གྲོས་ཚོགས་ཚོགས་དུས་བདུན་པའི་མཇུག་བསྡོམས་གཏམ་བཤད་སྐབས་ཚོགས་གཙོ་མཆོག་གིས། གྲོས་ཚོགས་ཀྱི་རེ་བ་གཙོ་བོ་འཛིན་སྐྱོང་གིས་སྔར་ལྷག་བོད་རྒྱ་འབྲེལ་མོལ་ཡོང་ཐབས་ལ་འབད་བརྩོན་གནང་སྟེ་མགོ་འཛུཊ་གནང་ཐབས་བྱ་དགོས་སྐོར་གསུངས་སོང་།
སྐབས་བཅོ་ལྔ་བའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པ་ཟླ་འདིའི་ཚེས་ ༡༡ ཉིན་ནས་བཟུང་གངས་སྐྱིད་གྲོས་ཚོགས་ཚོགས་ཁང་དུ་ཚོགས་ཏེ། བོད་ནང་གི་རང་ལུས་མེར་བསྲེཊ་དང་འབྲེལ་བའི་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་དང་། རྩིས་ལོ་ ༢༠༡༤ དང་ ༢༠༡༥ ལོའི་ལོ་འཁོར་སྔོན་རྩིས། གཞུང་འབྲེལ་གྲོས་ཆོད་གྲོས་འཆར་དང་ཁྲིམས་བཟོའི་ལས་དོན་བཅས་ཀྱི་ཐོག་བགྲོ་གླེང་གོ་བསྡུར་དང་གཏན་འབེབས་བཅས་གནང་བ་དང་། དེ་རིང་ཚེས་ ༢༢ ཉིན་གྱི་སྔ་དྲོ་ཁྲིམས་བཟོའི་ལས་དོན་དང་གཞུང་འབྲེལ་གྲོས་ཆོད་གྲོས་འཆར། གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་བཅས་ཀྱི་ཐོག་བགྲོ་གླེང་གནང་རྗེས་མཇུག་སྒྲིལ་སོང་།
ཚོགས་གཙོ་མཆོག་གིས་རང་ལུས་མེར་བསྲེཊ་ཐད། རང་ལུས་མེར་བསྲེཊ་ཐད་སྐབས་རེར་བོད་མིའི་སྒྲིག་འཛུགས་ཀྱི་མཆོད་འབུལ་སྨོན་ལམ་གོ་སྒྲིག་དང་། གྲོས་ཚོགས་ནང་གྲོས་ཆོད་བཞག་པའི་རྒྱུ་མཚན་ལ་བརྟེན་ནས་རང་ལུས་མེར་བསྲེཊ་གནང་མཁན་མང་དུ་འགྲོ་གི་ཡོད་མེད་ཀྱི་གནས་སྟངས་འདྲི་མཁན་ཡོང་གི་འདུག དེར་ཚོགས་གཙོའི་ངོས་ནས་ངོས་འཛིན་ཞུ་ཐུབ་ཀྱི་མེད་ཅེས་ཞུ་བཞིན་ཡོད། ང་རང་ཚོའི་འཐབ་རྩོད་ནང་བོད་ནང་གི་བོད་མི་ཚོས་སོ་སོའི་སྲོག་ཡན་བློས་གཏོང་ཐུབ་ཀྱི་ཡོད་སྟབས། ང་ཚོ་བཙན་བྱོལ་ནང་ཡོད་པའི་བོད་མི་ཚོས་ཁོང་ཚོའི་འབོད་སྒྲ་དང་མངོན་འདོད་གང་ཡིན་པ་དེ་འཛམ་གླིང་ནང་གསལ་སྤྲོད་དང་རྒྱབ་སྐྱོར་ཐོབ་པའི་ལས་འགུལ་སྤེལ་རྒྱུ་ལས་འགན་རེད་ལ། གྲོས་ཚོགས་ནང་ད་ལྟའི་དངོས་ཡོད་གནས་སྟངས་གང་ཡིན་ལ་གོ་བསྡུར་དང་གསལ་བོ་བཟོ་དགོས་པ་ལས་འགན་ཡིན་པའི་ཆ་ནས་བསྒྲུབ་ཀྱི་ཡོད། རང་ལུས་མེར་བསྲེཊ་དང་འབྲེལ་ཏེ་རྒྱ་ནག་གི་འགན་འཁུར་མཁན་ཚོས་བོད་མིའི་ནང་ཁུལ་དཀྲུག་ཤིང་རྒྱག་པའི་ལས་རིམ་སྣ་ཚོགས་ཤིག་སྤེལ་བསྡད་ཀྱི་ཡོད་པ་ང་ཚོ་ཚང་མས་མཁྱེན་གྱི་ཡོད། རྔ་བ་ལྟ་བུར་མཚོན་ན་རྒྱ་ནག་གི་མགོ་ཁྲིད་ཚོས་སྡིག་ར་སྐུལ་ཏེ། “ ཁྱེད་རང་ཚོ་བེད་སྤྱོད་གཏོང་གི་ཡོད་པ་རེད། ཁྱེད་རང་ཚོ་བེད་སྤྱོད་བཏང་ཚར་བའི་རྗེས་སུ་ཡ་བྱེད་མཁན་རག་གི་མ་རེད། ”ཅེས་བཤད་བསྡད་འདུག དེ་ཚོ་ང་ཚོས་ཤེས་ཀྱི་ཡོད། ཡིན་ནའང་། བོད་ནང་སྡོད་མཁན་བོད་མི་རེ་ཟུང་གིས་དངུལ་དང་དངོས་པོའི་ཁེ་ཕན་ལ་ལྟོས་ཏེ་རྒྱུགས་འགྲོ་མཁན་ཡོང་གི་ཡོད་པ་ལས། རྒྱ་ཆེ་ས་ནས་བོད་མི་མང་ཆེ་བ་ཞིག་གིས་གནད་དོན་དེ་དག་རྒྱ་ནག་གིས་བོད་མི་ནང་ཁུལ་དཀྲུག་ཤིང་རྒྱག་པ་དང་། བོད་ནང་དང་བཙན་བྱོལ་བོད་མིའི་བར་མཐུན་སྒྲིལ་མི་ཡོང་བའི་ལས་གཞི་རྩོམ་བཞིན་པ་གསལ་བོ་མཁྱེན་པའི་ཐོག་ནས་ད་དུང་ཡང་ཆིག་སྒྲིལ་གྱི་ནུས་པ་ཤུགས་ཆེར་བསྐྲུན་པའི་ལས་འགུལ་སྤེལ་གྱི་ཡོད་པ་རེད། གྲོས་ཚོགས་འདི་བརྒྱུད་ནས་བོད་ནང་ཡོད་པའི་བོད་མི་ཚོར་དེ་འདྲའི་མགོ་སྐོར་བསླུ་བྲིད་དང་གནོན་ཤུགས། སྡིག་ར་འོག་ད་བར་ཚུད་ཡོད་པ་མ་རེད་ལ། མ་འོངས་པར་ཡང་མ་ཚུད་པ་གནང་རོགས་གནོངས། ཞེས་གསུངས་སོང་།
