རེ་དོགས་ཁྲོད་ཀྱི་ཨབ་གྷན་རྒྱལ་ཡོངས་སྲིད་འཛིན་འོས་བསྡུ།

དེ་རིང་གཟའ་སྤེན་པའི་ཉིན་ཊ་ལི་བྷན་དྲག་སྤྱོད་ཤོག་ཁག་གིས་འཇིགས་སྐུལ་བྱེད་མིན་ལ་མ་ལྟོས་པར། ཨབ་གྷན་གྱི་སྐབས་གསུམ་པའི་སྲིད་འཛིན་འོས་འདེམས་བྱས་ཡོད་པ་དང་། འོས་བསྡུ་དེར་རྒྱལ་ཡོངས་ཀྱི་མི་ས་ཡ་ ༡༣ ལྷག་གིས་ཆ་ཤས་བླངས་ཡོད་འདུག

དེ་རིང་སྔ་དྲོའི་ཆུ་ཚོད་ ༧།༣༥ ནས་ཉིན་རྒྱབ་ཆུ་ཚོད་ ༤།༠༠ བར། ཨབ་གྷན་ནང་ཉིན་བརྒྱ་དུས་གཅིག་ཏུ་རྒྱལ་ཡོངས་སྲིད་འཛིན་འོས་བསྡུ་བྱེད་མགོ་བཙུགས་ཡོད་པ་དང་། ཐེངས་འདིའི་སྲིད་འཛིན་འོས་བསྡུའི་ཁྲོད་རྒྱལ་ཁ་ཐོབ་པར་མང་མོས་འོས་བསྡུའི་བརྒྱ་ཆ་ ༥༠ ཡན་ལོན་དགོས་སྐོར་བསྒྲགས་འདུག

ཨབ་གྷན་གྱི་ནང་སྲིད་བློན་ཆེན་མོ་ཧྰ་མ་ཌི་ཨུ་མར་ (Mohammad Omar Daudzai ) ལགས་ཀྱིས། “ ཐེངས་འདིའི་འོས་བསྡུ་འདི་ལོ་རྒྱུས་ཐོག་གལ་འགངས་ཆེ་ཤོས་ཤིག་ཆགས་ཀྱི་ཡོད་སྟབས། ལྟ་སྲུང་དམག་མི་འགྲེམ་འཇོག་གིས་ཐབས་ཤེས་ཡོད་རྒུ་བཏོན་ཏེ་འོས་བསྡུའི་ས་ཚིགས་ཁག་དང་མང་ཚོགས་ཀྱི་བདེ་འཇགས་ལ་སྲུང་སྐྱོབ་བྱེད་བཞིན་ཡོད།” ཅེས་བརྗོད་འདུག

མཉམ་འབྲེལ་རྒྱལ་ཚོགས་ཀྱི་ཨབ་གྷན་འོས་བསྡུའི་རྟོག་ཞིབ་ཚོགས་གཞོན་ཎེ་ཁོ་ལཱ་སེ་ཧེ་སམ་ (Nicholas Haysom) ལགས་ཀྱིས། “ ད་བར་ཨབ་གྷན་ནང་དྲང་པོ་དྲང་བཞག་གི་འོས་བསྡུ་ཞིག་བྱུང་ཐུབ་མེད་སྟབས། ཐེངས་འདིའི་རྒྱལ་ཡོངས་སྲིད་འཛིན་འོས་བསྡུ་ཚགས་ཚུད་དྲང་བཞག་ཅིག་ཡོང་རྒྱུར་སྐུལ་འདེད་དང་རྟོག་ཞིབ་མཐིལ་ཕྱིན་བྱ་རྒྱུ་ཡིན།” ཞེས་བརྗོད་འདུག

ཨབ་གྷན་རྒྱལ་ཡོངས་སུ་མངའ་སྡེ་ཁག་ ༣༤ དང་། ཆབ་སྲིད་ཚོགས་པ་མི་འདྲ་བ་ ༡༡ ཡོད་འདུག་ལ།  སྤྱིའི་མི་འབོར་ས་ཡ་ ༢༨ ལྷག་ཡོད་པ་ལས། གདམ་བྱ་འདེམས་བྱེད་ཀྱི་ཐོབ་ཐང་ཡོད་པའི་མི་ས་ཡ་ ༢༥ ཙམ་ཡོད་ཅིང་། ཐེངས་འདིར་དེབ་སྐྱེལ་བྱས་ཡོད་པའི་མི་ས་ཡ་ ༡༣ ལྷག་བྱུང་ཡོད་འདུག

