བོད་མིའི་རང་དབང་སྒེར་ལངས་དུས་དྲན་ཐེངས་ ༥༥ པའི་སྟེང་ཞུཊ་པའི་དྲན་ཚུལ།

ཝང་ཅེའི་ལིན་གྱིས་བརྩམས། ཆབ་ཆ་འབྲུག་བྷེ་ཡིས་བསྒྱུར།

གླེང་ཡོང་དུས་ངོ་གནོངས་པ་ཞིག་རེད། ངས་རྒྱུན་རིང་པོ་ཞིག་ལ་བོད་པ་ (Tibet) ཞེས་པའི་མིང་ཚིག་འདིའི་ཅི་ཞིག་སྟོན་གྱི་ཡོད་པར་དོ་སྣང་བྱས་མ་མྱོང་། ངས་ཀྲུང་གོའི་མངའ་ཁོངས་སུ་བོད་རང་སྐྱོང་ལྗོངས་ཞེས་པ་ཞིག་ཡོད་པ་ཤེས་ཀྱིན་ཡོད་ལ། མྱངས་ཟིན་པའི་སློབ་གསོས་ཀྱང་བོད་ཅེས་པ་དབྱིན་ཡིག་ནང་བསྒྱུར་ཏེ་རྒྱའི་སྐད་ཡིག་གི་ཕེན་ཡེན་ཐོག་ (XiZang) བཀོད་འདུག  དགོད་བྲོ་བ་ཞིག་ལ་ང་ཨ་རིའི་ས་ཐོག་དུ་གོམ་པ་སྤོས་པའི་ཟླ་ཤས་རྗེས་སུ་ད་གཟོད་བོད་ཅེས་པ་ (Tibet) ཡིན་པ་ཤེས།

ང་ལ་མཚོན་ནས་བཤད་ན་བོད་ནི་ཧ་ཅང་ལྐོག་གྱུར་ཞིག་དང་། ཐ་ན་འཇིགས་སྐྲག་གི་གནས་ཤིག་རེད་བསམ་བསྡད་ཡོད། བོད་གླེང་དུས་ཀྲུང་གོའི་སྐམ་སར་འཚོ་བ་སྐྱེལ་བཞིན་པའི་རྒྱ་རིགས་ཕལ་མོ་ཆེའི་བསམ་བློ་ནང་གཅིག་འཇུག་གཉིས་མཐུད་དུ་དྲན་ཡོང་བ་ནི་ཀླ་ཀློ་དང་རྗེས་ལུས། བཙོག་པ། ཁ་དབུགས་ཀྱི་མི་འདང་པ་འདི་དག་རེད། ལོ་བཅུ་གཅིག་སྔོན་ཏུ་དར་མའི་ངར་ཤུགས་ཤིག་དང་། ཡང་ན་བློ་སེམས་མི་བདེ་བའི་ཚོར་བ་ཅིག་དང་མཉམ་དུ་རྒྱབ་ལ་ཁུག་མ་ཁོ་ན་འཁུར་ནས་ལྷ་སའི་ཕྱོགས་སུ་སོང་། སྐབས་དེར་མ་འོངས་བའི་ཉིན་བཅུའི་རྗེས་ལུས་ལ་རལ་གྲི་བྲལ་མེད་དུ་ཐོགས་པའི་མི་ཚོགས་ཤིག་གི་ཁྲོད་དུ་འཛུལ་དགོས་པ་དྲན་དུས་སྐྱོ་བ་དང་བརྗིད་ཉམས་ཀྱི་ཚོར་བ་ཅིག་ཅར་དུ་སྐྱེས་བྱུང་ལ། ངས་ཀྱང་བསམ་བཞིན་དུ་སུད་སིའི་དམག་གྲི་གཅིག་འཁྱེར་བ་གསལ་བོར་དྲན་གྱི་འདུག

བསམ་ཡུལ་ལས་འདས་པ་ཞིག་ལ། ང་ཕོ་བྲང་པོ་ཏཱ་ལ་དང་གཙུག་ལག་ཁང་། ར་མོ་ཆེ། བར་བསྐོར། ད་དུང་མིང་མི་ཐོགས་པའི་སྲང་ལམ་དག་ཏུ་བསྐྱོད་སྐབས། ངས་མཐོང་བའི་བོད་མི་ཚོ་ནི་ཁ་ཁུ་སིམ་པོ་དང་། ཁོང་ཚོས་རྒྱང་ཕྱག་ཡང་ཡང་འཚལ་བའམ། ཡང་ན་མ་ནི་འཁོར་ལོ་བསྐོར་བ། ཕྲེང་བ་འདྲེན་པ་སོགས་ཀྱི་མི་ཕྱེད་དད་པས་མ་ཎི་ཡིག་དྲུག་འདོན་གྱིན་པ་དེ་དག་མཐོང་དུས་ང་ལ་དོགས་པ་ཁག་ཅིག་བྱུང་། གཞན་ལ་འཁྲུག་རྩོད་མི་བྱེད་པར་ཞི་བདེ་ལ་དབྱིངས་ཞུགས་པའི་ཆོས་ལྡན་རྒྱལ་ཁབ་ཁྲོད་ཀྱི་མི་ཚོགས་ཀྱི་ཆ་ཤས་ཤིག་ཡིན་པ་གསལ་པོ་རེད་མོད། ཅི་ཕྱིར་ཕན་ཚུན་དམར་གསོད་ཀྱི་ལས་ལ་གོམས་པའི་ཀླ་ཀློའི་མི་རིགས་ཤིག་མཚོན་པར་བྱས་སམ། ང་དང་བྲལ་མེད་དུ་ཐོགས་པའི་རལ་གྲི་དེ་ཕྱིས་སུ་ཀུ་ཤུའི་པགས་པ་བཤུ་བྱེད་དུ་གྱུར་སོང་།

