བུད་མེད་སྒེར་ལངས་དུས་དྲན་ཐེངས་ ༥༥ པའི་ཐོག་བཀའ་ཟུར་རིན་ཆེན་མཁའ་འགྲོ་མཆོག་གིས། བོད་ཀྱི་བུད་མེད་ཚོར་གཞན་དང་མ་འདྲ་བའི་བློ་སྟོབས་ཆེན་པོ་ཡོད་པ་དེ་སོ་སོའི་རྒྱལ་ཁབ་དང་མི་རིགས་ཀྱི་རྩ་དོན་ཆེད་གཏོང་རྒྱུ་གལ་ཆེན་ཡིན་སྐོར་གསུངས་སོང་།
དེ་རིང་སྔ་དྲོའི་ཆུ་ཚོད་ ༩། ༠༠ པ་ཙམ་ལ་དྷ་ས་གཙུག་ལག་ཁང་གི་རྒྱལ་གཅེས་དཔའ་བོའི་རྗེས་དྲན་རྡོ་རིང་མདུན་དུ། བོད་ཀྱི་བུད་མེད་སྒེར་ལངས་དུས་དྲན་ཐེངས་ ༥༥ པ་སྲུང་གཙི་གནང་ཡོད་ཅིང་། སྐུ་མགྲོན་གཙོ་བོ་བཀའ་ཟུར་རིན་ཆེན་མཁའ་འགྲོ་མཆོག་གི་གཙོས་བུད་མེད་སྤྱི་འཐུས་ཁག་ཅིག་དང་། གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ། དེ་བཞིན་དྷ་སའི་ཉེ་འཁྲིས་ཀྱི་སློབ་གྲྭ་ཁག་གི་སློབ་ཕྲུག་དང་སེར་སྐྱ་མི་མང་བཅས་འདུ་འཛོམས་གནང་འདུག
དུས་དྲན་མཛད་སྒོའི་ཐོག་ཕྱི་ལོ་ ༡༩༩༧ ནས་བཟུང་ཅན་ངྷི་གྷར་དུ་སྨན་བཅོས་ཐད་དང་བླངས་ཞབས་ཞུ་གནང་མཁན་ཨ་ཅག་ཚེ་རིང་སྒྲོལ་དཀར་ལགས་ཀྱི་སྤྱི་སེམས་ལ་ཆེ་མཐོང་དང་གུས་བཀུར་མཚོན་ཆེད། ༢༠༡༤ ལོའི་རྒྱལ་གཅེས་༼དཔའ་མོའི་མེར་སྒྲོན་གྱི་གཟེངས་རྟགས༽ཧིན་སྒོར་ ༢༥༠༠༠ ཕུལ་བ་དང་། གཞན་ཡང་། གཞིས་བཞུགས་བོད་མི་རྒན་གཞོན་ཚང་མས་རང་སྲོག་བློས་གཏོང་གིས་བོད་ཀྱི་ཆོས་དང་སྐད་ཡིག་རིག་གཞུང་བཅས་མི་ཉམས་རྒྱུན་འཛིན་གནང་བཞིན་པར་བསྔགས་བརྗོད་དང་ཡི་རངས་མཚོན་ཆེད། འདི་ལོའི་བུད་མེད་སྒེར་ལངས་ཀྱི་ཉིན་མོ་དང་བསྟུན་ཏེ་༼རྒྱའི་བཙན་གནོན་འོག་གི་རྒྱ་བོད་མི་རིགས་བསྲེས་ལྷད་ཐད་ཞིབ་འཇུག༽དང་༼བྱེས་སུ་གྱར་རྗེས་བོད་རིགས་དང་མི་རིགས་གཞན་བར་རིགས་རྒྱུད་བསྲེས་ལྷད་ཐད་ཞིབ་འཇུག༽ཅེས་པའི་བརྗོད་གཞི་གཉིས་ཀྱི་ཐོག བུད་མེད་ཤེས་ཡོན་ཅན་གཉིས་ལ་དུས་ཡུན་ལོ་གཅིག་རིང་ལས་ཞོར་དུ་ཉམས་ཞིབ་བྱེད་པར་མཐུན་རྐྱེན་བསྐྲུན་རྒྱུ་ཡིན་པ་ཁྱབ་བསྒྲགས་གནང་སོང་།