དེ་དག་ཁྲོད་ལོ་ ༡༨ ནས་ ༤༠ བར་གྱི་བརྒྱ་ཆ་ ༥༠ ཟིན་ཡོད་པ་དང་། ལོ་ ༡༨ ནས་ ༢༥ བར་གྱི་བརྒྱ་ཆ་ ༣༠།༥༤ ། ལོ་ ༢༦ ནས་ ༣༥ བར་གྱི་བརྒྱ་ཆ་ ༢༥།༠༦ ། ལོ་ ༣༦ ནས་ ༤༠ བར་གྱི་བརྒྱ་ཆ་ ༣༠། ལོ་ ༤༡ ནས་ ༧༠ བར་གྱིས་བརྒྱ་ཆ་ ༡༥།༠༤ ། བཅས་ཆགས་ཡོད་འདུག་ལ། འོས་བསྡུའི་སྐབས་བུ་བརྒྱ་ཆ་ ༧༥ དང་བུད་མེད་བརྒྱ་ཆ་ ༣༥ བཅས་ཆགས་ཏེ། ཨབ་གྷན་ལོ་རྒྱུས་ཐོག་འོས་བསྡུའི་དེབ་སྐྱེལ་བྱེད་མཁན་ཆེས་མང་ཤོས་ཆགས་ཡོད་འདུག

རྒྱལ་སྤྱིའི་ཁྱོན་ཡོངས་སུ་དོ་སྣང་ཤུགས་ཆེར་བྱེད་ཀྱིན་པའི་ཨབ་གྷན་གྱི་སྲིད་འཛིན་འོས་བསྡུའི་ཁྲོད་འོས་མི་ ༨ མཉམ་ཞུགས་ཡོད་འདུག་ལ། དེ་དག་ཁྲོད་མང་ཚོགས་ཀྱིས་རེ་བ་བྱེད་ཡུལ་མི་སྣ་གསུམ་ནི། ལོ་ ༥༣ ཡིན་པའི་ཨབ་གྷན་གྱི་ཕྱི་སྲིད་བློན་ཆེན་ཟུར་བ་ཨབ་དྷུ་ལཱ་ (Abdullah Abdullah) དང་། ལོ་ ༦༣ ཡིན་པའི་དཔལ་འབྱོར་བློན་ཆེན་ཟུར་པ་ཨ་ཤི་རབ་གྷ་ཧ་ཎི་ ( Ashraf Ghani)། ལོ་ ༧༠ ཡིན་པའི་ཕྱི་སྲིད་བློན་ཆེན་ཟུར་པ་ཛྷལ་མེ་ར་སོལ་ (Zalmai Rassoul) ལཊ་བཅས་ཡིན་འདུག

༢༠༠༡ ལོར་ཨ་རི་དང་ནེ་ཊོ་ ( NATO) དམག་དཔུང་གིས་ཨབ་གྷན་སྲིད་གཞུང་ལ་རྒྱབ་རོགས་གནང་སྟེ་ཊ་ལི་བྷན་དྲག་སྤྱོད་ཤོག་ཁག་ཕམ་པར་བརྒྱབ་པ་དང་། ཨ་རི་དང་ནུབ་ཕྱོགས་རྒྱལ་ཁབ་ཁག་གི་སྲུང་དམག་རོགས་སྐྱོར་འོག་ད་བར་ཨབ་གྷན་ནང་རྒྱལ་ཡོངས་འོས་བསྡུ་ཐེངས་གསུམ་བྱས་ཏེ། ཧཱ་མི་ཌི་ཀར་ཛི་ (Hamid Karzai) སྲིད་འཛིན་དུ་ཐོབ་ཡོད་འདུག ཁོས་ལོ་ ༡༢ ཙམ་ལ་སྲིད་འཛིན་འཁུར་ཡོད་ཀྱང་ཊ་ལི་བྷན་དྲག་སྤྱོད་ཤོག་ཁག་དང་ཞི་མོལ་བྱེད་མ་ཐུབ་པ་དང་ལོ་རྗེས་མར་ཨ་རིའི་སྲུང་དམག་ཨབ་གྷན་ནང་འཇོག་རྒྱུའི་གྲོས་མཐུན་ལ་མིང་རྟགས་བཀོད་མེད་སྟབས། ད་ཆ་ཨབ་གྷན་གྱི་ས་ཁུལ་ཁག་ཏུ་འཇིགས་སྐུལ་རིང་ལུགས་པས་ཉེས་མེད་མི་སེར་དང་། འོས་བསྡུའི་གནས་ཚུལ་སྤེལ་མཁན་གྱི་ཕྱི་རྒྱལ་གསར་འགོད་པ་བཅས་ལ་གང་བྱུང་མེ་མདའ་བརྒྱབ་ཏེ། ཟླ་འདིའི་ཚེས་ ༢ ཉིན་ཨེ་པེ་གསར་འགོད་པ་ཁེ་ཋེ་ལགས་དམར་གསོད་དང་། གསར་འགོད་པ་གཞན་ཞིག་རྨས་སྐྱོན་བཏང་ཡོད་འདུག

