༧གོང་ས་མཆོག་གིས་ཉི་ཧོང་རི་ནན་ཇི་དགོན་པར་མང་ཚོཊ་ལ་བཀའ་སློབ་གནང་སྐབས། མི་ཚེ་དོན་དང་ལྡན་པ་ཞེས་པ་སོ་སོར་དངུལ་མང་པོ་ཡོད་པ་དང་མིང་སྐམ་པོ་ཡོད་པ་ཙམ་ལ་བརྩི་གི་མེད་པར། མི་ལུས་ཤིག་ཐོབ་ནས་སེམས་ལྡན་གྱི་སྤྱི་ཚོགས་ཤིག་ཏུ་སྐྱེས་ཡོད་སྟབས། གང་ཐུབ་ཀྱིས་གཞན་ལ་ཕན་ཐོཊ་ཐུབ་ན་མི་ཚེ་དོན་དང་ལྡན་པ་བྱུང་ཡོད། ཅེས་གསུངས་འདུག
ཉིན་འདི་གར་༧གོང་ས་མཆོག་གིས་ཉི་ཧོང་དུ་ཆོས་ཕྱོཊ་ཀྱི་མཛད་འཕྲིན་སྐྱོང་བཞིན་པ་ལྟར། ཁ་སང་ཚེས་ ༡༠ ཉིན་ཤི་ཆིན་མི་ཀྱོ་གཙུག་ལག་སློབ་ཆེན་གྱི་ཚོཊ་ཁང་དུ་མང་ཚོཊ་ལ་གསང་སྔཊ་སྐོར་གྱི་བཀའ་སློབ་དང་དྲི་བ་དྲིན་ལན་བཅས་གནང་ཡོད་འདུག སྐབས་དེར་༧གོང་ས་མཆོག་གིས་མཁན་སློབ་ཆོས་གསུམ་སྐབས་བོད་ལ་ནང་ཆོས་དར་ཚུལ་གྱི་བྱུང་རིམ་ངོ་སྤྲོད་དང་འབྲེལ། གསང་སྔགས་སྐོར་ལ་བཀའ་སློབ་གནང་སྐབས་ང་ཚོས་ནམ་རྒྱུན་ཤོད་སྲོལ་ལ་ཕྱི་འདུལ་བ་ནང་བྱང་སེམས། གསང་བ་གསང་སྔཊ་ཞེས་བསྟན་ཐོག་གཅིག་ལ་དེ་གསུམ་ཉམས་ལེན་བྱེད་རྒྱུ་ཤོད་ཀྱི་ཡོད། མགོན་པོ་ཀླུ་སྒྲུབ་ཀྱི་༼དབུ་མ་རིན་ཆེན་ཕྲེང་བ༽དང་༼བྱང་ཆུབ་སེམས་འགྲེལ༽བཅས་ཀྱི་ནང་བདག་གཞན་མཉམ་བརྗེས་ཀྱི་བྱང་ཆུབ་ཀྱི་སེམས་སྒོམ་རྒྱུའི་སྐོར་ལ་མང་པོ་གསུངས་ཡོད། མགོན་པོ་ཀླུ་སྒྲུབ་ཀྱིས་བཀའ་བབ་ཀྱི་བསྟན་པའི་བྱ་བ་མཛད་རྒྱུ་དེ་ཤེར་ཕྱིན་གྱི་དངོས་བསྟན་སྟོང་ཉིད་ཀྱི་རིམ་པའི་སྐོར་དེ་རྩལ་དུ་བཏོན་ཏེ་གསུང་གི་ཡོད། དེར་བརྟེན་དབུ་མའི་ལྟ་བའི་སྐོར་ལ་ཀླུ་སྒྲུབ་ཀྱིས་གསུང་ལས་ལྷག་པ་ཞིག་མེད། ཕྱི་འདུལ་བ་དང་ནང་བྱང་སེམས་ཀྱི་ཉམས་བཞེས་ཡོད་པའི་ཐོག་གསང་སྔགས་གཙོ་བོ་གསང་བ་བསྡུས་པའི་སྐོར་ལ་སྐྱེད་རིམ་སྐོར་མཛད་ཡོད་ལ་དེ་བཞིན་རྫོགས་རིམ་སྐོར་ལའང་མཛད་ཡོད། ཁོང་གི་སློབ་མ་ཨཱརྱ་དེ་བས་གསང་སྔཊ་སྐོར་མཛད་ཡོད། དེ་བཞིན་ཐེག་ཆེན་སྐོར་དབུ་མ་བཞི་བརྒྱ་པ། ཟླ་བ་གྲགས་པ་ཕྱི་འདུལ་བ་དང་ནང་བྱང་སེམས། དབུ་མ་འཇུག་པ་དང་བཞི་བརྒྱ་པའི་འགྲེལ་བ། རྩ་བ་ཤེས་རབ་ཀྱི་འགྲེལ་བ་ཚིགས་གསལ། ཀླུ་སྒྲུབ་ཡབ་སྲས་ནས་བཟུང་སྟེ་མཁན་ཆེན་ཞི་བ་འཚོའི་བར་ཕྱི་འདུལ་བ་ནང་བྱང་སེམས། གསང་བ་གསང་སྔགས་བྱས་ཏེ་ཕེབས་ཡོད། དེ་ལྟར་འདས་པའི་དུས་སུ་བོད་གངས་ཅན་གྱི་ལྗོངས་སུ་བསྟན་པ་འཛིན་སྐྱོང་སྤེལ་གསུམ་ཚད་ལྡན་གྱི་དབང་དུ་བྱས་པ་ཡིན་ན། གསུམ་ལྡན་རིག་པ་འཛིན་པ་ཞེས་པ་འདི་བྱེད་ཀྱི་ཡོད། ཅེས་སོཊ་གསུངས་ཡོད་འདུག
ཚེས་ ༩ ཉིན་རི་ནན་ཇི་དགོན་པར་ (Rinnaji Temple) ཆིབས་བསྒྱུར་གྱིས་༼བྱམས་བརྩེ་བརྒྱུད་སྙིང་སྟོབས་སྐྲུན་ཐབས༽ཞེས་པའི་བརྗོད་གཞིའི་ཐོག་བཀའ་སློབ་གནང་སྐབས་༧གོང་ས་མཆོག་གིས། ངོས་ད་ཆར་རང་ལོ་ ༧༩ བསླེབ་ཀྱི་ཡོད། ལོ་ ༡༦ ཐོག་ཆབ་སྲིད་ཀྱི་འགན་འཁྱེར་བ་རེད། དེ་ནས་དུས་ཚོད་ཀྱི་དཀའ་ངལ་ཞིག་འཕྲད་པ་རེད། གང་ལྟར་རང་དབང་བྲལ་བ་རེད། དེ་ནས་ལོ་ ༢༤ ཐོག་ལུང་པ་དང་བྲལ་བ་རེད། དཀའ་ངལ་མང་པོ་ཞིག་འཕྲད་པ་རེད། འོན་ཀྱང་། བསམ་བློ་རྒྱ་ཆེ་ས་ནས་བཏང་ན་སོ་སོའི་ལུང་པ་བྲལ་བ་རེད་དེ་འཛམ་བུ་གླིང་འདི་སོ་སོའི་ལུང་པ་རེད། ང་ཚོ་བོད་པའི་བཤད་སྲོལ་ལ། གང་སྐྱིད་ཕ་ཡུལ། སུ་བྱམས་ཕ་མ། ཞེས་བརྗོད་སྲོལ་ཡོད། བསམ་བློ་འདི་ལྟར་གཏོང་སྐབས་ད་ལྟ་འཛམ་གླིང་འདིའི་སྟེང་བསྡད་ཡོད། འཛམ་གླིང་གི་ལུང་པ་འདྲ་མིན་ལ་གྲོགས་པོ་ཧ་ཅང་མང་པོ་ཡོད། འདི་ལྟར་ངོས་ཀྱིས་མི་ཚེ་བསྐྱལ་བ་རེད། སོ་སོའི་མི་ཚེ་འདི་དོན་དང་ལྡན་པ་ཞིག་དགོས་རྒྱུ་ཧ་ཅང་གལ་ཆེན་པོ་རེད། མི་ཚེ་དོན་དང་ལྡན་པ་ཞེས་པ་སོ་སོར་དངུལ་མང་པོ་ཡོད་པ་དང་མིང་སྐམ་པོ་ཡོད་པ་ཙམ་ལ་བརྩི་ཡི་མེད། སོ་སོ་མིའི་སྐྱེ་བ་བླངས་པ་དེས་མི་ལ་རྙོག་གྲ་བཟོ་རྒྱུ་དང་བརྡབ་གསིག་གཏོང་རྒྱུའི་ཐོག་མི་ཚེ་སྐྱེལ་ན་དགོས་འདུན་མ་ཚང་བ་རེད། མི་ལུས་ཞིག་ཐོབ་ནས་སེམས་ལྡན་སྤྱི་ཚོགས་ཤིག་ནང་སྐྱེས་ཡོད་སྟབས། ང་ཚོས་གང་ཐུབ་ཀྱིས་གཞན་ལ་ཕན་ཐོགས་ཐུབ་ན་མི་ཚེ་དོན་དང་ལྡན་པ་བྱུང་ཡོད། ཅེས་གསུངས་འདུག
