སོལ་རླངས་ཕྱེད་བཅག་གི་སྲིད་བྱུས་མཚམས་བཞག་འདུག

༢༠༡༣ ལོའི་ཕྱི་ཟླ་ ༨ ནས་ ༡༢ བར་རྒྱ་གར་སོལ་རླངས་ལས་ཁུངས་ཀྱིས་དོ་བདག་གི་ཨ་ངྷར་འཛིན་བྱང་དང་དངུལ་ཁང་མ་དེབ་གཉིས་མཐུད་རྗེས། སོལ་རླངས་ཁ་གསབ་དངུལ་འབབ་སོ་སོའི་དངུལ་ཁང་མ་དེབ་བརྒྱུད་ཕྱིར་སློག་གི་ཡོད་ཀྱང་། ད་ཆར་སྲིད་བྱུས་དེ་གནས་སྐབས་རིང་མཚམས་འཇོག་བྱས་ཡོད་འདུག

སྔར་ལོའི་ཟླ་ ༡༢ ཚེས་ ༣༡ ཉིན་ནས་བཟུང་རྒྱ་གར་གཞུང་གིས་སོལ་རླངས་རྫ་མ་སྤྲོད་སྟངས་ཀྱི་སྒྲིག་གཞིར་འགྱུར་བ་བཏང་སྟེ། སོལ་རླངས་ཕྱེད་བཅག་ (Domestic Subsidised Cylinder) དང་། ཕྱེད་བཅག་མེད་པ་ (Domestic Non subsidised Cylinder) བཅས་ཁག་གཉིས་སུ་བགོས་ཡོད་པ་དང་། ཕྱེད་བཅག་ཡོད་པའི་ཁྱིམ་ཚང་དང་ཚོགས་པ་ཁག་གིས་རླངས་རྫ་རེར་ཧིན་སྒོར་ ༤༥༥ སྤྲད་དེ་ལོ་རེར་སོལ་རླངས་རྫ་མ་ ༡༡ བརྗེ་ལེན་ཆོག་པ་དང་། དེ་ལས་བརྒལ་ཚེ་དེབ་མེད་མཁན་ཚོ་དང་གཅིག་མཚུངས་ཀྱིས་རླངས་རྫ་རེར་ཧིན་སྒོར་ ༡༡༨༧ སྤྲོད་དགོས་ཀྱི་ཡོད་འདུག

རྒྱ་གར་སོལ་རླངས་སྤྲོད་མཁན་ཚོའི་ཁྲོད་མི་སྒེར་གྱི་ཁེ་ཕན་ཆེད་སོལ་རླངས་བེད་སྤྱོད་ལོག་པར་གཏོང་མཁན་མང་པོ་བྱུང་གི་ཡོད་སྟབས། སྔར་ལོའི་ཕྱི་ཟླ་ ༨ ནས་སོལ་རླངས་ཕྱེད་བཅག་གི་ཁ་གསབ་དངུལ་འབབ་ཐད་ཀར་མི་མང་གི་དངུལ་ཁང་མ་དེབ་ (Bank Account) བརྒྱུད་ནས་དོ་དག་ལ་ཕྱིར་སློག་པའི་སྲིད་བྱུས་གསར་བ་ཞིག་མགོ་འཛུགས་བྱས་ཡོད་ཅིང་། དོ་བདག་གིས་ཀྱང་སོ་སོའི་ཨ་ངྷར་འཛིན་བྱང་གི་ངོ་བཤུས་སོལ་རླངས་ལས་ཁུངས་དང་དངུལ་ཁང་གཉིས་ཀར་སྤྲད་དེ་ཕན་ཚུན་མཐུད་བཅུག་རྗེས། སོལ་རླངས་ཕྱེད་བཅག་གི་ཁ་གསབ་དངུལ་འབབ་དོ་བདག་གི་དངུལ་ཁང་མ་དེབ་ཐོག་ཕྱིར་སློག་གི་ཡོད། སྔར་ལོའི་ཕྱི་ཟླ་ ༡༢ ཚེས ༣༡ བར་ཁ་གསབ་དངུལ་འབབ་ཐད་ཀར་རག་མིན་རིགས་གཉིས་བཟོས་ཏེ། ཟླ་ལྔའི་རིང་ཨ་ངྷར་འཛིན་བྱང་མེད་པའི་རིཊ་དང་། དངུལ་ཁང་ལ་མཐུད་རྒྱག་མ་ཐུབ་མཁན་ཚོར་དུས་ཡུན་དེའི་ནང་རླངས་རྫ་རེར་ཧིན་སྒོར་ ༤༥༥ བླངས་ཡོད་པ་དང་། ཨ་ངྷར་འཛིན་བྱང་དང་དངུལ་ཁང་མ་དེབ་གཉིས་མཐུད་ཡོད་རིཊ་ལ་ཧིན་སྒོར་ ༡༡༨༧ བྱས་ཏེ་བཙོང་རྗེས། སོལ་རླངས་ཁ་གསབ་དངུལ་འབབ་དངུལ་སོ་སོའི་དངུང་ཁང་མ་དེབ་ཐོག་ཕྱིར་སློག་གི་ཡོད་འདུག

