དེ་རིང་གྲོས་ཚོགས་ཚོགས་དུས་བདུན་པ་སྤྱི་འཐུས་ཚོགས་ཁང་གསར་པའི་ནང་མགོ་འཛུགས་གནང་ཡོད་ཅིང་། ཚོགས་གཙོའི་ངོ་སྤྲོད་གནང་བ་ལྟར་ན་ཐེངས་འདིར་སྔོན་རྩིས་གཏན་འབེབས་ལས་གཞན་ལས་རིམ་མང་པོ་མེད་པ་དང་། མང་ཚོགས་རྩིས་ཁྲ་ཚོགས་ཆུང་གི་མཇུག་སྐྱོང་སྙན་ཐོ་ཕྱི་འགྱངས་བྱེད་དགོས་བྱུང་ཡོད་སྐོར་གསུངས་སོང་།
དེ་རིང་ཉིན་རྒྱབ་ཆུ་ཚོད་ ༡།༣༠ སྟེང་། གངས་ཅན་སྐྱིད་གཤོང་གི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་ཁང་གསར་པའི་ནང་། སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པ་དེ་དབུ་འཛུགས་གནང་སོང་། ཚོགས་འདུ་དབུ་འཛུགས་ཐོག་སྤྱི་འཐུས་ཚོགས་གཙོ་གཞོན་གཉིས་ཀྱིས་གཙོས་པའི་སྤྱི་འཐུས་རྣམ་པ་དང་སྲིད་སྐྱོང་མཆོག་གིས་དབུས་པའི་བཀའ་བློན་རྣམ་པ། དེ་བཞིན། ཟུར་ཉན་དུ་ལྷན་ཁང་ཁག་གི་དྲུང་ཆེ་རྣམ་པ་དང་བཞུགས་སྒར་དང་གངས་སྐྱིད་ཁུལ་གྱི་དོ་སྣང་ཅན་དག དམིགས་བསལ་སྐུ་མགྲོན་ཡུ་རོབ་མཐུན་ཚོགས་ཀྱི་དཔལ་འབྱོར་དང་སྤྱི་ཚོགས་ཚན་ཁག་གི་ཚོགས་གཙོ་སྐུ་ཞབས་ཧེ་རེ་མཱ་ལོ་སེལ་ (Heuri Malosse) ལགས་ཀྱིས་སྣེ་ཁྲིད་པའི་སྐུ་ཚབ་ཚོགས་ཆུང་གི་ཚོགས་མི་རྣམ་པ་བཅས་ཕེབས་འདུག
ཚོགས་འདུ་དབུ་འཛུགས་ཀྱི་ཐོག་མར་ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་བཏང་རྗེས་སྤེན་པ་ཚེ་རིང་མཆོག་གིས་གྲོས་ཚོགས་དབུ་འཛུགས་ཀྱི་གཏམ་བཤད་དོན། ཁ་སང་གསུམ་བཅུ་དུས་དྲན་མཛད་སྒོའི་སྐབས་ཆབ་སྲིད་དང་འབྲེལ་བའི་དོན་གནད་ཁག་ཞུས་ཟིན་སྟབས་བསྐྱར་ལྡབ་བྱེད་མི་དགོས་པར་ད་རེབ་ཚོགས་གཙོས་དབུ་འཛུགས་གཏམ་བཤད་མང་པོ་ཞུ་རྒྱུ་མེད། དེ་རིང་ཞོགས་པར་༧གོང་ས་མཆོག་དབུ་བཞུགས་ཐོག་ཐུགས་རྗེས་ལེགས་གསོལ་དང་། ད་རེབ་གྲོས་ཚོགས་ཚོགས་དུས་བདུན་པ་འདི་ཚོགས་ཁང་པ་བསྐྱར་གསོ་འཛུགས་སྐྲུན་བྱས་རྗེས་ཀྱི་ཚོགས་དུས་དང་པོ་དེ་འཚོགས་ཀྱི་ཡོད། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