བོད་ཀྱི་གསོ་རིག་ཡར་རྒྱས་གཏོང་བའི་གོ་སྐབས་དམ་འཛིན་བྱེད་དགོས།

དེ་རིང་༧གོང་ས་མཆོག་གིས་སངས་རྒྱས་སྨན་བླའི་རྗེས་གནང་སྩོལ་སྐབས། བོད་ཀྱི་གསོ་བ་རིག་པའི་སྨན་པ་ཚོས་རང་དབང་ལུང་པའི་ནང་གསོ་བ་རིག་པ་ཡར་རྒྱས་གཏོང་བའི་གོ་སྐབས་དམ་འཛིན་བྱེད་དགོས་སྐོར་གསུངས་སོང་།
དེ་རིང་སྔ་དྲོའི་ཆུ་ཚོད་ ༨།༣༠ ཙམ་ལ་དྷ་ས་ཐེག་ཆེན་གཙུག་ལག་ཁང་དུ་བོད་ཀྱི་སྨན་པའི་ལྷན་ཚོགས་ཀྱིས་ཇི་ལྟར་གསོལ་འདེབས་ཞུས་པ་ལྟར། ༧གོང་ས་མཆོག་གིས་སངས་རྒྱས་སྨན་བླའི་སྒྲུབ་ཐབས་རྗེས་གནང་སྩལ་སོང་ལ། དེར་བོད་ཀྱི་སྨན་རྩིས་སྨན་པ་དང་རྩིས་པ། མཐོ་སློབ་ཀྱི་དགེ་སློབ་བཅས་དང་། དྷ་སྟེང་དང་སུ་ཇཱ་སོགས་ཀྱི་དགེ་སློབ། ཕྱི་རྒྱལ་ནང་ཆོས་དོན་གཉེར་བ། དྷ་ས་ཁུལ་གྱི་སེར་སྐྱ་མི་མང་བཅས་མི་ ༡༢༠༠༠ ཙམ་འཛོམས་འདུག
གསུང་ཆོས་དབུ་འཛུཊ་ཀྱི་ཐོག་མར་༧གོང་ས་མཆོག་གིས་བོད་ཀྱི་གསོ་བ་རིག་པ་ཡར་རྒྱས་གཏོང་བའི་གོ་སྐབས་དམ་འཛིན་བྱེད་རྒྱུ་གལ་ཆེན་ཡིན་པའི་ཐད། “ སྨན་པས་སོ་སོའི་ཤེས་ཚད་གཞི་ལ་བཞག་ནས་ཉམས་མྱོང་ཕྱོགས་བསྡོམས་དང་། རང་དབང་ལུང་པའི་ནང་དུ་གསོ་བ་རིག་པའི་རིག་གཞུང་འདྲ་མིན་གྱི་མི་སྣར་ཐུག་འཕྲད་བྱས་ཏེ། ཕན་ཚུན་གོ་བསྡུར་དང་ཉམས་མྱོང་སྤེལ་རེས་བྱེད་པའི་གོ་སྐབས་ཡག་པོ་ཡོད་པ་དམ་འཛིན་བྱེད་རྒྱུ་ཧ་ཅང་གལ་ཆེན་པོ་རེད། རྩ་བའི་ང་ཚོ་བོད་ཀྱི་གསོ་བ་རིག་པའི་རིག་གཞུང་དེ་དངོས་གནས་གཏིང་ཟབ་པོ་དང་། འཛམ་གླིང་གི་གསོ་བ་རིག་པའི་ནང་གི་ཕལ་ཆེར་སྤུས་དག་ཤོས་ཤིག་ཆགས་ཀྱི་ཡོད་པ་རེད། བོད་ལ་ཡོད་པའི་གསོ་བ་རིག་པའི་སྲོལ་རྒྱུན་རིག་གནས་དེ་ཆོས་རྒྱལ་ཁྲི་སྲོང་ལྡེའུ་བཙན་གྱི་སྐབས་སུ་བྱུང་བ་དང་། ཆོས་རྒྱལ་ཁྲི་སྲོང་ལྡེའུ་བཙན་དབུ་བཞུགས་ཐོག