ཆབ་སྲིད་བཙོན་པ་གྲྭ་བློ་བཟང་གྲགས་བཟང་ལཊ་ཀྱི་གཟུཊ་པོའི་གནས་སྟངས་ཛ་དྲག་ཆཊ་ཡོད་ཀྱང་། དཔལ་འབྱོར་གྱི་དཀའ་ངལ་དབང་གིས་སྨན་ཁང་ལ་སྟོན་མ་ཐུབ་པར་ལྷག་འདུག
རྒྱ་གཞུང་གིས་ཕྱི་ལོ་ ༢༠༡༢ ལོའི་ཟླ་ ༡༡ ཚེས་ ༢༦ ཉིན་མཚོ་སྔོན་མཚོ་ལྷོ་ཁུལ་ཐོག་ཏུ་བོད་རིགས་སློབ་མ་ཚོས་སྐད་ཡིག་རང་དབང་ཐད་ཞི་རྒོལ་བྱེད་སྐབས་ཀྱི་པར་རིས་དང་གནས་ཚུལ་ཕྱི་ཕྱོགས་སུ་མཁོ་སྤྲོད་གནང་བའི་ཉེས་མིང་འོག འཁྱམས་རི་དགོན་པའི་གྲྭ་བློ་བཟང་གྲགས་བཟང་འཛིན་བཟུང་གིས་ཟླ་ ༤ ལྷག་རིང་འདྲི་རྩད་གཅར་རྡུང་བྱས་ཏེ་ནད་གཅོང་དུ་བཏང་རྗེས་ཀློད་གྲོལ་བཏང་ཡོད་ཀྱང་། ཉེ་བའི་ཆར་ནད་གཞི་ཇེ་སྡུག་དུ་ཕྱིན་སྟེ་སྐུ་གཟུགས་ཀྱི་གནས་སྟངས་སྐྱོ་བོ་ཆགས་ཡོད་པ་དང་། དཔལ་འབྱོར་རྐྱེན་པས་སྨན་ཁང་དུ་བསྟེན་གཏུག་བྱེད་རྒྱུར་དཀའ་ངལ་འཕྲད་ཀྱི་ཡོད་འདུག
ཀུན་བཟང་བསྟན་འཛིན་ལགས་ཀྱིས་བརྗོད་པ་ལྟར་ན། ༢༠༡༢ ལོའི་མཚོ་ལྷོ་ཁུལ་གྱི་སློབ་མའི་ཞི་རྒོལ་རྗེས་སུ་རྒྱ་གཞུང་གིས་གྲྭ་གྲགས་བཟང་ལགས་སུ་རྒྱལ་ཁབ་ཀྱི་གསང་ཕྱིར་བསྒྲགས་བྱས་པའི་ཉེས་མིང་འོག་ཟླ་ ༤ རིང་བཀག་ཉར་འདྲི་རྩད་དང་གཅར་རྡུང་མནར་གཅོད་བཏང་སྟེ། སྙིང་མི་བདེ་བ་དང་དབང་བོ་མི་གསལ་བ་ཞིག་དུ་གྱུར་ཡོད་པ་མ་ཟད། བཙོན་ཁང་ནང་མནར་གཅོད་བཏང་སྟེ་ཕོ་བ་དང་མཁལ་མར་སྐྱོན་བཟོས་རྗེས་བཙོན་གྲོལ་གཏོང་དགོས་བྱུང་ཡོད་ཀྱང་། ད་ལྟའི་བར་དཔལ་འབྱོར་གནས་སྟངས་དབང་གིས་སྨན་ཁང་ཆེན་པོ་ཞིག་ཏུ་སྟོན་མ་ཐུབ་པར། སྨན་ཁང་ཆུང་བའི་ནང་བསྟེན་གཏུག་གིས་ན་ཟུག་འཇོག་བྱེད་ཀྱི་སྨན་རེ་འཐུང་ནས་བསྡད་འདུག ད་ལྟ་ནད་གཞི་ཇེ་སྡུག་དུ་ཕྱིན་ཡོད་པ་དངོས་ཡོད་ཡིན་ཡང་། སྨན་ཁང་ལ་སྟོན་བྱེད་ཀྱི་སྒོར་མོའི་ཡོངས་ཁུངས་མེད་པར་ལྷག་ཡོད་འདུག
གྲྭ་བློ་བཟང་གྲགས་བཟང་ལགས་ནི། མཚོ་ལྷོ་ཁུལ་གསེར་ཆེན་རྫོང་སྤྲེལ་ནག་ཡུལ་ཚོ་ནས་ཡིན་པ་དང་། ད་ལྟ་རང་ལོ་ ༢༧ ཡིན་འདུག ཆུང་དུས་ཕ་མ་གཉིས་ཚེ་ལས་འདས་རྗེས་འཁྱམས་རི་དགོན་པའི་ཨ་ཁུ་བཟང་བོ་ཞུ་བ་ཞིག་གི་རྩར་གྲྭ་བ་བྱས་ཡོད་པ་དང་། ད་ལྟའི་བར་ཁོང་ཨ་ཞང་ཞིག་གིས་གཉོར་སྐྱོང་འོག་འཚར་ལོངས་བྱུང་ཡོད་འདུག
གསར་འགོད་པ། དོན་གོ
རྒྱལ་གཅེས་དཔའ་བོ་ཁོང་གི་ཕ་ཡུལ་ས་གནས་བོད་མི་ཚོས་ཁོང་གི་སྨན་ཡོན་ཐོག་རོགས་རམ་ཞིག་ཀྱང་བྱེད་མི་ཐུབ་པ་བློ་ཕམ་བྱུང་།