མཛད་སྒོའི་ཐོག་དབུས་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་བཀྲ་ཤིས་སྒྲོལ་མ་ལགས་ཀྱིས་ཡིག་ཐོག་ནས་བསྒྲགས་གཏམ་སྒྲོགས་སྦྱང་གནང་བའི་ནང་། ང་རང་ཚོ་རང་དབང་ལུང་པའི་ནང་ཡོད་པའི་བོད་རིགས་རྒན་གཞོན་བར་གསུམ་གྱིས་སྒེར་གྱི་སྟབས་བདེའི་ཆེད་མིན་པར། བོད་མི་རིགས་རྩ་བརླག་ཏུ་འགྲོ་བའི་ཉེན་སྲུང་གི་འོས་འགན་དེ་མདང་སྐྱེས་ཀྱི་བྱིས་པར་ཡང་ཡོད་ན། རྒྱ་ཆེ་ས་ནས་བསམ་བློ་བཏང་ནས་དེང་དུས་ཀྱི་སྦྱང་པའི་ཡོན་ཏན་དང་མཉམ་དུ། ཕ་མེས་ནས་ཡོད་པའི་བོད་མི་རིགས་ཀྱི་རང་བཞིན་ལྷན་སྐྱེས་སུ་ཡོད་པའི་མཛངས་སྤྱོད་དང་། འཛམ་གླིང་ལ་ངོམ་དུ་ཆོག་པའི་སངས་རྒྱས་ཀྱི་ཆོས་ལ་དོ་སྣང་། དེ་བཞིན་སོ་སོའི་སྐད་ཡིག་གོམས་སྲོལ་ལ་ཆེ་མཐོང་སྤྲོད་ཐུབ་པ་དང་། དེའི་ཐོག་ནས་རང་རྒྱལ་ཁབ་ཀྱི་བཟང་པོའི་གོམས་སྲོལ་གྱིས་རྒྱབ་ཐེག་པ་ཞིག་ཡོང་བར་གོམ་པ་དང་པོ་ཁྱིམ་ཚང་ནང་ནས་སློབ་གསོ་གོ་རྟོགས་སྤེལ་རྒྱུ་རྒན་རབས་ཚོར་འགན་ཡོད་པ་བཞིན། མི་རབས་གསར་པ་ཚོའི་ངོས་ནས་ཀྱང་སྟབས་གང་བདེ་དང་སྣང་བ་གང་སྐྱིད་ཙམ་མིན་པར། བོད་ཕྱི་ནང་གཉིས་སུ་རང་ལུས་མེར་བསྲེགས་ག་རེའི་དོན་དུ་གཏོང་གི་ཡོད་པ་ཚང་མས་མཁྱེན་གྱི་ཡོད་པ་བཞིན། ཉིན་རེའི་འཚོ་བའི་བྱ་ལས་ནང་སེམས་འཁུར་བླངས་ཏེ་གཤིས་རྒྱུད་བཟང་པོའི་ཡོན་ཏན་རྣམས་མི་རབས་ནས་མི་རབས་བརྒྱུད་རྩིས་སྤྲོད་ཐུབ་རྒྱུར་བདག་གཅེས་ལ་འབད་བརྩོན་གནང་དགོས་པའི་གཞེན་སྐུལ་ཞུ་ཡི་ཡོད། ཅེས་བཀོད་འདུག