གསོ་བ་རིག་པའི་རིག་གནས་མི་འདྲ་བ་རྣམས་མཉམ་དུ་ཚོགས་ཏེ་རིག་གནས་ཕྱོགས་བསྡུས་བྱས་པ་ཞིག་ཁྱེད་རང་ཚོས་བཤད་ཀྱི་འདུག ད་ལྟ་དུས་རབས་ཉེར་གཅིག་ནང་བསླེབས་བསྡད་ཡོད་པ་དང་། རིག་གནས་འདྲ་མིན་བར་ཉམས་མྱོང་སྤེལ་རེས་བྱེད་པ་སོགས་མུ་མཐུད་ཡར་རྒྱས་གཏོང་བའི་གོ་སྐབས་ཡོད་པ་རེད། གོ་སྐབས་དེ་ཚོ་དམ་འཛིན་བྱེད་རྒྱུ་ཧ་ཅང་གལ་ཆེན་པོ་རེད། ”ཅེས་གསུངས་སོང་།
༧གོང་ས་མཆོག་གིས་དེང་སང་ཆོས་ཚོགས་དང་བླ་མ་འགའ་ཤས་ཀྱིས་དཔལ་འབྱོར་ཁོ་ན་དོན་དུ་གཉེར་བཞིན་པ་ཡག་པོ་མིན་པའི་ཐད། “ཆོས་འབྲེལ་རྒྱས་བསྡུས་ག་འདྲ་བྱས་པ་ཡིན་ནའང་། ཀུན་སློང་རྣམ་པར་དག་པ་ཞིག་དགོས་ཀྱི་ཡོད་པ་རེད། ཆོས་འཆད་པ་པོའི་ངོས་ནས་བསམ་པ་རྣམ་པར་དག་པའི་ཐོག་ནས་བཤད་རྒྱུ་རེད་མ་གཏོགས། འཇིག་རྟེན་ཆོས་བརྒྱད་ཀྱི་བསམ་བློ་དང་འདྲེས་ཏེ་མཁས་འདོད་དང་གྲགས་འདོད། ལྷག་པར་དུ་དེང་སང་ཆོས་ཚོགས་ཀྱི་གྲས་སུ་དངུལ་གཙོ་བོ་དོན་དུ་གཉེར་མཁན་འདུག དེ་ཚོ་ཧ་ལས་པའི་ཞབས་འདྲེན་རེད། བླ་མའི་མིང་ཐོགས་པའི་གྲས་མང་པོ་ཞིག་གིས་ཕལ་ཆེར་ཆོས་ཀྱི་ཚོང་རྒྱག་གི་ཡོད་པ་འདྲ་བོ་འདུག བོད་ནང་དུ་ཡོད་པའི་ངའི་ངོ་ཤེས་བླ་མ་ཞིག་གིས་དམ་བཅའ་གསུམ་བཞག་འདུག དམ་བཅའ་དང་པོ་བོད་ནང་ནམ་རྒྱུན་རྟ་ཞོན་གྱི་ཡོད་པས་རྟ་མི་ཞོན་པ་དང་། གཉིས་པ་ཤ་མི་བཟའ་བ། གསུམ་པ་ཆོས་ཀྱི་ཚོང་མི་རྒྱག་པ་བཅས་ཀྱི་དམ་བཅའ་བཞག་འདུག བོད་ནང་ལའང་ཆོས་ཀྱི་ཚོང་རྒྱག་མཁན་ཡོང་གི་ཡོད་སྟབས། སྐྱེས་བུ་དམ་པ་ཁོང་ལྟ་བུས་ཆེད་དུ་གཉེར་ནས་ཆོས་ཀྱི་ཚོང་མི་རྒྱག་པའི་དམ་བཅའ་བཞག་འདུག