རྒྱ་གཞུང་གིས་ནག་ཆུ་སོག་རྫོང་ཁྲི་རྡོ་ཡུལ་ཚོའི་བོད་མི་གསུམ་འཛིན་བཟུང་བྱས་ཏེ་ད་ཆར་གར་ཡོད་མ་ཤེས་པར་ལྷག་ཡོད་འདུག
ངག་དབང་ཐར་པ་ལགས་ཀྱིས་འདི་གར་གནས་ཚུལ་མཁོ་སྤྲོད་བྱས་པ་ལྟར་ན། ཟླ་སྔོན་མའི་ཚེས་ ༢༨ ཉིན་རྒྱ་གཞུང་གིས་ཁ་པར་བརྒྱུད་བོད་དོན་དང་འབྲེལ་བའི་གནས་ཚུལ་གཏོང་རེས་བྱས་པའི་ཉེས་མིང་འོག ནག་ཆུ་སོག་རྫོང་ཁྲི་རྡོ་ཡུལ་ཚོའི་གྲོང་ཚོ་བཞི་པའི་དཔལ་ལྷ་ཚང་གི་བུ་རིན་ཆེན་དབང་འདུས་དང་། ག་འཇིག་ཚང་གི་བུ་ཕུར་ཚེ་གཉིས་འཛིན་བཟུང་བཙོན་འཇུག་བྱས་ཡོད་པ་མ་ཟད། ཉིན་དེར་ལྕགས་ཟམ་ཁར་བོད་རང་བཙན་གྱི་ཡི་གེ་འབྲི་མཁན་ཡིན་པའི་དོགས་གཞིའི་འོག དྲིལ་མདའ་དགོན་པའི་གྲྭ་ཨ་འདེ་ཟེར་བ་ཞིག་ཀྱང་འཛིན་བཟུང་བྱས་ཡོད་འདུག་ལ། ད་ཆར་ཁོང་ཚོ་གར་ཡོད་ཅི་བྱུང་གི་གནས་ཚུལ་ཅི་ཡང་མ་ཤེས་པར་ལྷག་ཡོད་འདུག
གནས་ཚུལ་མཁོ་སྤྲོད་པས་བརྗོད་དོན་ལྟར་ན། རྒྱ་ནག་གཞུང་གིས་ད་ཆར་ཡང་སོག་རྫོང་གི་སྐྱ་སེར་གཉིས་ལ་དམ་དྲག་དང་གང་བྱུང་འཛིན་བཟུང་བྱེད་ཀྱིན་པར་མ་ཟད། ཟླ་སྔོན་མའི་ཚེས་ ༡༩ ཉིན། སོག་རྫོང་དྲིལ་མདའ་དགོན་པའི་གྲྭ་ཚངས་དབྱངས་རྒྱ་མཚོ་དང་ཚེ་དབང་། ཨ་ཚེ། རྒྱལ་མཚན་བཅས་ཀློད་གྲོལ་ཆེད་ཡུལ་ཚོའི་སྲིད་གཞུང་ལ་རེ་འདུན་ཞུ་རུ་ཕྱིན་པའི་བོད་མི་ཁག་ཅིག་འཛིན་བཟུང་བྱས་ཡོད་འདུག ཚེས་ ༢༠ ཉིན་ཡུལ་ཚོའི་རྒན་རྒོན་དང་བུད་མེད་ཚང་མས་སྲིད་གཞུང་གི་མདུན་དུ་ངུ་འབོད་བྱེད་བཞིན་ཁོང་ཚོ་ཀློད་གྲོལ་གཏོང་དགོས་པའི་རེ་འདུན་ཞུ་མཐར་གྲྭ་བ་རྣམས་ཀློད་གྲོལ་བཏང་ཡོད་ཀྱང་། ས་གནས་ལས་བྱེད་དང་ཉེན་རྟོག་པས་འདྲི་རྩད་གཅར་རྡུང་བཏང་སྟེ་ཡུལ་མི་ཚོས་རེ་རེ་བཞིན་བསྐྱོར་ནས་རང་ཁྱིམ་སོ་སོར་བསྐྱལ་དགོས་བྱུང་ཡོད་འདུག
ད་ཆར་རྒྱ་གཞུང་གིས་ཁྲི་རྡོ་ཡུལ་ཚོའི་གྲོང་ཚོ་ ༡༠ ནང་ཞིབ་བཤེར་ས་ཚིགས་ ༡ ནས་ ༣ བར་བཙུགས་ཏེ་མི་མང་ལ་ཞིབ་བཤེར་དང་འདྲི་གཅོད་བྱེད་ཀྱིན་པར་མ་ཟད། ཁྲི་རྡོ་ཡུལ་ཚོ་ནས་དྲིལ་མདའ་དགོན་པའི་བར་ཞིབ་བཤེར་ས་ཚིཊ་ ༣ བཙུགས་ནས་ཞིབ་བཤེར་ནན་མོ་བྱེད་ཀྱིན་ཡོད་འདུག
གསར་འགོད་པ། དོན་གོ