ཡང་བསྒྲགས་གཏམ་དེའི་ནང་། དེ་རིང་གི་གོ་སྐབས་འདི་བརྒྱུད་དེ་༧ཀུན་གཟིགས་པཎ་ཆེན་རིན་པོ་ཆེ་དགེ་འདུན་ཆོས་ཀྱི་ཉི་མ་མཆོག་གང་དུ་ཡོད་མེད་རྒྱ་གཞུང་གིས་གསལ་སྟོན་དགོས་པ་དང་། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གིས་དབུས་ཆབ་སྲིད་བཙོན་པ་ཡོངས་གློད་བཀྲོལ་དགོས་པ། ངེས་མེད་འཛིན་བཟུང་དང་། བཙོན་ཁང་ནང་གཅར་རྡུང་དྲག་པོས་དམར་གསོད་གཏོང་བ་སོགས། ལོ་ངོ་དྲུག་བཅུའི་ནང་བོད་མིའི་ཐོག་ལག་བསྟར་བྱེད་མུས་སུ་ཡོད་པའི་མཁྲེགས་བཟུང་སྲིད་ཇུས་དེ་ཕམ་ཉེས་དང་། དབང་ཆ་གཅིག་སྡུད་དང་ནོར་འཁྲུལ་ཅན་གྱི་སྲིད་ཇུས་ཡིན་པར་རྒྱ་གཞུང་གི་འགོ་ཁྲིད་ཚོས་ངོས་ལེན་བྱེད་དགོས་པའི་འབོད་སྐུལ་ཞུ། ཞེས་སོགས་བཀོད་འདུག
མཇུག་ཏུ་བཀའ་ཟུར་རིན་ཆེན་མཁའ་འགྲོ་ལགས་ཀྱིས་གསུང་བཤད་གནང་དོན། “ ང་ཚོ་ཚང་མས་ལས་ཀ་ག་རེ་བྱས་པ་ཡིན་ནའང་སོ་སོའི་ལུས་ངག་ཡིད་གསུམ་གཏད་ནས་དེ་ཅིའི་ཕྱིར་བྱེད་ཀྱི་ཡོད་པ་ཧ་གོ་དགོས་པ་གལ་ཆེན་པོ་རེད་མ་གཏོགས། རྒན་པ་དང་འགན་འཛིན་ཚོས་སོང་ཟེར་གྱི་འདུག་མ་འགྲོ་རང་འགྲོ་རེད་བསམ་ནས་ཕྱིན་པ་ཡིན་ན་དེར་དོན་སྙིང་ཡོད་པ་མ་རེད། ངས་སྙིང་ཐག་པ་ནས་འབོད་སྐུལ་ཞུ་འདོད་པ་ཞིག་ལ་ང་ཚོས་རྒྱལ་ཁབ་ཀྱི་དོན་དུ་དཀའ་ལས་བརྒྱབ་པ་དེ་འཁྲབ་སྟོན་ཙམ་མིན་པར་ཚོར་བ་དང་ལྡན་པའི་ཐོག་ནས་གནང་དགོས་པ་དེ་ཞེ་དྲག་གལ་ཆེན་པོ་རེད། དེ་བཞིན། ལས་ཀ་ག་རེ་བྱས་པ་ཡིན་ནའང་མཉམ་རུབ་བྱེད་རྒྱུ་གལ་ཆེན་པོ་རེད། འདས་པའི་ལོ་ ༥༥ རིང་སྐུ་ལས་བསྐྱོན་པ་ལ་བརྟེན་ཏེ་བོད་པའི་བཙན་བྱོལ་སྤྱི་ཚོགས་ཟེར་དུས་འཛམ་གླིང་ཐོག་ཉི་མ་ཤར་བ་ལྟར་ཚང་མས་ཧ་གོ་བ་ཞིག་དང་། ཧ་གོ་འདོད་མེད་མཁན་ཚོར་ཡང་ཧ་མ་གོ་རང་གོ་ལྟ་བུ་ཆགས་བསྡད་ཡོད་སྟབས། ང་ཚོས་མུ་མཐུད་དུ་གོམ་པ་བརྒྱབ་ནས་ང་ཚོ་གང་དུ་འགྲོ་དགོས་ས་རེད། ག་རེ་བྱེད་དགོས་ཀྱི་འདུག་བལྟས་པ་ཡིན་ན། སྔ་མོའི་མི་ཚོ་དང་འདྲ་ཡི་མ་རེད། སྔོན་མའི་ཨ་མ་ལགས་བག་ལེབ་བཙོང་མཁན་དེ་ཚོར་ཐུགས་ཁག་ཡོད་པ་མ་རེད། དེ་དུས་སྐད་ཤེས་ཀྱི་མེད་ལ་དེང་སང་ནང་བཞིན་གཞན་ལ་སློང་བ་སོགས་ཡོད་པ་མ་རེད། ཡིན་ནའང་། ཁོང་མོ་ཚོས་བག་ལེབ་བཙོང་ནས་ཚོགས་པའི་འགྲོ་སོང་བསགས་པ་རེད། ངས་བལྟས་ན་དེ་ཚོ་ལོ་རྒྱུས་ནང་འགོད་དགོས་པའི་གཟི་བརྗིད་ཅིག་རེད་བསམ་གྱི་འདུག སྤྱིར་བཏང་བཙན་བྱོལ་གྱི་སྤྱི་ཚོགས་མང་པོ་ཞིག་ཡོད་ཀྱང་སྤྱི་པའི་ཆེད་དུ་དེ་འདྲ་དཀའ་ལས་རྒྱག་མཁན་ཧ་ལམ་བྱུང་ཡོད་པ་མ་རེད་དྲན་གྱི་འདུག མི་སྒེར་སོ་སོའི་ཆེད་དུ་ལས་ཀ་ག་རེ་ཡིན་ནའང་བྱེད་མཁན་གང་སར་ཡོད་པ་རེད། མདོར་བསྡུས་ནས་ཞུས་ན། དེ་རིང་འདིར་བོད་ཀྱི་བུད་མེད་ལྷན་ཚོགས་ཁྲ་རིག་རིག་བསླེབས་ཡོད་པ་དེ་དཔའ་མོ་སྟོང་ཕྲག་མང་པོས་སྐུ་ལས་བསྐྱོན་ཏེ་བྱུང་བ་ཡིན་སྟབས། འདི་ཡག་པོ་ཞིག་ཉར་ནས་མ་འོངས་པར་བོད་ལ་གདན་འདྲེན་ཞུ་དགོས་པ་དེ་དཔེ་གལ་ཆེན་པོ་རེད། ”ཅེས་གསུངས་སོང་།
ཡང་བཀའ་ཟུར་རིན་ཆེན་མཁའ་འགྲོ་མཆོག་གིས་བོད་ཀྱི་བུད་མེད་ཚོར་གཞན་དང་མ་འདྲ་བའི་བློ་སྟོབས་ཤིག་ཡོད་པ་དེ་བེད་སྤྱོད་ཡག་པོ་གཏོང་དགོས་བའི་སྐོར་ལ། “ འཛམ་གླིང་མི་མང་ལ་མེད་པ་ཞིག་ང་ཚོར་ག་རེ་འདུག་ཟེར་ན། ང་ཚོ་བོད་མི་དང་དེའི་ནང་ནས་ཀྱང་བུད་མེད་ཚོ་སྐུ་ལས་བསྐྱོན་ཐུབ་མཁན་དང་གནད་དོན་ཆེ་མ་ཆུང་གསུམ་ལ་གདོང་ལེན་བྱེད་ཐུབ་མཁན། གང་ལྟར་བོད་ཀྱི་བུད་མེད་ཟེར་དུས་དངོས་གནས་དྲང་གནས་གཞན་དང་མ་འདྲ་བའི་བློ་སྟོབས་ཆེན་པོ་ཅན་ཞིག