ཁྲིན་ཀོང་ཀྲིན་གྱི་གསུམ་བཅུ་དུས་དྲན་སྟེང་སྤེལ་བའི་གསུང་བཤད།

                                                                                                 ཁྲིན་ཀོང་ཀྲིན།   ལོ་མ་རྒྱལ་གྱིས་བསྒྱུར།

༼ དེ་རིང་ནི་ཟླ་ ༣ པའི་ཚེས་ ༡༠ སྟེ།  བོད་མིའི་སྒེར་ལངས་ཐེངས་ ༥༥ པའི་དུས་དྲན་རེད།  ནེའུ་ཡོག་དང་ནའེ་ཇེ་སར་ (new Jersey ) ས་ཁུལ་གྱི་བོད་མི་རྣམས་མཉམ་འབྲེལ་རྒྱལ་ཚོགས་ཀྱི་མདུན་དུ་འཛོམས་ཏེ་དུས་དྲན་སྲུང་བརྩི་བྱས།  བོད་མི་དང་བོད་དོན་རྒྱབ་སྐྱོར་བ་བཅས་ཧ་ལམ་མི་ ༢༠༠༠ ལྷག་འཛོམས་འདུག ཐེངས་འདིའི་ལས་འགུལ་འདི་ནི། ནེའུ་ཡོག་དང་ནེའི་ཇེ་སར་གྱི་བོད་རིགས་ཚོགས་པ་དང་བོད་ཀྱི་གཞོན་ནུ་ལྷན་ཚོགས། བུད་མེད་ལྷན་ཚོགས། སློབ་ཕྲུག་ཚོགས་པ། ཆུ་བཞི་སྒང་དྲུག ཨ་རིའི་བོད་ཀྱི་ཚོགས་ཆུང་བཅས་ཁྱོན་ཚོགས་པ་དྲུག་གིས་མཉམ་རུབ་བྱས་པ་ཞིག་རེད།  སྐད་གྲགས་ཅན་གྱི་ཁྲིམས་གཙོ་པ་ཁྲིན་ཀོང་ཀྲིན་ནི་ལས་འགུལ་འདིར་གདན་འདྲེན་ཞུས་ཡོད།  གཤམ་དུ་བཀོད་ཡོད་པ་དེ་ནི་ཐེངས་འདིའི་གསུམ་བཅུ་དུས་དྲན་སྟེང་སྤེལ་བའི་ཁོང་གི་གསུང་བཤད་དེ་ཡིན།༽

གྲོགས་པོ་ཚོ་སྐུ་ཁམས་བཟང་། དེ་རིང་། ཁྱོད་ཚོ་དང་མཉམ་དུ་ལས་འགུལ་འདིར་མཉམ་ཞུགས་ཐུབ་པར་ང་རང་བསོད་ནམས་ཆེན་པོ་ཡིན་སེམས་བཞིན་ཡོད། དེ་ནས། ཚོགས་པ་ཁག་གིས་ང་རང་འདིར་གདན་འདྲེན་ཞུས་བར་ཐུགས་རྗེ་ཆེ་བ་ཞུ་བ་དང་སྦྲགས། བྱང་ཨ་རི་ན་གནས་སྡོད་བྱས་པའི་༧གོང་ས་མཆོག་གི་སྐུ་ཚབ། སྐལ་རྡོར་དང་ཀུན་དགའ་རྣམ་གཉིས་ལ་ཡང་ཐུགས་རྗེ་ཆེ་ཞུས་བ་ཡིན།  དེ་རིང་ནི་བོད་མིའི་སྒེར་ལངས་ཐེངས་ ༥༥ ཡི་དུས་དྲན་ཉིན་མོ་རེད། ང་རང་གིས་ད་དུང་དྲག་སྤྱོད་རྒྱལ་ཁབ་ན་འཚོ་གཞེས་བྱེད་བཞིན་པའི་མི་མང་གི་སྒེར་ལངས་བྱེད་པའི་ཉིན་མོ་ལ་སྔར་ལས་རེ་བ་བྱེད་ཀྱི་ཡོད། འཚེ་མེད་ཞི་བ་ནི་མི་ཡི་ནང་སེམས་ཀྱི་ཟབ་སར་འཐིམ་ཡོད་པའི་ཁ་སང་དེ་རིང་ལ། ང་རང་གིས་བསམ་ན། སྒེར་ལངས་བྱེད་པ་ནི་ཧ་ཅང་གི་དགོས་ངེས་ཤིག་རེད་འདོད། དེ་རིང་། ང་ཚོས་འདི་ནས་རྔམ་རྟོན་ཁྲོམ་སྐོར་བྱེད་པ་འདི་ནི། སང་ཉིན་ང་ཚོས་རང་ཉིད་ཀྱི་རྒྱལ་ཁབ་ནས་དེ་རིང་གི་འདི་ལྟ་བུའི་རང་དབང་དང་ཞི་བདེ་ཡི་སྒོ་ནས། རང་ཉིད་ཀྱི་བསམ་ཚུལ་དང་ང་ཚོ་ཡི་རེ་འདུན་དག་བརྗོད་ཐུབ་པའི་ཆེད་དུ་ཡིན།