ཡང་གོང་ས་མཆོག་གིས། ངོས་རང་མི་སུ་ཞིག་ལ་ཐུག་ཀྱང་ཐོག་མར་མི་དེ་གང་འདྲ་ཡོད་མེད་དང་། མི་དེའི་གཞིས་ཀ་གང་འདྲ་ཡོད་མེད་བལྟ་གི་ཡོད། མི་གཤིས་སྤྱོད་བཟང་པོ་ཡོད་མཁན་ཞིག་མཐོང་ན་ལམ་སེང་སེམས་ཐག་ཉེ་པོ་ཆགས་ཀྱི་འདུག་སྟབས། རིམ་པ་དང་པོ་ང་ཚོ་ཚང་མར་གཅིག་གྱུར་གྱི་འདུ་ཤེས་དགོས་རྒྱུ་ཧ་ཅང་གལ་ཆེན་པོ་རེད། ངོས་ནམ་རྒྱུན་ང་ཚོས་འཛམ་གླིང་སྟེང་གི་མི་དུང་ཕྱུར་བདུན་ཅུ་ ཡོད་པ་རྣམས་མི་གཅིག་མཚུངས་ཡིན་པའི་འདུ་ཤེས་འཛིན་དགོས་རྒྱུ་ཧ་ཅང་གལ་ཆེན་པོ་རེད། མི་གཅིག་གྱུར་གྱི་འདུ་ཤེས་བསྟན་པ་ཡིན་ན་ང་ཚོ་དང་ཁོང་ཚོ་ཞེས་པ་ཡོང་གི་མེད། རིམ་པ་གཉིས་པའི་ཐོག་འགྲོ་སྐབས་ལུང་པ་དང་མི་རིགས། སྐད་ཡིག ཆོས་དད་མི་འདྲ་བ་སླེབ་ཡོང་གི་ཡོད། མི་རིགས་དང་སྐད་ཡིག ཆོས་དད་གཅིག་མཚུངས་ཡིན་ནའང་སྤྱི་ཚོགས་ནང་དབུལ་ཕྱུག་དང་། ཤེས་ཡོན་ཡོད་མེད་སོགས་ཀྱི་དབྱེ་བ་བསླེབ་ཀྱི་ཡོད། རིམ་པ་འདིའི་ཐོག་ཕྱིན་ན་ང་ཚོ་དང་ཁོང་ཚོ་ཞེས་པ་འདི་མང་པོ་བསླེབ་ཀྱི་ཡོད། ངོས་རང་ལ་ཆ་བཞག་ན་མི་སུ་ཞིག་ལ་ཐུག་ཀྱང་ངོས་རང་མི་ཞིག་ཡིན་པ་དང་མི་ཞིག་ལ་ཐུག་གི་ཡོད་བསམ་པ་མ་གཏོགས། ངོས་རང་ནང་པ་དང་བོད་པ་ཡིན་པའི་བསམ་བློ་གཏོང་གི་མེད། ཅེས་གསུངས་འདུག
བྱམས་བརྩེའི་ནུས་པའི་ཐོག་༧གོང་ས་མཆོག་གིས། བྱམས་བརྩེ་ཞེས་པ་འདི་ང་ཚོའི་ལུས་པོའི་གྲུབ་ཆའི་སྟེང་བྱམས་བརྩེའི་ནུས་པ་ཞིག་ཡོད། དེ་ཆོས་དང་རྣམ་དཔྱོད། ཤེས་རབ་ཀྱི་རྒྱབ་སྐྱོར་ལ་བརྟེན་ནས་བྱམས་བརྩེ་དེ་མི་གཅིག་གྱུར་གྱི་འདུ་ཤེས་ཐོག་ནས་སྤེལ་དགོས། མི་ཙམ་མ་ཟད་སྲོག་ཆགས་གཞན་ལའང་བྱམས་བརྩེ་སྤེལ་རྒྱུ་དེ་མིའི་རྣམ་དཔྱོད་ཀྱི་ནུས་པའི་ཐོག་ནས་ཡོང་ཐུབ་ཀྱི་ཡོད། དེ་ལྟ་བུའི་བྱམས་བརྩེ་མི་ཁོ་ནར་ཁྱབ་པ་ཡིན། དེ་ཆོས་དད་ཡོད་མཁན་རྐྱང་གི་སྐད་ཆ་མིན། རིགས་གཅིག་གིས་བྱམས་བརྩེ་ཞེས་པ་ཆོས་པ་ཚོས་ཉམས་ལེན་བྱེད་རྒྱུ་རེད་ཅེས་བརྗོད་མཁན་ཡོད། དམིགས་བསལ་ཆོས་ལ་དད་པ་མེད་མཁན་ཞིག་ཡིན་ཡང་བྱམས་བརྩེ་དང་འབྲེལ་བའི་ཡ་རབས་བཟང་སྤྱོད་དེ་རྒྱ་གར་གྱི་ལྟ་གྲུབ་ནང་ཧ་ལམ་ལོ་ངོ་སྟོང་ཕྲག་གསུམ་ཙམ་གོང་ནས་ཆོས་ཚང་མར་གུས་ཞབས་བྱེད་ཀྱི་ཡོད་པ་བཤད་ཡོད། རྒྱ་གར་གྱི་རྩ་ཁྲིམས་དེ་ཡང་ཆོས་ལུགས་རིས་མེད་ཀྱི་ཐོག་བཞག་ཡོད། དེར་བརྟེན། ང་ཚོ་མི་ཞིག་ཡིན་པའི་ཆ་ནས་བྱམས་བརྩེ་ཡོད་ན་བདེ་སྐྱིད་ཡོང་གི་ཡོད་པ་རེད། ཆོས་ལ་དད་པ་ཡོད་མཁན་མང་པོ་ཡོད་ཀྱང་། འཛམ་གླིང་ནང་མི་དུང་ཕྱུར་བཅུ་ལྷག་ལ་ཆོས་དད་པ་མེད། དེ་དག་ལའང་ཁྱབ་ཆེད་ཆོས་ལུགས་རིས་མེད་ཀྱི་བཟང་སྤྱོད་ཀྱི་ཐོག་ནས་འགྲོ་རྒྱུ་དེ་ཧ་ཅང་གལ་ཆེན་པོ་རེད། ཅེས་སོགས་གསུངས་ཡོད་འདུག
ཡང་ཉིན་དེར་གྲོང་ཁྱེར་ཨོ་ས་ཀའི་སེ་ཧྥི་གྷ་ཀོན་ (Siefu Gakuen Boys High School) བུའི་སློབ་གྲྭའི་དགེ་ལས་དང་སློབ་མ་ཚོར་༼གཞོན་སྐྱེས་ཚོར་རེ་བ་ཇི་ཡོད༽ཅེས་པའི་བརྗོད་གཞིའི་ཐོག་བཀའ་སློབ་གནང་སྐབས། འདས་པའི་དུས་རབས་ཉི་ཤུའི་ནང་ང་དང་ཁྱོད་ཅེས་བདག་འཛིན་བྱས་ཏེ་དུས་རབས་ཉེར་གཅིག་གི་མགོ་སྟོད་བར་འཁྲུག་རྩོད་བྱུང་ཡོད་སྟབས། དུས་རབས་ ༢༠ པའི་ནང་ལྷོད་གཡེང་དུ་ཕྱིན་པར་སྐྱོན་བརྗོད་བྱས་ཏེ་བསྡད་ན་མི་འགྲིག་པར་དུས་རབས་འདིའི་ནང་དེ་ལྟར་མི་ཡོང་བའི་འབད་བརྩོན་གནང་དགོས་པ་དང་། འདས་པའི་དུས་རབས་དེ་འཚེ་བའི་དུས་རབས་ཤིག་ཆགས་ཡོད་སྟབས། དུས་རབས་འདི་གྲོས་མོལ་གྱི་དུས་རབས་ཤིག་ཏུ་ངོས་འཛིན་གྱིས་འབད་བརྩོན་གནང་དགོས་པའི་བཀའ་སློབ་དང་། མཇུག་ཏུ་དྲི་བ་དྲིས་ལན་བཅས་གནང་ཡོད་འདུག
གསར་འགོད་པ། དོན་གོ
