ཨ་རིའི་འགྲོ་བ་མིའི་ཐོབ་ཐང་ལྟ་རྟོག་ཚོཊ་པས་བལ་ཡུལ་གནས་སྡོད་བོད་མི་སྐྱབས་བཅོལ་བར་འགྲོ་བ་མིའི་ཐོབ་ཐང་ཐོག་དཀའ་ངལ་འཕྲད་བཞིན་པའི་སྐོར་གྱི་སྙན་ཐོ་ཞིག་བཏོན་འདུག
འགྲོ་བ་མིའི་ཐོབ་ཐང་རྟོག་ཞིབ་ཚོགས་པའི་སྙན་ཐོའི་ནང་། དེ་སྔོན་མཉམ་འབྲེལ་རྒྱལ་ཚོཊ་སྐྱབས་བཅོལ་ལྷན་ཚོཊ་ (UNHCR) དང་བལ་ཡུལ་གཉིས་བར་ཡ་རབས་གྲོས་མཐུན་ (Gentleman’s Agreement) ཞེས་པ་ཞིག་བཞག་ཡོད་པ་དེར་བལ་ཡུལ་གཞུང་གིས་བརྩི་བཀུར་བྱས་ཏེ། བོད་མི་སྐྱབས་བཅོལ་བའི་གཞི་རྩའི་འགྲོ་བ་མིའི་ཐོབ་ཐང་ལ་སྲུང་སྐྱོབ་དང་འགན་ལེན་གནང་རྒྱུའི་འབོད་སྐུལ་ཞུས་ཡོད་པ་དང་། གྲོས་མཐུན་དེར་བོད་ནས་བྲོས་བྱོལ་ཡོང་བའི་བོད་མི་ཚོ་བལ་ཡུལ་རྒྱལ་ཁོངས་སུ་འཛུལ་རྗེས། བོད་མི་ཚོ་འཛིན་བཟུང་དང་བཀག་ཉར། རྒྱ་གཞུང་ལ་རྩིས་སྤྲོད་སོགས་མི་བྱེད་པ་མ་ཟད། བལ་ཡུལ་བརྒྱུད་རྒྱ་གར་ནང་སྐྱབས་བཅོལ་འགྲོ་བར་རོགས་རམ་གནང་རྒྱུ་ཡིན་ཞེས་བཀོད་ཡོད།
༢༠༠༣ ལོར་བལ་ཡུལ་གཞུང་གིས་བོད་མི་བྲོས་བྱོལ་བ་ ༡༨ ནས་ ༢༡ ཙམ་རྒྱ་གཞུང་ལ་རྩིས་སྤྲོད་བྱས་པ་རྒྱལ་སྤྱིའི་ཁྲིམས་རྩ་ཁྲིམས་ལ་འགལ་ཡོད། ལོ་འགའི་སྔོན་རྒྱ་ནག་དང་བལ་ཡུལ་གཉིས་ཀྱི་སྐོར་སྲུང་འབྲེལ་ལམ་དམ་ཟབ་ཕྱིན་ཏེ་ས་མཚམས་དམ་སྲུང་བྱས་སྟབས། བོད་ནས་བྲོས་བྱོལ་དུ་ཡོང་མཁན་ཉུང་དུ་ཕྱིན་ཡོད་པ་དང་། ༢༠༠༨ ལོའི་ཡར་སྔོན་དུ་ལོ་རེར་བྲོས་བྱོལ་བོད་མི་ ༢༠༠༠ ལྷག་བརྒལ་བ་ཡོང་གི་ཡོད་པ་དང་། ༢༠༡༣ ལོར་བྲོས་བྱོལ་བོད་མི་ ༡༧༡ ཟིན་གྱི་མེད་ཚུལ་སོགས་བཀོད་འདུག