སྒེར་གཅོད་པར་བརྟེན་ས་དང་ལག་ཆ་ཞིག་ཡོད་པ་ནི་སྐྱག་རྫུན་དང་དྲག་སྤྱོད་ཁོ་ན་རེད། མ་ཟད། ཁོ་ཚོས་དྲག་སྤྱོད་ནི་ཐབས་ལམ་ཀུན་ལས་མཆོག་ལ་བརྩིས་ཏེ། མུ་མཐུད་ནས་གཉའ་གནོན་དང་དྲག་གནོན་བྱེད་ཀྱི་ཡོད། འདི་ལྟ་བུའི་གནས་སྟངས་འོག་ནས། ཉམས་ཐག་པ་རྣམས་ཀྱིས་ངེས་པར་དུ་ཚུལ་ལྡན་རང་སྲུང་གི་དབང་ཆ་དེར་སྲུང་སྐྱོབ་བྱེད་དགོས། འདི་ནི་འཛམ་གླིང་ཡོངས་ཁྱབ་ཀྱིས་ངོས་ལེན་བྱེད་པའི་སྤྱི་མང་གི་དབང་ཆ་དེ་རེད། ནམ་ཞིག་ང་ཚོའི་འཚོ་གནས་ཀྱི་བདེ་འཇགས་དང་། མི་གཞིའི་བརྩི་མཐོང་། ཁྲིམས་མཐུན་རྒྱུ་ནོར་བཅས་ལ་གཞན་གྱིས་གནོད་སྐྱོན་བྱེད་དུས། ང་ཚོས་ཁྲིམས་དང་མཐུན་པའི་སྒོ་ནས་དེ་ལ་སྲུང་སྐྱོབ་བྱེད་འོས།  ང་ཚོས་འཚེ་བ་དང་དྲག་སྤྱོད་ལ་ངོ་རྒོལ་བྱེད་པ་ལྟར། སྒྲིག་ཁྲིམས་མེད་པའི་འཚེ་མེད་ཞི་བ་ལ་ཡང་ངོ་རྒོལ་བྱེད་དགོས། དེ་ནས། འཚེ་མེད་ཞི་བའི་ལམ་ཁར་བགྲོད་པ་དང་མཉམ་དུ། དྲག་སྤྱོད་སྲིད་གཞུང་ལ་ངོ་རྒོལ་བྱེད་མཁན་གྱི་མི་མང་རྣམས་ལ་བཤུ་གཞོག་དང་བཀག་འགོག་བྱེད་མི་རུང་། འདི་ནི་དྲག་སྤྱོད་ལ་བློ་ཁ་ཕྱོགས་པ་ཞིག་མ་རེད། ཡིན་ན་ཡང་། ཚུལ་དང་མི་མཐུན་པའི་སྤྱི་ཚོགས་ནས་ཚུལ་མཐུན་ཅན་དང་ཁྲིམས་མཐུན་ཅན་གཉིས། མཚམས་མཚམས་སུ་ཁ་མཐུན་ཡོང་རྒྱུ་མ་རེད།  དེ་ནས། ཚུལ་ལྡན་རང་སྲུང་གི་དབང་ཆ་དེ་ལ་འགེབ་སྲུང་བྱེད་པའི་ཁྲིམས་མཐུན་རང་བཞིན་དང་དགོས་ངེས་རང་བཞིན་དེ་ནི།  སྤྱི་ཚོགས་གང་ཞིག་དྲང་པོ་དྲང་བཞག་ངང་གནས་ཐུབ་པར་ཕན་ཐོགས་ཆེན་པོ་ཡོད།   འཚེ་མེད་ཞི་བའི་མཛུབ་མོ་ནི་དྲག་སྤྱོད་སྲིད་གཞུང་ལ་ཀེར་དགོས་པ་ལས་མི་མང་དཀྱིལ་མ་ཚོའི་ཕྱོགས་སུ་གཏོད་མི་རུང་།