་ལ་ངས་ངོས་འཛིན་ཞུ་བཞིན་ཡོད། དེར་བརྟེན་བློ་སྟོབས་དེ་བེད་སྤྱོད་གཏོང་ས་མ་ནོར་བ་བྱས་ནས་སོ་སོའི་རྒྱལ་ཁབ་དང་མི་རིགས་ཀྱི་རྩ་དོན་དང་ཆོས། རིག་གཞུང་སྲུང་སྐྱོབ་ཐོག་གཏོང་ཐུབ་པ་ཡིན་ན། འདིར་ཞུགས་ཚང་མ་ཁྱིམ་གྱི་ཨ་མའམ་ཡང་ན་མ་འོངས་པའི་ཨ་མ་ཡིན་སྟབས། སོ་སོའི་ཁྱིམ་མི་ཚོར་བོད་ཀྱི་ཆོས་དང་རིག་གཞུང་སྤེལ་ཐུབ་པ་ཡིན་ན། འཛམ་གླིང་གི་མི་སུ་གཅིག་གིས་ཀྱང་ང་ཚོར་ལག་ཁེལ་གྱི་མ་རེད་བསམ་གྱི་འདུག མདོར་བསྡུས་ན་ང་ཚོས་ལོ་ངོ་ ༥༥ ཕྱི་ལོགས་ནས་བསྐྱལ་བ་རེད། ད་དུང་ལོ་ག་ཚོད་བསྐྱལ་དགོས་མིན་ཤེས་ཀྱི་མ་རེད། གཅིག་བྱས་ན་ང་ཚོ་མགྱོགས་པོར་བོད་ལ་ལོག་ཐུབ་པ་དང་། ཡང་ན་ད་དུང་ལོ་ ༥༥ ལ་བསྡད་དགོས་ཁེལ་སྲིད་པ་རེད། གལ་སྲིད་ཕྱི་ལོགས་ནས་ལུས་པ་ཡིན་ན་ང་ཚོས་གོམ་པ་གང་འདྲ་རྒྱག་དགོས་ཀྱི་འདུག་བསམ་བློ་གཏོང་རྒྱུ་ཧ་ཅང་གལ་ཆེན་རེད། ”ཅེས་གསུངས་སོང་།
དུས་དྲན་མཛད་སྒོ་གྲུབ་རྗེས་བོད་ཀྱི་བུད་མེད་ལྷན་ཚོགས་ཀྱི་སྣེ་ཁྲིད་དེ་དྷ་ཤོད་ཀ་ཅ་རིའི་ཁྲིམས་ཁང་བར་བུད་མེད་ཚོས་ཞི་བའི་གོམ་བགྲོད་གནང་ཡོད།
གསར་འགོད་པ། པདྨ་མཚོ།
བུད་མེད་ཚོགས་པའི་རྒྱལ་ཁབ་ཅིག་ལ་ཡིད་སྨོན་བྱེད་ཀྱི་ཡོད་པ་དེ་ཡག་པོ་རེད་ཤག ངས་བུད་མེད་ཚོགས་པའི་རྒྱལ་ཁབ་བརྗེད་འདུག་བསམ་སོང་། བུད་མེད་ཚོགས་པ་འདི་ཤར་གླིང་ཟླ་སྒྲོན་ཟེར་བའི་སྐབས་འཚོལ་བ་དེའི་ཚོའི་གཡོ་འོག་ལ་མི་འགྲོ་རྒྱུ་གལ་ཆེ།
སྐྱེས་མ།
བུད་མེད་ཟེར་བའི་ཚིག་དེ་ལ་སྒྲ་བཤད་ངན་པ་མི་འདྲ་བ་གསུམ་ཡོད་པར་བོད་དམངས་ཁྲོད་ཀྱི་གནའ་བོའི་ངག་རྒྱུན་དུ་གོ་རྒྱུ་འདུག
དེང་གི་མཁས་པ་ཁ་ཤས་ཤིག་གི་ཞལ་ནས་ཀྱང་དེ་བཞིན་ཐོས་སོང་།
