ཁ་སང་གྲོས་ཚོགས་ནང་ནང་སྲིད་བཀའ་བློན་མཆོག་གིས་བོད་ནས་གསར་དུ་འབྱོར་བའི་གཞོན་སྐྱེས་ལས་མེད་དང་ཆབ་སྲིད་བཙོན་ཟུར་ཆེད་སྡོད་ཁང་གསར་རྒྱག ངྷ་སའི་ཐང་ཁྲོམ་གྱི་དཀའ་ངལ་བཅས་ཀྱི་ཐད་ནས་ལན་འདེབས་གསལ་བཤད་གནང་སོང་།
ཁ་སང་ཕྱི་ཚེས་ ༡༢ ཉིན་གྱི་གྲོས་ཚོགས་ཚོགས་དུས་བདུན་པའི་ཉིན་གཉིས་པའི་སྔ་དྲོ། སྤྱི་འཐུས་ཨཅྰརྱ་ཡེ་ཤེས་ཕུན་ཚོཊ་ལཊ་ཀྱིས་ནང་སྲིད་བཀའ་བློན་མཆོག་ལ་བོད་ནས་གསར་དུ་འབྱོར་བའི་གཞོན་སྐྱེས་ལས་མེད་ཀྱི་འཚོ་ཐབས་དང་ཆབ་སྲིད་བཙོན་ཟུར་རྣམས་ལ་སྡོད་ཁང་མཐུན་འགྱུར་གནང་རྒྱུའི་ལས་འཆར་གྱི་སྔོན་རྩིས་གྲོས་ཚོགས་སུ་ཞུས་དོན་ལྟར། ད་ཆ་གཞོན་སྐྱེས་ཇི་ཙམ་ཞིག་གི་འཚོ་ཐབས་ཐོག་ཕན་རླབས་གྲུབ་འབྲས་ཇི་བྱུང་དང་། ཆབ་སྲིད་བཙོན་ཟུར་རྣམས་ལ་སྡོད་ཁང་མཐུན་འགྱུར་གང་དང་གང་གནང་ཐུབ་ཡོད་མེད། ལས་འཆར་ཕྱག་བསྟར་གནང་ཐུབ་མེད་ཚེ་ད་ལྟའི་གནས་སྟངས་དང་མ་འོངས་པར་ལག་བསྟར་གནང་ཐུབ་མིན་སྐོར་ལ་སྐར་རྟགས་ཅན་གྱི་དྲི་བ་བཏོན་སོང་ལ། དེར་ནང་སྲིད་བཀའ་བློན་མཆོག་གིས། ད་བར་བོད་ནས་གསར་དུ་འབྱོར་བའི་གཞོན་སྐྱེས་ཕོ་མོ་གྲངས་ ༣༥ ལ་སྦྱོར་བརྡར་ཕུལ་ཟིན་པ་དང་། ད་ལྟའི་ཆར་གཞོན་སྐྱེས་ཕོ་མོ་གྲངས་ ༦༢ ལ་དབྱིན་སྐད་དང་། ༣༡ ལ་གློག་ཀླད། ༢༡ ལ་རྨང་རིམ་ཤེས་ཡོན་སྦྱོང་བརྡར་ (Open Basic Education) བཅས་ཀྱི་སློབ་ཁྲིད་འགྲོ་མུས་ཡིན་པར་ཕན་རླབས་གྲུབ་འབྲས་མི་དམན་ཙམ་བྱུང་ཡོད་པའི་རེ་བ་ཞུ་བཞིན་ཡོད་པ་དང་། ཆབ་སྲིད་བཙོན་ཟུར་ཁག་ཅིག་ལ་སྡེ་ར་ལྡུན་དུ་སྡོད་ཁང་གསར་སྐྲུན་ལས་གཞི་བསྒྲིཊ་ཟིན་ཀྱང་། ཆབ་སྲིད་བཙོན་ཟུར་ཁག་ཅིག་ནས་སྡོད་ཁང་བཞུཊ་སྒར་ཁུལ་དུ་ཡོང་བའི་རེ་འདུན་ཞུས་པ་ལྟར། བཀའ་ཤག་ནས་དམིཊ་བསལ་དགོངས་བཞེས་ཀྱིས་ལས་གཞི་དེ་ཉིད་སྡེ་ར་ལྡུན་ནས་ངྷ་རམ་ས་ལར་སྤོ་འཐུས་ཆོག་པའི་བཀའ་འཁྲོལ་གནང་སོན་བྱུང་བ་དང་། ཁང་སའི་ཐད་བཀའ་ཟུར་རྗེ་བཙུན་པདྨ་མཆོག་དང་བོད་ཁྱིམ་སྤྱི་ཁྱབ་