་གཏོང་བཞིན་པ་དག་ལ་གདུང་སེམས་མཉམ་སྐྱེད་ཞུ་ཆེད་ཡིན་ལ། སྐྱབས་བཅོལ་བོད་མིའི་སྒྲིག་འཛུགས་ནི་འགྲོ་བ་མིའི་ཐོབ་ཐང་དང་དམངས་གཙོ། རང་དབང་བཅས་ལ་གུས་བརྩི་རྒྱབ་སྐྱོར་བྱེད་མཁན་གྱི་རྒྱལ་སྤྱིའི་ཐོག་གི་རྒྱལ་ཁབ་དང་ཚོགས་སྡེ། མི་སྒེར་བཅས་ཀྱིས་དམིགས་དཔེ་ལྟ་ས་ཞིག་ཡིན་སྟབས། བོད་མི་མང་སྤྱི་འཐུས་གྲོས་ཚོགས་ཀྱིས་གཏན་ལ་ཕབ་པའི་དབུ་མའི་ལམ་གྱི་ཐབས་ལམ་བརྒྱུད་རྒྱ་གཞུང་གིས་བོད་མིའི་སྒྲིག་འཛུགས་དང་ལྷན་དུ་བོད་དོན་ཐག་གཅོད་བྱ་རྒྱུར་རྒྱབ་སྐྱོར་བྱེད་བཞིན་ཡོད” ཅེས་གསུངས་སོང་།

དེའི་རྗེས་གསར་འགོད་པ་ཚོའི་དྲི་བར་ལན་འདེབས་སྐབས་ཁོང་གིས། “ཡུ་རོབ་མཐུན་ཚོགས་ཀྱི་རྩ་ཁྲིམས་དོན་ཚན་ ༢༡ ནང་དམངས་གཙོ་དང་འགྲོ་བ་མིའི་ཐོབ་ཐང་། སྨྲ་བརྗོད་རང་དབང་གོང་འཕེལ་དུ་གཏོང་རྒྱུ་ནི་རང་དབང་ཚོང་ལས་ཀྱི་སྔོན་འགྲོའི་ཆ་རྐྱེན་ཞིག་ཡིན་པར་བརྟེན། ཡུ་རོབ་གྲོས་ཚོགས་ནང་ཡུའུ་ཁུ་རཱེན་གྱི་རང་སྐྱོང་མངའ་ཁུལ་ཁུ་རེ་མཱེ་ (Crimea )གནད་དོན་གཙོས་བོད་མིའི་འགྲོ་བ་མིའི་ཐོབ་ཐང་སྐོར་ལ་གྲོས་བསྡུར་བྱ་རྒྱུ་ཡིན་ལ། ཡུ་རོབ་མཐུན་ཚོགས་ཀྱིས་རྒྱ་ནག་མཉམ་དུ་རང་དབང་ཚོང་ལས་ཀྱི་གྲོས་ཆོད་སྐབས་བོད་ནང་གི་འགྲོ་བ་མིའི་ཐོབ་ཐང་ནི་གླེང་དགོས་པའི་གནད་དོན་གལ་ཆེན་ཞིག་ཡིན། མི་འགྱངས་བར་རྒྱ་ནག་གི་སྲིད་འཛིན་ཞི་ཅིན་ཕིན་འཇར་ནམ་དུ་ཡོང་རྒྱུ་ཡིན་སྟབས། སྐབས་དེར་ང་ཚོས་ཁོ་རང་ལ་སྲིད་དོན་དང་འབྲེལ་བའི་བོད་ཀྱི་གནད་དོན་སྐོར་གླེང་བྱ་རྒྱུ་ཡིན། ”ཞེས་བརྗོད་སོང་།

ད་རེབ་གསུམ་བཅུའི་དུས་དྲན་ཐོག་ཕེབས་པར་རྒྱ་གཞུང་གིས་གནོན་ཤུགས་སྤྲད་པའི་སྐོར་ལ་ཁོང་གིས། “ ཉེ་ལམ་རྒྱ་ནག་ཚོང་འབྲེལ་དོན་གཅོད་ཀྱིས་ང་ཚོ་དྷ་རམ་ས་ལར་འགྲོ་མི་ཆོག་པའི་ཡི་གེ་ཞིག་འབྱོར་སོང་། དེ་བཞིན། ཟླ་འདིའི་ཕྱི་ཚེས་ ༢༩ ཉིན་རྒྱ་ནག་གཞུང་ཚབ་པ་ང་སར་ཡོང་སྟེ་རྒྱ་ནག་གི་ནང་སྲིད་ལ་ཐེ་གཏོགས་མ་བྱེད་རོགས་ཞེས་བརྗོད་སོང་། ངས་ཀྱང་ཁོ་མོར་ང་ཚོར་མཚོན་ན་བོད་ཀྱི་གནད་དོན་ནི་རྒྱལ་སྤྱིའི་གནད་དོན་ཞིག་ཡིན་པ་དང་། རྒྱ་ནག་གི་མགོ་ཁྲིད་ཚོས་ཀྱང་ཉི་ཧོང་དང་ཝེ་ཐི་ནམ་སོགས་ཀྱི་ནང་སྲིད་ལ་ཐེ་གཏོགས་བྱེད་ཀྱི་ཡོད། དེ་མིན་རྒྱ་གཞུང་གིས་ང་ཚོར་བོད་ཀྱི་ལྷ་ས་གཙོས་བོད་རིགས་ས་ཁུལ་དུ་ཡོང་རྒྱུར་མགྲོན་འབོད་བྱོས་དང་། ང་ཚོ་བོད་ནང་དུ་ཡོང་ན་བོད་ཀྱི་གནས་སྟངས་ངོ་མ་མཐོང་ཐུབ་ཅེས་འགྲེལ་བརྗོད་བྱས་པ་ཡིན། ”ཞེས་སོགས་བརྗོད་སོང་།

གསར་འགོད་པ། པདྨ་མཚོ།