ད་ལྟ་ང་ཚོར་གོང་དུ་བཀའ་འདྲི་ཞུ་ས་དང་འོག་ལ་འགྲེལ་བཤད་རྒྱག་ས་གཉིས་ཀ་ཡོད།

དེ་རིང་སྔ་དྲོར་ངྷ་ས་བོད་ཀྱི་དཔེ་མཛོད་ཚོཊ་ཁང་དུ་སྨོན་ལམ་བོད་ཀྱི་ཀུན་བཏུས་ཚིག་མཛོད་ཆེན་མོའི་ཆོས་ལུཊ་དང་འབྲེལ་བའི་ཐ་སྙད་རྩོམ་སྒྲིག་བྱེད་ཕྱོཊ་སྐོར་གྱི་རྩོམ་སྒྲིག་མི་སྣའི་ཚོགས་འདུ་ཐེངས་གཉིས་པ་དབུ་འཛུགས་གནང་སྟེ། བློ་བཟང་སྨོན་ལམ་ལགས་ཀྱིས་ད་ལྟ་ང་ཚོས་ཧ་མ་གོ་ན་གོང་དུ་བཀའ་འདྲི་ཞུ་ས་ཡོད་ལ། འོག་ལ་འགྲེལ་བཤད་རྒྱག་སའང་ཡོད་སྟབས། ང་ཚོའི་མི་རབས་འདི་དཔེ་མི་སྲིད་པའི་གནད་འགག་ཅིག་ཆགས་ཡོད་སྐོར་བརྗོད་བྱུང་།

དེ་རིང་སྔ་དྲོའི་ཆུ་ཚོད་ ༩།༠༠ ཐོག ངྷ་ས་བོད་ཀྱི་དཔེ་མཛོད་ཁང་གི་ཚོགས་ཁང་དུ་སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གི་གོ་སྒྲིག་འོག སྨོན་ལམ་བོད་ཀྱི་ཀུན་བཏུས་ཚིག་མཛོད་ཆེན་མོའི་ནང་ཆོས་ལུགས་དང་འབྲེལ་བའི་ཐ་སྙད་རྩོམ་སྒྲིག་བྱེད་ཕྱོགས་སྐོར་རིས་མེད་ཆོས་བརྒྱུད་ཁག་གི་རྩོམ་སྒྲིག་མི་སྣའི་ཚོགས་འདུ་ཐེངས་གཉིས་པ་དབུ་འཛུགས་གནང་སོང་ལ། ཚོགས་འདུའི་ཐོག་རིས་མེད་ཆོས་བརྒྱུད་ཁག་གི་ཚིག་མཛོད་རྩོམ་སྒྲིག་མི་སྣ་ ༤༠ ལྷག་དང་སྨོན་ལམ་བརྡ་འཕྲིན་ཞིབ་འཇུག་ཁང་གི་ལས་བྱེད་བཅས་འཛོམས་འདུག

ཐེངས་འདིའི་ཚོགས་འདུ་ཚེས་ ༡༣ ནས་ ༡༥ བར་ཚོགས་རྒྱུ་ཡིན་པ་དང་། ཉིན་དང་པོར་ཆོས་བརྒྱུད་སོ་སོའི་ཚིག་མཛོད་རྩོམ་སྒྲིག་ཁང་རེ་རེའི་སྐུ་ཚབ་གཅིག་རེས་འདས་པའི་ལོ་གཅིག་གི་ལས་ཀ་ངོ་སྤྲོད་དང་ཉམས་མྱོང་ཕྱོགས་བསྡོམས་ཀྱི་གསུང་བཤད་གནང་རྒྱུ་དང་། ཉིན་གཉིས་པར་ཚིག་མཛོད་སྤྱི་ཁྱབ་རྩོམ་སྒྲིག་པ་འཇུ་བསྟན་སྐྱོང་ལགས་ཀྱིས་ཚིག་མཛོད་ཀྱི་ཐ་སྙད་ལ་འགྲེལ་བཤད་རྒྱག་སྟངས་ཀྱི་ཚད་གཞིའི་སྐོར་དང་མ་འོངས་པར་རྩོམ་སྒྲིག་བྱེད་ཕྱོགས་སྐོར་ལམ་སྟོན་གནང་རྒྱུ་དང་། ཚིག་མཛོད་རྩོམ་སྒྲིག་འགན་འཁུར་བ་གཞོན་པ་སྤྲོ་ཚིགས་ཆོས་གྲགས་ལགས་ཀྱིས་ཚིག་མཛོད་ནང་བརྡ་སྤྲོད་རྣམ་གཞག་དབྱེ་སྟངས་དང་། ལོ་རྒྱུས་དང་འབྲེལ་བའི་ཞིབ་འཇུག་དང་རྩོམ་སྒྲིག་བྱེད་ཕྱོགས་སྐོར་ངོ་སྤྲོད། ཉིན་གསུམ་པར་ཚིག་མཛོད་ནང་ལྟ་གྲུབ་དང་འབྲེལ་བའི་ཆོས་ལུགས་ཀྱི་ཐ་སྙད་དང་ལོ་རྒྱུས་རྩོམ་སྒྲིག་བྱེད་ཕྱོགས། དེ་བཞིན་ཕྱག་བཞེས་འཕྲིན་སྒྲུབ་དང་འབྲེལ་བའི་ཐ་སྙད་རྩོམ་སྒྲིག་བྱེད་ཕྱོགས་བཅས་ཀྱི་ཐད་ཕན་ཚུན་གོ་བསྡུར་གནང་རྒྱུ་ཡིན་འདུག