ད་ལྟ་ཨབ་གྷན་གྱི་སྲིད་འཛིན་འོས་མི་གསུམ་པོས་ཁ་གཅིག་གྲགས་ཐོག སྲིད་འཛིན་ཧཱ་མི་ཌི་ཀར་ཛི་ལགས་ཀྱིས་ལོ་རྗེས་མར་ཨ་རིའི་སྲུང་དམག་ཨབ་གྷན་ནང་འཇོག་རྒྱུའི་གྲོས་མཐུན་ལ་མིང་རྟགས་བཀོད་མེད་པ་དེར་གྲོས་ཆོད་འཇོག་རྒྱུའི་མོས་མཐུན་དང་། ལྐོག་ཟ་རུལ་སུངས་ལ་རྒོལ་རྡུང་། རྒྱལ་ཁབ་ཀྱི་བདེ་འཇགས་གོང་མཐོར་གཏོང་ཐབས་ཐད་ལངས་ཕྱོགས་གཅིག་པ་འཛིན་གྱི་ཡོད་ཀྱང་། པ་ཀི་སི་ཐན་དང་ཨབ་གྷན་གྱི་ས་མཚམས་རྩོད་རྙོག་སྐོར་ལ་ལངས་ཕྱོགས་མི་མཐུན་པ་བྱུང་བཞིན་ཡོད་འདུག

གནད་དོན་དབྱེ་ཞིབ་པ་ཚོས། ཨབ་གྷན་གྱི་སྲིད་འཛིན་འོས་བསྡུའི་ཁྲོད་ཕོ་མོ་དབྱེར་མེད་ཀྱི་ཆབ་འབངས་ས་ཡ་མང་པོས་ཆ་ཤས་ལེན་བཞིན་ཡོད་པ་དང་། རེ་བ་བྱེད་ཀྱིན་པའི་སྲིད་འཛིན་འོས་མི་དག་ཉམས་མྱོང་དང་གནའ་དེང་ཤེས་ཡོན་གྱི་ཕྱུག་པའི་མི་སྣ་ཤ་སྟག་ཡིན་སྟབས། ཁོ་ཚོ་སུར་རྒྱལ་ཁ་ཐོབ་ཀྱང་ཨབ་གྷན་ནང་སྔར་མེད་བཅོས་བསྒྱུར་ཞིག་ཡོང་ངེས་ཡིན་སྐོར་བརྗོད་འདུག

ཟླ་ ༢ ཚེས་ ༢ ཉིན་ཨབ་གྷན་ནང་རྒྱལ་ཡོངས་སྲིད་འཛིན་འོས་བསྡུ་ཁྱབ་བསྒྲགས་བྱེད་མགོ་བཙུགས་པ་ནས་བཟུང་། ཊ་ལི་བྷན་དྲག་སྤྱོད་ཤོག་ཁག་གིས་གཏོར་བཅོམ་གྱི་ལས་འགུལ་འདྲ་མིན་སྤེལ་ཏེ། ད་བར་མི་སེར་དང་ཕྱི་རྒྱལ་གྱི་དམག་མི། གསར་འགོད་པ་བཅས་ཁྱོན་མི་ ༥༦ ལྷག་དམར་གསོད་བཏང་ཡོད་སྟབས། རྒྱལ་སྤྱིའི་གནོན་ཤུགས་འོག་ཨབ་གྷན་ནང་སྲིད་བློན་ཆེན་གྱིས་འོས་བསྡུའི་ཆེད་དམག་མི་ ༡༩༥༠༠༠ དང་། ཉེན་རྟོག་པ་ ༡༠༠༠༠། དྲག་ཆས་ཉེན་རྟོག་པ་ ༤༥༠༠༠། གསང་བའི་རྟོག་ཞིབ་མི་སྣ་ ༤༠༠༠། ཉེན་འགོག་མི་སྣ་ ༨༠༠༠ བཅས་ཁྱོན་སྲུང་དམག་སུམ་འབུམ་ལྔ་ཁྲི་ཉིས་སྟོང་ ༣༥༢༠༠༠ ཆེད་གཏོང་གིས་འོས་བསྡུའི་ས་ཚིགས་ ༢༨༥༠༠ ནང་ལྟ་སྲུང་བྱེད་བཅུག་ཡོད་འདུག

