བོད་མི་ཞི་རྒོལ་བ་ཞིག་གི་བྲོས་བྱོལ་གྱི་ལམ་བུ་ཀྱག་ཀྱོག

ས་བྱི་ཞི་རྒོལ་ཆེན་མོར་མཉམ་ཞུགས་བྱེད་མཁན་ཞི་རྒོལ་བ་ཞིག་ལོ་ངོ་ལྔ་ལྷག་རིང་བྲོས་བྱོལ་བྱས་མཐར། ཉེ་ལམ་རྒྱ་གར་ནང་སྐྱབས་བཅོལ་དུ་འབྱོར་ཏེ་ད་ཆར་དབུས་སྣེ་ལེན་ཁང་དུ་བཞུགས་ཡོད་པར། གསར་འགོད་པས་ཁོང་གི་འདས་དོན་སྐོར་ལ་གླེང་མོལ་བྱས་ཡོད།

མིང་དང་ཕ་ཡུལ་གསལ་བོར་བརྗོད་འདོད་མེད་པའི་ཞི་རྒོལ་བ་ཁོང་གིས་ངོ་སྤྲོད་གནང་བ་ལྟར་ན། ཁོ་བོ་ཕྱི་ལོ་ ༢༠༠༨ ཟླ་ ༣ ཚེས་ ༡༦ ཉིན་རྨ་ཆུ་རྫོང་དངུལ་ར་ཡུལ་ཚོའི་ཞི་རྒོལ་ནང་མཉམ་ཞུགས་བྱས་ཡོད་པ་དང་། ཐོག་མར་དངུལ་རྭ་ཡུལ་ཚོའི་སྐྱ་སེར་མི་མང་གིས་ཞི་བའི་སྐད་འབོད་སོགས་ཀྱི་ངོ་རྒོལ་བྱས་ཡོད་ཀྱང་། རིམ་གྱིས་མི་ཇེ་མང་དུ་ཕྱིན་པ་དང་བསྟུན་ཏེ་མི་མང་གིས་སེམས་ཚོར་མ་གནོན་པར། ས་གནས་མངགས་གཏོང་ཁང་གི་ཁང་པ་ཞིག་མེར་བསྲེགས་དང་། ཉེན་རྟོག་པའི་རླངས་འཁོར་གཏོར་བཅོམ་བཏང་ཡོད་པ་མ་ཟད། རྒྱ་ནག་གི་དར་དམར་མེར་བསྲེགས་བཏང་སྟེ་བོད་ཀྱི་རྒྱལ་དར་བསྒྲེངས་འཛུགས་བྱས་ཏེ་ཆུ་ཚོད་ ༣ ལྷག་ལ་སྐད་འབོད་བྱས་ཡོད་འདུག དེའི་ཕྱི་ཉིན་ནས་བཟུང་རྒྱ་གཞུང་གི་ཉེན་རྟོག་པས་དངུལ་རྭ་ཡུལ་ཚོའི་སེར་སྐྱ་མི་མང་བརྒྱ་ལྷག་འཛིན་བཟུང་བཙན་ཁྲིད་ཀྱིས་ཟླ་ལྔ་དྲུག་རིང་བཀག་ཉར་བྱས་ཡོད་པ་དང་། སྐབས་དེར་བོད་མི་མང་པོ་ཞིག་གིས་རྒྱ་གཞུང་ལ་མགོ་འདོགས་མ་བྱས་པར་བྲོས་བྱོལ་བྱས་ཡོད་པ་དང་། ཁོ་རང་དེའི་ཁྲོད་ཀྱི་གཅིག་ཡིན་འདུག དཀའ་སྡུག་དང་འཇིགས་སྐྲག་གི་ཁྲོད་ནས་ལོ་ངོ་ ༦ ཙམ་རིང་བྲོས་བྱོལ་བྱས་མཐར། ཉེ་ཆར་ལམ་ཁྲིད་པ་ཅིག་ལ་རྒྱ་སྒོར་ལྔ་ཁྲི་ལྷག་སྤྲད་དེ་འགྲམ་འགག་སྒོ་བརྒྱུད་ནས་རྒྱ་གར་ནང་སྐྱབས་བཅོལ་དུ་འབྱོར་བ་ཡིན་འདུག