ཡང་ཚོགས་གཙོ་མཆོག་གིས་གྲོས་ཚོགས་ནང་དོལ་རྒྱལ་དང་འབྲེལ་བའི་གྲོས་ཆོད་གཏན་འབེབས་བྱས་པའི་ཐད། ད་རེ་གྲོས་ཚོགས་ནང་ལས་དོན་གལ་ཆེ་བ་གཅིག་དོལ་རྒྱལ་རྗེས་འབྲངས་པའི་གནས་སྟངས་དང་འབྲེལ་བའི་གཞུང་འབྲེལ་གྲོས་ཆོད་ཅིག་འཇོག་ཐུབ་ཡོད། དེར་སྤྱི་འཐུས་སོ་གཉིས་སོ་གསུམ་ཞིག་གིས་ཆ་ཤས་བླངས་པ་རེད། འཛིན་སྐྱོང་གི་ངོས་ནས་འབྲེལ་ཡོད་བཀའ་བློན་དང་སྲིད་སྐྱོང་མཆོག་བཅས་ཀྱིས་ཆ་ཤས་བླངས། ལྷག་པར་དུ་བདེ་སྲུང་ལས་ཁུངས་ཀྱིས་ནས་ད་ལྟའི་བར་དོལ་རྒྱལ་རྗེས་འབྲངས་པས་བོད་མི་ཚོར་འཚེ་བའི་ལས་གང་དང་གང་བརྩམས་ཡོད་མེད་ཀྱི་ཟླ་དུས་ཚེ་གྲངས་མིང་དང་བཅས་པ་གྲོས་ཚོགས་འདིའི་ནང་སྙན་གསེང་དང་། ༧གོང་ས་མཆོག་གི་སྐུ་ཕྱྭར་བདོ་བའི་དོལ་རྒྱལ་རྗེས་འབྲངས་པས་ག་རེ་བྱེད་ཀྱི་ཡོད་མེད་ཆ་ཚང་གསལ་བོར་གྲོས་ཚོགས་འདིའི་ནང་སྙན་སེང་གནང་ཡོད་སྟབས། སྲིད་སྐྱོང་མཆོག་གིས་གསུངས་ལྟར་བང་ཡག་པོ་བསྒྲིགས་ཏེ་མང་ཚོགས་ནང་གསེལ་བཀྲོལ་བྱེད་དགོས་པ་ཞིག་དང་། ལྷག་པར་དུ་ང་ཚོའི་མི་རབས་གསར་བའི་ནང་གནས་ཚུལ་དེ་ཚོའི་སྐོར་མི་ཤེས་མཁན་ཚོར་ག་དུས་ཡིན་ཡང་བལྟ་ཆོག་ཆོག་ཡོད་པའི་ཡིག་ཆ་ཞིག་དྲ་ལམ་དང་ཤོག་བུ་ཐོག་ཕུལ་ཐུབ་པའི་གནས་བབ་ཅིག་དང་། དེ་ཡང་བོད་རྒྱ་དབྱིན་གསུམ་ཐོག་འཇོག་རྒྱུར་འབད་བརྩོན་གནང་རོགས། ཞེས་གསུངས་སོང་།
ཁོང་གིས་མུ་མཐུད་གསུང་དོན། བོད་ནང་འདས་པའི་ལོ་ཁ་ཤས་ནང་གུ་རུ་རིན་པོ་ཆེའི་སྐུ་གཏོར་རྒྱུའི་ལས་གཞི་བརྩམས་ཡོད་པ་རེད། ཤེས་རྟོགས་བྱུང་གསལ་ལ་ཁམས་ཀྱི་ས་ཁུལ་ཁག་ཅིག་ཏུ་དོལ་རྒྱལ་སྐུ་ཆེན་པོ་དེ་འདྲ་བྲག་ངོས་སུ་བཞེངས་ཏེ་མ་འོངས་པ་གཏོར་དགོས་ཀྱང་གཏོར་ཁག་པོ་ཆགས་པ་དེ་འདྲ་བཟོ་བསྡད་ཀྱི་ཡོད་པ་རེད། དེ་ཚོ་ང་ཚོ་ཚང་མས་ཤེས་ཀྱི་ཡོད་པ་རེད། རྒྱུ་མཚན་དེ་དག་ལ་བརྟེན་ནས་བོད་ནང་ཡོད་པའི་བོད་མི་ཚོས་དོལ་རྒྱལ་དང་འབྲེལ་བའི་གནད་དོན་གསལ་བོ་བྱས་ནས་མཁྱེན་དགོས་པ་རེད། ཁ་སང་བཀུར་འོས་སྤྱི་འཐུས་ཤིག་གིས་གསུངས་པ་རེད། བཙན་བྱོལ་ནང་ཡོད་པའི་དོལ་རྒྱལ་རྗེས་འབྲངས་པ་ཚོ་བོད་ནང་ག་དུས་འགྲོ་ན་ག་བར་འགྲོ་ན་འགྲོ་ཆོག་ཆོག