བོད་མིའི་སྒྲིག་འཛུཊ་ལ་ལོ་རེར་སྒོར་ས་ཡ་ ༦ ནས་ ༨ ཀྱི་ཞལ་འདེབས་སྤྲོད་ཀྱི་ཡོད།

བོད་ཀྱི་སྨན་རྩིས་ཁང་དབུ་བརྙེས་པའི་དུས་དྲན་མཛད་སྒོའི་ཐོག འགན་འཛིན་ལགས་ཀྱིས་སྨན་རྩིས་ཁང་གིས་བོད་མིའི་སྒྲིག་འཛུགས་ཀྱི་ལས་དོན་ཐོག་ལོ་རེར་ཞལ་འདེབས་སྒོར་ས་ཡ་ ༦ ནས་ ༨ བར་གནང་གི་ཡོད་པ་མ་ཟད། བོད་པའི་སྤྱི་ཚོགས་ནང་སྨན་སྦྱིན་གྱི་ལས་དོན་སྤེལ་བཞིན་ཡོད་སྐོར་བརྗོད་སོང་།

དེ་རིང་ཕྱི་ཚེས་ ༢༣ ཉིན་གྱི་ཞོགས་པའི་ཆུ་ཚོད་ ༡༠།༢༠ སྟེང་བོད་ཀྱི་སྨན་རྩིས་མཐོ་སློབ་ཚོགས་ཁང་དུ། བོད་ཀྱི་སྨན་རྩིས་ཁང་དབུ་བརྙེས་ནས་མི་ལོ་ ༥༣ འཁོར་བའི་དུས་དྲན་མཛད་སྒོ་ཚོགས་ཡོད་ཅིང་། མཛད་སྒོའི་སྐུ་མགྲོན་གཙོ་བོར་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་དང་། བོད་མིའི་སྒྲིག་འཛུཊ་ཀྱི་ཁྲིམས་ཞིབ་པ་ཆེ་ངག་དབང་འཕེལ་རྒྱལ་མཆོག་དང་ཁྲིམས་ཞིབ་པ་གཞན་གཉིས། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་དྲུང་སྟོབས་རྒྱལ་ལགས། འོས་བསྡུ་ལྷན་ཁང་གི་འགན་འཛིན། ཕྱི་དྲིལ་དང་འཕྲོད་བསྟེན་ལས་ཁུངས་ཀྱི་དྲུང་ཆེ། གཞུང་འབྲེལ་མིན་པའི་ཚོགས་པ་ཁག་གི་ཚོགས་གཙོ་དང་སྐུ་ཚབ། སྨན་རྩིས་ཁང་གི་འགན་འཛིན་གཙོས་ལས་བྱེད་དང་སློབ་མ་བཅས་མི་ ༢༠༠ ལྷག་འཛོམས་འདུག

མཛད་སྒོའི་ཐོག་མར་ཚང་མ་སྐུ་བཞེངས་ཐོག་བོད་རྒྱལ་ཁབ་དང་མི་རིཊ་ཆེད་རང་སྲོག་བློས་གཏོང་གནང་མཁན་རྒྱལ་གཅེས་དཔའ་བོ་དཔའ་མོ་འདས་གསོན་ཡོངས་ལ་གུས་འདུད་དང་ངག་བཅད་མྱ་ངན། གཡུ་ཐོག་གསོལ་འདེབས་གསུང་འདོན་བཅས་གནང་བ་དང་། སྨན་རྩིས་ཁང་གི་འགན་འཛིན་ཚེ་རིང་བཀྲ་ཤིས་ལགས་ཀྱིས་ལོ་འཁོར་ལས་བསྡོམས་སྙན་སྒྲོན་གནང་སྐབས། ༢༠༡༤ ཟླ་ ༣ ཚེས་ ༡༥ བར་སྨན་རྩིས་ཁང་དུ་ལས་བྱེད་དང་ལས་མི། སློབ་ཕྲུག་བཅས་ཁྱོན་མི་ ༧༤༢ ཡོད་པའི་ཁྲོད་སྨན་པ་ཕོ་མོ་ ༡༥༠ དང་། སྐར་རྩིས་པ་ཕོ་མོ་ ༢༡། འཛིན་སྐྱོང་ལས་བྱེད་ཕོ་མོ་ ༢༨༡ ། ལས་མི་ཕོ་མོ་ ༡༧༢ ། ཆོད་གན་སྨན་པ་ཕོ་ ༡། འཛིན་སྐྱོང་དུ་ཆོད་གན་ལས་བྱེད་ཕོ་ ༦ ། སྨན་སློབ་སྐབས་ ༡༧ དང་༡༨ ། ༡༩ བཅས་ལ་སློབ་ཕྲུག་ཕོ་མོ་ ༨༧། སྐར་རྩིས་སྐབས་དགུ་བ་དང་བཅུ་བ་གཉིས་ལ་རྩིས་སློབ་ཕོ་མོ་ ༢༤ བཅས་ཡོད་སྐོར་བརྗོད་སོང་།