དེ་རིང་ཚོགས་འདུ་དབུ་འབྱེད་ཐོག་སྨོན་ལམ་བརྡ་འཕྲིན་ཞིབ་འཇུག་ཁང་གི་འགན་འཛིན་དགེ་བཤེས་བློ་བཟང་སྨོན་ལམ་ལགས་ཀྱིས། ཚིག་མཛོད་ཀྱི་ལས་གཞི་ངོ་སྤྲོད་དང་ཚོགས་འདུའི་དགོས་དམིགས་སྐོར་གསུང་བཤད་གནང་སྐབས། “ ང་ཚོ་ཚང་མ་མཉམ་རུབ་ཀྱིས་ཤུགས་རྒྱག་ཐུབ་ན་གྲུབ་འབྲས་ཤིག་འཐོན་གྱི་རེད། རྒྱུ་མཚན་གང་ཡིན་ཟེར་ན། གཅིག་ནས་ད་ལྟ་ང་ཚོས་ཧ་མ་གོ་ན་གོང་དུ་བཀའ་འདྲི་ཞུ་ས་ཡོད་ལ། འོག་ལ་འགྲེལ་བཤད་དགོས་ནའང་རྒྱག་ས་ཞིག་ཡོད་སྟབས། ང་ཚོའི་མི་རབས་འདི་དཔེ་མི་སྲིད་པའི་གནད་འགག་ཅིག་ཆགས་འདུག གཉིས་ནས་ང་ཚོ་ལ་གོ་སྐབས་ཡག་པོ་ཞིག་འདུག བཙན་བྱོལ་ལུང་པའི་ནང་ང་ཚོ་རང་དབང་ཡིན་ལ། བླ་ཆེན་ཁག་མང་ཆེ་བ་ཞིག་འདིར་བཞུགས་ཡོད་པ་དང་། དགོན་སྡེ་ཁག་འདི་འདྲ་མང་པོ་ཞིག་ཡོད་པ་རེད། བོད་ནང་ལོགས་ནས་ལས་ཀ་འདི་འདྲ་ཞིག་སྒྲུབ་དགོས་ན་དཀའ་ལས་ཁག་པོ་རེད། དེར་བརྟེན་ང་ཚོ་ཚང་མས་གོ་སྐབས་འདི་བཟུང་ནས་ཤུགས་རྒྱག་དགོས་པ་ཧ་ཅང་གལ་ཆེན་པོ་རེད། ཡིན་ནའང་། ང་ཚོ་མི་གཅིག་གཉིས་ཤིག་གིས་ཡོང་བ་ཞིག་མ་རེད་ལ། ཤེས་ཀྱང་ཤེས་ཀྱི་མ་རེད། ཤེས་མདོག་གིས་ལས་ཀ་འདི་བྱས་པ་ཡིན་ན་གོ་ལོག་ཐེབས་པའི་འགྲེལ་བཤད་དེ་འདྲ་རྒྱག་སྲིད་པའི་ཉེན་ཁ་ཡོད་སྟབས། སོ་སོས་གང་ཤེས་པ་དེའི་ཐོག་འགྲོ་རྒྱུ་རེད་མ་གཏོགས་བསམ་པ་རྣམ་དག་བྱས་པ་ཡིན་ནའང་འགྲོ་ས་ཡོད་པ་མ་རེད། དེ་སྔོན་ཞུས་པ་ལྟར། རྣམ་པ་ཚོ་ཚང་མས་འདིའི་སྒང་ལ་དཀའ་ལས་རྒྱག་རོགས་གནོངས་ཞེས་རེ་སྐུལ་ཞུ་རྒྱུ་ཡིན། ” ཞེས་བརྗོད་བྱུང་།