དུས་ཚོད་འགོར་བས་བཀྲ་ཤིས་ལྷུན་པོ་དང་གམ་པ་ལའི་རི་ཁ། རླབས་ཕྲེང་མཁའ་རུ་འཕྱོ་བའི་ཡར་འབྲོག་གཡུ་མཚོ། ཚ་ཚ་འུར་འུར་གྱི་ཡངས་པ་ཅན། གནམ་མཚོ་ཕྱུག་མོའི་བགས་ཆག་ད་ལྟ་རབ་རིབ་ཞིག་ཏུ་གྱུར་ནའང་། ཉིང་ཁྲི་ལ་ཕྱོགས་པའི་ལམ་ཁར་མཐོང་བའི་ངང་ཚུལ་གཅིག་སྟེ་ད་ལྟ་ཡང་བརྗེད་ཐུབ་ཀྱི་མི་འདུག དེ་ནི་བོད་རིགས་ན་གཞོན་ལོ་ན་ ༡༣ དང་ ༡༤ བར་དང་། ཆེས་ཤོས་ལོ་ན་ ༢༠ ཅན་གྱི་མི་ལྔ་བོ་དེ་རེད། ཁོ་ཚོས་ཁམས་དཀར་མཛེས་ནས་རྒྱང་ཕྱག་འཚལ་ཏེ་ལྷ་སའི་ཕྱོགས་སུ་གནས་འཇལ་དུ་འགྲོ་བཞིན་འདུག ངས་ཁོ་ཚོའི་དཔྲལ་བའི་ཁྲག་ཤུལ་ལ་ལྟ་བཞིན་འདི་ཚོ་སྨྱོན་པ་མིན་ནམ་སྙམ་པ་བྱུང་། ཡིན་ཡང་ཁོ་ཚོའི་གདོང་པར་བདེ་སྐྱིད་དང་ཆོག་ཤེས་ཀྱི་ཁེངས་འདུག ཟླ་བ་དྲུག་གི་ལམ་ཐག་གི་དྲག་ཆར་རླུང་འཚུབ་ཁྲོད་ཁོང་ཚོ་ཅི་ལྟར་ཡོང་བ་ཡིན་ནམ། ངས་རྩ་བ་ནས་དྲན་མི་ཕོད་པ་ཤིག་རེད། ཆོས་ལུགས་དད་མོས་རྒྱུན་འཁྱོངས་བྱེད་པའི་མི་རིགས་ནི་ཆེས་བློ་ཡུལ་ལས་འདས་པ་ཞིག་རེད་ཨང་།

དུས་ཚོད་ནི་གློག་འཁྱུག་པ་ལྟར་ ༢༠༠༨ ལོའི་ཟླ་ ༣ པར་བསླེབ།  གསར་འགྱུར་རྒྱང་བསྒྲགས་ནས་བོད་ཁུལ་དུ་དྲག་ཟིང་བྱུང་བའི་བཤད་ཚུལ་ཞིག་བསྒྲགས་ཡོང་། གསལ་བོ་ཤིག་མི་གོ་ནའང་། ཕལ་ཆེར་ཟིང་འཁྲུག་ནི་ཏཱ་ལའི་ཁ་བྲལ་རིང་ལུགས་པའི་སྒྲིག་འཛུགས་ཀྱིས་སྔོན་ནས་གྲ་སྒྲིག་དང་འཆར་གཞི་ལྡན་པའི་སྐུལ་སློང་ལས་བྱུང་བ་རེད་ཟེར། དྲང་མོར་བཤད་ན། གསར་འགྱུར་དེའི་ཐོས་རྗེས་སྔོན་མའི་སྤྲོ་འཆམ་སྐབས་བོད་མིས་སྤྲད་པའི་ཚོར་བ་ཡག་པོ་དེའི་ཕྱེད་ཀ་བརླག་སོང་། བོད་མིས་ཅི་ཕྱིར་རང་བཙན་རྩོད་ཀྱི་ཡོད་པ་ངས་ཧ་གོ་མ་སོང་། སེམས་ནས་ཁོང་ཁྲོ་དྲག་ཏུ་འབར་ཡོང་། རང་བཙན་གྱི་ཅི་བྱེད། རྒྱལ་ཁབ་ཀྱིས་གྲངས་ཉུང་མི་རིགས་ལ་གཟིགས་སྐྱོང་སྲིད་ཇུས་ཡོད་པ་མ་ཡིན་ནམ། སློབ་མའི་མཐོ་རྒྱུགས་མ་ལོངས་ནའང་བསྡུ་ལེན་བྱེད་ཀྱི་ཡོད། ད་དུང་ཕྲུ་གུ་གཉིས་ཀྱང་སྐྱེས་ན་ཆོག ད་ག་རེ་འདོད་ཀྱི་ཡོད་དམ།