གང་ལྟར་བླ་མའི་ངོས་ནས་གྲགས་པ་དོན་དུ་གཉེར་བ་དང་ཆོས་ཚོང་བརྒྱབ་པ་ཡིན་ན། ཕྱི་ནས་བལྟས་ན་ཆོས་བྱེད་ཀྱི་ཡོད་ཀྱང་དོན་དུ་སྡིགས་པ་གསོག་གི་ཡོད་པ་རེད། དེ་བཞིན། སློབ་མས་ཀྱང་བསམ་པ་རྣམ་དག་བྱས་ནས་ཆོས་ཉན་དགོས་པ་རེད། ནང་པ་སངས་རྒྱས་པའི་སྐྱབས་གནས་སངས་རྒྱས་དང་ཆོས། དགེ་འདུན་གསུམ་ཤེས་པའི་ཐོག་ནས་དད་པ་ཐོབ་པ་ཡིན་ན། ཆོས་ཆོས་སུ་འགྲོ་བ་ཞིག་ཡོང་གི་རེད། ”ཅེས་གསུངས་བྱུང་།
མཇུག་ཏུ་༧གོང་ས་མཆོག་གིས་འབའ་བ་ཕུན་ཚོགས་དབང་རྒྱལ་ལགས་སྐུ་གྲོངས་བའི་སྐོར་ལ་གསུངས་དོན། “འབའ་བ་ཕུན་ཚོགས་དབང་རྒྱལ་ལགས་ངེད་གཉིས་ཕྱི་ལོ་ ༡༩༥༡ ཙམ་ནས་ངོ་ཤེས་པ་ཡིན། ཁོང་ལ་ཆ་བཞག་ན། ལྟ་གྲུབ་ཀྱི་ཆ་ནས་མཱ་ཁེ་སིའི་ལྟ་གྲུབ་འཛིན་མཁན་ཞིག་དང་། བོད་མི་རིགས་ཀྱི་ལར་ཞེན་ཧ་ལས་པ་ཡོད་པ་རེད། བོད་མི་རིགས་ཀྱི་ལར་ཞེན་ཆེ་དྲག་པའི་རྐྱེན་གྱིས་ཕྱིས་སུ་ཁོང་བཙོན་ཁང་དུ་འགྲོ་དགོས་བྱུང་བ་རེད། གང་ལྟར་ཕུན་ཚོགས་དབང་རྒྱལ་གྱི་མཚོན་པའི་གུང་ཁྲན་ཏང་ཡོན་ངའི་ངོ་ཤེས་པ་མང་པོ་ཞིག་ ༡༩༥༧ ཙམ་ནས་བཟུང་ལས་ཁུངས་ནས་གནས་དབྱུང་བཏང་ཡོད་པ་དང་། ཁ་ཤས་བཟང་བཙོན་དུ་བཅུག་ཡོད་པ་རེད། ཕུན་ཚོགས་དབང་རྒྱལ་ལགས་རྣམ་དཔྱོད་དང་སྙིང་སྟོབས་ལྡན་པ། མི་རིགས་ཀྱི་ཞེན་ཁོག་དང་ལྷག་བསམ་ལྡན་པ་དངོས་གནས་དྲང་གནས་བོད་མི་རིགས་ཀྱི་དཔའ་བོ་ཞིག་རེད། དེ་རིང་འདས་པོ་ཁོང་དང་། བོད་ནང་དུ་སངས་རྒྱས་ཀྱི་བསྟན་པ་དང་མི་རིགས་ཀྱི་ཐོབ་ཐང་ཆེད། འདས་གྲོངས་སུ་གྱུར་བའི་རང་ལུས་མེར་བསྲེགས་གནང་མཁན་སོགས་འདས་པོ་རྣམས་དང་། དེ་བཞིན་ནད་གཅོང་སོགས་དཀའ་ངལ་འོག་ཡོད་པ་ཚང་མའི་ཆེད་དུ་སྨོན་ལམ་ཡག་པོ་ཞིག་རྒྱོབས། ” ཞེས་གསུངས་སོང་།
གསར་འགོད་པ། པདྨ་མཚོ།