རྒྱ་ནག་གི་སྡིངས་ཆ་དང་མི་མང་འདུ་འཛོམས་ཐོག་སྐད་ཆ་བཤད་རྒྱུའི་གོ་སྐབས་བསྐྲུན་པ། དེ་ཚོ་བྱས་བསྡད་ཀྱི་ཡོད་པ་རེད། ཡིན་ནའང་། མི་མང་གི་ངོས་ནས་ད་ལྟའི་བར་བོད་ནང་དེའི་ཐོག་གདོང་ལེན་ཡག་ཐག་ཆོད་ཅིག་ཡོང་གི་འདུག་བསམ་བསམ་ཞིག་འདུག ཡིན་ནའང་ས་ཆ་ཁ་ཤས་ཤིག་ལ་གནས་ཚུལ་གསལ་བོ་ཆགས་མ་ཆགས་ཀྱི་གནས་སྟངས་འོག ཁག་ཅིག་གིས་ང་ཚོའི་བླ་མ་རིན་པོ་ཆེ་དེའི་འདྲའི་བཀའ་གནང་ཡོད་ཀྱི་མ་རེད་ཅེས་པ་དེ་འདྲ་ཡང་ཡོང་བསྡད་ཀྱི་ཡོད་ས་རེད། ༧གོང་ས་མཆོག་གིས་དོལ་རྒྱལ་གནད་དོན་དང་འབྲེལ་བའི་ཐོག་ནས་ཁ་སང་ང་ཚོས་གྲོས་ཆོད་ནང་བཀོད་པ་ནང་བཞིན། དགོངས་པ་མང་པ་བཞེས་བརྟག་དཔྱད་གནང་ནས་བཀའ་སློབ་གནང་ཡོད་པ་དེ་ད་རེབ་གྲོས་ཚོགས་བརྒྱུད་ནས་བོད་ནང་ཡོད་མཁན་ཚོས་༧རྒྱལ་བ་རིན་པོ་ཆེས་བཀའ་སློབ་གནང་བཞག་པ་དེ་གསན་པ་དང་མཇལ་བའི་གོ་སྐབས་མ་བྱུང་བ་དེ་འདྲ་ཡོད་པ་ཡིན་ན། དེ་ཅིག་ཞུས་ནས་བསམ་སོང་། དེ་དེ་བཞིན་གྱིས་སྦང་བླངས་ཚུལ་བཞིན་བྱེད་རྒྱུའི་ཐོག་ང་ཚོས་ཆིག་སྒྲིལ་གྱི་ནུས་པ་སྤུངས་རྒྱུ་དང་། བོད་རྩ་དོན་བསྟན་སྲིད་མི་རིགས་ཀྱི་ཆེད་དུ་ཡིན་པ་ངོས་འཛིན་གསལ་བོ་བྱས་པའི་ཐོག་ནས་མགོ་སྐོར་བསླུ་བྲིད་འོག་མ་ཚུད་པར་བྱ་རྒྱུ་དང་། ལྷག་པར་དུ་སོ་སོའི་ཐག་ཆོད་པའི་ཐོག་གནང་དགོས་པ་གལ་ཆེན་པོ་རེད། ཅེས་གསུངས་བྱུང་།
