ཁུ་རེ་མྰེའི་མང་མོས་ཐག་གཅོད་ཕྱིར་འཐེན་བྱེད་དགོས།

དེ་རིང་དབྱིན་ཇིའི་རྒྱལ་ས་ལོན་ཊོན་དུ་ཨ་རིའི་རྒྱལ་དོན་དྲུང་ཆེ་ཇོན་ཁེ་རེན་ལགས་དང་ཨུ་རུ་སུའི་ཕྱི་སྲིད་བློན་ཆེན་ལྰ་བེ་རོབ་བེ་ (Sergei Lavrov) ལགས། དབྱིན་ཡུལ་གྱི་སྲིད་བློན་མཆོག་དང་ཕྱི་སྲིད་བློན་ཆེན་བཅས་ཀྱིས་ཁུ་རེ་མྰེ་ཡི་ནང་མང་མོས་ཐག་གཅོད་ཀྱི་འོས་བསྡུ་མི་བྱེད་པའི་གནད་དོན་ཐོག་གྲོས་བསྡུར་བྱེད་བཞིན་པ་མ་ཟད། གལ་སྲིད། ཨུ་རུ་སུས་མང་མོས་འོས་བསྡུའི་གནད་དོན་དེར་ཕྱིར་འཐེན་བྱེད་པར་མོས་མཐུན་མ་བྱས་ཚེ་ཨ་རི་དང་ཡུ་རོབ་མཐུན་ཚོགས་གཉིས་ཀྱིས་ཨུ་རུ་སུ་རྒྱལ་ཁབ་ལ་དཔལ་འབྱོར་གྱི་ཉེས་ཆད་གཏོང་རྒྱུ་ཡིན་འདུག

ཁ་སང་ཕྱི་ཚེས་ ༡༣ ཉིན་ཨ་རིའི་གྲོས་ཚོགས་གོང་མའི་ཕྱི་སྲིད་འབྲེལ་ལམ་ལྷན་ཚོགས་ནང་ཨ་རིའི་རྒྱལ་དོན་དྲུང་ཆེ་ཇོན་ཁེ་རེན་ལགས་ཀྱིས། ཟླ་འདིའི་ཚེས་ ༡༦ ཉིན་ཡུའུ་ཁུ་རཱེན་གྱི་རང་སྐྱོང་མངའ་ཁུལ་ཁུ་རེ་མྰེ་མང་ཚོགས་ཀྱིས་ཁུ་རེ་མྰེ་ཨུ་རུ་སུའི་རྒྱལ་ཁོངས་སུ་འགྲོ་དགོས་མིན་ལ་མང་མོས་ཐག་གཅོད་ཀྱི་འོས་བསྡུའི་ལས་རིམ་ཕྱིན་ཚེ།  ཨ་རི་དང་ཡུ་རོབ་མཐུན་ཚོགས་གཉིས་ཀྱིས་ཨུ་རུ་སུས་རང་སྐྱོང་མངའ་ཁུལ་དེར་བཙན་འཛུལ་དབང་བསྒྱུར་བྱས་པར་ངོས་འཛིན་གྱིས་ངོ་རྒོལ་བྱ་རྒྱུ་ཡིན་ཞེས་བརྗོད་ཡོད་འདུག

ཟླ་འདིའི་ཚེས་ ༡༡ ཉིན་ཨ་རི་དང་དབྱིན་ཡུལ། ཧྥ་རན་སི། འཇར་མན། ཨི་ཊ་ལི། ཁེ་ཎ་ཌ། ཉི་ཧོང་བཅས་ཀྱིས་ཨུ་རུ་སུ་གཞུང་གིས་ཁུ་རུ་མྰེ་ཡི་མང་མོས་ཐག་གཅོད་ཀྱི་འོས་བསྡུ་དེ་མཚམས་འཇོག་བྱེད་དགོས་པ་དང་དེ་མིན་མང་མོས་འོས་བསྡུ་བྱས་པའི་གྲུབ་འབྲས་ཇི་བྱུང་ལ་ངོས་ལེན་མེད་པའི་བསྒྲགས་གཏམ་སྤེལ་ཡོད་འདུག་ལ། ནུབ་ཕྱོགས་རྒྱལ་ཁབ་ཚོས་ཀྱང་ཁུ་རུ་མྰེ་ནང་མང་མོས་ཐག་གཅོད་ཀྱི་འོས་བསྡུ་བྱེད་མི་ཆོག་པའི་སྐྱོན་བརྗོད་བྱེད་བཞིན་ཡོད་འདུག

ཁ་སང་མཉམ་འབྲེལ་རྒྱལ་ཚོགས་བདེ་འཇགས་ལྷན་ཁང་གིས་ཡུའུ་ཁུ་རཱེན་གྱི་གནད་དོན་ཐོག་ཛ་དྲག་ཚོགས་འདུ་ཞིག་ཚོགས་པའི་ཐོག ཨུ་རུ་སུའི་མཉམ་འབྲེལ་རྒྱལ་ཚོགས་སྐུ་ཚབ་ཀྱིས། ཨུ་རུ་སུར་ཁུ་རེ་མྰེའི་བདག་དབང་སྲུང་སྐྱོབ་བྱེད་པའི་ཐོབ་ཐང་ཡོད་ཀྱང་། ཨུ་རུ་སུས་ཡུའུ་ཁུ་རཱེན་ལ་དམག་འཁྲུག་རྒྱག་པར་འདོད་མོས་མེད་ཅེས་བརྗོད་ཡོད་པ་དང་། ཡུའུ་ཁུ་རཱེན་བར་བརྒལ་སྲིད་བློན་མཆོག་གིས་ནུབ་ཕྱོགས་རྒྱལ་ཁབ་ཚོས་ཡུའུ་ཁུ་རཱེན་གྱི་བདག་དབང་སྲུང་སྐྱོབ་བྱེད་དགོས་པའི་འབོད་སྐུལ་ཞུས་ཡོད་འདུག

ད་ལྟའི་ཆར་ཡུའུ་ཁུ་རཱེན་རྒྱལ་མཚམས་སུ་ཨུ་རུ་སུའི་དམག་དཔུང་འབོར་ཆེན་ཡོང་ནས་དམག་སྦྱོང་བྱེད་ཀྱི་ཡོད་སྟབས། ཨ་རིའི་འཐབ་འཁྲུག་གནམ་གྲུ་འགའ་པོ་ལན་ཌི་རྒྱལ་ཡོངས་གནམ་ཐང་དུ་བབས་ནས་ཚོད་ལྟ་བྱེད་བཞིན་ཡོད་འདུག