༧གོང་ས་སྐྱབས་མགོན་ཏཱ་ལའི་བླ་མ་མཆོག་གིས་ཡུན་ནས་རིང་དུ་གུ་ཡངས་པོས་མིའི་ནང་སེམས་ཀྱི་ཞི་བདེ་ལ་མཐོང་ཆེན་གནང་བ་མ་ཟད། བྱམས་དང་བརྩེ་བའི་སྒོ་ནས་རང་ཉིད་ཀྱི་མཐའ་འཁོར་གྱི་མི་རྣམས་ལ་ཐུགས་འཕྲད་དང་བྱམས་སྐྱོང་གནང་ཡོད།  དུས་ཡུན་རིང་པོ་ ༡༩༧༤ ལོ་ནས་བཟུང་སྟེ། ༧གོང་ས་མཆོག་འཛམ་གླིང་གི་ས་ཆ་གང་སར་ཕེབས་ཞོར་དུ།  ནན་ནན་བཅག་བཅག་གི་སྒོ་ནས་རང་བཙན་མི་རྩོད་པ་དང་།  གལ་ཏེ། བོད་ལ་རྒྱ་ནག་གི་རྩ་ཁྲིམས་ཀྱི་སྒྲོམ་གཞི་ལས་མིང་དོན་མཚུངས་པའི་རང་སྲིད་རང་སྐྱོང་ཐོབ་པ་ཡིན་ན།  གཉིས་ཕན་དབུ་མའི་ལམ་ནས་བོད་རྒྱའི་དཀའ་རྙོག་སེལ་བར་གསུངས་ཡོད།   འདི་ལྟ་བུའི་བྱམས་བརྩེ་དང་རྣམ་དཔྱོད་ཀྱིས་ཁེངས་པའི་ཆོས་ཀྱི་དབུ་ཁྲིད་འདིས་འགྲོ་བ་མིའི་ཐོབ་ཐང་གི་རྩོད་ལེན་ཆེད་དུ། ས་ཕྱོགས་གང་སར་ཕེབས་ཏེ་འབོད་བསྐུལ་དང་རེ་འདུན་བསྩལ། ཡིན་ན་ཡང་།  རྒྱ་གཞུང་གི་དབང་འཛིན་པ་ཚོས་རྣ་འོན་པ་དང་ངག་ལྐུགས་པའི་བརྟུལ་ཞུགས་བཟུང་སྟེ།  ༧གོང་ས་མཆོག་གིས་རང་བཙན་རྩོད་བཞིན་འདུག་ཅེས་སྐྱག་རྫུན་བཤད་དེ།  མི་རིགས་ཕན་ཚུན་གྱི་བར་ལ་འཁོན་སེམས་སློང་བ་དང་།  མི་མང་ནས་༧གོང་ས་མཆོག་ལ་དགྲ་ཡི་འདུ་ཤེས་འཛིན་དགོས་པར་བྱེད་པ་མ་ཟད།  མུ་མཐུད་དེ་དྲ་ལམ་བཀག་སྡོམ་བྱས་ནས་བདེན་པ་དངོས་མ་དེ་ཤེས་སུ་འཇུག་གི་མེད།