བོད་མི་བྲོས་བྱོལ་བ་རྒྱ་ནག་ལ་རྩིས་སྤྲོད་བྱས་ཡོད་མེད་ཀྱི་སྐོར་ལ་བལ་ཡུལ་ནང་སྲིད་ལྷན་ཁང་གི་མགྲིན་ཚབ་པས་གསར་ལམ་དུ། “ བལ་ཡུལ་ནང་ཕྱིར་འབུད་བྱས་བྱུང་མྱོང་མེད་ལ། དེ་འདྲའི་སྲིད་བྱུས་ཀྱང་མེད ” ཅེས་བརྗོད་པ་མ་ཟད། བལ་ཡུལ་གཞུང་གིས་སྐྱབས་བཅོལ་བ་ཚོ་འགྲོ་བ་མིའི་བདེ་རྩའི་ངོ་བོའི་ཐོག་ལྟ་སྐྱོང་བྱེད་ཀྱི་ཡོད་སྟབས། རྒྱལ་ཁབ་གང་གིས་ཀྱང་གནོན་ཤུགས་བསླེབས་མེད་ཚུལ་བརྗོད་འདུག
སྙན་ཐོའི་ནང་དེང་སྐབས་བལ་ཡུལ་གཞུང་གིས་བོད་མི་སྐྱབས་བཅོལ་བར་ཁྲིམས་མཐུན་གྱི་ཡིག་ཆ་ཚད་ལྡན་ཞིག་སྤྲོད་ཀྱི་མེད་སྟབས། བྱིས་པ་སློབ་གྲྭ་གཏོང་བ་དང་ཚོང་ལས་གཉེར་བ། ཕྱི་རྒྱལ་དུ་འགྲོ་སྐྱོད་སོགས་ལ་དཀའ་ངལ་འཕྲད་ཀྱི་ཡོད་པ་མ་ཟད། ཉེན་རྟོག་པ་དང་སྐོར་སྲུང་དམག་མི་ཚོས་བོད་མི་ཚོ་གང་བྱུང་འཛིན་བཟུང་བྱེད་ཀྱི་ཡོད་པ་དང་། བོད་མི་ཚོར་གསུམ་བཅུ་དུས་དྲན་གཙོས་སྲིད་དོན་ལས་འགུལ་དང་ཆོས་ལུགས་ཀྱི་བྱེད་སྒོ་ཁག་ལ་བཀག་སྡོམ་ནན་བྱེད་བཞིན་ཡོད་སྐོར་བཀོད་འདུག
སྙན་ཐོ་འདིའི་ཐད་འགྲོ་བ་མིའི་ཐོབ་ཐང་ལྟ་རྟོག་ཚོགས་པའི་ཨེ་ཤ་ཡ་མངའ་ཁུལ་གྱི་འགན་འཛིན་སྐུ་ཞབས་ཨད་ཌེམ་སི་ (Brad Adams) ལགས་ཀྱིས། ༢༠༠༨ ལོར་རྒྱ་གཞུང་གིས་བོད་ནང་གདུག་རྩུབ་ཅན་གྱི་སྲིད་བྱུས་ལག་བསྟར་བྱས་པ་ནས་བཟུང་། བལ་ཡུལ་གནས་སྡོད་བོད་མི་སྐྱབས་བཅོལ་བའི་གནས་སྟངས་ཇེ་སྡུག་ཏུ་ཕྱིན་པ་མ་ཟད། བོད་མི་ཚོར་མི་རིགས་དབྱེ་འབྱེད་ཀྱི་རྣམ་པ་མངོན་གསལ་ཡིན་པ་དང་ཞེས་བརྗོད་འདུག
འགྲོ་བ་མིའི་ཐོབ་ཐང་ལྟ་རྟོག་ཚོགས་པས་སྙན་ཐོ་འདི་བརྒྱུད། བལ་ཡུལ་སྲིད་གཞུང་གསར་བས་བོད་ནས་བྲོས་བྱོལ་ཡོང་མཁན་བོད་མི་སྐྱབས་བཅོལ་བར་ངོས་ལེན་གནང་རྒྱུ་དང་། བལ་ཡུལ་ནང་གི་བོད་ཚོའི་གཞི་རྩའི་སྨྲ་བརྗོད་རང་དབང་དང་འདུ་འཛོམས་རང་དབང་ལ་བཀག་སྡོམ་མི་བྱ་བའི་ཐད་རྒྱ་གཞུང་བརྡ་ལན་གསལ་བོ་སྤྲོད་དགོས་བའི་འབོད་སྐུལ་བྱས་འདུག
གསར་འགོད་པ། ལྷ་སྐྱབས་རྒྱལ།
