ཞི་ཅིན་ཕིན་ཡུ་རོབ་ནང་བསླེབས་འདུག

རྒྱ་ནག་གི་སྲིད་འཛིན་ཞི་ཅིན་ཕིན་ཡུ་རོབ་རྒྱལ་ཁབ་ཁག་བཞིའི་ནང་གཞུང་འབྲེལ་གཟིགས་སྐོར་བྱེད་བཞིན་ཡོད་འདུག

དེ་རིང་ཉིན་གུང་རྒྱ་ནག་གི་སྲིད་འཛིན་ཞི་ཅིན་ཕིན་དང་ཁོའི་བཟའ་ཟླ་ཕིན་ལེ་ཡོན་ (Peng Liyuan) གཉིས་ཀྱི་གཙོས་ཚོང་ལས་སྐུ་ཚབ་མི་སྣ་ ༢༠༠ ལྷག་ཧོ་ལན་ཌིའི་རྒྱལ་སའི་གནམ་ཐང་དུ་འབྱོར་ཏེ། ཡུལ་དེའི་རྒྱལ་བོ་ལེ་ཛན་ཌིར་ (Willem-Alexander) མཆོག་དང་རྒྱལ་མོ་མྰེད་སི་མྰ་ (Maxima) མཆོག་གཉིས་ཀྱིས་གཞུང་འབྲེལ་སྣེ་ལེན་བྱས་ཡོད་འདུག

ཐེངས་འདིར་སྲིད་འཛིན་ཞི་ཅིན་ཕིན་ཉིན་བཅུ་རིང་ཧོ་ལན་ཌི་གཙོས་འཇར་མན་དང་ཧྥ་རན་སི། སྦེལ་ཇམ་བཅས་སུ་གཞུང་འབྲེལ་གཟིགས་སྐོར་བྱས་ཏེ་རྒྱལ་ཁབ་ཕན་ཚུན་བར་གྱི་རང་དབང་ཚོང་ལས་ཀྱི་འབྲེལ་ལམ་འཕེལ་རྒྱས་གཏོང་ཐབས་ལ་གྲོས་ཆོད་ཁག་ཅིག་འཇོག་རྒྱུ་ཡིན་པ་མ་ཟད། ཡུ་རོབ་མཐུན་ཚོགས་ཀྱི་བསྟི་གནས་སུ་གཟིགས་སྐོར་དང་། ཧྥ་རན་སི་དང་རྒྱ་ནག་བར་ཕྱི་སྲིད་འབྲེལ་ལམ་བཙུགས་ནས་མི་ལོ་ ༥༠ འཁོར་བའི་དུས་དྲན་སྲུང་གཙི་སྐབས་གཏམ་བཤད་ཀྱི་སྤེལ་རྒྱུ་ཡིན་འདུག

གཟའ་འཁོར་རྗེས་མར་ཧོ་ལན་ཌིའི་གྲོང་ཁྱེར་ཧད་གྷེ་རུ་འཛམ་གླིང་གི་བཟོ་ལས་ཡར་ཐོན་ཅན་གྱི་རྒྱལ་ཁབ་ཨ་རི་དང་དབྱིན་ཡུལ། ཁེ་ཎ་ཌ། ཧྥ་རན་སི། འཇར་མན། ཉི་ཧོང་། ཨི་ཊ་ལི་བཅས་ཀྱི་སྲིད་འཛིན་དང་སྲིད་བློན་ཚོས། ཨུ་རུ་སུས་ཡུའུ་ཁུ་རེན་གྱི་རང་སྐྱོང་མངའ་ཁུལ་ཁུ་རེ་མྰེ་ (Crimea) བཙན་བཟུང་བྱས་སྟབས། རྒྱལ་སྤྱིའི་ཐོག་ནས་ཨུ་རུ་སུར་སྲིད་དོན་གྱི་གནོན་ཤུགས་དང་དཔལ་འབྱོར་ཉེས་ཆད་ཇི་ལྟར་གཏོང་དགོས་མིན་སྐོར་ལ་ཚོགས་འདུ་འཚོགས་པའི་སྐབས་དང་སྟབས་བསྟུན། ཨ་རིའི་སྲིད་འཛིན་ཨོ་བྷ་མ་དང་རྒྱ་ནག་གི་སྲིད་འཛིན་གཉིས་ཐུག་འཕྲད་གནང་སྟེ་ཁུ་རེ་མྰེན་གནད་དོན་སྐོར་ལ་གྲོས་མོལ་བྱ་རྒྱུ་ཡིན་འདུག

ཉེ་ལམ་འཇར་མན་གསར་ལམ་དུ་གནས་ཚུལ་སྤེལ་བ་ལྟར་ན། རྒྱ་ནག་གཞུང་གིས་འཇར་མན་སྲིད་བློན་ལྕམ་ཨན་རྗི་ལྰ་ (Angela Merkel) གཙོས་གཞུང་འབྲེལ་མི་སྣ་ཁག་ཅིག་རྒྱ་ནག་གི་ནན་ཅིན་དམར་གསོད་དུས་དྲན་གྱི་མཛད་སྒོར་མགྲོན་འབོད་བྱས་ཀྱང་། འཇར་མན་གཞུང་གིས་མགྲོན་འབོད་དེ་ནི་རྒྱ་ནག་གཞུང་གིས་ཉི་ཧོང་ལ་ཁ་རྡུང་དང་དཀྲོགས་གཏམ་སྤེལ་བའི་ལག་ཆར་ཆགས་སྲིད་སྟབས་ཁས་ལེན་བྱས་ཡོད་མི་འདུག

སྲིད་དོན་དབྱེ་ཞིབ་པ་ཚོས། རྒྱ་ནག་གི་ཚོང་ལས་དཔལ་འབྱོར་བྱེད་ཡུལ་ཆེ་ཤོས་དེ་ཡུ་རོབ་མཐུན་ཚོགས་ཀྱི་རྒྱལ་ཁབ་ཚོ་ཆགས་ཡོད་སྟབས། ཡུ་རོབ་མཐུན་ཚོགས་གཙོས་འཇར་མན་དང་ཧྥ་རན་སི། ཧོ་ལན་ཌི་བཅས་ཀྱི་མགོ་ཁྲིད་ཚོས་རྒྱ་ནག་ལ་གནོན་ཤུགས་སྤྲད་དེ་རྒྱ་ནག་གཞུང་གིས་ཀྱང་ཨུ་སུ་རུར་དཔལ་འབྱོར་ཉེས་ཆེད་གཏོང་དགོས་པར་ཁས་ལེན་བྱེད་འཇུག་རྒྱུའི་ཚོད་དཔག་བྱེད་ཀྱི་ཡོད་འདུག

གསར་འགོད་པ། ལྷ་སྐྱབས་རྒྱལ།