༧གོང་ས་མཆོག་གིས་སིམ་ལར་གསར་འགོད་པའི་བཅར་འདྲི་ཞིག་གི་སྐབས། བོད་ནང་འབྱུང་བཞིན་པའི་རང་ལུས་མེར་བསྲེགས་ཀྱི་གནད་དོན་དེ་དོན་རྐྱེན་ཁག་ཅིག་ལ་ཐུག་ཡོད་སྟབས། རྒྱ་ནག་གཞུང་གི་འབྲེལ་ཡོད་ལས་བྱེད་ཚོས་ཡ་ང་བའི་གནད་དོན་གྱི་བྱུང་རྐྱེན་གཙོ་བོ་གང་ལ་ཐུག་ཡོད་མེད་ཐོག་ཞིབ་དཔྱད་ནན་ཏན་གནང་རྒྱུ་ཧ་ཅང་གལ་ཆེན་པོ་ཆགས་ཡོད་ཅེས་གསུངས་འདུག
ཉིན་འདི་གར་༧གོང་ས་མཆོག་གིས་ཧི་མ་ཅལ་མངའ་སྡེའི་རྒྱལ་ས་སིམ་ལར་ཆོས་ཕྱོཊ་ཀྱི་མཛད་འཕྲིན་ཁག་སྐྱོང་བཞིན་པ་ལྟར། ཁ་སང་ཚེས་ ༡༩ ཉིན་གྱི་སྔ་དྲོ་༸གོང་ས་མཆོག་ཧི་མ་ཅལ་གཙུག་ལག་སློབ་གྲྭའི་བསླབ་པ་མཐར་སོན་གྱི་མཛད་སྒོ་ཐེངས་ ༢༡ པའི་ཐོག་ཆིབས་བསྒྱུར་གནང་སྟེ། མངའ་སྡེའི་སྲིད་སྐྱོང་དང་གཙུག་ལག་སློབ་གྲྭའི་རིཊ་བདག་གཅིག་ལྕོག་ལྕམ་སྐུ་ཨུར་མི་ལ་སིང་གྷ་མཆོག་གིས་ (Governor Urmila Singh) ༧གོང་ས་མཆོག་ལ་ཆེ་བསྟོད་ཀྱི་དབུ་ཞྭ་དང་གོས་གཟན། མཁས་དབང་གི་ཕྱག་འཁྱེར་ (Doctor of Letters (D.Litt) འབུལ་ལམ་ཞུས་ཡོད་པ་མ་ཟད། ༧གོང་ས་མཆོག་གིས་ ༢༠༡༣ ལོའི་གཙུག་ལག་སློབ་གྲྭའི་ཚན་རིག་དང་དབྱིན་ཡིག ལེགས་སྦྱར། སྒྱུ་རྩལ་བཅས་ཀྱི་སློབ་ཚན་ཁག་གི་ཐོག་གཟེངས་སུ་ཐོན་པའི་མ་ ༤༠ ཙམ་ལ་གསེར་གྱི་རྟགས་མ་གསོལ་རས་དང་ལམ་སྟོན་བཀའ་སློབ་གནང་ཡོད་འདུག
སྐབས་དེར་༧གོང་ས་མཆོག་གིས། རྒྱ་གར་ནི་རིག་གཞུང་ཕྱུག་ཅིང་གནའ་རབས་ཀྱི་ལོ་རྒྱུས་ལྡན་པའི་རྒྱལ་ཁབ་ཅིག་ཡིན་སྟབས། ང་ཚོས་རྒྱ་གར་གྱི་སྲོལ་རྒྱུན་ནས་དར་བའི་རིག་གཞུང་ལ་སློབ་སྦྱོང་བྱས་ཏེ་ཉིན་རེའི་འཚོ་བའི་ནང་བེད་སྤྱོད་བྱེད་དགོས་པ་དང་། ལྷག་པར་དུ་གཞོན་སྐྱེས་ཚོའི་དེང་དུས་ཤེས་ཡོན་དང་མཉམ་དུ་གནའ་རབས་ཀྱི་རིག་གཞུང་ལ་སློག་གཉེར་བྱེད་དགོས་ཚུལ་གསུངས་སོང་བ་མ་ཟད། ཁོང་གིས་རྒྱ་གར་གྱི་གནའ་རབས་རིག་གཞུང་ལ་སློབ་གཉེར་དང་ཉིན་རེའི་འཚོ་བའི་ནང་ཉམས་ལེན་བྱས་ཏེ་མི་ཚེའི་ནང་དཀའ་ངལ་འཕྲད་སྐབས་ཕན་ཐོགས་ཆེན་པོ་ཡོང་གི་འདུག་པ་དང་། ཕྱོགས་མཚུངས་རྒྱ་གར་མང་གཙོ་ཚད་མཐོ་བོ་ཡིན་པའི་རྒྱལ་ཁབ་ཅིག་ཡིན་སྟབས། འཛམ་གླིང་ཁྱོན་ཡོངས་ལ་ཞི་བདེ་དང་ཡར་རྒྱས། བརྟན་ལྷིང་གི་སྤྱི་ཚོགས་བསྐྲུན་རྒྱུའི་མིག་དཔེ་འཇོག་ཐུབ་པ་བྱུང་ཡོད་པའི་བཀའ་སློབ་གནང་ཡོད་འདུག
ཚེས་ ༡༨ ཉིན་༸གོང་མཆོག་སིམ་ལ་ཇོ་ནང་མ་དགོན་དུ་ཆིབས་བསྒྱུར་གནང་སྐབས་གསར་འགོད་པ་ཞིག་གིས་བོད་ནང་གི་རང་ལུས་མེར་བསྲེཊ་ཐད་བཀའ་འདྲི་ཞུས་པའི་ལན་དུ། “ ངོས་རང་ ༢༠༠༡ ལོ་ནས་ཕྱེད་རྒན་ཡོལ་གྱི་གནས་སྟངས་ཐོག་བསྡད་པ་ཡིན། ༢༠༡༡ ལོར་ངོས་རང་གི་ཆབ་སྲིད་ཀྱི་འགན་དབང་ཡོངས་རྫོགས་མང་གཙོའི་ལམ་ནས་འོས་བསྡུ་བྱས་པའི་མགོ་ཁྲིད་ལ་རྩིས་སྤྲོད་བྱས་ཟིན་པ་ཡིན། སྤྱིར་བཏང་རང་ལུས་མེར་བསྲེགས་ཀྱི་གནད་དོན་ནི་ཆབ་སྲིད་ཀྱི་གནད་དོན་ཞིག་ཆགས་ཡོད། དེར་བརྟེན། གནད་དོན་དེའི་ཐོག་ངོས་རང་ལ་དམིགས་བསལ་གང་ཡང་བརྗོད་རྒྱུ་མེད། འོན་ཀྱང་། བོད་ནང་འབྱུང་བཞིན་པའི་རང་ལུས་མེར་བསྲེགས་ཀྱི་གནད་དོན་དེ་དོན་རྐྱེན་ཁག་ཅིག་ལ་ཐུག་ཡོད་སྟབས། འབྲེལ་ཡོད་གནད་ཡོད་མི་སྣ་དང་ལྷག་པར་རྒྱ་ནག་གཞུང་གི་འབྲེལ་ཡོད་ལས་བྱེད་ཚོས་ཡ་ང་བའི་གནད་དོན་གྱི་བྱུང་རྐྱེན་གཙོ་བོ་གང་ལ་ཐུག་ཡོད་མེད་ཐོག་ཞིབ་དཔྱད་ནན་ཏན་གནང་རྒྱུ་ཧ་ཅང་གལ་ཆེན་པོ་ཆགས་ཡོད། ” ཅེས་བཀའ་ལན་གནང་འདུག
ཉིན་དེར་གསར་འགོད་པར་ཐུག་འཕྲད་གནང་རྗེས་ཇོ་ནང་མ་དགོན་རྟག་བརྟན་ཕུན་ཚོགས་གླིང་དུ་ཆིབས་བསྒྱུར་གྱིས་གཟིཊ་ཞིབ་གནང་ཡོད་པ་མ་ཟད། ༧གོང་ས་མཆོག་གིས་རྩ་བའི་ཇོ་ནང་གི་ཆོས་བརྒྱུད་འདི་བོད་གངས་ཅན་ལྗོངས་ཀྱི་ཆོས་བརྒྱུད་ཅིག་དང་ཆོས་བརྒྱུད་གལ་ཆེན་ཞིག་ཆགས་ཡོད་ཚུལ་དང་། དཔལ་དུས་ཀྱི་འཁོར་ལོ་སྦྱོར་དྲུག་གི་སྐོར་ནས་ཇོ་ནང་ཐུན་མོང་མ་ཡིན་པ་ཞིག་ཆགས་ཡོད་པ་མ་ཟད། སྦྱོར་དྲུག་གི་ཉམས་ལེན་མཐོང་བ་གྱུར་བར་མ་ཉམས་པར་ཡོད་པ་དེ་ཕལ་ཆེར་ཇོ་ནང་ཁོ་ནར་ལྟ་བུ་དང་། བསྟན་པ་སྤྱི་དང་ལྷག་པར་དཔལ་དུས་ཀྱི་འཁོར་ལོའི་བསྟན་པ་འཛིན་སྐྱོང་སྤེལ་གསུམ་བྱེད་མཁན་གྱི་རྟེན་གནས་ཤིག་ཆགས་ཡོད་སྟབས། གནད་འགག་ཧ་ཅང་ཆེན་པོ་ཆགས་ཡོད་སྐོར་གསུངས་ཏེ། ༧གོང་ས་མཆོག་རང་ཉིད་ལ་ཆ་བཞག་ན་ཇོ་ནང་གི་ཆོ་ག་ཟུར་དུ་མེད་ཀྱང་། གླིང་རིན་པོ་ཆེ་སྐུ་མདུན་ནས་ཇོ་ནང་ཁྲིད་རྒྱུན་ཞུས་ཡོད་པ་དང་། གླིང་རིན་པོ་ཆེས་སྐྱབས་རྗེ་ཕ་བོང་ཁ་རིན་པོ་ཆེའི་སྐུ་མདུན་ནས་གསན་ཡོད་སྟབས། ས་དགེ་བཀའ་རྙིང་གི་སྐྱེས་ཆེན་དམ་པ་དེ་དག་གིས་མཛད་པ་རྣམས་ལ་རྗེས་སུ་ཡི་རང་དང་། མཁས་པ་སོ་སོས་མཛད་པའི་གཞུང་མཇལ་གྱི་ཡོད་སྐོར་གསུངས་བྱུང་བ་མ་ཟད། ཇོ་ནང་མ་དགོན་གྱིས་རྗེ་རིན་པོ་ཆེའི་སེར་ཕྲེང་དང་རྗེ་རིན་པོ་ཆེས་རྩ་འཇུག་གི་རྣམ་བཤད། རྣམ་འདྲེན་ལེའུ་གཉིས་པ་བཅས་ལ་བལྟ་ཐུབ་ན་ཡག་པོ་ཡོད་སྐོར་གྱི་བཀའ་སློབ་གནང་འདུག
ཉིན་རྒྱབ་༧གོང་ས་མཆོག་སིམ་ལ་གཏན་སློབ་ཏུ་ཆིབས་སྒྱུར་གནང་སྟེ། སིམ་ལའི་ཧིན་བོད་མཛའ་འབྲེལ་ཚོགས་པའི་ཚོགས་གཙོ་དང་། ཧི་མ་ཅལ་གཙུག་ལག་སློབ་གྲྭ་ཆེན་མོའི་ནང་ཆོས་སྡེ་ཚན་གྱི་སློབ་དཔོན་ཝི་ཨེས་ནེ་ཀི་ལགས་ཀྱིས་བརྩམས་པའི་༼ཁུ་ནུ་དགེ་བཤེས་དཔལ་ལྡན་སེང་གེའི་མཛད་རྣམ༽དབུ་འབྱེད། དགེ་ལས་དང་སློབ་ཕྲུག་གཙོས་པའི་དད་ལྡན་པ་ ༡༠༠༠ ལྷག་ལ་སྐྱབས་འགྲོ་སེམས་སྐྱེད་ཀྱི་ཆོས་འབྲེལ་བཅས་གནང་རྗེས། སྐྱབས་རྗེ་སྟག་ལུང་རྩེ་སྤྲུལ་རིན་པོ་ཆེ་མཆོག་གིས་དབུས་དགོན་པའི་ལས་གནས་དང་དགེ་འདུན་པ་ཡོངས་ཀྱིས་ཕེབས་བསུའི་ཁྲོད་ཐུབ་བསྟན་རྡོ་རྗེ་བྲག་ཨེ་ཝམ་ལྩོག་སྒར་ཆོས་འཁོར་རྣམ་རྒྱལ་གླིང་གི་འདུ་ཁང་དུ་ཆིབས་བསྒྱུར་དབུ་བཞུགས་ཐོག སྟག་ལུང་རྩེ་སྦྲུལ་རིན་པོ་ཆེ་མཆོག་གིས་མཎྜལ་རྟེན་གསུམ་འདེགས་འབུལ་གནང་ཡོད་འདུག
