རྒྱ་གཞུང་གིས་ནགས་ཤོད་འབྲི་རུ་འབྲོང་སྣ་དགོན་པའི་དབུ་མཛད་ལ་ལོ་བཅོ་བརྒྱད་ཀྱི་བཙོན་འཇུག་ཁྲིམས་ཐག་བཅད་འདུག
ངག་དབང་ཐར་པ་ལགས་ཀྱིས་འདི་གར་གནས་ཚུལ་བཏང་འབྱོར་ལྟར་ན། རྒྱ་གཞུང་གིས་འདི་ལོའི་ཕྱི་ཟླ་ ༡ ནང་ནགས་ཤོད་འབྲི་རུ་རྫོང་འབྲོང་སྣ་དགོན་པའི་དབུ་མཛད་དང་དགོན་པའི་འགན་ཁུར་བ་ཐར་འདོད་རྒྱལ་མཚན་ལཊ་སུ། ༧གོང་ས་མཆོག་གི་སྐུ་པར་དང་བཀའ་སློབ་ཉར་བ་སོཊ་ཀྱི་ཉེས་མིང་འོག་ལོ་ ༡༨ བཙོན་འཇུག་ཁྲིམས་ཐག་བཅད་ཡོད་འདུག
གྲྭ་ཐར་འདོད་རྒྱལ་མཚན་ལགས་ནི། ༡༩༦༠ ལོར་ཕ་འབྱུང་གནས་དང་མ་ཨ་སྒྲོལ་གཉིས་ཀྱི་ཁྱིམ་དུ་སྐྱེས་པ་དང་། ཆུང་དུས་དགའ་ལྡན་དུ་ཆོས་ཞུགས་གནང་སྟེ་ནང་པའི་ཆོས་གཞུང་ལ་ཐོས་བསམ་སློབ་གཉེར་གནང་ཡོད་འདུག ༡༩༩༢ ནས་བཟུང་འབྲོང་སྣ་དགོན་པའི་དབུ་མཛད་དང་། ༡༩༩༨ ལོ་ནས་དགོན་པའི་འགན་འཁུར་བའི་ཕྱག་ལས་གནང་སྟེ་འབྲོང་སྣ་དགོན་པའི་ཤེས་ཡོན་སློབ་གསོ་དང་འདོན་རྟ་དབྱངས། ཐུན་མོང་མ་ཡིན་པའི་བྱེད་སྒོ་ཁག་བཅས་ཕྱོཊ་ཡོངས་ལ་ཐུགས་འཁུར་ཆེ་བཞེས་གནང་མཁན་ཞིག་ཡིན་སྟབས། དགོན་གྲོང་གཉིས་ཀྱིས་དད་མོས་བྱེད་སའི་མི་སྣ་ཞིག་ཆགས་ཡོད་འདུག
༡༩༦༩ ལོར་ཁོང་གི་ཡབ་འབྱུང་གནས་འབྲི་རུའི་མི་མང་གིས་ཆོས་དང་རིག་གཞུང་། རྒྱལ་ཁབ་དང་ལུང་པ་སྲུང་སྐྱོབ་ཆེད་སྐྱེས་པ་ཡོངས་རྫོགས་དམག་ལ་ཞུགས་ནས་འབྲི་རུ་རྫོང་ཐོག་ཏུ་རྒྱ་དམག་དང་འཐབ་འཁྲུག་སྐབས་ཚེ་སྲོག་ཤོར་ཡོད་འདུག་ལ། ཁོང་གི་ཨ་ཁུ་བཀྲ་ཤིས་སྲིད་ཐར་ཡང་སྐབས་དེའི་དོན་རྐྱེན་འོག་སྲོག་ཁྲིམས་ཕོག་ཏེ་ལོ་ ༡༣ རིང་བྲོལ་བྱོལ་དུ་ཕྱིན་ཡོད་པ་དང་། རྗེས་སུ་གུ་ཡངས་བཏང་སྟེ་སྲོག་ཁྲིམས་ཕྱིར་འཐེན་བྱས་ཡོད་འདུག
འབྲོང་སྣ་དགོན་བདེ་ཆེན་དཔལ་འབར་གླིང་ནི། དུས་རབས་ ༡༡ ནང་ཕྱག་བཏབ་ཡོད་པ་དང་། དུས་རབས་ཉི་ཤུའི་དཀྱིལ་དུ་རྒྱ་དམར་གྱི་བོད་ཀྱི་ཆོས་དང་རིགས་གཞུང་གཏོར་བཤིག་བྱེད་སྐབས་རྩ་གཏོར་དུ་ཕྱིན་ཡོད་འདུག རྗེས་སུ་མཁན་པོ་མཁྱེན་རབ་ཆོས་གྲགས་དང་དབུ་མཛད་བསྟན་འཛིན་དབང་ཕྱུག་སོགས་གནས་བརྟན་བགྲེས་སོང་རྣམས་ཀྱིས་དགོན་པའི་རྟེན་དང་བརྟེན་པ་སླར་གསོ་གནང་སྟེ། ད་ཆར་དགོན་པར་དགེ་འདུན་གྱི་ཞལ་གྲངས་ ༩༠ ཙམ་ཡོད་འདུག
དགོན་པ་ཞིག་གསོ་གནང་མཁན་མཁན་པོ་མཁྱེན་རབ་ཆོས་གྲགས་ལགས་ནི་ཐར་འདོད་ཀྱི་ཨ་ཁུ་ཡིན་འདུག་ལ། ཁོང་བོད་བཙན་བཟུང་མ་བྱས་གོང་འབྲོང་སྣ་དགོན་པའི་མཁན་པོ་ཡིན་པ་དང་། དུས་ཟིང་སྐབས་ལོ་ ༡༥ རིང་བཙོན་འཇུག་མནར་གཅོད་ཚད་ལས་འདས་པ་མྱངས་དགོས་བྱུང་ཡོད་འདུག
༢༠༡༣ ལོའི་ལོ་མཇུག་དང་འདི་ལོའི་ལོ་མགོར་འབྲི་རུ་རྫོང་དུ་ངོ་རྒོལ་དང་བོད་ཀྱི་རིག་གཞུང་སྲུང་སྐྱོབ་ཆེད་ལས་འགུལ་སྤེལ་བ་ལ་བརྟེན་ནས། འབྲོང་སྣ་དགོན་པའི་རིག་གནས་དགེ་རྒན་སྐལ་བཟང་དོན་གྲུབ་གཙོས་གྲྭ་བ་ཁག་ཅིག་འཛིན་བཟུང་བྱས་ཡོད་པ་མ་ཟད། སྔར་ལོའི་ལོ་མཇུག་ཏུ་འབྲོང་སྣ་དགོན་པའི་གྲྭ་ཤག་ཁག་སྔོག་བཤེར་དང་གྲྭ་ཤག་དང་དགོན་པར་སྒོ་ཐེལ་བརྒྱབས་པའི་གནས་ཚུལ་བྱུང་ཡོད་པ་དང་། ད་ཆར་ཡང་དགོན་པའི་རྒྱུན་ལྡན་གྱི་བྱེད་སྒོ་ཁག་ལ་དམ་དྲག་བྱེད་ཀྱི་ཡོད་འདུག
གསར་འགོད་པ། དོན་གོ
![Changpa nomads walk on a rugged path in Ladakh's Chushul valley [Tarushi Aswani/Al Jazeera]](https://tibettimes.net/wp-content/uploads/2026/10/Screen-Shot-2026-10-16-at-2.29.07-PM-360x180.png)
