ཟི་ལིང་གྲོང་ཁྱེར་ཉེན་རྟོག་ཁང་གིས་ཡུ་གུར་བ་དང་བོད་རིགས་གྲྭ་བ་ཚོ་མངགས་གཏོང་ཁང་དུ་ཡོང་ནས་ཐོ་འགོད་བྱེད་དགོས་པའི་བརྡ་ཁྱབ་དེར་དགོངས་སེལ་ཞུས་ཡོད་འདུག
རྨ་ཆེན་རྫོང་ནས་ཡིན་པའི་བོད་མི་ཞིག་གིས་གནས་ཚུལ་མཁོ་སྤྲོད་གནང་བ་ལྟར་ན། རྒྱ་གཞུང་གིས་ཟླ་འདིའི་ཕྱི་ཚེས་ ༡ ཉིན་ཡུན་ནན་ཞིང་ཆེན་ཁུན་མེན་མེ་འཁོར་འབབ་ཚིགས་སུ་བྱུང་བའི་དམར་གསོད་དོན་རྐྱེན་དེ་ཡུ་གུར་དྲག་སྤྱོད་པས་སྤེལ་བ་ཡིན་ལུགས་ཕྱིར་བསྒྲགས་བྱས་ཡོད་པ་ལྟར། ཟླ་འདིའི་ཕྱི་ཚེས་ ༤ ཉིན་ཟི་ལིང་གྲོང་ཁྱེར་ཞིན་ཧེ་ལམ་མངག་གཏོང་ཁང་གིས། ཁུལ་དེར་ཕྱི་ནས་གཉེན་འཕྲད་སོགས་སུ་ཡོང་བའི་ཡུ་གུར་བ་དང་བོད་རིགས་གྲྭ་བ་ཚོར་ངེས་པར་དུ་མངག་གཏོང་ཁང་དུ་ཐོ་འགོད་བྱེད་དུ་འཇུག་དགོས་ལ། གལ་སྲིད་ཞིབ་བཤེར་ཁྲོད་ཐོ་འགོད་བྱས་མེད་པ་ཤེས་རྟོགས་བྱུང་ཚེ། མགྲོན་ཁང་གི་བདག་པོས་འགན་འཁུར་དགོས་པའི་བརྡ་ཁྱབ་སྤེལ་བ་དེར། མི་མང་གིས་མི་རིགས་དབྱེན་དཀྲུག་གི་བྱ་སྤྱོད་ཡིན་པའི་སྐྱོན་བརྗོད་བྱས་ཡོད་སྟབས། ཉེ་སྔོན་ཟི་ལིང་གྲོང་ཁྱེར་ཉེན་རྟོག་ཁང་གིས་ཝེ་པའོ་བརྒྱུད་མི་མང་ལ་དགོངས་སེལ་ཞུས་ཡོད་པ་དང་། དེ་བཞིན། ཁུན་མེན་གྱི་དམར་གསོད་དོན་རྐྱེན་བྱུང་རྗེས། མགོ་ལོག་ཁུལ་རྨ་ཆེན་རྫོང་ཉེན་རྟོག་ཁང་གིས་བོད་རིགས་དང་ཡུ་གུར་བ་ཚོ་རྫོང་ཐོག་ཏུ་ཡོང་བར་བཀག་འགོག་བྱས་རྐྱེན། ས་གནས་བོད་མི་དང་ཡུ་གུར་བ་ཚོས་ངོ་རྒོལ་བྱས་ཏེ་རྨ་ཆེན་རྫོང་ཉེན་རྟོག་ཁང་གིས་དགོངས་སེལ་ཞུ་དགོས་བྱུང་ཡོད་འདུག
མཁོ་སྤྲོད་གནང་བའི་པར་རིས་ལྟར་ན། དགོངས་སེལ་ཡི་གེ་དེའི་ནང་དུ། ཟླ་འདིའི་ཕྱི་ཚེས་ ༤ ཉིན་ཞི་ཧེ་ལམ་མངག་གཏོང་ཁང་གིས་འཁྱམ་ཉུལ་བ་ཚོའི་ཐོབ་ཐང་ཞིབ་བཤེར་བྱེད་སྐབས། བསམ་བློ་སྒྱིད་ལུག་དང་བྱ་བ་བསྒྲུབ་སྟངས་སྟབས་བདེ་བྱས་རྐྱེན། བརྡ་ཁྱབ་ནང་ཚིག་བརྗོད་མ་འགྲིག་པར་མི་རིགས་ཀྱི་མཛའ་བརྩེ་ལ་གནོད་སྐྱོན་བཟོས་པའི་གནད་དེར། མངག་གཏོང་ཁང་གི་མགོ་ཁྲིད་དང་མི་མང་ཉེན་རྟོག་ཁང་གིས་ཡིག་ཐོག་ཞིབ་བཤེར་བྱས་ཏེ། གྲོང་ཁྱེར་ཉེན་རྟོག་བྱ་བའི་ལྟ་ཞིབ་ཁང་ལ་གནད་དོན་ཡར་ཞུ་དགོས་པའི་བཀའ་མངགས་བྱས་ཡོད་ཅེས་དང་། རྒྱ་ཆེའི་དྲ་གྲོགས་ཚོར་དགོངས་སེལ་ཞུ་བ་དང་ཆབས་ཅིག མི་མང་གི་སྐྱོན་བརྗོད་ངོས་ལེན་དང་། མ་འོངས་པར་ཉེན་རྟོག་ཁང་གི་སློབ་གསོ་དང་གསོ་སྐྱོང་སྦྱོང་བརྡར་ལ་ཤུགས་སྣོན་རྒྱག་རྒྱུ་དང་། མི་རིགས་མཐུན་སྒྲིལ་དམ་ཟབ་ཡོང་ཆེད། སྤྱི་ཚོགས་འཆམ་མཐུན་དང་བརྟན་ལྷིང་ཡོང་བར་འབད་བརྩོན་བྱ་རྒྱུ་ཡིན། ཉེན་རྟོག་ཁང་གི་བྱ་བར་མི་མང་གིས་ཡོ་བསྲང་གནང་བར་ཐུགས་རྗེ་ཆེ་ཞེས་བཀོད་འདུག
གསར་འགོད་པ། པདྨ་མཚོ།
