ལྷོ་ཀོ་རི་ཡའི་སྨན་པ་ཞིག་གིས་ཕུང་གྲུབ་ལྷན་ཐབས་གཤག་བཅོས་བྱས་ཏེ་གྲྭ་པ་ཞིག་གི་མཚན་མ་བརྗེ་པོ་བརྒྱབ་ཡོད་འདུག
ཟླ་འདིའི་ཚེས་ ༡ ཉིན་ལྷོ་ཀོ་རི་ཡའི་བྷུ་སང་གྲོང་ཁྱེར་ ( Busan) དུ་ཡོད་པའི་ཏུང་ཨད་ཕྱི་ལུགས་གསོ་རིག་སློབ་ཆེན་ (Dong-A University) གྱི་ཕུང་གྲུབ་ལྷན་ཐབས་གཤག་བཅོས་གནང་མཁན་སྨན་རམས་པ་ཀེམ་སོ་ཁེ་ཝང་ (Dr. Kim Seok-Kwun) ལཊ་ཀྱིས། སྐྱེ་དུས་བུ་མོ་ཡིན་ཡང་ཕོའི་སྐུལ་རྒྱུའི་ལུས་བཅོས་བརྟག་ཐབས་ ( Hormone Therapy) ལ་བརྟེན་ནས་འཚོ་བ་སྐྱེལ་བཞིན་པའི་རང་ལོ་ ༣༡ ཡིན་པའི་གྲྭ་པ་ཞིག་ལ་ཆུ་ཚོད་ ༡༡ ལྷག་རིང་གཤག་བཅོས་བྱས་ཏེ་ནུས་ལྡན་ཕོ་མཚན་ཞིག་སྦྱར་ཡོད་འདུག་ལ། དེ་ནི་ཁོང་གིས་མཚན་སྦྱོར་གཤག་བཅོས་གནང་ཐེངས་ ༣༢༠ པ་དེ་ཆགས་ཡོད་འདུག
འདིའི་ཐད་སྨན་པ་ཀེམ་སོ་ཁེ་ཝང་ལགས་ཀྱིས། “ འདི་ལྟར་གཤག་བཅོས་བྱས་ན་ཆོས་ཕྱོགས་ཀྱི་ཉེས་པ་དང་རྒོལ་རྡུང་ཕོག་སྲིད་ཀྱང་། གཤག་བཅོས་མ་བྱས་པར་གཡུག་བཞག་པ་ཡིན་ན་ནད་པ་ཤི་རྒྱུ་ལས་ལྷག་མེད་སྟབས། ཆོས་ལུགས་དང་མཐུན་མིན་ལ་མ་ལྟོས་པར་ནད་བཅོས་སྲོག་སྐྱོབ་ཀྱི་གཤག་བཅོས་བྱས་པ་ཡིན། ” ཞེས་བརྗོད་འདུག
ལྷོ་ཀོ་རི་ཡའི་ཡེ་ཤུའི་ལྷན་ཚོགས་ཀྱི་ཚོགས་གཙོ་བླ་ཆེན་ཧོང་ཇཱ་ཆོལ་ (Hong Jae Chul) ལཊ་ཀྱིས། “མཚན་མ་བརྗེ་བསྒྱུར་གྱི་གཤག་བཅོས་ནི་ཆོས་ལུགས་ཁག་གི་སྟོན་པའི་བཀའ་ལུང་དང་འགལ་བའི་བྱ་སྤྱོད་ཅིག་ཡིན་སྟབས། བཀའ་ཆད་ནན་མོ་ཕོག་རྒྱུ་རེད།’’ ཅེས་བརྗོད་འདུག