ཡང་ཁོང་གིས། ” ང་རང་ལྟ་བུ་ཡིན་ན། གཞན་པ་གང་ཡང་མེད་ཀྱང་དཀའ་ལས་གང་འཚམ་བརྒྱབ་མྱོང་ཡོད། དཀའ་ལས་ག་ཚོད་རྒྱག་ཐུབ་ན་དེའི་ཚོད་ཀྱིས་གྲུབ་འབྲས་ཤིག་ཐོན་ཐུབ་པ་གསལ་བོ་ཡིན་སྟབས། ན་ནིང་འདིར་ཕེབས་མཁན་ཚོས་ཕྱག་ལས་གནང་སྟེ་གང་འཚམ་འགྲོ་བཞིན་ཡོད་དུས་ཚིག་མཛོད་རྩོམ་སྒྲིག་བྱེད་པའི་ཉམས་མྱོང་གང་ལ་གང་འཚམ་བསགས་ཡོད་པ་རེད། ཡིན་ནའང་། གསར་པ་དེ་ཚོས་ཕལ་ཆེར་ཉམས་མྱོང་བསག་རྒྱུ་ཡིན་སྟབས། མ་འོངས་ལོ་བཞི་དང་ལྔ་ཡི་ནང་དུ་དཀའ་ལས་རྒྱག་ཐུབ་པ་ཡིན་ན། ཚིག་མཛོད་རྩོམ་སྒྲིག་བྱེད་མཁན་མཁས་པ་ཞིག་ཆགས་ཐུབ་པའི་རེ་བ་ཡོད། དེ་རིང་ང་ཚོ་འདིར་མི་བཞི་བཅུ་ལྔ་བཅུ་ཞིག་འཛོམས་བསྡད་ཡོད་པ་དང་། མ་འོངས་པར་བཙན་བྱོལ་ནང་གི་ཚིག་མཛོད་རྩོམ་སྒྲིག་བྱེད་མཁན་ཆེད་མཁས་པ་ཞིག་རང་བཞིན་གྱིས་ཆགས་ཡོད་པ་རེད། འདི་བཙན་བྱོལ་ནང་གི་གཟི་བརྗིད་དང་། བོད་ཀྱི་དགོན་སྡེ་ཁག་གི་གྲུབ་མཐའ་སོ་སོ་དང་ལུང་ཚན་སོ་སོའི་གཟི་བརྗིད་ཅིག་ཆགས་ཡོད་པ་རེད། ལས་ཀ་འདི་ཡག་པོ་ཞིག་བྱུང་བ་ཡིན་ན་སངས་རྒྱས་ཀྱི་བསྟན་པ་སྤྱི་དང་ལྷག་པར་དུ་སོ་སོ་རང་གི་མེ་ཏོག་གངས་ལ་འཕོས་པའི་ཆོས་རྒྱུད་གྲུབ་མཐའ་དེ་དག་འཛིན་སྐྱོང་སྤེལ་གསུམ་བྱེད་པར་ཐུགས་ཕན་ཆེན་པོ་གསོ་ཐུབ་ངེས་རེད་དྲན་གྱི་འདུག ང་ཚོས་བསྟན་པ་སྤྱི་ལ་ཞབས་འདེགས་ཞུས་ཟེར་ནའང་སོ་སོའི་དེ་ཡར་རྒྱས་བཏང་ནས་སངས་རྒྱས་བསྟན་པ་སྤྱི་ལ་ཕན་པ་ཞིག་བསྒྲུབ་རྒྱུ་རེད་མ་གཏོགས། དེ་མིན་པའི་སངས་རྒྱས་བསྟན་པ་སྤྱི་ལ་ཞབས་འདེགས་ཞུས་ཟེར་བ་ཞིག་ཡོང་གི་མ་རེད། ” ཅེས་བརྗོད་བྱུང་།