འདིའི་ཐད་བོད་མིའི་སྒྲིག་འཛུཊ་དཔལ་འབྱོར་ལས་ཁུངས་སོལ་རླངས་སྡེ་ཚན་གྱི་འགན་འཛིན་འདན་མ་ཚང་འཇམ་དབྱངས་ནོར་བུ་ལགས་སུ་བཅར་འདྲི་ཞུས་པར་ཁོང་གིས། ཁོང་ཚོས་ད་ལྟའི་བར་ཨ་ངྷར་འཛིན་བྱང་དངུལ་ཁང་ལ་མཐུད་ཡོད་མེད་བཅས་རིགས་གཉིས་སུ་བགར་ཏེ། མཐུད་མེད་མཁན་གྱི་རིཊ་ལ་རླངས་རྫ་རེར་ཧིན་སྒོར་ ༤༥༥ ལེན་གྱི་ཡོད་པ་དང་། མཐུད་ཡོད་མཁན་ཚོར་རླངས་རྫ་རེར་ཧིན་སྒོར་ ༡༢༠༠ ལྷག་ལ་བཙོང་རྗེས། སོལ་རླངས་ཕྱེད་བཅག་གི་ཁ་གསབ་དངུལ་འབབ་དངུལ་འཛིན་མ་དེབ་བརྒྱུད་ཕྱིར་སློག་ཡོང་གི་ཡོད་སྟབས། མི་མང་གི་ངོས་ནས་འདིའི་རིགས་ཤེས་རྒྱུ་གལ་ཆེན་ཡིན་པ་དང་། ལྷག་པར་དུ་སོལ་རླངས་གི་གོང་ཚད་ཟླ་རེར་འགྱུར་བ་འགྲོ་བཞིན་ཡོད་པར་དོ་སྣང་བྱ་དགོས་སྐོར་བརྗོད་བྱུང་།

ཨ་ངྷར་འཛིན་བྱང་དངུལ་ཁང་ལ་མཐུད་ཡོད་ཀྱང་ཁ་གསབ་དངུལ་རག་གི་མེད་པའི་དཀའ་ངལ་ཐད་ཁོང་གིས། དངུལ་ཁང་དང་སོལ་རླངས་ལས་ཁུངས་ལ་ཨ་ངྷར་འཛིན་བྱང་གི་ངོ་བཤུས་སྤྲད་ཚར་ཡང་། ཐད་ཀར་ཁེ་ཕན་བརྒྱུད་སྤྲོད་ (DBTL) ཟེར་བའི་ཡི་གེ་ཞིག་འབྱོར་དགོས་ཀྱི་ཡོད་པ་དང་། ཡི་གེ་མ་འབྱོར་སྔོན་ལ་སོལ་རླངས་ལས་ཁུངས་ཀྱིས་རླངས་རྫ་བཙོང་བ་ཡིན་ན་ཕྱེད་བཅག་ཁ་གསབ་དངུལ་འབབ་རེག་གི་མེད་པ་མ་ཟད། སོལ་རླངས་རྫ་མ་ལེན་སྐབས་སོལ་རླངས་ལས་ཁུངས་ཀྱིས་དོ་བདག་གི་ཨ་ངྷར་འཛིན་བྱང་དང་དངུལ་ཁང་གཉིས་མཐུད་བརྒྱབ་མི་འདུག་ཅེས་བརྡ་སྤྲད་པའི་རིགས་ལ་ཕྱེད་བཅག་ཁ་གསབ་དངུལ་འབབ་རག་གི་མེད་པ་དང་། དོ་བདག་གིས་དངུལ་ཁང་ལ་མཐུད་བརྒྱབ་ཡོད་ཚེ་མ་འོངས་པར་སྲིད་བྱུས་ཡང་བསྐྱར་ལག་བསྟར་བྱས་ན་ཁ་གསབ་དངུལ་རག་པའི་རེ་བ་ཡོད། ད་ཆར་ཕྱེད་བཅག་ཁ་གསབ་དངུལ་དངུལ་ཁང་བརྒྱུད་ཕྱིར་སློག་བྱེད་པའི་སྲིད་བྱུས་གནས་སྐབས་རིང་མཚམས་འཇོག་བྱས་ཡོད་ཅེས་སོགས་བརྗོད་བྱུང་།