འགན་འཛིན་ཚེ་དབང་ཡེ་ཤེས་མཆོག་གཙོས་འགན་འཛིན་ལྷན་ཚོཊ་བཅས་ནས་མེག་གྷན་དགའ་ལྡན་ཆོས་གླིང་བཙུན་དགོན་ཉེ་འཁྲིས་སུ་ཆབ་སྲིད་བཙོན་ཟུར་ཁག་ཅིག་གི་སྡོད་ཁང་དང་། ངྷ་ས་ས་གནས་མགོ་འཛིན་ལས་ཁུངས་ཀྱི་ལས་ཤག་གསར་སྐྲུན་ཞུ་རྒྱུ་ཆེད་ཇི་ལྟར་འབོད་སྐུལ་ཞུས་པ་ལྟར་ཁང་ས་དེ་གསོལ་བསྩལ་གནང་ཡོད་ཚུལ་དང་། ད་ལྟའི་ཆར་ས་མཚམས་དབྱེ་འབྱེད་ (Demarcation) དང་ཨར་ལས་ཆེད་ (Digital Survey) སྒྲུབ་ཟིན་ཡོད་པ་རིང་མིན་སྡོད་ཁང་གི་བཀོད་རིས་དང་འཆར་རྩིས་བཟོ་འགོད་ཞུས་ཏེ་འབྲེལ་ཡོད་གྲོང་སྡེ་ལས་ཁུངས་ནས་ཆོག་མཆན་ཐོན་མཚམས་ཨར་ལས་མགོ་འཛུགས་ཞུ་རྒྱུ་ཡིན་ཞེས་བཀའ་ལན་གནང་སོང་།
ཡང་སྤྱི་འཐུས་ཨཅྰརྱ་ཡེ་ཤེས་ཕུན་ཚོཊ་ལཊ་ཀྱིས་ནང་སྲིད་བཀའ་བློན་མཆོག་ལ། ངྷ་སར་གནས་སྡོད་བོད་རིཊ་ཁག་ཅིག་གི་འཚོ་རྟེན་དཀའ་སེལ་ལས་འཆར་གྱི་སྔོན་རྩིས་གྲོས་ཚོཊ་སུ་ཞུས་ཡོད་པ་ལྟར། ད་ཆ་ལས་འཆར་ཕྱག་བསྟར་ཇི་ཙམ་གནང་ཐུབ་ཡོད་མེད་དང་། ལས་འཆར་གྱི་ངོ་བོ་ཇི་འདྲ་ཞིག་ཐོག་གནང་བཞིན་ཡོད་མེད། མ་འོངས་ལས་འཆར་མུ་མཐུད་གནང་དགོས་གཟིགས་ཀྱི་ཡོད་མེད་བཅས་ཀྱི་སྐར་རྟགས་ཅན་གྱི་དྲི་བ་ ༥ བ་བཏོན་པའི་ལན་དུ་ནང་སྲིད་བཀའ་བློན་མཆོག་གིས། ངྷ་སར་གནས་སྡོད་བོད་རིཊ་ལམ་ཁྲོམ་སྟོན་མཁན་རྣམས་ཀྱི་འཚོ་རྟེན་ཁྲོམ་སའི་དཀའ་ངལ་སེལ་ཐབས་སུ་ས་གནས་གཞུང་ལ་འཆར་འབུལ་ཞུས་ཟིན་པ་མཇུག་གནོན་ཞུ་བཞིན་ཡོད་པ་དང་། ལས་འཆར་གྱི་ངོ་བོ་གཉིས་ཡོད་པར་ལྷ་རབ་གཞུང་ལམ་ཅུང་རྒྱ་སྐྱེད་ཀྱིས་རང་འཇགས་གནང་ཐབས་དང་། དེ་ལྟར་དོན་འབྲས་མ་སོན་ཚེ་ས་ཆ་གཞན་ཞིག་ལ་ཁྲོམ་ས་ཐབས་ཤེས་ཞུ་རྒྱུ་བཅས་ཡིན་ཚུལ་དང་། ལས་གཞི་མགོ་འཛུགས་ཟིན་པ་ཞིག་དོན་གཉེར་མ་བྱུང་བར་མུ་མཐུད་མཇུག་སྐྱོང་དགོས་གལ་མཐོང་གི་ཡོད་པའི་ལན་འདེབས་གནང་སོང་།