༡༽སྐྱེས་མའི་མཚན་མ་དེ་སྐྱེས་པའི་མཚན་མ་ལྟར་འབུད་རྒྱུ་མེད་པས་ན་་་་ བུད་མེད་་་་་་དང་།
༢༽སྤྱི་ཚོགས་སྟེང་སྐྱེས་མ་རྣམས་ཀྱི་ཐོབ་ཐང་དང་ཆེ་མཐོང་གནས་རིམ་སོགས།སྐྱེས་པ་ཚོའི་གོང་ལ་དུས་ནམ་ཡང་འབུད་མི་ཐུབ་པར་ བསྙད་དེ་་་་་བུད་མེད་་་་་་དང་།
༣༽སྐྱེས་མ་ལ་འབྲེལ་ཞིང་ཆགས་ན་འཁོར་བ་དང་ངན་སོང་གི་གནས་ནས་ནམ་ཡང་ཐར་བའམ་འབུད་མི་ཐུབ་ཅེས་སྐུར་ནས་་་་་བུད་མེད་་་་་ཟེར་གྱིན་ཡོད་པ་རེད་ཟེར། དེ་བཞིན་དུ་སྐྱེ་བ་བླངས་པ་སྐྱེས་པ་ལས་དམན་པར་བཤད་ནས་སྐྱེ་དམན་དང་ནག་མོ་ཨ་ཡེ་སོགས་འབོད་པ་ནི།མུན་ནག་དང་མ་རབས་རྗེས་ལུས་ཀྱི་སྤྱི་ཚོགས་ཤིག་གི་ཕོ་མཆོག་མོ་དམན་གྱི་ལྟ་ངན་འཁུར་མཁན་ཚོའི་འབྱུང་བོའི་རང་གཟུགས་རུལ་དྲི་བྲོ་བ་དེ་རེད་འདོད།འོད་སྣང་དང་ཡ་རབས། བྱམས་བརྩེ།འདྲ་མཉམ་གྱི་དུས་རབས་འདིར། ཆེས་བླ་ན་མཐོ་ཞིང་། ཆེས་རླབས་ཆེ་བའི་འགྲོ་བ་མིའི་རིགས་ཀྱི་མ་ཡུམ་བྱམས་ཆེན་བརྩེ་བའི་བདག་ཉིད་དྲིན་མོ་ཆེ་རྣམས་ལ་ང་ཚོས་ད་ནས་བཟུང་
༼སྐྱེས་མ༽ཞེས་འབོད་རོགས་སྙིང་ནས་ཞུ་ཞུ། ཞེས་བོད་རྒྱལ་ལོ༢༡༤༡ལོ་སར་ཚེས༧ནུབ་གུས་དམན་པ་མགོ་ལོ་ཟླ་བྷེ་རུ་འབོད་པས་མགྱོགས་བྲིས་བྱས།
༢༠༡༤/༠༣/༠༨ རྒྱལ་སྤྱིའི་སྐྱེས་མའི་དུས་ཆེན་ལ་བོ་ཁ་བ་ཅན་གྱི་མ་ལྕམ་སྲིང་གསུམ་ལ་རྟེན་འབྲེལ་གྱི་དོད་དུ་འབྲི་ཁུལ་བྱས་པར་འདིར་སྣོན་བརྒྱབ་པ་ཞིག་ལ་བོད་ཀྱི་བུད་མེད་ཚོགས་པ་ཞུ་བའི་མཚན་འདི་ཡང་༼ སྐྱེས་མ༽ཞེས་པར་བརྗེ་བསྒྱུར་གནང་བར་རེ་ཞུ་དང་བཅས་ཕུལ།
ཉི་མ་དེ་རིང་ནས་བཟུང་བོད་ཁ་བ་ཅན་ལ་་་་་་སྐྱེས་མ་་་་་་་མ་གཏོགས་བུད་མེད་མེད།
ནག་མོ་མེད། སྐྱེ་དམན་མེད། ཨ་ཡེ་མེད་པར་ཤོག་ཅིག་གུ། མ་སྲིང་སྐྱེས་མའི་སྡེ་ཆེན་རྒྱལ་གྱུར་ཅིག