གསར་འགོད་པས་ཁོང་ལ་རྒྱ་གར་གཞུང་གིས་སོལ་རླངས་ཕྱེད་བཅག་གི་ཁ་གསབ་དངུལ་མཚམས་འཇོག་བྱེད་དགོས་དོན་གང་ཡིན་དྲིས་པར། “ ད་ལོའི་ཟླ་ ༡ ཚེས ༡ ནས་བཟུང་ཨ་ངྷར་འཛིན་བྱང་དང་དངུལ་ཁང་མཐུད་ཡོད་མེད་མ་ལྟོས་པར་སོལ་རླངས་རྫ་མ་གོང་ཆེན་པོས་བཙོང་རྗེས་ཕྱེད་བཅག་ཁ་གསབ་དངུལ་འབབ་ཐད་ཀར་དོ་བདག་གི་དངུལ་དེབ་སྟེང་ཆུ་ཚོད་ ༢༤ རིང་ཕྱིར་སློག་བྱེད་པའི་སྲིད་བྱུས་ལག་བསྟར་གནང་ཡོད་ཀྱང་། ཟླ་ ༣ ཚེས་ ༡༠ ཉིན་རྒྱ་གར་དཔལ་འབྱོར་ལས་ཁུངས་ཀྱིས་འབྲེལ་ཡོད་ལས་ཁུངས་དང་དངུལ་ཁང་བཅས་ཕན་ཚུན་བར་དྲ་ལམ་ནས་དངུལ་གཏོང་ལེན་བྱེད་པར་དཀའ་ངལ་བྱུང་སྟབས། གནས་སྐབས་རིང་མཚམས་འཇོག་དང་ཞིབ་འཇུག་བྱེད་རྒྱུ་རེད། ཟླ་བ ༦ པར་རྒྱ་གར་གྱི་གཞུང་གསར་བ་སླེབ་སྐབས་ཡང་བསྐྱར་མགོ་འཛུགས་བྱེད་སྲིད་པ་རེད། ”ཅེས་བརྗོད་བྱུང་།

རྒྱ་གར་ནང་སོལ་རླངས་རྫ་མའི་རིན་གོང་འཕར་འགྲིབ་ཡང་དང་བསྐྱར་དུ་བྱུང་བཞིན་པའི་རྒྱུ་མཚན་གང་ཡིན་དྲིས་པར། “རྒྱ་གར་རང་གི་ནང་སོལ་རླངས་བརྒྱ་ཆ་ ༣༠ ཙམ་ལས་བཏོན་ཐུབ་ཀྱི་ཡོད་པ་མ་རེད། སོལ་རླངས་ཀྱི་བརྒྱ་ཆ་ ༧༠ ཨུ་རུ་སུ་དང་ཨི་རན་གཙོས་པའི་ཕྱིའི་རྒྱལ་ཁག་ནས་ནང་འདྲེན་བྱེད་ཀྱི་ཡོད་པ་རེད། དེ་ལ་ཡང་ཨ་སྒོར་སྤྲད་ནས་ཉོ་བཞིན་ཡོད་སྟབས། རྒྱལ་སྤྱིའི་ཚོང་རྭའི་ནང་ཨ་སྒོར་འཛའ་ཐང་འཕར་ཆགས་དང་། སོལ་རླངས་ལེན་སའི་རྒྱལ་ཁབ་ཁག་གི་ཆབ་སྲིད་བརྟན་བརླིང་ཡོད་མེད་བཅས་ལ་བརྟེན་ནས་རྒྱ་གར་གྱི་སོལ་རླངས་གོང་ཚད་ལ་འཕར་འགྲིབ་ཡོང་བསྡད་ཀྱི་ཡོད་པ་རེད། ” ཅེས་བརྗོད་སོང་།

གསར་འགོད་པ། ལྷ་སྐྱབས་རྒྱལ།