སྔོན་རྩིས་གནས་སྟངས་ཐད་ཚོགས་གཙོ་མཆོག་གིས། སྔོན་རྩིས་སྤྱི་ཡོངས་ཀྱི་གནས་བབ་ཐོག་གྲོས་ཚོགས་སྔོན་མའི་ནང་བཀའ་མོལ་བྱུང་བ་རེད། ད་རེབ་དཔལ་འབྱོར་བཀའ་བློན་གྱི་སྔོན་རྩིས་གསུང་བཤད་ནང་འདས་པའི་ལོ་གཉིས་ཀྱི་གནས་སྟངས་སྙན་སྒྲོན་གནང་ཡོད་པ་རེད། ཕྱོགས་ཡོང་ནས་ཡོང་མང་བ་དང་སོང་ཉུང་བའི་གནས་བབ་སྔོན་རྩིས་གསུང་བཤད་ནང་འཁོད་བསྡད་ཡོད་པ་རེད། སྔོན་རྩིས་མ་དངུལ་དང་གཏན་འཇགས་མ་དངུལ་གྱི་གནས་སྟངས་དེ་ས་ཡ་ ༨༠༡ ཆགས་བསྡད་ཡོད་པ་རེད། དེ་ ༡༩༩༦ ལོ་ནས་མགོ་བཙུགས་པ་རེད། མགོ་ཚུགས་དགོས་དོན་དེ་ཡང་གཏན་འཇགས་མ་དངུལ་ཤུགས་ཆེ་རུ་གཏོང་ཐུབ་པ་ཡིན་ན། སྤྱི་བབ་ཀྱི་ཐོག་ནས་བོད་མིའི་སྒྲིག་འཛུགས་ཀྱི་འགྲོ་སོང་གཏོང་ཐུབ་ཀྱི་རེད་བསམ་པའི་རེ་བ་བརྒྱབ་ཡོད་ཀྱང་། འཛམ་གླིང་སྤྱིའི་དཔལ་འབྱོར་གྱི་འགྱུར་འགྲོས་དང་། ལྷག་པར་དུ་རྒྱ་གར་གྱི་དཔལ་འབྱོར་གནས་སྟངས་ཡར་རྒྱས་ཕྱིན་པ་ལ་བརྟེན་ནས་སྤྱི་བབ་དེ་རང་བཞིན་གྱིས་ཉུང་དུ་ཕྱིན་ཡོད་སྟབས། ཐོག་མའི་རེ་བ་ལྟ་ད་ལྟ་འགྲོ་ཐུབ་ཀྱི་མེད་ཀྱང་། ༡༩༩༦ ནས་ད་ལྟའི་བར་སྔོན་རྩིས་མ་དངུལ་དང་བརྟན་འཇགས་མ་དངུལ་ནང་ས་ཡ་དེ་འདྲ་ཞིག་བསླེབ་པ་དེ་ག་རང་བཟང་ཕྱོགས་ཀྱི་འགྱུར་བ་ཞིག་ཡིན་པ། དངོས་ཡོད་གནས་སྟངས་ཀྱི་ཐོག་ནས་ལས་འཆར་མ་དངུལ་དང་སྤྱི་བཏང་མ་དངུལ་ཐོག་ནས་བགྲོ་གླེང་སྐབས་ཟུར་བཀོད་ནང་མང་པོ་ཞིག་བཏང་བསྡད་ཀྱི་འདུག་ཅེས་པའི་གནས་བབ་དེ་རེད། དེ་ཚོའི་གྲས་ཏེ་ཕྲན་བུ་ཉུང་དུ་འགྲོ་གི་ཡོད་ཀྱང་། ཕྱོགས་གཉིས་ཀ་ནས་བལྟས་པ་ཡིན་ན། གནས་སྟངས་འགྲིག་ཐག་ཆོད་ཡོད་པ་ཞིག་སྔོན་རྩིས་གསུང་བཤད་ནང་གསལ་བོ་ཆགས་བསྡད་ཡོད་པ་རེད་ལ། ཟུར་བཀོད་ལྷག་འཆར་ཡིན་ནའང་ས་ཡ་ ༡༨༧༡ ཡོད་པ་རེད། དེའི་ནང་ལས་འཆར་དངུལ་ལོ་རང་ག་གཅིག་པུ་མིན་པར་ལོ་ཁ་ཤས་གནང་དགོས་པའི་དངུལ་བབ་དེ་དག་ཚུད་བསྡད་ཀྱི་ཡོད་པ་རེད། ལས་འཆར་མ་ཡིན་པའི་དངུལ་དེ་དག་མ་དངུལ་གྱི་སྲོལ་འདྲ་ཆགས་བསྡད་ཡོད་སྟབས། ཁྱོན་ཡོངས་ཀྱི་གནས་བབ་ནས་བལྟས་ན་འགྲིག་ཐག་ཆོད་འདུག་བསམ་བསམ་སྔོན་རྩིས་ནང་མཇལ་ཐུབ་པ་ཞིག་རེད། ཅེས་གསུངས་བྱུང་།