ཁོང་གིས་དངུལ་རྭའི་ཞི་རྒོལ་སྐོར་བརྗོད་དོན། “ ༢༠༠༨ ལོའི་ཟླ་ ༣ ཚེས་ ༡༦ ཉིན་ང་དངུལ་རྭ་ཡུལ་ཚོར་ཡོང་ཡོད། ཉིན་དེའི་སྔ་དྲོར་རྨ་ཆུ་རྫོང་ཐོག་ནས་བོད་མི་མང་པོས་རྒྱ་ནག་ལ་ངོ་རྒོལ་བྱས་པའི་གནས་ཚུལ་གོ་སོང་། ཕྱི་དྲོའི་ཆུ་ཚོད་ ༦ ཙམ་ལ་དངུལ་རྭ་དགོན་པའི་གྲྭ་བ་ཉིས་བརྒྱ་ལྷག་གིས་སྣེ་ཁྲིད་དེ་ངོ་རྒོལ་བྱས་ཏེ། ཡུལ་ཚོའི་སློབ་ཆུང་གི་རྒྱ་དར་མར་ཕབ་ནས་མེར་བསྲེགས་བཏང་བ་མ་ཟད། ཚབ་ཏུ་བོད་དར་ཞིག་བསྒྲེངས་འཛུགས་བྱས་པ་དང་། དེ་ནས་ས་གནས་ཉེན་རྟོག་ཁང་གི་རླངས་འཁོར་བཅག ཁང་པ་དྲུག་བདུན་ཞིག་ཡོད་པ་ལས་ཡིག་ཆ་ཉར་ཚགས་བྱེད་སའི་ཁང་པ་ཞིག་མེར་བསྲེགས་བཏང་བ་རེད། སྐབས་དེར་ཉེན་རྟོག་པ་ཚོ་བྲོས་ཏེ་ཤུལ་དུ་གཅིག་མ་གཏོགས་ལྷག་མི་འདུག མི་མང་གིས་ཉེན་རྟོག་པ་གཅིག་པུ་དེར་ཉེས་རྡུང་སོགས་བཏང་མ་སོང་། ཕྱི་དྲོའི་ཆུ་ཚོད་ ༦ ཙམ་ནས་དགོང་མོའི་ཆུ་ཚོད་ ༩ ཡོལ་ཙམ་བར། ༧རྒྱལ་བ་རིན་པོ་ཆེ་ཕྱིར་བོད་ནང་མྱུར་དུ་ཕེབས་དགོས། པཎ་ཆེན་རིན་པོ་ཆེ་ཀློད་གྲོལ་གཏོང་དགོས། བོད་ལ་རང་དབང་དགོས་སོགས་ཀྱི་སྐད་འབོད་བྱས་ཏེ། ཉིན་དེར་ང་ཚོ་ཧ་ཅང་སྐྱིད་པོ་བྱུང་སོང་། དེ་ལྟར་མ་བྱེད་ཟེར་མཁན་ཡང་བྱུང་མ་སོང་། ” ཅེས་བརྗོད་བྱུང་།