ཁོང་གིས་སྨན་རྩིས་ཁང་དགེ་རྩའི་ངོ་བོའི་ཐོག་གསར་འཛུགས་གནང་སྟེ། བོད་ཀྱི་རིག་གཞུང་དང་ཤེས་རིག སྤྱི་ཚོགས་བདེ་རྩ་སོགས་ཀྱི་ཐོག་ཞབས་འདེགས་ཞུས་ཏེ་དགོས་ངེས་ཅན་ལ་སྨན་སྦྱིན་ཤུགས་ཆེར་འགྲོ་བཞིན་ཡོད་པ་དང་། ད་དུང་སྨན་སྦྱིན་ཤུགས་ཆེ་རུ་གཏོང་འཆར་ཡོད་པས་སྨན་སྦྱིན་ཡོང་ཁུངས་སྔར་ལྷག་འབད་བརྩོན་བྱེད་དགོས་ཀྱི་ཡོད་པ་དཔེར་ན། ༢༠༡༣ ལོའི་ཟླ་ ༡ ནས་ཟླ་ ༡༢ བར་གྱི་ལོ་གཅིག་རིང་སྨན་སྦྱིན་ཧིན་སྒོར་ས་ཡ་ ༢༢ ཙམ་བཏང་ཡོད་པ། གཏོང་ཡུལ་གཙོ་བོ་མི་མང་ཉམ་ཐག་དང་དགུང་ལོ་ ༦༥ ཡན་སོན་པའི་བགྲེས་སོང་། སྨན་རྩིས་ཁང་གི་ལས་བྱེད་དང་ནང་མི། བོད་མིའི་སྒྲིག་འཛུགས་ཀྱི་སྲི་ཞུ་བ། བོད་ནས་གསར་དུ་འབྱོར་མཁན། སློབ་ཕྲུག་དང་གྲྭ་བཙུན་རྣམས་པར་ཕྱེད་བཅག བར་ལམ་༧གོང་ས་མཆོག་གིས་མང་ཚོགས་ལ་གསུང་ཆོས་གནང་སར་སྨན་རྩིས་ཁང་གིས་མི་འབོར་ལ་གཞིག་ཏེ་སྨན་ཁང་འཕྲལ་འཛུགས་ཀྱིས་སྨན་སྦྱིན་གནང་གི་ཡོད་པ་མ་ཟད། ལྷག་པར་དུ་བོད་མིའི་སྒྲིག་འཛུགས་ཀྱི་ཆོས་རིག་དང་ནང་སྲིད། ཤེས་རིག འཕྲོད་བསྟེན་བཅས་ཀྱི་ལས་དོན་ཐོག་ལོ་རེར་ཞལ་འདེབས་སྒོར་ས་ཡ་ ༦ ནས་ ༨ བར་འགྲོ་བཞིན་ཡོད་སྐོར་བརྗོད་སོང་།

འགན་འཛིན་ཚེ་རིང་བཀྲ་ཤིས་ལགས་ཀྱིས་སྨན་རྩིས་ཁང་གི་རིན་ཆེན་རིལ་བུའི་སྐོར་ལ། “ རིན་ཆེན་རིལ་བུ་འདོད་པ་ཁེངས་བ་ཞིག་བཟོ་སྐྲུན་བྱེད་ཐུབ་ཀྱི་མེད་སྟབས། དགོས་ངེས་སྟངས་འཛིན་མ་བྱེད་ན་སྨན་སྦྱོར་བཟོ་སྐྲུན་མ་བྱས་པའི་སྔོན་ནད་པར་ཆད་པའི་དཀའ་ངལ་ཡོང་སྙམ་ཡོད། དེར་བརྟེན། རིན་ཆེན་རིལ་བུའི་འགྲོ་སྟངས་ནད་པའི་ཆེད་དུ་བརྟག་དཔྱད་གནས་བབ་ཇི་ཙམ་དགོས་ཀྱང་དགོས་དབང་ཆ་ཚང་ཡོད་ལ། ནད་པའི་ཆེད་དུ་སྨན་པ་སོ་སོས་འདོད་པ་ཚིམ་པ་གནང་གི་ཡོད། ལྷག་པར་དུ་བཞུགས་སྒར་དང་གཞིས་ཆགས་ཆེ་ཁག་གི་སྨན་ཁང་རྣམས་ལ་ཚོང་བསྒྱུར་བྱ་བར་ཐོ་བགོས་བགོ་འགྲེམས་བྱེད་བཞིན་ཡོད། ཉོ་མཁན་ཚོར་འདོད་པ་ཚིམ་པའི་གྲངས་འབོར་ཐོབ་ཀྱི་མེད་ཀྱང་། སྨན་ཁང་ཁག་ཏུ་རིན་ཆེན་རིལ་བུ་རྩ་ཆད་མི་འགྲོ་ཆེད་ཐབས་ལམ་དེ་དག་སྤྱོད་ཀྱི་ཡོད། སྤྱི་ཚོགས་ནང་སྒེར་བས་རིན་ཆེན་རིལ་བུ་མང་པོ་བཟོ་སྐྲུན་ཐུབ་སར་སྨན་རྩིས་ཁང་གིས་བཟོ་སྐྲུན་མ་ཐུབ་པ་གང་ཡིན་གྱི་བསམ་འཆར་ཡོང་གི་ཡོད། སྨན་རྩིས་ཁང་ལ་དུས་ནས་དུས་སུ་གཟིམ་ཆུང་ནས་གསོལ་རས་གནང་གི་ཡོད་པ་དང་བོད་ནས་ཕེབས་མཁན་དགེ་བའི་བསམ་བློ་ཡོད་མཁན་ཚོས་ཀྱང་རིན་ཆེན་རིལ་བུའི་རྒྱུ་ཆ་ཞལ་འདེབས་ཕུལ་བ་དང་། གཞན་སྨན་རྩིས་ཁང་གི་སྡེ་ཚན་མང་པོས་ས་གནས་གང་སར་རིན་ཆེན་རིལ་བུའི་རྒྱུ་ཆ་བསྒྲུབ་ཐབས་འབད་བརྩོན་བྱེད་བཞིན་ཡོད། རིན་ཆེན་རིལ་བུའི་རྒྱུ་ཆ་ཉོ་རྒྱུ་སྨན་རྩིས་ཁང་ལ་དཔལ་འབྱོར་གྱི་དཀའ་ངལ་མེད་པ་དང་དེའི་ཐོག་རིན་ཆེན་རིལ་བུའི་རྒྱུ་ཆ་མ་འདང་པའི་རྐྱེན་གྱིས་བཟོ་སྐྲུན་བྱེད་ཐུབ་ཀྱི་མི་འདུག་ཅེས་བརྗོད་ཀྱི་འདུག གལ་ཏེ། རིན་ཆེན་རིལ་བུ་འདོད་པར་ལྟར་བཟོ་སྐྲུན་ཐུབ་ན་ནད་པར་གཏོང་རྒྱུ་ཙམ་མིན་པར་ཚོང་བསྒྱུར་དཀའ་ངལ་མེད་པར་ཡོང་བར་བྱ་རྒྱུ་ཡིན། བློ་ཕམ་གྱི་གནས་ཚུལ་ཞིག་ལ་སྨན་རྩིས་ཁང་གི་མཚན་བྱང་ཐོག་ནས་རིན་ཆེན་རིལ་བུ་རྫུན་མ་ཞིག་ཐོན་ཏེ་བལ་ཡུལ་གྱི་རྒྱལ་ས་དང་ཨུ་རུ་སུ། ཕྱི་སོག བོད་བཅས་སུ་རིན་གོང་མཐོན་པོར་འཚོང་བཞིན་ཡོད་སྟབས། རིན་ཆེན་རིལ་བུ་རྫུན་མ་བཟོ་མཁན་བཙལ་འཚོལ་ཐུབ་ཚེ་ས་གནས་སུ་ཁྲིམས་གཏུག་བྱེད་རྒྱུ་ཡིན། ” ཞེས་བརྗོད་སོང་།

