ཁ་སང་རྒྱ་ནག་གི་སྲིད་འཛིན་གྱིས་རྒྱ་གར་རྒྱ་ནག་གཞུང་ཚབ་ཆེན་མོ་ཨ་ཤོག་ཁན་ཌ་མཆོག་ལ་རྒྱ་དཀར་ནག་གི་འབྲེལ་ལམ་གལ་ཆེན་དུ་བཟུང་བཞིན་ཡོད་སྐོར་བསྒྲཊ་འདུག
ཟླ་འདིའི་ཚེས་ ༢༠ ཉིན་རྒྱ་ནག་གི་སྲིད་འཛིན་ཞི་ཅིན་ཕིན་གྱིས། ཉེ་ལམ་གསར་དུ་བསྐོ་བཞག་བྱས་པའི་རྒྱ་ནག་རྒྱ་གར་གཞུང་ཚབ་ཆེན་མོ་ཨ་ཤོག་ཁན་ཌ་ (Ashok Kantha) མཆོག་གི་གཙོས་གཞུང་ཚབ་ཁག་ ༡༢ ཙམ་ལ་གཞུང་འབྲེལ་སྣེ་ལེན་གྱི་མཛད་སྒོ་ཞིག་སྐོང་ཚོགས་གནང་སྟེ། རྒྱ་དཀར་ནག་གཉིས་ཀྱི་འབྲེལ་ལམ་ལོ་རྒྱུས་ཐོག་གལ་ཆེ་ཤོས་ཤིག་ཏུ་བཟུང་གི་ཡོད་པ་མ་ཟད། ཞི་ཅིན་ཕིན་ཁོ་རྒྱ་དཀར་ནག་གཉིས་ཀྱི་འབྲེལ་ལམ་ཚགས་ཚུད་ལམ་ལྷོང་ཡོང་བར་སྐུལ་འདེད་བྱེད་མཁན་གྱི་ཕོ་ཉ་ཡིན་སྐོར་བསྒྲགས་འདུག
དེ་ནི། ཞི་ཅིན་ཕིན་གྱིས་ཉེ་ལམ་རྒྱ་དམག་གིས་རྒྱ་གར་བྱང་ཤར་མངའ་སྡེ་ཁག་དང་ལ་དྭགས་ས་མཚམས་བཅས་སུ་བཙན་འཛུལ་འཇིགས་སྐུལ་བྱེད་བཞིན་ཡོད་པ་མ་ཟད། པ་ཀི་སི་ཐན་ལ་དཔུང་རོགས་བྱས་ཏེ་རྡུལ་ཕྲན་གློག་རྡུལ་མ་ལག་དང་གློག་ཁང་གསར་རྒྱག དེང་རབས་གོ་མཚོན་གྱི་ལག་ཆ་མང་པོ་བཙོང་བ་བཅས་ཀྱིས་ཨེ་ཤ་ཡའི་སྟོབས་ཆེན་རྒྱལ་ཁབ་གཉིས་ཀྱི་འབྲེལ་ལམ་ལ་དོ་ཕོག་ཤུགས་ཆེར་ཕྱིན་ཡོད་སྟབས། འབྱུང་འགྱུར་རྒྱ་དཀར་ནག་གཉིས་ཀྱི་འབྲེལ་ལམ་སྔར་ལྷག་ཡར་རྒྱས་ཡོང་ཆེད་བརྗོད་པ་ཞིག་ཡིན་འདུག
ཞི་ཅིན་ཕིན་གྱིས། “ ངས་རྒྱ་དཀར་ནག་གཉིས་ཀྱི་འབྲེལ་ལམ་ནི་ལོ་རྒྱུས་ཐོག་གལ་ཆེ་ཤོས་ཤིག་ཏུ་བཟུང་གི་ཡོད་པ་མ་ཟད། རང་ངོ་རང་ཤེས་དང་རང་འགན་རང་འཁུར་བྱས་ཏེ་འབྲེལ་ལམ་སྔར་ལྷག་འཕེལ་རྒྱས་ཡོང་ཐུབ་པ་བྱ་རྒྱུ་ཡིན” ཞེས་བརྗོད་འདུག
གནད་དོན་དབྱེ་ཞིབ་པ་ཚོས། རྒྱ་གར་ནི་རྒྱ་ནག་འཕེལ་རྒྱས་ཡོང་ཐབས་ལ་མེད་དུ་མི་རུང་བའི་རྒྱལ་ཁབ་ཅིག་ཆགས་ཡོད་སྟབས། རྒྱ་ནག་གིས་ཐབས་བརྒྱ་ཇུས་སྟོང་གིས་རྒྱ་གར་དང་མཉམ་འབྲེལ་བྱས་ཏེ་འཛམ་གླིང་གི་སྟོབས་འབྱོར་ཆེ་ཤོས་ཀྱི་རྒྱལ་ཁབ་ཅིག་ཆགས་རྒྱུར་འབད་བརྩོན་བྱེད་བཞིན་ཡོད་སྐོར་བརྗོད་འདུག
ལོ་འདིའི་ལོ་མཇུག་ཏུ་རྒྱ་ནག་གི་སྲིད་འཛིན་ཞི་ཅིན་ཕིན། ༡༩༥༤ ལོར་རྒྱ་དཀར་ནག་གཉིས་བར་གྲོས་མཐུན་དོན་ཚན་ལྔ་ལ་མིང་རྟགས་བཀོད་དེ་ལོ་ ༦༠ འཁོར་བའི་དུས་དྲན་སྲུང་གཙི་དང་འབྲེལ། རྒྱ་གར་ནང་གཟིགས་སྐོར་གནང་སྟེ་སྲིད་གཞུང་གསར་བའི་མགོ་ཁྲིད་དང་ཐུག་འཕྲད་ཀྱིས་ཚོང་འབྲེལ་དང་ས་མཚམས། མཉམ་ལས། ཁེ་ལས་གསར་འཛུགས། མ་འཇོག་བྱེད་ཕྱོགས་སོགས་ཀྱི་ཐད་གྲོས་མོལ་བྱ་རྒྱུ་ཡིན་འདུག
༢༠༡༤ ལོ་ནི་རྒྱ་དཀར་ནག་གཉིས་ཀྱི་མཛའ་འབྲེལ་མཐུན་ལམ་གྱི་ལོར་སྲུང་གཙི་བྱ་རྒྱུ་ཡིན་སྐོར་བསྒྲགས་ཡོད་པ་ལྟར། ཟླ་འདིའི་ཚེས་ ༡༨ ཉིན་རྒྱ་གར་འཆར་འགོད་ལྷན་ཁང་གི་འགན་འཛིན་གཞོན་པ་མོན་ཌེག་སིན་ (Montek Singh Ahluwalia) ལགས་རྒྱ་ནག་ཏུ་ཕྱིན་སྟེ་སྲིད་འཛིན་ཞི་ཅིན་ཕིན་དང་སྲིད་བློན་ལེ་ཁ་ཆང་གཉིས་ལ་ཐུག་ཕྲད་གནང་སྟེ། རྒྱ་དཀར་ནག་གཉིས་ཀྱི་ཐབས་ཇུས་དང་དཔལ་འབྱོར་གནད་དོན་ཐད་གྲོས་མོལ་གནང་ཡོད་པ་མ་ཟད། ༢༠༡༥ ལོའི་ནང་ཚུན་ཨ་སྒོར་ཐེར་འབུམ་ ༡༠༠ ཡི་ཚོང་དོན་གྲོས་ཆོད་ཁག་ཅིག་ལ་མིང་རྟགས་བཀོད་ཡོད་འདུག
ཟླ་ ༤ པའི་ཚེས་ ༡༨ ཉིན་ནས་དུས་ཡུན་ཟླ་གཉིས་ཙམ་རིང་རྒྱ་གར་ལ་རྒྱང་ལྟ་བྱེད་པ་ (Glimpses of India) ཞེས་པའི་མིང་བྱང་འོག རྒྱ་གར་གྱི་རིག་གཞུང་འགྲེམས་སྟོན་ཚོགས་ཆུང་ཞིག་རྒྱ་ནག་གི་རྒྱལ་ས་པེ་ཅིན་དང་ཁྲོན་ཆིན (Chongqing)། ཁྲིན་ཏུའུ (Chengdu)། ཀོང་ཀྲིག (Guangzhou) ཧོང་ཀྲིག (Hangzhou)། ཧོང་ཀོང་། ཏ་ལེན (Dali)། ཁོན་མེན (Kunming)། ཧྲང་ཧེ (Shanghai)། ཝུ་རའོ་མུའུ་ཆི (Urumqi)། ལྷ་ས། ཆིན་ཏོ ( Qingdao) བཅས་གྲོང་ཁྱེར་ ༡༢ ནང་རྒྱ་གར་གྱི་གློག་བརྙན་དང་དེང་དུས་རི་མོའི་སྒྱུ་རྩལ། རིག་གཞུང་འཁྲབ་སྟོན། རྒྱ་གར་གྱི་སྙན་གྲགས་ཆེ་བའི་རྩོམ་པ་པོ་དག་གི་བརྩམས་ཆོས་སོགས་འགྲེམས་སྟོན་བྱ་འཆར་ཡོད་འདུག
རྒྱ་ནག་རྒྱ་གར་གཞུང་ཚབ་ཆེན་མོ་ཨ་ཤོག་ཁན་ཌ་ (Ashok Kantha) ལགས་ནི། རྒྱ་གར་གཞུང་གི་ལྷོ་ཤར་ཨེ་ཤ་ཡའི་གནད་དོན་སྐོར་གྱི་དྲུང་ཆེ་ཟུར་པ་ཡིན་པ་མ་ཟད། དེ་སྔོན་ཤི་རི་ལན་ཁའི་རྒྱ་གར་གྱི་གཞུང་ཚབ་ཆེན་མོ་གནང་མྱོང་མཁན་ཞིག་ཡིན་འདུག
གསར་འགོད་པ། དོན་གྲུབ།