ཁོ་ཚོའི་བཤད་སྟངས་དེ་ནི། དོན་དངོས་དང་མི་མཐུན་པ་མ་ཟད།  གནད་དོན་ཐག་གཅོད་ཀྱི་ཐད་ལའང་ཕན་ཐོགས་ཅི་ཡང་མི་འདུག ད་དུང་། འགལ་བ་སྔར་ལས་རྣོ་ངར་ཅན་དུ་གཏོང་གི་འདུག  འདི་ལྟ་བུའི་རྫུན་དང་འཁྱོག་བཤད་ནི་གནའ་སྔ་མོ་སྔ་མོ་ལ་ནུས་པ་ཞིག་ཐོན་ཡོད་ཀྱང་།  དེང་སང་བརྡ་འཕྲིན་གྱི་དུས་རབས་འདིར།  བྱེད་སྟངས་དེ་ནི་རང་མགོ་རང་གིས་གཡོགས་པ་རང་རེད། དཔེར་ན། ༧གོང་ས་མཆོག་རྒྱལ་ཁབ་ག་གེ་མོ་ཞིག་གི་སྲིད་འཛིན་དང་ཡང་ན་སྲིད་བློན་ལ་མཇལ་འཕྲད་གནང་སྐབས།  རྒྱ་གཞུང་གིས་རྒྱལ་ཁབ་དེ་དག་ལ་ལེ་བདའ་དང་འཁང་ར། སྐྱོན་བརྗོད་སོགས་ཤུགས་ཆེན་བྱས་ཏེ། རྒྱ་ནག་མི་མང་གི་སེམས་ཁམས་ལ་ཕོག་ཐུག་འགྲོ་བའི་ལས་ཀ་བྱེད་ཀྱི་ཡོད་པ་མ་ཟད།  ཏཱ་ལའི་བླ་མ་ནི་ཁ་བྲལ་རིང་ལུགས་པ་ཞིག་རེད་ཅེས་སྐྱོན་བརྗོད་ཀྱང་བྱེད་ཀྱི་ཡོད། དེ་ལྟར་ཡིན་ན་ཡང་།  ད་ལྟ་ང་ཚོ་ཀུན་གྱི་མིག་གི་མཐོང་ཆོས་སུ་གྱུར་བའི་དངོས་ཡོད་གནས་ཚུལ་དེ་ནི།   ༧གོང་ས་མཆོག་ས་ཆ་ག་བར་ཕེབས་ཀྱང་།  ཁོང་ལ་དད་གུས་དང་དགའ་མོས་བྱེད་མཁན་ཧ་ཅང་མང་ཞིང་།  ཁོང་གི་གསུང་བཤད་ལ་ཉན་མཁན་ཡང་དེ་བཞིན་མང་པོ་ཡོད། ཐ་ན། ཁ་ཤས་ཤིག་གོང་ས་མཆོག་ལ་ཞལ་མཇལ་ཐེངས་གཅིག་གི་ཆེད་དུའང་ཐག་རིང་ནས་ཡོང་གི་ཡོད། འདི་ནི་མི་མང་གི་སེམས་པ་དང་མི་མང་གི་དད་འདུན་རེད།

ཁ་སང་དེ་རིང་ཡིན་ན། རྨོངས་གཉིད་ལས་སད་པའི་མི་རྣམས་ཀྱིས་དབང་འཛིན་པའི་ཁོ་ཚོ་ལ་མཁོ་སྤྲོད་བྱེད་ཀྱི་ཡོད་པའི་གནས་ཚུལ་དག་ནི་རྫུན་མ་ཡིན་པ་ཤེས་ཀྱི་ཡོད། དེ་ནས། རིམ་གྱིས་རྒྱ་གཞུང་ལ་ཡིད་ཆེས་བྱེད་པ་དེ་ཡང་མཚམས་འཇོག་བྱེད་ཀྱི་ཡོད། མི་དེ་དག་གིས་རྒྱ་གཞུང་གིས་འཇིགས་སྐུལ་དང་བཀག་སྡོམ་ཇི་ལྟར་བྱས་ཀྱང་། བོད་ཀྱི་མཐོ་རིམ་དང་མི་མང་གི་ནང་ལ་ཐད་ཀར་འབྲེལ་འདྲིས་བྱས་ཏེ།  བོད་མིའི་མངོན་འདོད་ངོ་མ་དེ་ཅི་ཞིག་ཡིན་མིན་དེ་རྒྱུས་ལོན་བྱེད་ན་འདོད་ཀྱི་ཡོད། རྒྱུ་མཚན་ནི་དེ་ཡིས་སྐྱག་རྫུན་ལྷང་ལ་བུད་པའི་ཡིད་ཆེས་ཀྱི་ཉེན་ཁ་དེ་མཚོན་གྱི་ཡོད། ཡིན་ན་ཡང་།  ང་ཚོས་དེ་ནི་མི་རིགས་མཐུན་སྒྲིལ་ཡོང་བའི་ལོ་རྒྱུས་ཀྱི་འགག་རྩ་ཞིག་ཏུ་བརྩིས་ཏེ།  གོ་སྐབས་དེ་དམ་འཛིན་བྱེད་དགོས། གང་ལྟར། རྒྱ་ནག་ལ་དམངས་གཙོ་དང་རང་དབང་། ཕྱི་གསལ་ནང་གསལ་གྱི་བརྡ་འཕྲིན་སོགས་མེད་ཚེ།  གནད་དོན་མང་པོ་ཞིག་རྩ་བའི་སྒོ་ནས་ཐག་གཅོད་བྱེད་ཐུབ་ཀྱི་མ་རེད།