ཁོང་གིས་མུ་མཐུད་དུ། ཕྱི་ཉིན་ཉེན་རྟོག་པ་མང་པོ་ཡུལ་ཚོའི་ནང་དུ་འབྱོར་ཏེ་ཡུལ་མིའི་འགྲོ་འོང་ལ་བཀག་སྡོམ་བྱས་པ་མ་ཟད། ཡུལ་ཚོའི་མགོ་ཁྲིད་སོགས་ལ་ངོ་རྒོལ་བྱེད་མཁན་ཚོར་མགོ་འདོགས་ཞུ་རུ་འཇུག་དགོས་པ་དང་། གལ་སྲིད་མགོ་མ་བཏགས་ན་ངོ་རྒོལ་བ་ཚོར་པར་བརྒྱབ་ནས་གསལ་བོ་ཤེས་ཡོད་སྟབས། རེ་རེ་བཞིན་འཛིན་བཟུང་བྱེད་རྒྱུ་ཡིན་ལུགས་བརྗོད་པར་བརྟེན། ཕྱིས་སུ་དངུལ་རྭ་དགོན་པའི་གྲྭ་བ་ ༣༠ དང་མི་སྐྱ་ ༧༠ ལྷག་གིས་མགོ་བཏགས་པ་དང་། ཚང་མ་རྨ་ཆུ་རྫོང་ཐོག་ཏུ་ཁྲིད་དེ་ཟླ་ལྔ་དྲུག་ཙམ་ལ་བཀག་ཉར་བྱས་པ་རེད། ཕྱིས་སུ་རིམ་པ་གཉིས་སུ་དབྱེ་སྟེ་ཀློད་གྲོལ་བཏང་ཡོད་ཀྱང་། ཁ་ཤས་ལ་རྒྱ་སྒོར་ཁྲི་ ༥ ནས་ ༧ ཙམ་གྱི་ཉེས་ཆད་བཅད་ཡོད་ལུགས་ཀྱང་གོ་སོང་། ང་ཚོ་ཁ་ཤས་ཤིག་གིས་མགོ་མ་བཏགས་པར་བྲོས་བྱས་པ་ཡིན། ང་རང་ཟླ་ ༢ ལྷག་ལ་རྫ་ཁ་རི་ཁ་རྐྱང་རྐྱང་ནས་བསྡད་པ་ཡིན། དེའི་རྗེས་ནས་ཟླ་ ༣ ཙམ་རིང་མགོ་ལོག་ཏུ་ཡོད་པའི་སྤུན་མཆེད་ཅིག་གི་སར་ཕྱིན་ཡང་། མི་ཞིག་གིས་རྒྱ་གཞུང་ལ་གསང་བརྡ་སྤྲད་དེ་བྲོས་བྱོལ་བྱེད་དགོས་བྱུང་སོང་། ང་སོང་བའི་ཕྱི་ཉིན་དེར་མགོ་ལོག་ཉེན་རྟོག་པ་བསླེབས་ཏེ་ཁྱེད་ཚང་གི་མགྲོན་པོ་གང་དུ་ཡོད་ཅེས་འདྲི་རྩད་བྱས་འདུག དེ་ལྟར་བྱས་ནས་ལོ་ངོ་ ༦ མ་ཟིན་ཙམ་གྱི་རིང་ཉིན་མཚན་མེད་པར་དོགས་ཟོན་དང་འཇིགས་སྐྲག་འོག་བསྡད་པ་ཡིན། ངའི་དོན་ལ་ལུས་ཚེགས་སེམས་ཚེཊ་ཀྱིས་ངའི་ཁྱིམ་མི་གཉེན་འབྲེལ་ཚོས་ཀྱང་དཀའ་ལས་ཆེན་པོ་མྱངས་སོང་།”ཞེས་བརྗོད་སོང་།

རྒྱ་གར་ལུང་པར་འབྱོར་ཏེ་ཚོར་སྣང་ག་འདྲ་འདུག་དྲིས་པར། “བལ་ཡུལ་སྣེ་ལེན་ཁང་དུ་བསླེབས་པ་ནས་བཟུང་ཧ་ཅང་སྐྱིད་པོ་འདུག ལུས་སེམས་གཉིས་ཀར་ངལ་གསོ་ཐེབས་སོང་། འདས་བའི་ལོ་ངོ་ ༦ ཙམ་དང་། ལྷག་པར་དུ་རྒྱ་གར་ལ་བྲོས་བྱོལ་དུ་ཡོང་བའི་ལམ་བར་ནས་མཚན་མོ་གཉིད་ཀྱང་ཁུག་གི་མི་འདུག ༧རྒྱལ་བ་རིན་པོ་ཆེ་མཇལ་སྐབས། སེམས་ལ་བོད་ཡུལ་སྤྱི་ཡོངས་ནས་རང་ལུས་མེར་བསྲེགས་བྱས་པའི་བོད་མི་རྣམས་དྲན་ཡོང་དུས་ཁོ་ཚོ་དངོས་གནས་སྙིང་རྗེ་བསམ་སྟེ། ང་རང་ལ་རིག་གནས་གང་ཡང་མེད་ཀྱང་ཁོང་ཚོ་ཚང་མའི་ཆེད་དུ་སྐྱབས་འཇུག་སྨོན་ལམ་བརྒྱབ་པ་ཡིན། ༧རྒྱལ་བ་རིན་པོའི་ཞལ་མཇལ་གསུང་ཐོས་དུས་སེམས་པ་ཧ་ཅང་སྐྱིད་པོ་བྱུང” ཞེས་བརྗོད་བྱུང་།