རྒྱལ་ཡོངས་སྲིད་འཛིན་འོས་བསྡུ་བརྒྱུད་ཨབ་གྷན་ནང་འཕྲད་བཞིན་པའི་དཀའ་རྙོག་བཞི་སེལ་དགོས་ཀྱི་ཡོད་པ་ལས་དང་པོ། ཨ་རིའི་དམག་དཔུང་ཨབ་གྷན་ནང་འཇོག་རྒྱུར་གྲོས་ཆོད་འཇོག་རྒྱུ་དང་། གཉིས་པ། ཊ་ལི་བྷན་དྲག་སྤྱོད་ཤོག་ཁག་དང་ཞི་མོལ་གནང་རྒྱུ། གསུམ་པ། ཨབ་གྷན་གྱི་ཤེས་ཡོན་དང་དཔལ་འབྱོར་གོང་འཕེལ་གཏོང་རྒྱུ། བཞི་བ། རང་ཁ་རང་གསོ་ཡོང་ཐབས་བྱས་ཏེ་རྒྱལ་ཁབ་འཕེལ་རྒྱས་གཏོང་རྒྱུ་བཅས་ཡིན་འདུག

ཐེངས་འདིའི་འོས་བསྡུའི་ཐད་ཨ་རི་གཙོས་ནུབ་ཕྱོགས་རྒྱལ་ཁབ་ཁག་གིས་ཨ་སྒོར་ས་ཡ་ ༡༢༦ ཞལ་འདེབས་ཕུལ་ཏེ། མཐུན་གྲོགས་རྒྱལ་ཁབ་ཅིག་ཏུ་འགྱུར་ཐབས་བྱེད་ཀྱིན་ཡོད་པ་མ་ཟད། རྒྱ་གར་གཞུང་གིས་དམག་སྦྱོང་དང་དངུལ་བུན་ཕོན་ཆེན་སྤྲད་དེ་མནའ་མཐུན་རྒྱལ་ཁབ་ཅིག་ཏུ་འགྱུར་ཐབས་དང་། རྒྱ་ནག་གིས་འོས་སྒམ་དང་འོས་བསྡུའི་མཁོ་ཆས་འདྲ་མིན་སྤྲད་དེ་ཚོང་འབྲེལ་བྱེད་སའི་རྒྱལ་ཁབ་ཅིག་ཆགས་རྒྱུར་འབད་བརྩོན་དང་། པ་ཀི་སི་ཐན་གྱིས་རམ་འདེགས་དམག་མི་བཏང་སྟེ་ས་མཚམས་སྲུང་སྐྱོབ་བཅས་བྱས་འདུག

གནད་དོན་འདིའི་ཐད། རྒྱ་གར་གཞུང་གི་ཨབ་གྷན་དང་པ་ཀི་སི་ཐན་གྱི་དམིགས་བསལ་སྐུ་ཚབ་སྐུ་ཞབས་ལམ་བྷ་ (S K Lambah) ལགས་ཀྱིས། “ ཨ་རིའི་གཞུང་གིས་ཨབ་གྷན་གྱི་དམག་དོན་དང་ཆབ་སྲིད་ཐོག་ཐེ་ཇུས་བྱེད་བཞིན་ཡོད་སྟབས། ང་ཚོས་ཀྱང་ཨབ་གྷན་ལ་དངུལ་བུན་དང་དམག་སྦྱོང་སྤྲད་པ་ཙམ་མིན་པར། ཆབ་སྲིད་ཐོག་འབྲེལ་ལམ་འཛུཊ་ཐབས་བྱ་རྒྱུ་གལ་ཆེན་ཆགས་ཡོད།”ཅེས་བརྗོད་འདུག

ཐེངས་འདི་ནི་ཨབ་གྷན་སྲིད་འཛིན་འོས་བསྡུ་གནང་ཐེངས་གསུམ་པ་ཡིན་པ་དང་། ཕྱི་ཟླ་ ༥ བའི་ནང་སྲིད་འཛིན་གྱི་འོས་བསྡུའི་གྲུབ་འབྲས་ཁྱབ་བསྒྲགས་བྱ་འཆར་ཡོད་འདུག

གསར་འགོད་པ། དོན་གྲུབ།