༢༠༠༩ ལོར་བསླེབ་པ་དང་བོད་པ་ཚོའི་རང་བསྲེགས་ཀྱི་གསར་འཕྲིན་གཅིག་མཇུག་གཉིས་མཐུད་དུ་ཐོས་ཡོང་། ང་ཚོའི་ཐོས་པའི་རང་བསྲེགས་ཀྱི་དོན་རྐྱེན་རབས་དང་རིམ་པ་ཐ་དག་ཀྲུང་གོའི་ཕྱི་ལོག་གི་བོད་རང་བཙན་སྟོབས་ཤུགས་དང་། ཡང་ན་ཏཱ་ལའི་རུ་ཚོགས་ཀྱིས་ངན་སྐུལ་གྱིས་བཟོས་པ་རེད་ཅེས་པ་འདི་ཡིན་པ་སྨོས་མེད་རེད། ལྷབ་ལྷུབ་ཏུ་འབར་བའི་མེ་ལྕེ་དེས་ང་བོད་མིར་དགའ་བའི་བགས་ཆག་ལྷག་འཕྲོ་དེ་ཡང་རྩ་བ་ནས་བཅོམ་སོང་།

༢༠༡༣ ལོའི་ཟླ་ ༣ པའི་ཚེས་ ༡༠ ཉིན། དགེ་རྒན་ཆེན་མོ་ཡང་ཅེན་ལེས་བོད་མིའི་རང་དབང་སྒེང་ལངས་དུས་དྲན་ཐེངས་ ༥༤ སྟེང་མཉམ་ཞུགས་དང་གཏན་བཤད་གནང་སྟེ་མང་གཙོ་དོན་གཉེར་པ་དང་མཉམ་དུ་རྒྱབ་སྐྱོར་བྱེད་འོས་པ་རེད་ཟེར། མཉམ་འབྲེལ་རྒྱལ་ཚོགས་མདུན་ཐང་དུ་བོད་རང་དབང་ (Free Tibet) གི་ཡི་གེ་མཐོང་དུས། བོད་རང་དབང་ཞེས་པ་འདི་གང་ཞིག་ནས་ཐོན་པ་རེད་དམ། ང་ལྷོང་ལྷོང་པོར་གྱུར།    

བཙན་སྐུལ་གྱི་བསམ་བློ་འདིའི་འོག་ཏུ། ངས་བོད་པ་ཞེས་པའི་འབྱུང་རྐྱེན་ལ་ལྟ་ཞིབ་ཀྱི་མགོ་བཙུགས་པ་དང་། ༡༩༥༩ ལོའི་ཟླ་ ༣ པར་བོད་དུ་དོན་དངོས་སུ་ཅི་ཞིག་བྱུང་ཡོད་པར་ལྟ་ཞིབ་བྱས། ༡༩༥༠ ལོ་ཀྲུང་གོས་ “བོད་ལྗོངས་ཞི་བདེ་བཅིང་གྲོལ” ཞེས་པར་ཁ་གཡར་ཏེ་ཇི་ལྟར་བོད་ནང་འཛུལ་བ་དང་བོད་ཁུལ་ཁྱོན་ཡོངས་བདག་བཟུང་བྱས་པ་གཟིགས་ཞིབ་བྱས་པ་ཡིན། དེ་ནས་ངས་གོང་ས་ཏཱ་ལའི་བླ་མས་གླེང་བཞིན་པའི་འཚེ་མེད་ཞི་བདེ་དང་དབུལ་མའི་ལམ་ལ་ལྟ་ཞིབ་ཀྱིས་ཤེས་རྟོགས་བྱུང་མགོ་བཙུགས།

རང་དབང་གི་འཇིག་རྟེན་འདིར། ངས་བོད་མི་རིགས་ཀྱི་ཇི་ལྟར་བཟོད་སྒོམ་གྱི་འགན་ལྗིད་མོ་འཁུར་ཡོད་པ་དང་། ཕ་སར་བཙན་ཤེད་ཀྱིས་ཁ་བྲལ་ཏེ་ཁྱིམ་གཞི་བོར་བརླག་གིས་ཕྱིའི་རྒྱལ་ཁབ་ཁག་ལ་འཁྱམ་ཉུལ་གྱི་ལོ་ངོ་ ༥༠ ལྷག་རིང་ཕྱིར་ལོག་ཐུབ་ཀྱི་མེད་པ་ཤེས་སོང་།

མ་རྩོམ་གྱི་འབྲེལ་ཐག  ( http://news.boxun.com/news/gb/party/2014/03/201403131637.shtml#.UyaYYl4whaQ)