རྒྱ་ནག་གཞུང་འབྲེལ་ཀྲུང་གོའི་བོད་ལྗོངས་རླུང་འཕྲིན་དྲ་བར་གནས་ཚུལ་སྤེལ་བ་ལྟར་ན། ཟླ་འདིའི་ཚེས་ ༣ ཉིན་ལྷ་སའི་གཙུག་ལག་ཁང་དུ་ ༢༠༡༤ ལོའི་བོད་རང་སྐྱོང་ལྗོངས་བོད་བརྒྱུད་ནང་བསྟན་གྱི་དགེ་བཤེས་ལྷ་རམས་པའི་དམ་བཅའ་འཇོག་པ་དང་ལག་འཁྱེར་སྤྲོད་པའི་མཛད་སྒོ་ཞིག་ཚོགས་ཡོད་འདུག
གནས་ཚུལ་དེའི་ནང་བཀོད་དོན། གཞུང་བཀའ་པོད་ལྔའི་དགོངས་དོན་གཞིར་བྱས་པའི་ཆོས་རྩོད་དྲག་པོ་བྱས་མཐར་སེ་འབྲས་དགེ་གསུམ་བཅས་དགེ་ལུགས་པའི་དགོན་པ་གཙོ་ཁག་ནས་ཕེབས་པའི་གྲྭ་བཙུན་ ༡༠ ལ་དགེ་བཤེས་ལྷ་རམས་པའི་ཡོན་གནས་ཐོབ་འདུག
ཀྲུང་གོའི་ནང་བསྟན་མཐུན་ཚོགས་བོད་ལྗོངས་ཡན་ལག་ཚོགས་པའི་ཚོགས་གཙོ་སྒྲུབ་ཁང་ཐུབ་བསྟན་མཁས་གྲུབ་ལགས་ཀྱིས་གྲྭ་བཙུན་བཅུ་བོར་ལག་ཁྱེར་དང་བྱ་དགའ་གནང་ཞིང་། ཁོང་གིས་ལོ་འདིར་དགེ་བཤེས་ལྷ་རམས་པའི་ཡོན་གནས་ཐོབ་པའི་གྲྭ་བཙུན་རྣམ་པ་ནི་གཞུང་བཀའ་པོད་ལྔ་ལ་བྱང་ཆ་ལྡན་ཞིང་ཤེས་ཡོན་ཆེ་བ་ཤ་སྟག་ཡིན་ཞེས་གསུངས། ཞེས་བཀོད་འདུག
གནས་ཚུལ་ནང་མུ་མཐུད་དུ། ༢༠༠༥ ལོའི་དགེ་བཤེས་ལྷ་རམས་པའི་རྒྱུགས་ལེན་ལམ་ལུགས་སླར་གསོ་བྱས་པ་ནས་བཟུང་ད་ལྟའི་བར་བོད་ལྗོངས་སུ་གྲྭ་བཙུན་ ༧༤ ཡིས་དགེ་བཤེས་ལྷ་རམས་པའི་ཡོན་གནས་བླངས་ཡོད་པ་རེད། ཅེས་སོགས་བཀོད་འདུག
![Ren Quanniu said the Henan Provincial Justice Department revoked his licence over comments he made in court in a 2018 case [File: Leo Ramirez/ AFP]](https://tibettimes.net/wp-content/uploads/2025/07/Untitled-2-360x180.jpg)
བྱེད་སྒོ་འདིར་ཞུགས་མཁན་གྱི་སྐྱབས་ཡུལ་དགེ་བཤེས་རྣམ་པ་སྡུག་ཅག་རེད་ཟེར་ནས་ཞུ་རྒྱུ་གང་ཡང་མེད། ཡིན་ནའང་རྒྱ་ནག་གཞུང་གི་ཆབ་སྲིད་ཀྱི་ལག་ཆར་སྤྱོད་བཞིན་པའི་ཆོས་ཀྱི་བྱེད་སྒོ་འདིར་ངོས་ལེན་རྩ་བ་ནས་མེད་པ་མ་ཟད། མཐའ་གཅིག་ཏུ་དགག་པ་ཡོད། དེ་ལ་དོན་དག་གཉིས་ཡོད། དང་པོ། བོད་པའི་སྲོལ་རྒྱུན་གདན་ས་སེ་འབྲས་དགེ་གསུམ་གྱི་ཆོས་ཕྱོགས་ཀྱི་བྱེད་སྒོ་འདི་ལ་རྒྱ་ནག་གཞུང་གིས་ཐེ་ཇུས་བྱས་ཏེ་ལག་འཁྱེར་སྤྱོད་པ་དང་ཚོད་འཛིན་བྱེད་པ་སོགས་ལ་ངོས་ལེན་རྩ་བ་ནས་མེད། གཉིས་པ། དགེ་བཤེས་ལྷ་རམས་པའི་རྒྱུགས་གཞིར་ཞུགས་མཁན་དག་གདམ་བསྲེས་བྱེད་ཕྱོགས་དང་། སློབ་གཉེར་གྱི་བརྒྱུད་རིམ་ལ་སྟངས་འཛིན་དང་བསླབ་གཞིའི་གཞུང་ལུགས་སོགས་ལ་བཀོལ་ཇུས་བྱེད་ཀྱིན་པར་ངོ་རྒོལ་ཡོད།
སངས་རྒྱས་བསྟན་པ་རྟག་ཏུ་རྒྱས་འགྱུར་ཅིག །