་ཁང་བརྒྱབ་སྟེ་ཕྱིའི་དངོས་པོའི་ཐོག་ནས་མཐུན་རྐྱེན་འཛོམས་པ་ཆགས་བསྡད་ཡོད་སྟབས། ནང་གི་བཅུད་དེ་ཚོགས་ཁང་འདིའི་ནང་ཡོད་པའི་སྲིད་སྐྱོང་མཆོག་གཙོས་བཀའ་བློན་རྣམ་པ་དང་སྤྱི་འཐུས་ཚོགས་གཙོ་གཞོན་གཙོས་པའི་སྤྱི་འཐུས་རྣམ་པ་ཆགས་ཡོད་སྟབས། ཕྱིའི་སྣོད་ཡག་པོ་ཡོད་པ་བཞིན་ནང་གི་བཅུད་དེའང་སྔར་ལས་ལྷག་པ་ཡར་རྒྱས་གཏོང་བའི་གནད་འགག་ཆགས་ཡོད།
དེར་བརྟེན། ང་ཚོས་ལས་རིམ་ག་རེ་གནང་བ་ཡིན་ན་ང་ཚོས་སྤྱི་པར་བསམ་པ་དང་སྤྱི་པའི་ཐོག་ནུས་པ་སྤུངས་པ། སྤྱི་པའི་བསོད་ནམས་བསགས་ཆེད་དུ་བསམ་བློ་གཏོང་དགོས་པ་གལ་ཆེན་ཆགས་ཡོད། ཐེངས་འདིའི་གྲོས་ཚོགས་ཀྱི་ལས་རིམ་གཙོ་བོ་སྔོན་རྩིས་སྐོར་ཡིན་སྟབས་དུས་ཚོད་མང་ཤོས་རྩིས་ཀྱི་ཐོག་གཏོང་དགོས་ཀྱི་ཡོད་པ་རེད། སང་ཉིན་དཔལ་འབྱོར་བཀའ་བློན་མཆོག་གིས་སྔོན་རྩིས་གསུང་བཤད་གནང་བའི་རྗེས། ཉིན་རྒྱབ་སྔོན་རྩིས་ནང་དོན་ཐོག་སྤྱི་འཐུས་རྣམ་པའི་གཟིགས་ཞིབ་ཡག་པོ་གནང་ཆེད་ཉིན་ཕྱེད་ཀ་བཞག་ཡོད་པ་རེད། གཟིགས་ཞིབ་ཡག་པོ་གནང་སྟེ་གྲོས་ཚོགས་ནང་བགྲོ་གླེང་གནང་སྐབས་འགན་འཁྱེར་བའི་ཐོག་ནས་དངོས་ཡོད་གནས་ཚུལ་དང་འཚམ་པའི་ཐོག་ནས་དགོངས་འཆར་གསུང་རྒྱུར་འབད་བརྩོན་གནང་རོགས།
ཐེངས་འདིའི་གྲོས་ཚོགས་ནང་མྱ་ངན་གུས་འདུད་ཀྱི་གྲོས་ཆོད་ཁག་ཅིག་ཡོང་གི་རེད། ལྷག་པར་དུ་ཚོགས་དུས་དྲུག་པ་ནས་ད་ལྟའི་བར་བོད་ནང་གི་རང་ལུས་མེར་བསྲེགས་བྱུང་བ་ཁག་ཅིག་ལ་མྱ་ངན་གུས་འདུད་ཞུ་རྒྱུ་དང་། འདས་པའི་ཟླ་བ་དྲུག་ནང་སྤྱི་འཐུས་ཟུར་པ་གཉིས་འདས་གྲོངས་སུ་ཕྱིན་པ་བཅས་ལ་མྱ་ངན་གུས་འདུད་ཞུ་རྒྱུ་བཅས་ཡོད་པ་རེད། གཙོ་བོ་དེ་ ༢༠༠༨ ནས་ད་ལྟའི་བར་དུ་བོད་ནང་གི་གནས་སྟངས་དང་རྒྱ་ནག་གི་སྲིད་ཇུས་ལ་འགྱུར་བ་ཕྱིན་མེད་པ། བོད་ནང་ཛ་དྲག་གི་གནས་སྟངས་མུ་མཐུད་ལྷག་ཡོད་པར་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་ཞིག་གཞུང་འབྲེལ་གྱི་ཐོག་ནས་བསྣམས་ཕེབས་ཡོད་པ་རེད། དེ་ལས་གཞན་གྲོས་ཆོད་གྲོས་འཆར་གལ་ཆེན་ཞེ་དྲག་ཡོད་པ་མ་རེད། དེ་ནས་འཛིན་སྐྱོང་བཀའ་ཤག་དང་སྤྱི་འཐུས་ལྷན་ཚོགས་ཀྱི་ངོས་ནས་སྒྲིག་གཞི་བསྐྱར་བཅོས་ཀྱི་ལས་རིམ་གང་འཚམ་ཞིག་ཡོད་པ་རེད། དེ་ནས་སྤྱི་འཐུས་རྣམ་པ་ཚོས་དྲི་བ་བཏང་བཞག་པ་ཡིག་ཐོག་ཏུ་ཡོད་པ་དྲི་བ་ ༡༥ ཙམ་འདུག
ང་ཚོས་མཐའ་མའི་ལས་རིམ་བང་བསྒྲིགས་པའི་ནང་དུ། མང་ཚོགས་རྩིས་ཁྲ་ཚོགས་ཆུང་སྐབས་ལྔ་པའི་སྙན་ཐོ་མཇུག་སྐྱོང་འཛིན་བཀའ་ཤག་གིས་ལག་བསྟར་གནང་བའི་སྙན་ཐོ་དེ་ལས་དོན་བྱེད་ཕྱོགས་ཀྱི་ཐོག་ནས་ཚར་མེད་སྟབས་དེ་མཇུག་སྐྱོང་བྱེད་རྒྱུ་གྲུབ་ཡོད་པ་མ་རེད། དེ་དུས་འགྱངས་ཞུ་བའི་གྲོས་ཆོད་གྲོས་འཆར་ཞོང་གི་རེད། དེ་གཙང་མ་ཞིག་མ་བྱུང་ན་འགྲིག་གི་མེད་སྟབས། དུས་ཚོད་ཐུང་ཐུང་ཞིག་གི་ནང་དུ་ཡིག་ཆ་མང་པོ་ལྟ་དགོས་པ་དང་འབྲི་དགོས་པ་མང་པོ་ཞིག་ཡོད་སྟབས་ད་རེབ་གྲོས་ཚོགས་ནང་འཁྱེར་ཡོང་ཐུབ་མ་སོང་། སྲིད་སྐྱོང་གཙོས་པའི་བཀའ་བློན་རྣམ་པ་དང་སྤྱི་འཐུས་ཚོགས་གཙོ་གཞོན་གཙོས་པའི་སྤྱི་འཐུས་རྣམ་པས་འཕྱར་གྲུ་མཉམ་འདེགས་བྱས་ཏེ་ད་སྔ་ཚགས་ཚུད་པོ་བྱུང་ཡོད་པ་རེད་ལ། ད་རེབ་ཀྱང་དེང་སྐབས་ང་ཚོའི་སྤྱི་ཚོགས་ནང་ཟང་ངི་ཟིང་ངི་མང་པོ་ཞིག་ཡོང་བསྡད་པ་དེ་དག་འདིར་མ་ཡོང་བར་སྤྱི་འཐུས་རྣམ་པ་ཚོས་ཐུགས་བསམ་བཞེས་དགོས་པ་གལ་ཆེན་པོ་ཆགས་ཀྱི་འདུག ཅེས་སོགས་གསུངས་སོང་།
ཚོགས་འདུ་དབུ་འཛུགས་ཀྱི་ལས་རིམ་ཁག་གྲུབ་རྗེས་བོད་ནང་གི་ཛ་དྲག་གནས་སྟངས་ཐད་ཀྱི་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་ཐོག་སྤྱི་འཐུས་རེ་རེ་བཞིན་བགྲོ་གླེང་གནང་མགོ་འཛུགས་གནང་སོང་།
ཐེངས་འདིའི་གྲོས་ཚོགས་ཚོགས་དུས་བདུན་པ་སྐབས་ཚོགས་གཙོ་གཞོན་མེད་པའི་ལས་ཚབ་ཏུ་སྤྱི་འཐུས་དགེ་བཤེས་བློ་བཟང་སྙན་གྲགས་ལགས་དང་སྤྱི་འཐུས་འབའ་བ་སྐལ་བཟང་རྒྱལ་མཚན་ལགས། སྤྱི་འཐུས་འཇིགས་མེད་འབྱུང་གནས་ལགས་གསུམ་བསྐོ་བཞག་གནང་སོང་།
གསར་འགོད་པ། ལྷ་སྐྱབས་རྒྱལ།