རྒྱ་གཞུང་གི་སྒེར་གཅོད་པ་ཚོས་གྲངས་ཉུང་མི་རིགས་ཙམ་མ་ཡིན་པར། རྒྱལ་ཡོངས་མི་མང་ཡོངས་ལའང་གཉའ་གནོན་དང་མནར་གཅོད་བཏང་བ་དུས་ཚོད་ཐུང་ཐུང་ཞིག་མིན་པ་མིག་ཡོད་ཚད་ཀྱིས་མཐོང་གསལ་ཡིན།  སྒེར་གཅོད་པའི་རང་བཞིན་ནི་དམངས་གཙོ་ལ་རྒོལ་བ་དང་རང་དབང་ལ་རྒོལ་བ། ཁྲིམས་ལུགས་ལ་རྒོལ་བ་བཅས་ཡིན།  དེ་མ་ཟད། དབང་ཆ་སྒེར་འཛིན་གྱི་ཆེད་དུ་སྐྱུག་བྲོ་བའི་ཐབས་ལམ་འདྲ་མིན་ཡང་བཏོན་ཡོང་། གང་ལྟར། ང་ཚོས་སྒེར་གཅོད་སྲིད་དབང་གང་ཞིག་ཡིན་ཡང་འཐོར་ཤིག་ཏུ་གྱུར་འགྲོ་བ་དེར་ངོས་ཟིན་འཐོབ་དགོས།   “མི་བཟས་པ”་ཡིན་ན་སྒེར་གཅོད་པ་ལ་ཚད་ལོངས་ཡོད།  སྟབས་ལེགས་པ་ཞིག་ལ་ཁོ་ཚོ་ལ་བཅངས་བའི་མི་མང་གི་སེམས་པ་དང་ཡིད་ཆེས་དེ་བརླགས་ཡོད། དེར་བརྟེན། རྒྱ་ནག་ལ་རང་དབང་དང་དམངས་གཙོ། ཁྲིམས་དང་ལྡན་པ་ཞིག་འགྱུར་མིན་དེ། མི་རིགས་ཁག་ལ་རང་དབང་འཐོབ་མིན་གྱི་འགག་རྩ་དེ་རུ་གྱུར་ཡོད། དེར་བརྟེན། ང་རང་གིས་འདི་ལྟར་འབོད་བསྐུལ་ཞུ་བཞིན་ཡོད།  མི་རིགས་ཁག་གི་མི་མང་རྣམས་དེ་རིང་ནས་བཟུང་སྟེ། རང་འགུལ་གྱིས་ཡར་ལ་ལངས་ཏེ།  ཕྱོགས་ཡོངས་ལ་འབྲེལ་གཏུགས་དང་གཏིང་ཟབ་པའི་སྒོ་ནས་འབྲེལ་འདྲིས་བྱེད་ཅིང་། ཕན་ཚུན་ལ་སེམས་པ་རྣམ་དག་བྱས་ཏེ།  གོ་བ་ལོག་པ་རྣམས་གཙང་སེལ་བྱས་ནས་མཐུན་སྒྲིལ་གྱིས་ཡར་ལ་ལོངས་ཤོག རྒྱ་ནག་ལ་དམངས་གཙོ་དང་རང་དབང་འཐོབ་པར་བརྩོན། འདི་ནི་མི་རིགས་ཀུན་གྱི་ཐུན་མོང་གི་རྩ་བའི་ཁེ་ཕན་དེ་ཡིན།  ཁ་དཔེ་ལ།  བོད་ལ་རེ་བ་མང་། ཟེར་བ་ལྟར། ཆོད་སེམས་བརྟན་པས་རྒྱལ་ཁ་འཐོབ་ཐུབ།  ཧུར་བརྩོན་གྱིས་ཤོག  གྲོགས་པོ་ཚོ།  རང་ཉིད་ཀྱི་འགན་འཁྲི་རང་ཉིད་ཀྱིས་སྒྲུབ་དགོས།

ཐུགས་རྗེ་ཆེ། གྲོགས་པོ་རྣམས་པ།

ཉིས་སྟོང་བཅུ་བཞི་ལོའི་ཟླ་ ༣ པའི་ཚེས་ ༡༠ ཉིན་ལ་མཉམ་འབྲེལ་རྒྱལ་ཚོགས་ཀྱི་མདུན་ནས།

མ་རྩོམ་གྱི་འབྲེལ་ཐག   http://boxun.com/news/gb/intl/2014/03/201403111027.shtml#.Ux-50B23Trc