སྐབས་དེར་སྤྱི་འཐུས་ཁག་ཅིག་གིས་གཞོན་སྐྱེས་ ༣༥ ལ་སྦྱོར་བརྡར་ཕུལ་ཡུལ་དང་ཕོ་མོ་གྲངས་ག་ཚོད་ཡོད་མེད་སོགས་འཕྲོས་དོན་དྲི་བ་བཏོན་པར། ནང་སྲིད་བཀའ་བློན་མཆོག་གིས་གཞོན་སྐྱེས་ཚོར་སློབ་སྦྱོང་སྤྲོད་ཡུལ་གཙོ་བོ་ངྷ་ས་བོད་ཀྱི་བདེ་རྩ་ (Tibet Charity) ཡིན་པ་དང་། ད་ཆར་དབྱིན་ཡིག་སློབ་ཁྲིད་གཙོས་འཛིན་གྲྭ་གསུམ་པ་དང་ལྔ་བ། བརྒྱད་པ་བཅས་ཀྱི་ཡིག་འབྲེལ་ཡིག་རྒྱུགས་གཏོང་ཆོག་པའི་སློབ་སྦྱོང་སྤྲོད་བཞིན་ཡོད་པ་དང་། ཁོངས་འཁྱོལ་མཁན་གཞོན་སྐྱེས་ཕོ་མོ་གྲངས་ ༣༥ ཐོན་ཐུབ་ཡོད་པའི་ཁྲོད་དབྱིན་སྐད་སློབ་སྦྱོང་བྱེད་མཁན་ཕོ་ ༡༦ དང་མོ་ ༥ ཁྱོན་མི་ ༢༡ དང་། གློག་ཀླད་སྦྱོང་བརྡར་བྱེད་མཁན་ཕོ་ ༨ དང་མོ་ ༢ ཁྱོན་མི་ ༡༠ དང་། མ་བྱན་སློབ་སྦྱོང་བྱེད་མཁན་ཕོ་ ༡ དང་མོ་ ༣ ཁྱོན་མི་ ༤ བཅས་ཡིན་པ་དང་། སྐད་ཡིག་སྦྱོང་བརྡ་བྱེད་མཁན་ཚོར་ཟླ་རེར་ལག་དངུལ་ཧིན་སྒོར་ ༡༠༠༠ དང་། གློག་ཀླད་སློབ་སྦྱོང་བྱེད་མཁན་ལ་ཟླ་རེར་ཧིན་སྒོར་ ༡༥༠༠། ས་གནས་ཕྱི་ལོགས་ནས་ངྷ་སའི་སྦྱོང་བརྡར་ནང་ཞུགས་མཁན་རིགས་ལ་སྡོད་གནས་མཐུན་རྐྱེན་སྤྲོད་ཐུབ་ཀྱི་མེད་སྟབས། ཟླ་རེར་ཧིན་སྒོར་ ༢༥༠༠ བཅས་ཕུལ་གྱི་ཡོད་སྐོར་གསུངས་བྱུང་།
ཆབ་སྲིད་བཙོན་ཟུར་རྣམས་ཀྱི་སྡོད་ཁང་གསར་འཛུཊ་ཀྱི་གནས་སྟངས་དང་། སྡོད་ཁང་ཐོབ་རིགས་ཨོ་སི་ཊོ་ལི་ཡའི་རྒྱན་ཤོག་ནང་ཞུགས་ཆོག་མིན། མ་འོངས་པར་སྡེ་ར་ལྡུན་གྱི་ས་ཆ་དེ་བེད་སྤྱོད་ག་རེ་གནང་མིན་སོགས་ཀྱི་འཕྲོས་དོན་དྲི་བ་ཁག་གི་ལན་དུ་ནང་སྲིད་བཀའ་བློན་མཆོག་གིས། “ སྦྱིར་བཏང་ནང་སྲིད་ཀྱིས་ཨར་ལས་འཛུགས་སྐྲུན་གྱི་འགན་འཁུར་གྱི་ཡོད། ཨར་ལས་གྲུབ་རྗེས་བདེ་སྲུང་ལས་ཀྱི་འགན་འཁུར་གྱི་ཡོད་པ་རེད། ང་རང་གིས་ཆབ་སྲིད་བཙོན་པ་ཚོ་ཨོ་སི་ཊོ་ལི་ཡར་རྒྱན་ཐོབ་ན་ག་རེ་བྱེད་རེད་ཅེས་གསུང་བ་དེ་དཀའ་ངལ་ཞིག་ཨེ་ཡིན་ན་བསམ་གྱི་ཡོད། སྡོད་ཁང་ནང་གི་བཙོན་ཟུར་ཞིག་ལ་ཨོ་སི་ཊོ་ལི་ཡའི་རྒྱན་ཐོབ་ཚེ་ལམ་ཁ་འགོག་པའི་གནས་སྟངས་ཤིག་མཐོང་གི་མེད། དེ་ནི་གཞི་ཆགས་ཁག་གི་བོད་མི་ཕྱི་རྒྱལ་ལ་གཏོང་བའི་འགྲོ་སྟངས་ལྟར་ཡིན། ལྡེ་ར་ལྡུན་གྱི་ས་ཆ་དེ་ང་རང་ཚོའི་ཡིན་པ་ལྷག་བསྡད་ཡོད་སྟབས། དེའི་སྐོར་ད་སྔ་ཞུ་རྒྱུ་གང་ཡང་མེད། ད་ལྟ་ང་ཚོས་ཆབ་སྲིད་བཙོན་ཟུར་གྱི་སྡོད་ཁང་རྒྱག་སའི་ས་མཚམས་དབྱེ་བ་སོགས་ཀྱི་གནས་ཚུལ་རྐྱེན་པས་འགོར་ཡོད་ཀྱང་གང་མགྱོགས་ལས་གཞི་མགོ་བཙུགས་གནང་རྒྱུ་ཡིན། ”ཞེས་གསུངས་བྱུང་།
ངྷ་རམ་ས་ལའི་ཁྲོམ་སའི་དཀའ་ངལ་ཐད་ཁོང་གིས། ” ངྷ་ས་ཁུལ་དུ་ཡོད་མཁན་ཚོའི་འཚོ་རྟེན་དཀའ་ངལ་སེལ་ཆེད་དངུལ་རྩིས་ནང་དམིགས་བསལ་ཧིན་སྒོར་འབུམ་ ༥༠ ཞུས་ཡོད། ང་ཚོས་སྔོན་རྩིས་བཀའ་འཁྲོལ་ཞུས་རྗེས་རྒྱ་གར་གྱི་ (PWT) རང་གི་ཐོག་ནས་འཆར་གཞི་ཞིག་བཟོས་པ་སྐབས་སྔོན་མའི་གྲོས་ཚོགས་ལ་ཕུལ་བ་ཡིན། མངའ་སྡེ་དང་རྫོང་གཉིས་ཀྱིས་འཆར་གཞི་ལ་བཀའ་འཁྲོལ་ཐོབ་ཀྱང་། སྟབས་མ་ལེགས་པར་རྒྱ་གར་གྱི་ཁོར་ཡུག་དང་འབྲེལ་བ་ཡོད་པའི་ (National Green Tribunal ) ལས་ཁུངས་ཀྱིས་ཤིང་ནགས་སྲུང་སྐྱོབ་དགོས་པའི་བཀའ་ཁྱབ་བཏང་ཡོང་དུས་དེ་སྔོན་ (PWT) མཉམ་དུ་གྲོས་བསྡུར་བྱས་པའི་ཧིན་སྒོར་འབུམ ༣༥ ཡི་ལས་གཞི་འགྲོ་མ་ཐུབ་པའི་གནས་སྟངས་ཤིག་བྱུང་བ་རེད། ཡིན་ནའང་། དམིགས་བསལ་བཀའ་འཁྲོལ་ཞུས་པའི་ཧིན་སྒོར་འབུམ་ ༥༠ སོང་མེད་པར་དངུལ་གཞུང་གི་བང་མཛོད་ནང་ཡོད། དེ་སྔོན་ (PWT) མཉམ་དུ་སྒྲིག་པའི་འཆར་གཞི་དེ་དཔལ་འབྱོར་ལས་ཁུངས་བརྒྱུད་ནས་ཧིན་སྒོར་ ༧༨.༢༦༠༧༦ རག་ཐུབ་སྟབས། ནང་སྲིད་དང་ས་གནས་མགོ་འཛིན་ལས་ཁུངས་ཀྱིས་འབད་བརྩོན་ཞུ་བཞིན་ཡོད། བར་སྐབས་ལམ་ཁར་ཚོང་ལས་རྒྱག་མ་བཅུག་པའི་ཛ་དྲག་གནས་སྟངས་བྱུང་ཡང་། ད་ལྟ་རྒྱ་གར་གཞུང་འབྲེལ་ཡིག་ཐོག་གནས་སྐབས་རིང་ལམ་ཁར་ཚོང་ལས་བྱེད་ཆོག་པའི་བཀའ་འཁྲོལ་གནང་ཡོད། ལམ་ཁྲོམ་ཚོང་ལས་བྱེད་མཁན་ཚོར་རྫོང་ལས་ཁུངས་ནས་ངོས་འཛིན་ལག་འཁྱེར་བཟོ་དགོས་ཚུལ་བཤད་སྟབས། དེའི་ཐད་ཀྱི་འགྲོ་སོང་ཆ་ཚང་ནང་སྲིད་ལས་ཁུངས་ཀྱི་བཏང་ཡོད། ” ཅེས་གསུངས་སོང་།
གསར་འགོད་པ། ལྷ་སྐྱབས་རྒྱལ།