དེའི་རྗེས་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གིས་སྨན་རྩིས་ཁང་གི་སྨན་པ་དཀའ་བཅུ་པ་རྣམས་ལ་སྨན་རམས་པ་དང་། སྐབས་ ༡༦ པའི་སྨན་སློབ་རྣམས་ལ་སྨན་པ་དཀའ་བཅུ་བ། སྐབས་ ༨ པའི་རྩིས་སློབ་རྣམས་ལ་མཐར་ཕྱིན་ཕྱག་འཁྱེར་གནང་བ་མ་ཟད། སྨན་རྩིས་ཁང་ནང་ལོ་ ༢༠ དང་ ༣༠ འཁོར་བའི་སྨན་པ་དང་ལས་བྱེད་པ་རྣམས་ལ་གཟེངས་རྟགས། སྨན་སློབ་སྐབས་ ༡༧ དང་ ༡༨། རྩིས་སློབ་སྐབས་ ༩ པ་བཅས་ཀྱི་ལོ་འཁོར་རྒྱུགས་འབྲས་རྩེ་ཕུད་སློབ་མ་གསུམ་དང་། དེ་བཞིན་ལོ་རེའི་རྩེ་ཕུད་སློབ་མ་གཅིག་དང་མཐོ་སློབ་ཀྱི་སྤྱི་ཁྱབ་རྒན་བདག་བཅས་བྱ་དགའ་གནང་གནང་བ་དང་། སྨན་རྩིས་ཁང་ནས་གསར་དུ་འདོན་སྤེལ་ཞུས་པའི་ཟླ་རེའི་ཚགས་པར་༼སྨན་རྩིས་ཟླ་གསར༽ དང་སྨན་རྩིས་པ་ཨེ་པ་བསོད་ནམས་རིན་ཆེན་ལགས་ཀྱི་རྩོམ་སྒྲིག་གནང་བའི་༼བོད་རྩིས་རིག་པའི་རྣམ་བཤད་ཀུན་གསལ་ཡིད་ཀྱི་མེ་ལོང་༽། སྨན་རྩིས་ཁང་གི་ཉམས་ཞིབ་སྡེ་ཚན་ནས་ནད་གཞི་ཁག་ལ་༼བོད་སྨན་གྱིས་ཕན་བསྐྱེད་བྱུང་བའི་དཔྱད་ཁྲའི་སྙན་ཐོ༽འདོན་ཐེངས་གཉིས་པ་བཅས་ཀྱི་དཔེ་དེབ་དབུ་འབྱེད་བཅས་གནང་སོང་ལ། མཇུག་ཏུ་མཛད་སྒོ་དང་འབྲེལ་བའི་གཏམ་བཤད་ཀྱང་གནང་སོང་།

འཕྲོད་བསྟེན་བཀའ་བློན་མཆོག་གིས་གསུང་བཤད་གནང་སྐབས། འདས་པའི་ལོ་ ༥༣ རིང་སྨན་རྩིས་ཁང་གི་མི་ཐོག་རྒན་པ་ཚོས་སྐུ་ལུས་བསྐྱོན་ཏེ། ད་ཆར་མེད་པ་ནས་ཡོད་པ་དང་། ཡོད་པ་གོང་འཕེལ་གཏོང་རྒྱུར་ཚང་མས་ཕྱག་ལས་གནང་བཞིན་པ་དང་། འདས་པའི་དུས་སུ་བོད་ཀྱི་གསོ་བ་རིག་པ་གལ་ཆེན་དུ་བརྩིས་ནས་བོད་ཀྱི་སྨན་རྩིས་ཁང་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་མགོ་འཛུགས་མ་བྱས་སྔོན་དུ་མགོ་འཛུགས་གནང་སྟེ། མང་ཚོགས་ཀྱི་འཕྲོད་བསྟེན་ལ་ཕན་ནུས་ཆེན་པོ་ཐོན་ཐུབ་ཡོད་པ་མ་ཟད། ད་ཆར་འཕྲོད་བསྟེན་ལས་ཁུངས་གཙོས་བོད་མིའི་སྒྲིག་འཛུགས་སྤྱི་ཡོངས་ལ་ཕན་ཐོགས་ཆེན་པོ་ཡོང་བཞིན་པར་བསྔགས་བརྗོད་དང་། བོད་ཀྱི་གསོ་བ་རིག་པའི་ཡར་རྒྱས་ལ་མཐའ་མེད་སྟབས། མ་འོངས་པར་སྨན་རྩིས་གཉིས་ཀྱི་ཐོག་སྔར་ལྷག་ཡར་རྒྱས་གཏོང་རྒྱུ་གལ་ཆེན་ཡིན་སྐོར་གསུངས་སོང་།

གསར་འགོད་པ། ལྷ་སྐྱབས་རྒྱལ།