༡༩༨༦ ལོར་སྨན་པ་ཀེམ་སོ་ཁེ་ཝང་ལཊ་ཀྱིས། བུད་མེད་ཀྱི་ལྭ་བ་གྱོན་པའི་མི་ཞིག་གིས་མོ་མཚན་སྦྱོར་དགོས་པའི་རེ་སྐུལ་ཐེངས་མང་ཞུས་པ་ལྟར་མཚན་སྦྱོར་གཤག་བཅོས་ཐོག་མ་གནང་ཡོད་པ་དང་། དུས་དེ་ནས་ད་བར་ལོ་ ༡༠ ནས་ ༥༠ བར་གྱི་ཕོ་མོ་ ༣༢༠ ལ་ཕུང་གྲུབ་ལྷན་ཐབས་གཤག་བཅོས་ (Plastic Surgery) བྱས་ཏེ་མཚན་མ་བརྗེ་བོ་བརྒྱབ་ཡོད་འདུག་ལ། དེ་དག་ཁྲོད་ཕོ་ ༢༡༠ མོར་བསྒྱུར་བ་དང་། མོ་ ༡༠༠ ཕོར་བསྒྱུར་ཡོད་ཅིང་། ཕོ་ནས་མོར་བསྒྱུར་བར་རིན་གོང་ཨ་སྒོར་ ༡༠༢༡༠ དང་། མོ་ནས་ཕོར་བསྒྱུར་བར་ཨ་སྒོར་ ༢༨༧༦༠ ཡིན་འདུག
ཁོང་གིས་གཤག་བཅོས་བྱས་པའི་ཁྲོད་ཀྱི་སྐད་གྲགས་ཆེ་ཤོས་ལྷོ་ཀོ་རི་ཡའི་གློག་བརྙན་འཁྲབ་སྟོན་གནང་མཁན་ལེ་ཀོང་ཡུབ་ (Lee Kyung-yeop) ཡིན་པ་དང་། ༡༩༩༥ ལོར་ལེ་ཀོང་ཡུབ་ཕོ་ནས་མོར་བསྒྱུར་ཡོད་འདུག
འཁྲབ་སྟོན་མ་ལེ་ཀོང་ཡུབ་ཀྱིས། “ ངས་མཚན་མ་བརྗེ་བསྒྱུར་གྱི་གཤག་བཅོས་མ་བྱས་པར་བསྡད་ཡོད་ཚེ་ང་ཤི་ཚར་བ་རེད། ང་རང་གི་མཚན་མ་མ་གཏོགས་གཟུགས་དབྱིབས་དང་རྣམ་འགྱུར་སོགས་བུ་མོ་ཞིག་གི་ཉམས་མངོན་གསལ་དུ་ཡོད་སྟབས། ངས་སྙིང་པོ་མེད་པའི་མི་ཚེ་ཞིག་བསྐྱལ་མ་འདོད་པར་རང་ཉིད་བུད་མེད་ཅིག་ཏུ་བསྒྱུར་བ་ཡིན། ”ཞེས་བརྗོད་འདུག
སྨན་པ་ཀེམ་སོ་ཁེ་ཝང་ལགས་ནི། ༡༩༥༣ ལོར་ལྷོ་ཀོ་རི་ཡའི་བྷུ་སང་གྲོང་ཁྱེར་གྱི་གྷེན་སང་ (Gyungsang) ས་ཁུལ་དུ་སྐྱེས་བ་དང་། གཞི་རིམ་དང་འབྲིང་རིམ་ཐོན་རྗེས་གསོ་རིག་སློབ་ཆེན་དུ་གདོང་དང་ནུ་མའི་ཕུང་གྲུབ་ལྷན་ཐབས་ཆེད་སྦྱོང་གནང་ཡོད་འདུག ༡༩༨༦ ལོར་མཚན་མ་བརྗེ་བསྒྱུར་གྱི་གཤག་བཅོས་གནང་ཡོད་པ་དང་། ད་ལྟ་ལྷོ་ཀོ་རི་ཡའི་ཏུང་ཧད་གསོ་རིག་སློབ་ཆེན་གྱི་ཕུང་གྲུབ་ལྷན་ཐབས་གཤག་བཅོས་གནང་མཁན་གྱི་ཆེད་མཁས་པ་ཞིག་ཡིན་འདུག
གསར་འགོད་པ། དོན་གྲུབ།
