རྒྱ་གཞུང་གིས་ནག་ཆུ་སོག་རྫོང་གི་སྐྱ་སེར་ལྔ་འཛིན་བཟུང་བྱས་ཏེ་ད་ཆར་གར་ཡོད་མ་ཤེས་པར་ལྷག་ཡོད་འདུག
ངག་དབང་ཐར་པ་ལཊ་ཀྱིས་འདི་གར་གནས་ཚུལ་མཁོ་སྤྲོད་བྱས་པ་ལྟར་ན། ཟླ་འདིའི་ཚེས་ ༦ ཉིན་རྒྱ་གཞུང་གིས་ནག་ཆུ་སོག་རྫོང་ཁྲི་རྡོ་ཡུལ་ཚོ་དྲིལ་མདའ་དགོན་པའི་གྲྭ་སྐལ་བཟང་ཚུལ་ཁྲིམས་དང་། ཐུབ་བསྟན་དཔལ་ལྡན། རྡོ་བ་གྲོང་ཚོའི་ནོར་འབུག་ཚང་གི་བུ་ནོར་བུ་དོན་གྲུབ། རྟ་མགྲིན་ཚང་གི་བུ་སྨོན་ལམ་རྒྱ་མཚོ། དགེ་ལི་ཚང་གི་ཚེ་རིང་ཐར་པ་བཅས་ལ་ཁ་པར་བརྒྱུད་བོད་དོན་དང་འབྲེལ་བ་ཡོད་པའི་པར་རིས་དང་འཕྲིན་ཐུང་གཏོང་རེས་བྱས་ཡོད་པའི་ཉེས་མིང་འོག་འཇུ་བཟུང་བྱས་ཏེ། ད་ཆར་ནང་མི་ཉེ་འབྲེལ་ཚོས་ཁོང་ཚོ་གང་དུ་བཀག་ཉར་བྱས་ཡོད་མེད་ཀྱི་གནས་ཚུལ་ཅི་ཡང་མ་ཤེས་པར་ལྷག་འདུག་ཡོད་པ་མ་ཟད། འདི་ལོའི་ཕྱི་ཟླ་ ༢ ཚེས་ ༣ ཉིན་སོག་རྫོང་ཁྲི་རྡོ་ཡུལ་ཚོ་གྲོང་ཚོ་གསུམ་པའི་ན་གཞོན་དྲུག་བཀག་ཉར་བྱས་ཡོད་པ་ལས་སྲིད་གསུམ་རྡོ་རྗེ་དང་ལྷག་པ། འཇམ་དབྱངས་རྒྱ་མཚོ། རྡོ་རྗེ་བཅས་བཞི་ཡུལ་ཚོའི་སྲིད་གཞུང་དུ་ཉིན་ལྟར་ཐོ་འགོད་བྱེད་དགོས་པའི་ཐག་གཅོད་འོག་ཀློད་གྲོལ་ཐོབ་ཡོད་ཀྱང་། ནོར་འཕེལ་ཚང་གི་བུ་ཨ་བཟང་། འུག་གུ་མའི་བུ་མར་སྒོང་གཉིས། ཟླ་ ༢ ཚེས་ ༤ ཉིན་རྡོ་བ་གཤར་ཚ་དགོན་པར་འཛིན་བཟུང་བྱས་པའི་གྲྭ་བ་བཞི་བཅས་ད་ཆར་ཡང་གར་ཡོད་མ་ཤེས་པར་ལྷག་ཡོད་འདུག
གནས་ཚུལ་མཁོ་སྤྲོད་པས་བརྗོད་པ་ལྟར་ན། རྒྱ་ནག་གཞུང་གིས་དྲིལ་མདའ་དགོན་པའི་གྲྭ་སྐལ་བཟང་ཚུལ་ཁྲིམས་ལགས། ༢༠༡༢ ཟླ་ ༥ ནང་འཛིན་བཟུང་གིས་ལོ་ ༡ རིང་དུས་བཀ་བཙོན་འཇུག་གི་ཁྲིམས་ཐག་བཅད་དེ་ལྷ་སའི་སྟོད་ལུང་བཙོན་ཁང་དུ་བཙོན་འཇུག་ཀློད་གྲོལ་བྱས་རྗེས་ཡང་བསྐྱར་འཇུ་བཟུང་བྱས་པ་ཞིག་ཡིན་འདུག་ལ། ཉེ་ལམ་སོག་རྫོང་ཁྲི་རྡོ་ཡུལ་ཚོའི་ལྕགས་ཟམ་ཟམ་ཁའི་རྡོ་ཕ་བོང་ཆེན་པོའི་ཐོག་ལྕགས་རྩི་དམར་པོས་ “ བོད་རང་བཙན་ཡིན་” ཞེས་པའི་ཡིག་འབྲུ་ཆེན་པོ་བྲིས་ཡོད་པ་དང་། བོད་མིའི་རང་དབང་སྒེར་ལངས་གསུམ་བཅུའི་དུས་དྲན་བཅས་ལ་བརྟེན་ནས་ས་གནས་སུ་དམག་མིའི་རླངས་འཁོར་ ༢༠ ཙམ་དང་ཉེན་རྟོག་པ་ ༨༠ ལྷག་ཡོང་སྟེ་ས་གནས་མི་མང་གི་འགྲོ་བསྐྱོད་སོགས་ལ་དམ་དྲག་ནན་མོ་བྱེད་ཀྱི་ཡོད་འདུག
གསར་འགོད་པ། དོན་གོ