ཉིན་དེར་རྡོ་རྗེ་བྲག་ཨེ་ཝམ་ལྕོག་སྒར་ཆོས་འཁོར་གླིང་དགོན་པར་བཀའ་སློབ་གནང་སྐབས་གོང་ས་མཆོག་གིས། སྨིན་གྲོལ་གླིང་དང་རྡོ་རྗེ་བྲག་གཉིས་༸གོང་ས་ལྔ་བའི་སྐབས་ནས་ཐུན་མོང་མ་ཡིན་པ་ཆགས་ཡོད། གཏེར་བདག་གླིང་པ་དང་། རིག་འཛིན་དཔལ་སྦྱིན་གཉིས་གསང་བ་རྒྱ་ཅན་གྱི་ཆོས་བདག་ལྟ་བུ་ཆགས་ཡོད། ཐུན་མོང་མིན་པའི་འབྲེལ་བ་ཡོད་པ་ཞིག་རེད། ད་ཆ་ང་ཚོ་བྱེས་ལ་འཁོད་ནས་སྨིན་གྲོལ་གླིང་སྡེ་ར་ལྡུན་དང་། རྡོ་རྗེ་བྲག་འདིར་བཙུགས་ཡོད། གང་ལྟར་ང་ཚོ་གཞིས་བྱེས་མཉམ་འཛོམས་བྱུང་བའི་མཚམས་ལ་ས་ཆ་འདིར་ཆ་བཞག་ནའང་སྟོང་པར་འཇོག་རྒྱུ་མ་རེད། ས་ཆ་འདིར་རིན་པོ་ཆེས་ཞལ་སློབ་བྱས་ཏེ་གར་ཞྭ་དང་ཁུ་ནུ། སྤི་ཏི་བཅས་ཧི་མ་ལ་ཡི་རི་རྒྱུད་ནས་བསྟན་པའི་གཞི་མ་ལྟ་བུ་བཙུགས་ཡོད། ངོས་ཀྱིས་དུས་རྒྱུན་དུ་སྟོན་པའི་དམ་ཆོས་རྣམ་གཉིས་དེ། ལུང་དང་རྟོགས་པའི་བདག་ཉིད་དོ། དེ་འཛིན་བྱེད་དང་སྨྲ་བྱེད་པ། སྒྲུབ་པར་བྱེད་པ་ཁོ་ན་ཡིན། ཞེས་ལུང་རྟོགས་ཀྱི་བསྟན་པ་གཉིས་འཛིན་སྐྱོང་སྤེལ་གསུམ་བྱ་རྒྱུའི་ཐོག་ལ་འཆད་ཉན་དང་སྒོམ་སྒྲུབ་བྱེད་རྒྱུར་བཤད་པ་དང་བསྒྲུབ་པ་ཁོ་ན་ཡིན་ཞེས་གསུངས་ཡོད། ཁོ་ནའི་གཞན་ལྡན་རྣམ་བཅད་བསྟན་པ་རེད། ཅེས་བརྗོད་ཀྱི་ཡོད།
གཙོ་བོ་དགེ་འདུན་པ་ཚོས་ཕྱག་དཔེ་གཟིགས་རྒྱུ་ཧ་ཅང་གལ་ཆེན་པོ་རེད། ཁ་སང་ངོས་ཀྱིས་རྣམ་གྲོལ་གླིང་དུ་གྱང་ཁང་རིན་པོ་ཆེས་གཙོས་འབྲེལ་ཡོད་འགའ་ཤས་དང་སྐད་ཆ་བྱུང་། མཁན་ཆེན་ཞི་འཚོའི་དབུ་མ་རྒྱན་ནམ་རྒྱུན་ཆེད་གཉེར་མཛད་ཀྱི་ཡོད། ཚད་ཆེན་གྱི་ཚད་མའི་དེ་ཁོ་ན་ཉིད་བསྡུས་པ་ལྟ་མཁན་ཞེ་དྲག་ཉུང་ཉུང་རེད། ས་སྐྱའི་ནང་ཕལ་ཆེར་དཀོན་པོ་རེད། གདན་ས་ཚོའི་ནང་དུའང་རིག་པ་ཡག་པ་འགའ་ཤས་མ་གཏོགས་གཞན་ལྟ་མཁན་ཉུང་ཉུང་རེད། དེར་བརྟེན། པད་ནོར་རིན་པོ་ཆེའི་རྣམ་གྲོལ་གླིང་དགོན་པར་ཞི་བ་འཚོ་ཡབ་སྲས་ཀྱི་ཚད་ཆེན་རྩ་འགྲེལ་ལྟ་ཐུབ་ན་ཡག་པོ་ཡོད། ཅེས་བརྗོད་རྒྱུ་བྱུང་། ད་ལྟ་ལོ་དགུའི་རིང་སློབ་གཉེར་བྱེད་པ་དེའི་ཐོག་ལོ་གསུམ་ཁ་སྣོན་བྱས་ནས་ལོ་ བཅུ་གཉིས་བཟོས་ན་ཡག་པོ་ཡོད་ཅེས་ཞུ་རྒྱུ་བྱུང་། ད་ལན་ཡང་བསྐྱར་གྱང་ཁང་རིན་པོ་ཆེ་ཐུག་སྐབས་གཏན་འབེབས་བྱ་རྒྱུ་ཡིན། ཞེས་གསུངས་བྱུང་།
གང་ལྟར་གཞུང་འདི་ཧ་ཅང་གལ་ཆེན་པོ་རེད། དཔེར་ན། རྣམ་རྒྱལ་གྲྭ་ཚང་ལ་ཆ་བཞག་ནའང་འདྲ། རྒྱུད་གྲྭ་སྟོད་སྨད་དགེ་བཤེས་ཚོ་གནས་ཚུལ་ཐ་དད་རེད་མ་གཏོགས་གཞན་སྐྱེད་རིམ་ཚོ་དེ་སྔ་དཔེ་ཆ་ལྟ་གི་མེད། གཞུང་ཆེན་ལྟ་གི་མེད། ཕྱིས་སུ་ངོས་ཀྱིས་གཞུང་ཆེན་ལྟ་དགོས་པ་དང་རིགས་ལམ་སློབ་དགོས་བརྗོད་པ་ཡིན། དེ་སྔ་ལོ་གཅིག་གཅིག་རེད། ད་ཕལ་ཆེར་ལོ་བཞི་བཅུ་ཙམ་གོང་ལ་རེད། བཙུན་མའི་དགོན་པ་ཚོས་ད་ཆ་དཔེ་ཆ་ལྟ་བ་མ་ཟད། རྟགས་གསལ་བཏང་ནས་ཡག་ཐག་ཆོད་ཡོད། ལོ་གཉིས་གོང་དཔེ་ཆ་ལོ་བཅུ་བདུན་བལྟས་རྗེས་དགེ་བཤེས་མ་འཇོག་རྒྱུའི་ལམ་སྲོལ་ཞིག་གཏན་འབེབས་བྱས་ཡོད། རྒྱ་གར་ནང་དུ་ང་ཚོས་འདི་འདྲ་ཞིག་བྱེད་ཐུབ་པ་མ་ཟད། བོད་ནང་དུའང་དཀར་མཛེས་ཁུལ་དུ་བཙུན་མའི་དགོན་པ་འགའ་ཤས་ནས་དཔེ་ཆ་དང་མཚན་ཉིད། དེ་བཞིན་གཞུང་ཆེན་བལྟ་རྒྱུ་བྱེད་བཞིན་འདུག རིས་མེད་ཀྱི་དགོན་པ་མང་པོ་ཞིག་གིས་གཞུང་ཆེན་ལྟ་རྒྱུར་དོ་སྣང་གསར་པ་ཞིག་བསླེབས་ནས་འཇང་དགུན་ཆོས་ཚོགས་རྒྱུར་ས་དགེ་བཀའ་རྙིང་གི་དགོན་པ་དེ་དག་ནང་རིས་མེད་ཀྱི་དཔེ་ཆ་ལྟ་དགོས་ཀྱི་འདུག་ཅེས་ལམ་སྲོལ་རིམ་བཞིན་དར་ཡོད། ཕྱོགས་མཚུངས་རྒྱ་གར་ནང་བོད་མི་སྐྱ་བོ་ཕོ་མོ་ཚོས་ཀྱང་དཔེ་ཆ་དང་རིགས་ལམ་སློབ་རྒྱུར་འབད་བརྩོན་བྱེད་བཞིན་ཡོད་པ་མ་ཟད། བོད་ནང་དུའང་གཞི་ནས་དོ་སྣང་ཡོང་བཞིན་འདུག་ཅེས་གསུངས་འདུག
གསར་འགོད་པ། དོན་གོ