སྐུ་མགྲོན་གཙོ་བོ་དབུས་བོད་མིའི་སྒྲིག་འཛུགས་ཀྱི་ཆོས་རིག་དྲུང་ཆེ་ནོར་བུ་དོན་ལྡན་ལགས་ཀྱིས། ཚིག་མཛོད་ནང་གི་ཐ་སྙད་དང་དེའི་འགྲེལ་བ་བོད་ཡིག་ནང་འབྲི་དགོས་པ་དང་། སྔ་མོའི་དག་ཆ་རེ་ཟུང་ལ་དོགས་པ་ཡོད་སྲིད་སྟབས། སྤྱི་ཡོངས་ཀྱི་དག་ཆར་ཞུ་དག་ཡག་པོ་གནང་རྒྱུ་གལ་ཆེན་པོ་མཐོང་གི་འདུག ངའི་ལོ་ངོ་ཉི་ཤུ་རྩ་གསུམ་རིང་ཞབས་ཞུའི་ཉམས་མྱོང་ལས་ལྷན་ཁང་དག་དང་ཚོགས་པ་ཁག་ནང་ཁུལ་དུ་ཡིག་འབྲེལ་བྱེད་སྐབས་ཡིག་ནོར་མང་པོ་ཞིག་ཡོང་གི་འདུག མཚམས་རེར་གློག་ཀླད་ཀྱི་སྐྱོན་ཡིན་སྲིད་ཀྱང་། དོ་བདག་རང་ཉིད་ཀྱིས་ཞུ་དག་བྱེད་རྒྱུ་ཧ་ཅང་གལ་ཆེན་པོ་མཐོང་གི་འདུག ལས་གཞི་འདི་དབུ་འཛུགས་བྱས་ནས་ལོ་ངོ་གཉིས་འགྲོ་བཞིན་ཡོད་པ་དང་། ལས་གཞི་འདི་དུས་ཡུན་ལོ་ངོ་ ༩ ཡིན་སྟབས། ཚང་མས་གཟབ་གཟབ་གྱིས་ཞུ་དག་བྱེད་རྒྱུ་ཧ་ཅང་གལ་ཆེན་པོ་རེད། དེ་བཞིན། ཆོས་ལུགས་ཆོས་རྒྱུད་སོ་སོའི་ནང་གི་དོན་གཅིག་པའི་ཐ་སྙད་གཅིག་དུ་བསྡུས་ནས་འགྲེལ་བ་ཁ་གསལ་ཞིག་འབྲི་དགོས་པ་ཧ་ཅང་གལ་ཆེན་པོ་ཡིན་སྐོར་བརྗོད་བྱུང་།

ཡང་ཁོང་གིས། “ནམ་རྒྱུན་༧སྐྱབས་མགོན་རིན་པོ་ཆེ་མཆོག་གིས་ང་ཚོ་ནང་པའི་ཆོས་བྱེད་མཁན་ཚོ་དུས་རབས་ཉེར་གཅིག་པའི་ནང་པ་ཞིག་བྱེད་དགོས་ཞེས་གསུང་བཞིན་ཡོད་པ་ལྟར། དེང་དུས་དང་མཐུན་པའི་འགྲེལ་བཤད་ཁ་གསལ་པོ་དང་ཚང་མས་ཧ་གོ་ཐུབ་པ་ཞིག་དགོས་ཀྱི་འདུག དཔེར་ན། དེང་སང་འཛིན་རིམ་བདུན་པ་ནས་བཅུ་གཉིས་བར་ནང་ཆོས་སློབ་ཁྲིད་བྱེད་བཞིན་ཡོད་པས། ནང་ཆོས་ངོ་སྤྲོད་ཀྱི་ཐོག་འགྲེལ་བཤད་ཁ་གསལ་བོ་ཞིག་དང་གོ་བདེ་བོ་དགོས་པ་རེད། དེ་བཞིན་༧གོང་ས་མཆོག་གིས་ནང་ཆོས་ངོ་སྤྲོད་གནང་སྐབས་ཚིག་གི་འགྲེལ་བ་ཁ་གསལ་བོ་དང་གོ་བདེའི་ཐོག་ནས་འགྲེལ་བཤད་གནང་བ་དེ། ཕྱིའི་རྒྱལ་ཁབ་ཀྱི་སྐད་ཡིག་ནང་དུ་ཕབ་བསྒྱུར་བྱེད་རྒྱུ་ལས་སླ་པོ་ཡོང་གི་ཡོད་སྟབས། དེ་ལྟར་དགོངས་བཞེས་ཀྱིས་བརྡ་སྤྲོད་དང་ཐ་སྙད་དེ་དག་ཡིག་ཐོག་ནས་གང་གསལ་གསལ་དང་གོ་གང་བདེ་བདེ་ཞིག་གནང་ཐུབ་པ་ཡིན་ན། ནང་ཆོས་སློབ་གཉེར་བྱེད་མཁན་སོགས་ལ་ཕན་ཐོགས་ཆེན་པོ་ཡོང་རྒྱུ་རེད་བསམ་གྱི་འདུག ” ཅེས་བརྗོད་བྱུང་།

གསར་འགོད་པ། པདྨ་མཚོ།