མཇུག་ཏུ་ཚོགས་གཙོ་མཆོག་གིས་བོད་རྒྱ་འབྲེལ་མོལ་ཐད་འཛིན་སྐྱོང་བཀའ་ཤག་ལ་རེ་སྐུལ་གྱི་ཚུལ་དུ་གསུང་དོན། “ དེ་རིང་སྲིད་སྐྱོང་མཆོག་གིས་སྤྱི་ཡོངས་ཀྱི་གནད་དོན་དང་ཁྱིམ་མཚེས་རྒྱལ་ཁབ་ཁག་གི་གནས་སྟངས་བཅས་ཆ་ཚང་ཐོག་འགྲེལ་བཤད་ཅིག་གནང་བ་རེད། གྲོས་ཚོགས་འདིའི་ངོས་ནས་རེ་བ་ག་རེ་ཞུ་བཞིན་ཡོད་ཅེ་ན། འཛིན་སྐྱོང་གི་ངོས་ནས་སྔར་ལྷག་བོད་རྒྱ་འབྲེལ་མོལ་ཡོང་ཐབས་ལ་འབད་བརྩོན་གནང་རྒྱུ་གལ་ཆེན་པོ་ཆགས་ཀྱི་འདུག རྩ་བའི་མ་གནང་བ་མིན་ཡང་། ད་ལྟའི་བར་གྲོས་ཚོགས་ཀྱི་ངོས་ནས་ག་རེ་གནང་ཡོད་མེད་དང་ག་རེ་བྱེད་ཀྱི་ཡོད་མེད་རྩ་བ་ཉིད་ནས་ཉན་ཞིབ་དགོས་པ་དང་བྱས་ཡོད་མེད་སོགས་ཞུས་མེད། ཞུ་མི་དགོས་པ་དེ་དགོས་པ་རྒྱུ་མཚན་ཞིག་གི་ཐོག་ནས་རེད། འཛིན་སྐྱོང་གི་ངོས་ནས་ཏན་ཏན་གནང་གི་ཡོད་ཀྱི་རེད་ལ། ཚོགས་གཙོའི་ངོས་ནས་གྲོས་ཚོགས་འདི་བརྒྱུད་ལོ་འདིའི་ནང་རེ་བ་ཆེན་པོ་ཞིག་བརྒྱབ་བསྡད་ཡོད། མཁས་པ་ཚོའི་མང་པོ་བཤད་བསྡད་ཡོད་པ་རེད། དཔལ་ལྡན་སྲིད་སྐྱོང་མཆོག་གིས་ཀྱང་གསུངས་པ་རེད། ཞི་ཅིན་ཕིན་གྱིས་དབང་ཆ་ཚང་མ་ཡར་སྒྲུག་ཚར་དུས་བློ་ཁོག་ལྡན་པའི་ངང་དང་། ལྷག་པར་དུ་བོད་དང་ཆབ་སྲིད་གནད་དོན་གཞན་པའི་དཀའ་ངལ་སེལ་ཐབས་ལ་ཤུགས་རྒྱག་མདོག་ཁ་བོ་རེད། ང་ཚོའི་བོད་ཀྱི་གནད་དོན་གསོན་པོར་གནས་ཐུབ་རྒྱུ་གལ་ཆེན་པོ་རེད་ལ། ལྷག་པར་དུ་བོད་རྒྱ་འབྲེལ་མོལ་གྱི་གནད་དོན་དེ་མགོ་འཛུགས་ཐུབ་པ་གནང་རྒྱུ་གལ་ཆེན་པོ་རེད། ” ཅེས་གསུངས་སོང་།
གསར་འགོད་པ། དོན་གོ