ཁོས་མུ་མཐུད་དུ་མ་འོངས་པའི་སྐོར་ལ། “ ང་རང་གིས་མ་འོངས་པར་མི་ཚེ་གང་འདྲ་སྐྱེལ་མིན་ལ་སེམས་ཁྲལ་བྱེད་ཀྱི་མེད། གང་ལྟར་ཅིག་འགྲིག་འགྲོ་བ་རེད། ད་ལྟ་ང་ལོ་ ༣༢ རེད། གཞི་ནས་སློབ་གྲྭར་སོང་སྟེ་སློབ་སྦྱོང་བྱེད་ཟེར་ན་ཁག་པོ་ཡིན་ཡང་། སློབ་གྲྭའི་ནང་སོང་ནས་གང་ཐུབ་ཀྱིས་སློབ་སྦྱོང་བྱས་ནས་འདུག་རྒྱུ་ཡིན། ཕ་ཡུལ་ནས་གཞན་གྱི་བཙན་དབང་འོག་འདུག་པ་ལས་གཞན་ཡུལ་དུ་ཡོང་སྟེ་འཇིགས་སྐྲག་མེད་པར་གང་ཐུབ་ཀྱིས་སློབ་སྦྱོང་རེ་བྱས་ནས་བསྡད་ན་ཧ་ཅང་སྐྱིད་པོ་རེད” ཅེས་བརྗོད་བྱུང་།

མཇུག་ཏུ་ཁོང་གིས། ས་བྱི་ལོར་རྨ་ཆུ་རྫོང་སེར་སྐྱ་མི་མང་གིས་ངོ་རྒོལ་བྱེད་སྐབས་རྨ་ཆུ་རྫོང་གེ་སར་ནང་མ་གླུ་གར་ཁང་གི་རྔ་པ་ནས་ཡིན་པའི་གསར་བུ་གཉིས་ལ་ཉེན་རྟོག་པས་གཅར་རྡུང་ཚད་མེད་བཏང་སྟེ་འདས་གྲོངས་སུ་གྱུར་བའི་གནས་ཚུལ་ཡོངས་ཁྱབ་ཡིན་སྐོར་དང་། ས་བྱི་ཞི་རྒོལ་བྱུང་སྐབས་རྨ་ཆུ་རྫོང་ཁྲོམ་གཞུང་ནས་ཉེན་རྟོག་པས་དོན་མེད་དུ་ བོད་རིགས་གསར་བུ་ཚོར་གཅར་རྡུང་དང་འཛིན་བཟུང་བྱས་པ་སོགས་མང་པོ་ཡོད་ཀྱང་། དེང་སང་བཙོན་པ་མང་པོ་ཞིག་ཐ་ན་རང་གི་ཕ་མ་སྤུན་མཆེད་ཀྱིས་ཀྱང་གར་ཡོད་ཅི་བྱུང་མ་ཤེས་པ་ཆགས་ཡོད་སྐོར་སོགས་ངོ་སྤྲོད་གནང་བྱུང་།

གསར་འགོད་པ། པདྨ་མཚོ།

༼བོད་ཀྱི་དུས་བབ་ཚགས་པར་ལས་འདིར་བཀོད༽