བོད་རྒྱ་འབྲེལ་མོལ་བྱུང་ནས་བོད་དོན་དཀའ་ངལ་སེལ་ཐུབ་བྱུང་རྒྱུ་ནི་ཀུན་གྱི་འདོད་བློ་ལོས་ཀྱང་ཡིན་ཏེ། མིག་བཙུམས་རྣ་བཀབ་སྟེ་མིག་མེད་རྣ་མེད་ཚོར་བ་མེད་འདུ་ཤེས་མེད་འདུ་བྱེད་མེད་པའི་ཚུལ་དུ། བོད་རྒྱ་འབྲེལ་མོལ་བསྐྱར་མཐུད་བསྐྱར་མཐུད་བསྐྱར་མཐུད་དགོས་ལུགས་ཁ་ལ་བདེ་ཕྱོགས་ཀྱིས་མ་ཎི་ལྟར་བགྲང་བསྡད་ན། དེས་ནུས་པ་ཅི་ཞིག་འཐོན་མིན་ཧ་ཅང་བཤད་ཁག་པོ་རེད། ཕྱི་ཟླ་གསུམ་པའི་ནང་ཚོགས་པའི་རྒྱ་ནག་རྒྱལ་ཡོངས་དམངས་འཐུས་དང་སྲིད་གྲོས་ཚོགས་འདུའི་སྐབས། ཀྲུའུ་ཝེ་ཆོན་གྱིས་སྲིད་གྲོས་ཚོགས་འདུའི་སྟེང་སྤེལ་བའི་མི་རིགས་དང་ཆོས་ལུགས་སྡེ་ཁག་གི་བྱ་བའི་ལས་བསྡོམས་སྙན་ཐོ་དང་། བོད་རྒྱ་འབྲེལ་མོལ་ཐད་སྤེལ་བའི་ལན་འདེབས་དག་ལ་བཀུར་འོས་བཀའ་སྤྱི་ལྷན་རྒྱས་ཀྱིས་ཞིབ་གཟིགས་ཤིག་གནང་རྗེས། ད་གཟོད་ང་ཚོའི་ངོས་ནས་ཀྱང་འབྲེལ་མོལ་ཐད་སྐད་ཆ་ག་རེ་བཤད་དགོས་མིན་དང་གོམ་པ་ཇི་ལྟར་རྒྱག་དགོས་མིན་ཐད་བསམ་བློ་གཏོང་དགོས་པ་འདྲ།
རྒྱ་བོད་འབྲེལ་མོ་ཡོང་མིན་དེ་ནི་རྒྱ་ནག་རང་ལ་རག་ལས་ཡོད་པ་ལས་དེ་མིན་འཛིན་སྐྱོང་ལ་བྱེད་ཡག་གང་ཡང མེད་པ་ནི་ས་རིས་ཐང་གསལ་རེད།
བོད་རྒྱ་འབྲེལ་མོལ་ཡོང་དགོས་ན། གྲོས་ཚོགས་ཀྱི་ངོས་ནས་གནོད་གཞིའི་ལས་ཀ་ལས་རུང་གི་མ་རེད། ཡིན་ནའི། གྲོས་ཆོད་ཁག་ཅིག་གནོད་གཞི་རང་རེད།
ཞི་ཅིན་ཕིན་གྱིས་དབང་ཆ་ཚང་མ་ཡར་སྒྲུག་ཚར་དུས་བློ་ཁོག་ལྡན་པའི་ངང་དང་། ལྷག་པར་དུ་བོད་དང་ཆབ་སྲིད་གནད་དོན་གཞན་པའི་དཀའ་ངལ་སེལ་ཐབས་ལ་ཤུགས་རྒྱག་མདོག་ཁ་བོ་རེད། ཟེར་ནས་བཀའ་སྤྱི་གཉིས་ནས་དུས་ནར་འགྱངས་བྱ་རྒྱུ་ཡིན་ནམ། ཁ་དཔེར། བོད་རེ་བས་འཕུང། །རྒྱ་དོགས་པས་འཕུང། །ཞེས་པ་ལྟར་རེད། ངང་སྒུག་མ་གནང་པར་ལས་འཆར་གསར་པ་དང་ཐབས་ལམ་གསར་པར་འཚོལ་དགོས། འདི་ནི་གསར་གཏོད་ཡིན།